मती 7

एटाः होड़कू अलोपे बदीकू

(लूका 6:37-38,41-42)

1तोनोंगीग होड़ अलोपे फड़ियावगेय, दो तोनोंगीग अपे हों ओरोय फड़ियावतेडपेःआ। 2एटाःकूपे फड़ियावता हनन इया, भगवान अपे होंय फड़ियावपेता अरू अपे सोंगगेता हनानाः तंबीते अपे लगा हों भगवान सोंगगेता।

3अपे सउंगताकूराः मेडरे चुबाः बोलोकिया हना गुंडापे ञेलतना अरू अपे अनपेराः मेडरे बोलोकिया हना चइला चिला लगा मेरपे ञेलतना? 4अपे अनपेराः मेडराः चइला मेरपे ञेलता दो, करा उड़ी अपे सउंगताकू एचेरेपे कता अवेयता, ईंग आम मेडरे बोलोकिया हना गुंडायिंग उडुंगगोडता, माःआन। 5ने पचघुचिया होड़कू, मड़ंगरे अपेराः मेडरे बोलोकिया हना चइलापे उडुंगवा। हनाते अपे सउंगताकूराः मेडरे बोलोकिया हना गुंडा उडुंग लगा नपायतेपे ञेल अवेयता।

6सुद इदा हना जिनिसकून कुतुकू एचेरे अलोपे एमेय। हँकुःआ कुतुकू तयोमरे आमकू हवाःगोडता। अरू मुतीकून सुकरीकू मड़ंगरे अलोपे तेकेगे। नाःआ इयापे एचेय दो, सुकरीकू हना मुतीकूनकू चोडगोडता।

असे, ञाम अरू टोकोःगोड ञवनपे

(लूका 11:9-13)

7अपे असेगोड ञवन दो, भगवान अपे लगाय एमेयता। ञामगोड ञवन दो, अपे पवाव जुवाःता। दुवारपे टोकोःगोड ञवन दो, भगवान अपे लगाय गीगगोडता। 8असेयता हँकुःआ होड़कू पवाःता। ञामता हँकूके पवाःता। अरू दुवारकू टोकोःगोड ञवनता हँकू लगा दुवार गीग जुवाःता।

9अपे तलारे नाःआ उड़ी अपात इदानिया जा, अनँयगरीग बेटात रुटी जोम लगाय असेय दो दिरिय एमेवायता, 10अरू हकूय असे दो बींगे एमेवायता? 11अपे कसूर होड़कू इदानपे हों अँनपे लइंकू लगा नपाय नपाय जिनिसकूनपे एमेयता। दो अपेरीग सेरमो देसरीग अपापे भगवान एचेरेकू असेयता हँकुःआ होड़कू लगा नपाय जिनिसकून चिला लगा मेरेय एमेकेःआ?

12दो जेहो सकालाः एटाः होड़कूते अपे चहाःतना हनन इया हँकू सुदापे एचेय। मोसेस एमेतेरा हना नियमकूनरे अरू भगवानराः बड़रा कता होड़कूराः कागदरे ननानाः कता इदा।

सेरमो देसराः दूर अरू नरगराः दूर

(लूका 13:24)

13लायगुःराः दुवार सकड़ अरू हना दूर रिता इदा। अरू हना दुवारतेकू बोलता हँकुःआ होड़कू मुरुक बगरा इदानकुःआ। हनालगा सेपटा दुवारते भगवानराः राइजरे बोल लगापे कुरनिसगे। 14ईंग अपे एचेरेयिंग कतायतना, सताय जीव अगी गोःकूता हना दुवार सेपटा इदा अरू हना दूररे सेन लगा सिकिसता इदा। अरू गुनमिन होड़कू हना दूरकू ञामता।

सींग दूब अरू जोःओ

(लूका 6:43-45)

15भगवानराः बड़रा लबरातेकू कतायता हँकुःआ होड़कू अते सवासितीपे दोहोन। हँकुःआ होड़कू अपे एचेरे भेड़ाकूराः भेसरेकू वेगता। मनदो हँकू सतायरे रमू बुःआकू इया इदानकुःआ। 16हँकूराः जोःओ अते अपे हँकूपे सिनहा अवेता। पोटवा दूबते लुवा जोःओ अरू पुटूस दूबते अंगूर जोःओबू गोडता जा? 17नपाय सींगते नपाय जोःओ जोःता। मनदो आडयना हना सींग दूब अते, अनाड जोःओ जोःता। 18नपाय सींग दूब आड जोःओ ओरो जोनेना अरू आडयना हना सींग दूब अते नपाय जोःओ ओरो जोनेना। 19नपाय जोःओ मेर जोःता, हना जमा सींग दूबकून रूबकेडखनकू बाल एंडागोडता। 20ननानाः इया अपे हँकुःआ होड़कू अँकूराः लूर-नवनतेपे सिनहागोडकूता।

21परबू परबू माःआनकू रगींगता, हँकू अते मुरुक बगरा होड़कू भगवानराः राइजरे ओरोकू बोलोनेना। मनदो सेरमो देसरेय दोहोनता ईंगरीग अपांग भगवानराः ओंगोल इयाकू जियाःता, हँननकुःआ होड़कू एनेकला हंडाकू बोलता। 22हना दिन मुरुक बगरा होड़कू ईंग एचेरेकू होंबरेता, “ने परबू, अले आमराः ञावते होड़कू एचेरे, दरवाःआ हना कताकून मेरले कता उदुःगतेरा, जा? अरू आमराः ञावते होड़कू अते भूतकू मेरले एचे उडुंगतेडकुःआ जा? अरू आमराः ञावते अले मुरुक मुरुक बयाव जुवाः इयाःआ बुताकून मेरले एचेगतेरा जा?” 23दो ईंग हँकुःआ होड़कू एचेरेयिंग कतायता, “ईंग अपे कहियो मेरिंग सुदीगोडपेःआ। ने बेलूर होड़कू, अपे ईंग मड़ंगतेपे सलाव जुवाः।”

कनहूनदार होड़ अरू बुयांग होड़राः कहड़ी

(लूका 6:47-49)

24“ईंगराः जमा कताय मनाःता हाँयग होड़ कनहूनदार इदानिया। हाँय चटइनरे नेवतेडखन ओड़ाःय तुलातेरा हाँयग होड़ इया इदानिया। 25दो दाः उयुःनेन अरू पुरा दाः ओड़ाःरे टपूयान अरू गड़रा घटा हों सलावनेना। मनदो हना ओड़ाः चटइन चोटरे बड़ियड़ते तुलात दोहोन अते मेर रूबगान। 26अरू ईंग बड़रा मेरेय मनाःता हाँयग होड़ बुयांग होड़ इदानिया। हाँय बेगर नेवते बितीलरे ओड़ाःय तुलातेरा हाँयग होड़ इया इदानिया। 27दो दाः उयुःनेन अरू पुरा दाः ओड़ाःरे टपूयान अरू गड़रा घटा हों सलावनेना। दो हना ओड़ाः रूब एंडायान अरू हना ओड़ाःराः कहिसाः मेर बनसावगान।”

28ईसू नियम चेडदार होड़कू इया मेरेय चेडगाड, मनदो हातपात पवावतो होड़ इयाय चेडतेरा। 29हनालगा हाँय नाःआ कता बड़राय उरियावनेन दो हँकुःआ होड़कू अयूमवाडखनकू बयावयान।

S'ha seleccionat:

मती 7: kfp

Subratllat

Comparteix

Copia