Jenesis 24
24
Mae Ebraham ne hiro khetogna mae Isak
1Mae Ebraham gne gognaro na la kueku'e farahi, eghuteuna Lord neke fablahini mana ka puhi te gnafa igre. 2Aonu mae Ebraham ne ehani nogna mae gloku te loku ranghini mana funu tifa na. Mae igne mae ihei mala reireghidi nogna glepo te gnafa teke khotodi mae Ebraham re. Mae Ebraham ne cheke eghu ka mana, “Haboni thinigu iara gne fagaglana gna nate leghudi iagho nogu cheke iara gre. 3Iara magnahaghei nigho iagho te mala nhaꞌa cheke ka nanghagna Lord God, mae ihei te fnakno kligna nei pari teu igne. Thosei hata kaisei gaꞌase agne Kenan ka kantri te au teu iara igne te mala khetogna mae thugu iara mae Isak gne. 4Nu iagho mala ke pulo ka thofno namonogu nei vikegu teu iara ra mala filoni kaisei gaꞌase jare mala khetogna mana, mae thugu iara igne.”
5Mae gloku na ne cheke eghu ka mana, “Ba, na faꞌunha eghu iara jame te tirogna mei naꞌa balugu iara agne na? Ba, iara nake hata fapulo mae thumu iagho gne ka thofno namonomu iagho na?”
6Mae Ebraham ne cheke eghu ka mana, “Theo fara. Thosei ke hata fapulo iagho jare mae thugu iara na. 7Lord, God gna kligna na neke hata fajifla ghau iara ka suga gna mae kmagu na, nei ka glosedi eghu vikegu iara re neke nhaꞌa cheke eghu ka iara, ‘Iara ginauna na tusu ari ka vikemu iagho gre namono igne.’ Eghume Lord ginauna na kuruni nogna engel na mala baubatu nigho tei posa ka namonogu iara na. Eghuteuna engel igne ginauna na togho nigho iagho mala hata iagho kaisei gaꞌase malagna mae thugu iara na jare. 8Nu jame te tirogna mei naꞌa balumu iagho na, iagho ginauna na snagla nou ka nhaꞌa cheke igne. Nu iagho mala thosei ke hata fapulo mae thugu iara na jare eghu.” 9Aonu mae gloku na ne habo lao ka thinigna mae Ebraham nogna mae funei na ne nhaꞌa cheke ka mana eigna igne.
10Aonu mae gloku na ne hata nogna nabotho kamel mae Ebraham ra nei hata balugna kmana soasopaigna nafnata glepo te keli eghu mala namha. Mana tarabana glepo igre ne tei ka namonogna mae Naho na jare ka kantri Mesopotemia. 11Kate posa lao ke kosigna namono na, mana ne fatuthuru soru kamel re rhegna khoꞌu seu na. Igne fei grafi ka vido te mala mei toho khoꞌu goro gaꞌase re.
12Mae gloku na ne tarai ne cheke eghu, “Lord, iagho nogna God nogu mae funei iara Ebraham. Togho ghau iara mala tangomana iara te filoni kaisei gaꞌase te malagna thugna mana na gognaro gne, mala keli nogu gloku iara na ka tathagna nogu mae funei na. 13Iara kegra teu ao Lord, rhegna khoꞌu seu na igne, eghuteuna rehati goro gaꞌase majaghani gna namono igne ginauna mei agne mala toho khoꞌu. 14Iara ginauna na cheke eghu ka kaisei gaꞌase majaghani na, ‘Fasoru nou botol khoꞌu na mala koꞌu iara katha vido khoꞌu.’ Aonu naꞌa ginauna na cheke eghu, ‘Koꞌu sagho, eghuteuna iara ginauna na jaola fakokhoꞌu nou kamel iagho gre eghu.’ Jame gaꞌase te eghu igne ngala te malagna nou mae gloku iagho Isak na. Uve, jame eghu tutuani glepo igre meuna, iara ginauna na lase nigho iagho te thofno kheragna fofodu nogu mae funei iara gne, ne magnahaghei toghoni mana.”
15Kate theome gnafa nga teu mae gloku gne nogna tharai na, Rebeka ne mei funugna ka namono na pala ne mei kaisei botol ka fafragna na. Rebeka gne neke thugna gaꞌase mae Betuel. Eghuteuna mae Betuel gne neke thudi nalhaꞌu ngala Milka ghe Neho. Eghuteuna mae Neho gne neke thabusigna ngala mae Ebraham. 16Rebeka gne kaisei famane gaꞌase majaghani fara. Naꞌa kaisei gaꞌase khupi kolho, theome thuru ngau kaisei mae balugna. Aonu naꞌa ne soru ka khoꞌu seu na ne toho nogna botol na neke pulo haghe.
