Jone 8
8
Kaisei naikno biꞌo te tolaghi pedo
1Ke leghugna teke pulohi naiknore ka namonodire, mae Jisas ne haghe ka kaisei thogele te kiloi Thogele Gaju Olivi.
2Hamerane boibongi ka keha narane na, mae Jisas neke pulo Jerusalem ne ruma ka Sugablahi na. Ka narane tuana, kmana naikno filoni mana ne mei khapru faligohoni mana. Eghuteuna mana gnokro soru ne toutonu ranghidi Nonomho te Keli na. 3Hatimare mae velepuhigna vetula nogna mae Moses nei keha mae Farasi eghu hata ne mei kaisei gaꞌase teke tolaghi pedo. Aonu, mare ne fakegrani naꞌa ke uludi naiknore. 4Mare ne cheke eghu ka mae Jisas, “Mae velepuhi, gaꞌase igne thofno khale ka puhi tholaghi pedo. 5Eghuteuna, ka noda vetula tahati teke tusu ranghi ghita mae Moses ia thono blahi fara te tolaghi pedo na. Nu te chekeni ka vetula na cheke eghu agne, ‘Ihei te loku jafra jateula gaꞌase igne teuna, mala fada falehe kau thina’, ba unha eghu iagho gaoghathomu na?” 6Mare cheke igre khogla saosagroni kolho mae Jisas, mala cheke jafra mana nu athini mana ka fate eghu kolho.
Nu mae Jisas theome cheke ne pogho soru ne rioriso ka thagru glose na, ka geghesu thegna na. 7Mare magnahaghei keha cheke tughu ka mana ne ghusna fabrahu. Mana gnokro fadoglo haghe ne cheke eghu ka mare, “Mae ihei ka ghotilo te theome eni kaisei najafra na, kulu atha kaisei thina mala fadi faleheni naꞌa.” 8Aonu, mana fapea pogho soru neke rioriso ka thagru glose na.
9Kate nomhini nogna cheke mae Jisas igne, mae biꞌodi mae Jiure ne megei nga ne sopa thei. Hatimare mae biꞌo kulu tei, eghuteuna, mae majaghani re leghu lahu. Kate kafe tei te gnafa mare na, thegna gaꞌase na ngala kegra teu balugna mae Jisas na. 10Mae Jisas filo haghe ka naꞌa ne cheke eghu, “Naikno biꞌo, la kafe tei ngala aheva si ra? Theo kaisei naikno site au teu te mala fate falehe nigho iagho na ia?”
11Naꞌa ne cheke eghu ka mana, “Funei, theo kaisei ka reꞌe.”
Mae Jisas ne cheke eghu ka naꞌa, “Iara theome tangomana la te fate nigho na. Jifla tei sagho nu thosei ke eni kaisei najafra eghu!”
Mae Jisas u naphae gna nauthoglu
12Ke leghugna igne, mae Jisas ne cheke eghu ka naiknore, “Iara jateula u naphae eghu ka naiknogna nauthoglu igne. Ihei te leghu ghau iara na, mana ginauna theome totokhei kate romno na, nu mana na au kau naphae mala filoi u nabrou te karha na.”
13Hatimare mae Farasi ne cheke eghu ka mana, “Iagho khogla cheke leghudi kolho nou gaoghatho themu re. Eghume u nou cheke iagho tuare theome tutuani kolho. Ghehati theome fatutuanidi kolho nou cheke iagho re!”
