Luku 20
20
Mare magnahaghei laseni nogna nolaghi mae Jisas na
(Mat 21:23-27; Mak 11:27-33)
1Kaisei narane, mae Jisas ne farirhiudi neu naiknore ka Sugablahi na. Kate toutonuni mana Nonomho te Keli na, hatimare mae pris ulu nei hatimare mae velepuhigna vetula nogna mae Moses, nei keha mae biꞌo langau eghu ne mei ka mana. 2Eghuteuna mare ne cheke eghu ka mana, “Ghema, unha nafnata nolaghi site au ka iagho te edi glepo igrea? Mae ihei teke tusu ari nolaghi te mala edi iagho glepo gre?”
3Mae Jisas ne cheke eghu ka mare, “Iara na kulu ghusna ka ghotilo kaisei gusna. 4Ba, nolaghi teke faꞌapublahi naikno mae Jone ia neke mei funu ka God, ba funu ka naikno kolho? Chekeni ka iara.”
5Aonu, mare ne funu fapoaphola fari thedi ne cheke eghu, “Jame cheke eghu tahati na, ‘God ngala teke tusu lao nolaghi ka mae Jone na,’ mana ginauna na cheke eghu ka tahati, ‘Jame teuna, naugna unha me theome leghuni ghotilo unha teke chekeni mae Jone na?’ 6Nu jame ‘Naikno kolho teke tusu lao nolaghi na ka mae Jone’, teu tahati na, naikno te gnafare ginauna fada falehe ghita ka thina, naugna mare fatutuani ni mae Jone gne kaisei nogna mae profet God.”
7Aonu, mare ne cheke eghu ka mae Jisas, “Ghehati theome laseni cheke tughugna na.”
8Mae Jisas ne cheke eghu ka mare, “Uve, iara na jaola theome chekeni ka ghotilo unha nafnata nolaghi te au ka iara te edi glepo igre.”
Mae Jisas ne toutonu ka cheke naba
(Mat 21:33-46; Mak 12:1-12)
9Eghuteuna mae Jisas ne toutonu ka naiknore cheke naba igne, “Kaisei mae neke joꞌu kaisei nagare grep. Mana snakre lao ka keha mae nagare igne mala loku ranghini. Eghuteuna mana jifla ne tei au fabrahu ka namono delei. 10Kate thokeni ghanogna nagare na, mana ne kuru teini kaisei nogna mae gloku mala tei ka mae greireghi nagare gre mala hata keha ghegna sisi. Nu mae greireghi nagare re kegra haghe ne aknini mana ne tirodi tusu lao kaisei grep ka mana neke kuru fapuloni kolho. 11Aonu mae funei na neke kuru tei fapea mae nogna gloku na. Nu mare jaola ne purini mae gloku igne. Mare ne tirodi ghatho tahuni mae gloku igne neke kuru fapuloni kolho. 12Aonu mae khoto nagare na neke kuru teini fatilo nogna mae gloku na ka mare. Nu mae greireghi nagare igre ne parani fara mana ne koko fajiflani ke kosi nagare.
13 “Mae khoto nagare na ne cheke eghu, ‘Na unha te eni iara gognarona? Iara ginauna kuruni mae thofno thugu thegu te namhani fara iara igne. Glahula ghatho tahuni mare.’
14 “Kate filoni mare meigna mae thugna mana na, mare ne cheke eghu fari thedi, ‘Igne thofno thugna mae khoto nagare ia. Mei ghotilo mala falehe nodani, mala ke khotogna theda nagare igne!’ 15Eghuteuna mare ne hata fajiflani mana ke kosi nagare, ne faleheni mana.
“Eghume, unha glepo nate eni mae khotogna nagare na? 16Mana ginauna tei ka nagare na mala falehedi mae greireghi nagare igre. Aonu mana ginauna snakre lao nagare na ka keha mae greireghi nagare delei mala reireghi mare.”