17Mae gloku na chari ne tei ka naꞌa ne cheke eghu, “Famei katha vido khoꞌu ka botol iagho ana.”
18Rebeka ne cheke eghu, “Mae biꞌo, koꞌu sagho.” Naꞌa ghosei ne lisei soru botol na mala koꞌu mana.
19Kate koꞌu te gnafa mana na, Rebeka ne cheke eghu ka mana, “Iara ginauna na jaola hata keha khoꞌu maladi kamel gre.” Aonu naꞌa chari neke pulo neke toho fafodu botol na. Naꞌa ne eghu fabrahu ne ghilei koꞌu naba khoꞌu kamel re. 20Aonu, naꞌa ne ghosei ne tofa soru ka vido te mala koꞌu kamelire u khoꞌu teke toho naꞌa ka botol na. Gnafa teuna ke chari meke tei tohoi neu fabrahu ne ghilei koꞌu fahui kamelire. 21Mae gloku igne au kmu neu kolho ne filo neu ka naꞌa. Eigna mana magnahaghei te laseni glahula te toghoni Lord nogna thei na, ba theo.
22Kate koꞌu te gnafa kamel re, mana ne hata ne tusu lao ka Rebeka kaisei ring teke hohoro ka gol mala lilisei ka nehu na, tahugna na glima gram, nei phei khome neke hohoro la ka gol, tahu dire phei gobi gram. 23Aonu mae gloku gne ne ghusna eghu, “Iagho thugna gaꞌase mae ihei? Ba sugagna mae kmamu iagho na au keha chogho te mala thuru ghehati bongi na?”
24Naꞌa ne cheke eghu ka mana, “Iara thugna Betuel, thudi Naho ghe Milka. 25Uve, ghehati au kmana gano maladi nou kamel iagho gre, nei kaisei chogho ka suga na te mala thuru ghotilo na eghu.”
26Aonu nogna mae gloku mae Ebraham gne ne pogho soru pari ke ulugna Lord, 27ne cheke eghu, “Iara magnahaghei te cheke fakelini nanghagna Lord, nogna God nogu mae funei iara Ebraham. Iagho ne kokhoni ni fabrahu nogu mae funei iara na ne eni fabrahu unha teke chekeni iagho ka mana na. Lord, iagho batu ghau iara doglo ne mei ka sugadi vikegna nogu mae funei iara na.”
28Aonu Rebeka chari ne tei ka sugagna idogna na ne toutonu ka naꞌa eidi glepo igre. 29-30Mae Laban gne thabusigna Rebeka. Aonu mae Laban ne filodi u ring ka nehugna nei phei khome ka khamegna teure, nei Rebeka ne toutonu ka mana unha teke chekedi nogna mae gloku mae Ebraham. Aonu, mana jifla ne tei ne filodi mae igne nei nogna kamel re rhegna khoꞌu seu na. 31Mae Laban ne cheke eghu ka mana, “Mae biꞌo, Lord na la fablahi nigho iagho hi! Mei sagho mala ari ka suga na. Iagho theome tangomana te au teu agne na. Iara la kulu tarabanahi suga malamu iagho na nei jaola kaisei vido maladi nou kamel iagho re eghu.”
32Aonu nogna mae gloku mae Ebraham na ne ruma ka suga na. Mae Laban ne chekedi nogna mae glokure ne hata fadelei gobi lepo teke au ka kamel re ne fei ghedi buburu nei gano eghu. Aonu mana ne jaola ne chekedi nogna mae glokure mala hata mei keha khoꞌu ka nogna mae gloku mae Ebraham na mala titihi ghahe mana baludi mae teke mei balugna re. 33Eghuteuna mare hata gano ne mei ne lilisei ke ulugna nogna mae gloku mae Ebraham na, nu mana ne cheke ghu. “Iara gne ginauna na theome faghose ima, na ghilei toutonuni ghu iara eigna unha te meini iara gne.”
Aonu mae Laban ne cheke eghu ka mana, “Thofno keli fara, toutonu sagho.”