14Mae Jisas ne cheke eghu ka mare, “Uve, ka thegu iara na iara cheke kate au nafugna, eghuteuna u nogu cheke iara igre tutuani fara, naugna iara laseni aheva teke mei gu na nei aheva nate ke tei gu na. Ghotilo theome laseni aheva teke mei gu na nei aheva nate ke tei gu na. 15Ghotilo khogla fate leghuni kolho gaoghathogna naiknogna u nauthoglu igne kolho, eghuteuna iara theome fateni kaisei naikno jateula te eni ghotilo tuana eghu. 16Nu kate fateni iara naikno na, iara fateni mana ka puhi te tutuani nei doglo eghu. Naugna theome iara thegu kolho te fate na, nu ghepa mae Mama mae teke kuru mei ghau iara na te mala fate naikno na. 17U nomi vetula ghotilo ia cheke eghu, ‘Te kafe nanaba phiamare nodi chekere unha te chekeni phiamare na tutuani fara.’ 18Iara cheke eigu thegu, eghuteuna mae Mama mae teke kuru mei ghau iara na mana cheke eigu la iara.”
19Hatimare ne ghusna eghu ka mae Jisas, “Aheva gne mae kmamu iagho te chekeni iagho na?”
Mana ne cheke eghu ka mare, “Ghotilo theome lase ghau iara nei theome laseni la mae Mama. Jame lase ghau iara ghotilo na, ghotilo jame laseni la mae Mama.” 20Mae Jisas neke chekedi u cheke igre ka teke farirhiudi mana naiknore kau Sugablahi na, rhegna vido mala lilisei sileni ka God naiknore. Eghuteuna, theo kaisei mae te mei lokini mae Jisas na, naugna nogna narane mana teke lilisei God na theome thoke mei ngau.
Mae Jisas neke mei funugna kligna
21Mae Jisas neke cheke eghu ka naiknore, “Iara ginau nake tei koko ghami ghotilo. Eghuteuna ke leghugu iara na, ghotilo ginauna hari ghau iara, nu ghotilo ginauna lehe baludi nakhibomi are. Ghotilo ginauna theome tangomana nate mei thoke ka namono aheva te tei iara na.”
22Mae biꞌodi hatimare mae Jiu ne cheke eghu fari thedi, “Mana te chekeni na tahati ginauna theome tangomana te tei ka vido aheva te tei thegna na teu si mana gne. Na tei faleheni thegna mana fou?”
23Mae Jisas ne cheke eghu ka mare, “Ghotilo neke karha ka nauthoglu igne kolho, eghuteuna iara theome maegu ka nauthoglu igne. Nu iara neke mei funu kligna ka God. 24Naugna igne te chekeni iara ka ghotilo na, ‘Ghotilo ginauna lehe baludi nakhibomi are’. Te theome fatutuani ghau iara ghotilo, iara kaisei mae teke karha mei jateula kaisei mae biꞌo teuna, ghotilo ginauna na lehe kau nakhibomire!”
25Hatimare ne ghusna eghu ka mana, “Ghema, iagho mae ihei sia?”
Mae Jisas ne cheke eghu ka mare, “Iara ngala mae ihei teke chekeni thegu ka ghotilo tifa ia. 26Iara au kmana glepo fara te mala cheke eimi ghotilo nei mala fate ghami ghotilo teuna. Nu iara ginauna kafe cheke ka ghotilo naiknogna nauthoglu igne unha teke nomhidi iara ka mae teke kuru mei ghau na. Naugna unha te chekedi mana re thono tutuani fara.”
27Hatimare theome laseni gaoghathogna te chekeni mana eigna God mae Kmagna na. 28Mae Jisas ne cheke eghu ka mare, “Gognaro ghotilo na theome lasedi nogu cheke iara gre ghilei nhaꞌa haghe ghau iara ghotilo mae teke mei funu ka God gne kau gaju fafatha na. Kau narane tuana ame laseni nga ghotilo te theome eni iara kaisei glepo leghuni nogu gaoghatho thegu na. Nu unha mae Kmada teke farirhiu ghau iara re ngala te farirhiudi iara ka ghotilo re. 29Eghuteuna mae Mama mae teke kuru mei ghau iara na, mana au fabrahu balugu iara. Mana theome tei koko ghau iara, naugna iara edi fabrahu gobigna lepo te magnahaghedi mana mala edi iara teku re.” 30Aonu, kate chekedi mae Jisas glepo igre, kmana naikno ne fatutuani ni mana.