Kate nomhini naiknore cheke naba igne, mare ne cheke eghu, “Theo, theome jateula tuana eghu!”
17Nu mae Jisas ne filo ka mare ne cheke eghu, “Unha eghu gaoghathogna na phugra cheke ka grioriso te blahi na igne?
“ ‘Thina te tirodini mae iheire te horo suga na,
kela kegra haghe kaisei thina ulu fara ka suga na.’
18 Mae ihei te uka ke kligna thina igne, thina igne ginauna fadidiꞌani mana. Nu te soru thina igne ke kligna gna mana na, mana ginauna nghuja vuhai nakrofu kolho.”
Foli takis ranghini mae Sisa
(Mat 22:15-22; Mak 12:13-17)
19Hatimare mae velepuhigna vetula nogna mae Moses nei hatimare mae pris ulu teu igre laseni nogna cheke mae Jisas igne khogla chekedi kolho mare. Aonu, mare hiro phoge mala ghosei lokini mae Jisas. Nu mare mhaghuni unha nate eni naiknore.
20Naugna igne, mare ne ofoni thofno narane te mala lokini mana na. Aonu mare ne folidi keha mae mala chaghi nei ghusna keha gusna, nei saosagroni mana eghu mala tangomana mare te snakre laoni mae Jisas ka nogna nolaghi mae gavana. 21Aonu mae teke kuru mei mare igre ne cheke eghu ka mae Jisas, “Velepuhi, ghehati lasedi unha te chekedi nei farirhiudi teu iagho igre thofno tutuani fara. Eghuteuna iagho theome mhaghudi unha nafnata gaoghatho eimu iagho te edi naiknore. Naugna naikno te kmanare kaisei nanaba ngala ka iagho. Nu iagho toutonuni kolho unha te tutuani eigna puhigna God. 22Ba, ghema, keliu ngala te foli takis tahati ka mae Sisa na? Ba theo?” Mae Sisa gne mae king biꞌo gna Rom.
23Nu mae Jisas ne kulu lasedi nodi saosagro mae igre ne cheke eghu ka mare, 24“Hata mei kaisei sileni.” Hatimare ne tusu lao ka mae Jisas kaisei sileni. Mae Jisas ne cheke eghu, “Thotoghale gna nei u nanghagna eghu mae ihei te filodi ghotilo ka sileni na igre?”
Mare ne cheke eghu ka mana, “Mae Sisa.”
25Mae Jisas ne cheke eghu ka mare, “Uve, tusu fapulo ka mae Sisa unha teke nogna mae Sisa na, eghuteuna ke tusu fapulo ka God unha teke nogna God na eghu.”
26Hatimare ne jaglo nodi fara ka nogna cheke tughu mana igne ne theome ghagri kaisei cheke. Aonu mare ne theome tangomana te chaghini mae Jisas ka unha te chekedi mana ke uludi naiknore.
Keha mae Sadiusi ne mei ghusnani mae Jisas
(Mat 22:23-33; Mak 12:18-27)
27Keha mae Sadiusi mei ka mae Jisas. Mae igre theome fatutuani ni karha fapulo na. Hatimare ne ghusna eghu ka mae Jisas, 28“Ghema velepuhi, kaisei vetula teke risoni mae Moses malada tahati ia cheke eghu, ‘Jame kaisei gaꞌase lehe khetogna na, eghuteuna repa theo thudi, mae tahigna na nake tolaghi ka gaꞌase tuana mala ke au thugna mae tighagna teke lehe na.’ 29Uve, jare na hatimare fitu mae thabusigna. Mae biꞌo lahu na tolaghi, lehe eghuteuna theo thugna. 30Mae ke iko na ke tolaghi ka glehe kokoi na, ke leghu mana lehe. 31Eghuteuna mae fatilo na ke tolaghi la ka gaꞌase tuana. Ke leghu na mana jaola lehe. Eghu ne gnafa hatimare fitu mae thabusignare. Hatimare kafe lehe ne theo thudi. 32Leghu lahu na gaꞌase na jaola ne lehe. 33Nu igne nomi gusna ghehati na, ‘Ka narane karha fapulo na, gaꞌase igne na khetogna mae ihei ka hatimare fitu mae thabusigna igre?’ Naugna mare neke kafe tolaghi ka naꞌa.”