34Mana ne cheke eghu, “Iara gne nogna mae gloku mae Ebraham. 35Lord neke fablahini nogu mae funei iara na. Nogu mae funei iara igne mana kaisei mae dedei fara. Naugna Lord neke tusu ranghini mana kmana buluka, sipu, gol, silva, mae gloku, gaꞌase gloku, kamel nei dongki eghu. 36Sera khetogna nogu mae funei iara na naꞌa neke khaekave hi neke au nga kaisei thugna nalhaꞌu. Eghuteuna kate lehegna ginauna nogu mae funei iara igne mana ginauna nake tusu lao glepo teke khotodi mana igre ka mae thugna igne. 37-38Eghuteuna mana neke cheke faheta eghu fara ka iara, ‘Those hata kaisei gaꞌase agne ka kantri Kenan. Aheva te au teu iara igne te mala khetogna mae thugu iara na. Nu iagho mala ke pulo ka thofno namonogu nei vikegu teu iara ra mala filoni kaisei gaꞌase jare mala khetogna Isak mae thugu iara igne.’ Eghume iara neke nhaꞌa cheke leghudi nogna cheke nogu mae funei Ebraham.
39“Aonu iara neke ghusna eghu ka nogu mae funei na neku, ‘Ba, na faꞌunha eghu iara jame te tirogna mei naꞌa balugu iara agne na?’
40“Nu mana neke cheke eghu, ‘Iara kaisei mae mala leghuni chekegna Lord na. Eghuteuna mana ginauna na kuruni nogna engel na balumu iagho mala togho nigho iagho mala hata mei iagho kaisei gaꞌase malagna mae thugu iara na ka vikegna mae kmagu iara te au jare ra. 41Uve, jare na kaisei nabrou kolho te mala snagla iagho ka nhaꞌa cheke igne. Jame te tei iagho te theome snakreni mare ka iagho kaisei gaꞌase malagna mae thugu iara na, iagho ginauna na snagla nou ka nhaꞌa cheke igne.’
42“Kate mei iara ka khoꞌu seu na ginei gne, iara neke tarai eghu, ‘Lord, iagho nogna God nogu mae funei iara Ebraham, togho ghau iara mala tangomana iara te filoni kaisei gaꞌase malagna thugna mana na gognaro gne mala keli nogu gloku iara na ka tathagna nogu mae funei iara na.’ 43Filo sagho. Iara kegra teu rhegna khoꞌu seu na ao, iara ginauna na ofoni kaisei gaꞌase majaghani gna namono igne na mei toho khoꞌu agne. Iara ginauna na cheke eghu, ‘Famei katha vido khoꞌu ka botol iagho ana mala koꞌu iara,’ 44eghuteuna jame te cheke eghu naꞌa ka iara na, ‘Koꞌu sagho, iara ginauna na jaola toho khoꞌu maladi nou kamel iagho gre. Ka igne iara ginauna na laseni Lord neke vahinihi naꞌa malagna mae thugna nogu mae funei iara na teuna.’
45“Kate theome gnafa nga teu iara nogu tharai na, Rebeka ne jifla mei ka namono gne. Naꞌa pala ne mei u botol khoꞌu na ne soru ka khoꞌu seu na mala toho khoꞌu. Aonu iara ne cheke eghu ka naꞌa, ‘Famei katha vido khoꞌu ka iara.’
46“Eghuteuna naꞌa ghosei ne lisei soru botol kho'u na ne cheke eghu, ‘Mae biꞌo, koꞌu sagho. Iara ginauna na jaola hata khoꞌu maladi nou kamel iagho gre.’ Aonu kate koꞌu te gnafa iara na, naꞌa ne jaola ne hata khoꞌu maladi kamel re.
47“Iara neke ghusna eghu ka naꞌa, ‘Iagho thugna gaꞌase mae ihei?’
“Naꞌa neke cheke eghu, ‘Iara thugna Betuel. Beteul na, thudi Naho ghe Milka.’ Aonu iara neke lilisei kaisei ring ka nehugna na nei phei khome ka phei khamegna re neku.
48“Aonu iara neke pogho soru pari ne cheke fakelini Lord. Iara ne cheke fakelini Lord, naugna mana nogna God nogu mae funei iara Ebraham nei batu ghau iara ne doglo ne mei ka sugagna mae vikegna nogu mae funei iara na. Eghume gognaro na iara la filoni gaꞌase majaghani nate tolaghi thugna nogu mae funei iara na. 49Eghume te lolokeli ni ghotilo chekegna nogu mae funei iara na, ghotilo snakreni Rebeka gne mala tei balugu iara. Ne theome magnahagheni nga ghotilo nu, chekenila ghotilo ka iara eghu mala laseni iara unha nate eni iara na.”