Mae Jisas vikegna mae Ebraham
31Mae Jisas ne cheke eghu ka mae Jiu te fatutuani ni mana re, “Te leghudi fabrahu ghotilo nogu farirhiu iara re, ghotilo thofno nogu mae fanomho iara. 32Ghotilo ginauna laseni u glepo te tutuani eigna God na, eghuteuna u glepo te tutuani tuana ginauna hata fasnagla ghami ghotilo.”
33Nu keha naikno te theome magnahaghedi cheke te edi mana re ne cheke eghu, “Sei, ghehati theome nogna naikno sneka ihei nga, nu ghehati gne vikegna mae Ebraham. Eghume, unha eghu iagho gaoghathogna cheke te ‘Ghotilo na hata fasnagla ghami’ teu tuana?”
34Mae Jisas ne cheke eghu ka mare, “Tutuani fara, te chekeni iara ka ghotilo na, iheire te loku jafra ka nakhibo na, naikno tuare sneka ka nakhibo. 35Mae ihei teke karha ke lamnagna u tharakna na mana au nolaghi te mala au fabrahu ke lamnagna tharakna tuana. Nu mae sneka na mana theome au kaisei nolaghi te mala au fabrahu ke lamnagna u tharakna tuana. 36Eghume, jame te atha fasnagla ghau iara mae Thugna God na, ghotilo ginauna snagla nomi tutuani ngala. 37Iara lase ghami ghotilo thofno vikegna mae Ebraham. Nu iara lase ghami ghotilo magnahaghei te falehe ghau iara, naugna ghotilo theome magnahaghei te leghudi u nogu farirhiu iara re. 38Iara chekedi unha teke filodi thegu ka namono gna mae Mama na, nu ghotilo edi unha glepo teke cheke ranghi ghami mae kmami themi na.”
39Hatimare ne cheke eghu ka mana, “Sei ghema, mae kmami ghehati na mae Ebraham.”
Mae Jisas ne cheke eghu, “Jame thofno vikegna tutuani mae Ebraham ghotilo na, ghotilo jame leghudi puhi te keli teke edi mae Ebraham re. 40Iara ngala kaisei mae te chekedi ka ghotilo u glepo te tutuani teke nomhidi iara thegu ka thegna mae God Mama re. Nu ghotilo theome magnahagheni glepo te tutuani na. Eghuteuna ghotilo fariuriu mala falehe ghau iara. Mae Ebraham na neke theome eni kaisei glepo jateula tuana neku! 41Eghume, te chekeni iara ka ghotilo na, ghotilo ke edi la glepo teke edi mae kmami themi re.”
Nu mae Jiure ne cheke eghu ka mana, “Ghema, ghehati theome jateula goro sua te theome laseni mae kmadi na ia eghu sia. Nu ghehati mae kmami na kaisei God ngala.”
42Mae Jisas ne cheke eghu ka mare, “Jame thugna God tutuani ghotilo na, ghotilo jame namha ghau iara naugna iara neke mei funu ka God, eghuteuna te gognarona iara au agne. Aonu, iara theome mei kau nogu nolaghi thegu, nu iara mei ka nogna nolaghi God mae teke kuru mei ghau na. 43Ghotilo theome laseni unha te chekeni iara na. Naugna ghotilo theome magnahagheni te leghudi nogu cheke iara re. 44Ghotilo mae kmami na mae Satan. Ghotilo nogna naikno mana eghuteuna ghotilo magnahaghei edi unha glepo te magnahaghedi mana re. Mana kaisei mae falehe naikno funu tifa. Mana theome magnahaghei te leghuni u nabrou te tutuani na, naugna theo kaisei tutuani ke lamnagna mana. Mana kaisei mae chaichaghi, eghuteuna mana jateula chaichaghi te chekedi thegna tuare eghu. Eghuteuna, u chaichaghi te gnafare mei funudi ka mana. 45Nu iara chekeni ka ghotilo u glepo tutuani na. Naugna igne ghotilo theome fatutuanidi unha te chekedi iara re. 46Ba mae ihei ka ghotilo te filo ghau iara te eni unha glepo te diꞌa na? Te chekeni iara tutuani na, naugna unha me theome fatutuanidi ghotilo unha te chekedi iara re? 47Mae iheire te nogna God re, mare fanomhidi chekegna God re. Nu ghotilo gne theome nogna God naugna ghotilo ne tiromi fanomho ka mana!”
