एहुना 15
15
ईसू सताय अंगूर दूब
1हनते ईसू आँयग चेलाकू एचेरेय कतातेरा, “सताय अंगूर दूब ईंग हवे अरू ईंग अपांग किसाड़ हवे। 2ईंग सुदा मिनी दोहोनता अरू मेर जोःता हना नइड़ भगवान गेडगोडता#15:2 उनानी भासीरे मेर जोःता हना नइड़ भगवान गेडगोडता, हनाराः अरत ननन इया हों इदा; मेर जोःता हना नइड़ भगवान रेम देगगोडता, माःआन। अरू जोःता हना नइड़ अरू जोः लगाय कुड़गावगोडता। 3अपे एचेरे ईंग कता उदुःकेरा, हना सरवनते अपे सुदयनापे। 4अपे ईंग सुदा मिनीपे दोहोन दो ईंग अपे सुदा मिनीयिंग दोहोनता। मीटोंग नइड़, दूबरे मेर दोहोनतान दो हन मेर जोःता। हनन इया अपे हों ईंग सुदा मिनी मेरपे दोहोन दो अपे तोनोंग नपाय बुता ओरोपे एचे अवेतेरा। 5ईंग अंगूर दूब हवे अरू अपे नइड़तो हवे। ईंग हाँय सुदा अरू हाँय ईंग सुदा मिनीय दोहोनता दो, हाँय मुरुक नपाय बुताय बुता अवेता। मनदो ईंग अड़ाःकेडखन हाँय कहिसाः नपाय बुता ओरोय एचे अवेतेरा। 6तोनोंगीग ईंग सुदा मिनी मेरेय दोहोनतान दो हन अंगूरराः नइड़ इया गेडकेडखन तेके एंडागोडता अरू हना नइड़ झुरा जुवाःता। हनते होड़कू हना नइड़ मीरे हलंग जवारकेडखनकू बाल लो एंडागोडता। 7अपे ईंग सुदा मिनीपे दोहोन अरू ईंगराः सरवन इयापे जियाः दो, अपे भगवान एचेरेपे असेय हनापे पवाव जुवाःता। 8अपे नपाय बुताकेडखन मुरुक जोःओपे अदेरगोड दो अपे ईंगरिकुःआ चेलाकूपे बड़ाँःता। भगवानराः मान मरजइत नानाः अते होयाःता। 9अपांग ईंगे दुलारकेरा हनन इया अपे होयिंग दुलारकेडपेःआ। हनालगा अपे ईंग सुदा मिनीपे दोहोन अरू अपे ईंगपे अलार-दुलारगोड ञवन। 10ईंग, ईंग अपांगराः हुकुमकूनिंग मनाःता अरू हाँय सुदा ईंग अलार-दुलारगोड ञवनता, हनन इया अपे ईंगराः हुकुमकूनपे मनाः दो अपेयिंग अलार-दुलारगोड ञवनता। 11ईंग मुरुक बहालरे इदानिंगा। हनन इया अपेराः जीव हों मुरुक बनाहाल जुवाः लगा नाःआ कता अपे एचेरेयिंग कताकेरा। 12ईंगराः हुकुम ननाः हवे, ईंग अपेयिंग अलार-दुलारता। हनन इया अपे होँपे अलार-दुलार होड़ेंग। 13तोनोंगीग होड़ अनँयग सउंगताकू लगा जीवे एमे दो नाःआ अते मरंग दुलार तोनोंगीगराः कोवानेःआ। 14अपे लगायिंग एमेयता हना हुकुमपे मनाः दो, अपे ईंगरिकुःआ सउंगताकू हवे। 15तोनोंगीग बेगारी होड़ आँयगरीग मालिकराः ओंगोल मेरेय सुदीयता। हनालगा ईंग अपे नुँहू वरीते बेगारी होड़कू माःआन ओरोयिंग कतावातेडपेःआ। ईंग अपांग एचेरेयिंग अयूमकेरा, हना जमा कताकून अपेयिंग कता उदुःवाडपेःआ। हनालगा ईंग अपे ईंगरिकुःआ सउंगताकू माःआनिंग कतावापेता। 