50Mae Laban ghe mae Betuel ne cheke eghu, “Igne thofno gaoghatho neke mei funugna ka Lord, eghume ghepa theome naba te eni kaisei cheke ka puhi igne na eghu. 51Igne teu Rebeka na, hata sagho mala tei balumu mala tolaghi ka thugna nou mae funei na jateula te chekenihi Lord na eghu.”
52Kate nomhidi mae nogna gloku mae Ebraham cheke igre mana pogho soru pari ne cheke fakelini Lord. 53Aonu mana ne hata fajifla thua nafnata glalaoni silva, gol nei famane pohe teure ne tusu lao ka Rebeka. Eghuteuna mana jaola ne tufa namha te biꞌo fara sileni dire ka kheragna nei idogna teu Rebeka re. 54Ke leghudi igre mana nei mae teke mei balugna re eghu mare ne ima nei koꞌu neu ne thuru jare bongi tuana.
Kate dofra haghe mare hamerane boibongi ka keha narane na, mana ne cheke eghu ka naiknogna suga na, “Ghotilo snakre ghau iara mala ke pulo iara ka nogu mae funei na.”
55Nu kheragna nei idogna teu Rebeka re ne cheke eghu, “Ghepa magnahagheini Rebeka gne te au lao ghu balumi nabagna nabotho narane. Ke leghugna igne ame tangomana nga naꞌa te tei ghotilo na eghu.”
56Nu mana ne cheke eghu ka repa, “Thosei tore ghau iara te mala au faraugha agne na. Naugna Lord na la fakelinihi nogu gloku iara na. Iara magnahaghei teke pulo ka nogu mae funei na.”
57Idogna nei kheragna teu Rebeka re ne cheke eghu, “Tahati na ehani Rebeka mala ghusnani naꞌa unha te magnahagheni naꞌa na.”
58Aonu mare ne ehani naꞌa ne ghusna eghu, “Ba, iagho magnahaghei te tei balugna mae igne?”
Naꞌa ne cheke eghu, “Uve, iara ginau tei.”
59Aonu mare ne snakreni Rebeka ne tei balugna mana nei keha mae teke mei balugnare eghu. Mare ne kuru teini kaisei gaꞌase mala loku ihei teke reireghini na funu suagna na mala tei balugna. 60Kate namo jifla kokoni naꞌa namono na tharaknagna Rebeka re ne fablahini naꞌa, ne cheke eghu,
“Gregaguo, iagho ginauna mala idodi thogha naikno ka nauthoglu igne.
Eghuteuna vikemu iagho re ginauna na tapla sorudi mae naokare,
nei na hata nodi namonore eghu.”
61Aonu Rebeka nei nogna gaꞌase gloku re eghu ne gnokro ka kamel re ne tei baludi mare.
62Ka narane igne mae Isak neke jifla ka glokha khoꞌu te kiloi Bae Lahai Roi, gaoghathogna na, “Nogna glokha khoꞌu God mae ihei te karha nei filo mei koba ka iara.” Mana neke pulo ka namono gna mae kmagna na Negev. 63Kaisei grafi mana ne tei ka vido sare te theo naiknogna na, aonu mana ne filo laodi keha kamel ne mei ke ulugna mana. 64Rebeka ne filoni mae Isak ne krofu soru ka kamel na. 65Naꞌa ne ghusna eghu ka nogna mae gloku mae Ebraham na, “Ihei si nanghagna na mae te nolo te mei ka tahati ana ia?”
Mae gloku na ne cheke eghu ka naꞌa, “Tuana ngala thugna nogu mae funei iara na.” Aonu Rebeka ne toku tafru tathagna nei foflogna teure ka pohe na.
66Aonu kate mei mare te posa ka mae Isak na, mae gloku na ne toutonu ka mae Isak eigna nogna thei na, nei unha glepo teke edi ka namono teke tei mana na eghu. 67Aonu mae Isak hatani Rebeka ne tei ka suga tapuale teke au Sera na, idogna mana tifa na, ne tolaghi ka naꞌa. Mae Isak ne namhani fara Rebeka neke keli nagnafagna fara ke leghugna teke lehe idogna na.
S'ha seleccionat:
Jenesis 24: mrn
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Wycliffe Bible Translators , Inc. All rights reserved.