34Mae Jisas ne cheke eghu ka mare, “Tholaghi gne maladi kolho iheire te au teu ka nauthoglu igne. 35Eghuteuna te mala au ka nauthoglu majaghani na, nalhaꞌu ba gaꞌase te nabadi ka karha fapulo ka glehere, mare ginauna theome tolaghi jare. 36Naugna kau nakarha tuana naiknore ginauna na jateula engel eghu theome lehe. Mare mala goro thugna God, naugna mare neke karha fapulo ka glehe. 37Mae Moses neke thofno cheke thakle nihi eigna naikno te lehe na nake karha fapulo. Kau thoutonu eigna te gnubra gaju ikoi ia, mae Moses neke cheke eghu, ‘God gne nogna God mae Ebraham, nogna God mae Isak, nei nogna God mae Jekop.’ 38Eghume, neuba naikno igre neke lehehi tifa, God neke chekeni ka mae Moses na mare karhau ngala. Naugna jame theome karha mare na, God jame theome chekeni te ‘Iara nogna God mae Ebraham, nogna God mae Isak, nei nogna God mae Jekop.’ Tutuani, God igne theome nodi God naikno te lehe nu nodi God naikno te karha kolho. Naugna naikno te gnafare na kafe karha ka mana.”
39Keha mae ka hatimare mae velepuhigna vetula nogna mae Moses gre nomhini igne ne cheke eghu ka mana, “Velepuhi, te chekedi iagho gre tutuani fara!” 40Tuana ngala leghu lahu gna nodi faghusna mare na. Eigna mare ne mhaghuni te ghusna keha gusna ka mae Jisas.
Gusna eigna mae Mesia
(Mat 22:41-46; Mak 12:35-37)
41Ke leghugna igne mae Jisas ne cheke eghu ka mare, “Unha eghu naiknore te chekeni na mae Kraes na ginauna karha mei ka vikegna mae Devet teu igne? 42Naugna kau buka Sam ia thegna mae King Devet neke cheke eghu,
“ ‘God ne cheke ranghini nogu mae funei iara na,
iagho gnokro agne fei nhetagu iara.
43 Naugna iara ginauna lisei soru nou naoka iagho re ke parigna nou nolaghi.’
44 Mae Devet ne kiloni mae Mesia gne nogna ‘Mae funei’. Nu mae Mesia na jaola vikegna mae Devet. Faꞌunha ne kafe tutuani si phei glepo igrea?”
Mae Jisas ne cheke faparidi puhidi mae biꞌo re
(Mat 23:1-36; Mak 12:38-40)
45Kate kafe fanomho teu naiknore, mae Jisas ne cheke eghu ka nogna mae fanomhore, 46“Fiofilo ghami ghotilo ia ka mae velepuhidi vetula gre, glahula ne keli mare eghu ghotilo gaoghathomi na. Naugna mare magnahaghei te nolo tafri balu nodi phoko blahi ke uludi naiknore. Eghuteuna mare magnahaghedi naiknore te ghatho tahudi kate thafodi ka glalabare. Mare tei ka suga tharai ba ka gaghamu biꞌo, mare magnahaghei te gnokro ka sape nafnakno koba. 47Nu mare fakokhoanadi nei blaudi eghu koba nodi gobigna lepo goro naikno biꞌo teke lehe khetodire. Eghuteuna mare tarai brahu koba mala ne mae blahi eghudi naiknore kolho. Filo si ghotilo, God ginauna paradi fara mae tuare!”
S'ha seleccionat:
Luku 20: mrn
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Wycliffe Bible Translators , Inc. All rights reserved.