16अपे ईंग मेरपे सुनावगडिंगा। मनदो ईंग अपेयिंग सुनावकेडपेःआ अरू अपे सेनेकियानखन सगर बेला वरी दोहोनता हना नपाय बुताराः जोःओकून अदेर लगायिंग एटाःकेडपेःआ। हनाते अपे ईंगराः ञावते ईंग अपांग एचेरेपे असेय हना हाँय एमेवापेता। 17अपे अलार-दुलार होड़ेंगगोड ञवन लगा, ईंग नाःआ हुकुमकून अपे लगायिंग एमेयतना।
चउंदीसरिकुःआ होड़कूराः हिनइस-बिनइस
18चउंदीसरिकुःआ होड़कू अपेकू हिनइस-बिनइसवाता दो, हना अते मड़ंग हँकू ईंगकू हिनइस-बिनइसवातेरा। 19अपे नाःआ चउंदीसरिकुःआ होड़कूपे दोहोकुः दो चउंदीसरिकुःआ होड़कू अँननकू इया अपेकू अलार-दुलारकेःआ। मनदो अपे नाःआ चउंदीसरिकुःआ होड़कू ना लवे अरू ईंग अपे चउंदीस अते सुनावकेडखनिंग एटाःकेडपेःआ। हननलगा चउंदीसरिकुःआ होड़कू अपेकू हिनइस-बिनइसवाता।
20अपे एचेरेयिंग कतातेरा हना बड़रा अपे उहियार अगूयपे, तोनोंगीग बेगारी होड़ आँयगरीग मालिक अते मरंग मेरेय दोहोनता।#मती 10:24; लूका 6:40; एहु 13:16 हँकू ईंगकू संतावतेरा दो, अपे होंकू संतावपेता। अरू हँकू ईंगराः कताकू मनाः दो, अपेराः कता होंकू मनाःता। 21हँकुःआ होड़कू ईंगे वारकेरा हाँय मेरकू सुदीगेयता। अपे ईंगरिकुःआ हवे। हनालगा हँकू अपे सुदा नाःआ जमाकूनकू एचेयता। 22ईंग मेरिंग वेगकुःआ अरू हँकू ओरोयिंग कतावाकेकिकुः दो, हँकू एचेरे कसूरराः बोझा ओरो दोहोकुःआ। मनदो नुँहू हँकू ओरोकू कता अवेतेरा, अले मेरले कसूरगरा माःआन।
23ईंगे हिनइस-बिनइसवाता हाँय, ईंग अपांग होंय हिनइस-बिनइसवायता। 24तोनोंगीग होड़ नुँहू वरी मेरेय एचेगरा हना बुता ईंग हँकू तलारे मेरिंग एचेकेः दो, हँकू एचेरे कसूरराः बोझा ओरो होयाकुःआ। मनदो हँकू ईंग अरू ईंगराः बुताकू ञेलकेरा अरू ईंग अरू ईंग अपांग बनरकू हिनइस-बिनइसवारा। 25भगवानराः कागदरे ओजाःतो इदा हना सरवन होनोयाः लगा नाःआ इया होयाकिया;
हँकू ईंग बे अहवइरकू हिनइस-बिनइसवातेडिंगा।#सेरेंगकून 35:19; 69:4
26मनदो संघरादार, ईंग अपांग अगीते अपे एचेरेयिंग वारेयता, हाँय अपे एचेरेय वेग मेला ईंग बदीरेय कता उदुःगेता। हाँय भगवान अगीतेय वेगता हान सतायराः बिरुवा हवे। 27अपे ईंग सुदा ईंगराः सेवा बुँहड़ी वरीतेपे दोहोना। हनालगा अपे हों ईंग बदीरे हिदइतपे कता उदुः।
S'ha seleccionat:
एहुना 15: kfp
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.