Mae Jisas ghe mae Ebraham
48Hatimare mae Jiu ne cheke eghu ka mana, “Tutuani fara te chekeni ghehati ka iagho na, iagho theome mae Jiu nu iagho maemu ka namono Samaria, eghuteuna kaisei naitu au ke lamnamu iagho. Ba, theome doglo si cheke te edi ghehati grea?”
49Mae Jisas ne cheke eghu ka mare, “Theo, theo kaisei naitu te au ke lamnagu iara na. Iara ghatho tahuni mae Kmagu na, nu ghotilo cheke fadiꞌa ghau iara. 50Iara theome harini nafnaknogu thegu na mala ghatho tahu ghau naiknore. Nu mae Mama magnahaghedi naiknore te mala fafnakno ghau iara na, naugna te chekeni mana na iara kaisei mae thono doglo fara. Eghuteuna God ginauna kafe fate ghami ghotilo. 51Tutuani fara, te chekeni iara ka ghotilo na, mae ihei te leghuni chekegu iara na, mana ginauna theome lehe tifa e tifa.”
52Goro mae biꞌo re ne cheke eghu ka mae Jisas, “Uve, gognaro na ghehati lase nigho hi ka nou cheke themu re, iagho au kaisei naitu ke lamnamu. Naugna mae Ebraham ia la lehehi tifa nei hatimare mae profet ra jaola lehe hila. Nu te chekeni iagho na, ‘Mae ihei te leghuni chekegu iara na mana na theome lehe tifa e tifa.’ 53Ba, iagho mae ke biꞌogna mae kmada Ebraham sia? Mana lehehi tifa nei hatimare mae profet ra jaola lehehi eghu sia. Ba, iagho mae ihei sia, mala cheke eghu iagho?”
54Mae Jisas ne cheke eghu ka mare, “Jame fafnakno ghau iara thegu na, igne theo kaisei nafugna kolho. Nu mae ihei te fafnakno ghau iara na mae Kmagu iara ngala, mae te chekeni ghotilo ne mae nomi God themi teuni ghotilo ia. 55Neubane chekeni ghotilo ‘Mana na noda God tahati’ neu, ghotilo theome thofno laseni mana. Nu iara ngala te laseni mana na. Jame chekeni iara ne theome laseni mana teuna, iara jame kaisei mae chaghi jateula ghotilo eghu. Nu iara laseni fara mana nei leghudi chekegna mana re. 56Mae kmami ghotilo Ebraham na neke gleale'a nei keli tagna fara neku kate filoni narane meigu iara na.”
57Goro mae biꞌo re ne cheke eghu ka mana, “Icho idomi, iagho theome glimafulu finoghamu ngala funu karhamu! Faꞌunha ne filoni hila mae Ebraham sagho ia?”
58Mae Jisas ne cheke eghu ka mare, “Tutuani fara, te chekeni iara ka ghotilo na, ka narane theome karha nga tekeu mae Ebraham na, iara neke kulu auhi!” 59Kate nomhidi mare cheke te edi mae Jisas igre, mare atha thina ne rodi fada faleheni mana. Nu mae Jisas poru ne jifla ka Sugablahi na.
S'ha seleccionat:
Jone 8: mrn
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Wycliffe Bible Translators , Inc. All rights reserved.