Ruuka 18
18
Motatigha ghusabha
1Yesu akabhabhoorera abhaanabheegha bhaache eghetuubhaani kino, köbhëërëki kubha mbakwëndëru korisabha Eryobha chaasiko choose na bhataku omukörö. 2Akabhabhoorera akabhugha, “Mo‑moghya nyarebhe, naare‑ho omoteni o kiina umu. Omoteni o kiina uyo, taare aratiina Eryobha, koru ghotereera omooto wowoose. 3Mo‑moghya uyo, naare‑ho omosino umu. Omosino uyo kwo riibhagha ryaru naare aramutambana omoteni o kiina uyo komusabha, arabhugha, ‘Neghusabha uhe obhuhëënë bhoone koru kwo mobhisa waane.’
4“Kwo riibhagha irë, omoteni o kiina uyo naare araanga komutëghëërëra omosino uyo. Amare antenero, aghiisiikërëra omwene akabhugha, ‘Eni nteeghotiina Eryobha, koru nteeghotereera omooto wowoose, 5amare, gho kubha omosino uno nakunyaakinyaaki chwee, ibheere nekomuha obhuhëënë bhooche, kubha atabha aranyaaki gho ghuntambana wiiki!’”
6Akamara, Omutëmi akabhugha, “Mutëghëërërë bhoheene amangʼana gha moteni o kiina uyo omobhe! 7Eryobha kana, retaakobhakörëra bhoheene abhaato bhaache bhano bhakorisasaama rebhatoori, obhotiko no omwishe? Hëënë ndeghukëëchëra kobhatoori? 8ˆNekabhabhoorera kubha, ndekobhaha obhuhëënë bhoobho bhwango. Amare, hano eni Omoona o Mooto nekuucha ghugharuka mo‑se ino, nekubhöna abhaato bharankumi?”
Eghetuubhaani ke Mubharisaayo no omutöbhi o righööti
9Wiiki, Yesu akabhabhoorera eghetuubhaani kwo bhano ꞉bhiirooche kubha, ibho nibho bhaanyi no obhuhëënë ambërë e Ryobha, na kobhataraaha abhande bhoose. Akabhugha, 10“Mbaare‑ho abhaato bhabhere, bhano ꞉bhaaghiire Mwisëngërö ghusabha Eryobha. Umu naare Omubharisaayo, no owonde naare omutöbhi o righööti.
11“Omubharisaayo uyo akiimeerera, aghasabha Eryobha ghenkirinkiri arabhugha, ‘Oo Waryobha, ˆoghachömi, gho kubha eni nteenyi mobhe ke bhande bhano bhaghuköra amabhe, na bhano bhakuhöka abhaato ebheghiro na abhataari, hande koru kinya omutöbhi uno o righööti! 12Nekwiyima ebhiinyakurë mara kabhere kwo wiiki, na kwo bheghiro bhyose bhino nekubhöna, nehaaruusi imu ghwi ikomi.’
13“Amare omutöbhi uyo o righööti, akiimeerera kurë hasuuhu, koru tëëndiri ghugharaamereri Mwishaaro, amare akabha ariitëmatëma mo‑ghekubha keeche kwo macheeche, arabhugha, ‘Eryobha, rendigheri changori! Eni m‑mooto o masari neenyi!’”
14Niho Yesu akëëndërëra akabhugha, “ˆNekabhabhoorera kubha, omutöbhi uyo o righööti ꞉naagharokiri awaache, amariri kwabhëru ne Eryobha. Amare uyo owonde, tiyaanyi! Omooto woose uno aghwitiiri, Eryobha ndekomwiki haase. Wiiki omooto woose uno aghwitoora haase, Eryobha ndekomotiiri ighoro.”
Yesu ˆaghiitabheri abhaana abhasuuhu
(Mataayo 19:13–15; Maariko 10:13–16)
15Eriibhagha erende, abhaato mbaare bharamurëëtëra Yesu abhaana abhasuuhu, kubha abhetoorere amabhökö ghaache abhiitabheri. Hano abhaanabheegha bhaache bharooche ghayo, bhaghasëëma kobharëki gho kobhahaarera. 16Amare, Yesu akabhabherekera abhaana bhayo, akabhugha, “Mobhatighe abhaana abhasuuhu bhaache ghokoone, motabharëki, gho kubha obhutëmi bho Ryobha m‑bho bhaato bhano bhaanyi kinya abhaana bhano. 17Mahëënë ˆnekabhabhoorera kubha, omooto wowoose uno ataakobhwishereri obhutëmi bho Ryobha kinya omoona omosuuhu, taaghusöha‑mu naabha.”
N‑ghuköngʼu kwo bhaame ghusöha mo‑bhutëmi bho Ryobha
(Mataayo 19:16–30; Maariko 10:17–31)
18Wiiki omukangati umu omwame, akaacha komobhoori Yesu akabhugha, “Omweghi omuhëënë, nikörë ke, kubha mo‑rosiko ro ntenero nibhönë obhuhöru bho miishe ghyose?”
19Yesu akamobhoorera, “Ngwake okomberekera eni omuhëënë? Taanyi‑ho omooto uno anyi omuhëënë, amare n‑Eryobha eryene chiri! 20Iye, noghyeche emeghiro ghe Ryobha ghino ghekobhugha kubha, ‘Otataara, no otiita, no otiibha, no otaruusi obhwibhateri bho bhuröngö, no obhasooke iso na nyako.’#18:20 Mööhi Kohoroka 20:12–16; Kohiita kwo Meghiro 5:16–20.” 21Omukangati uyo aghagharokeri akabhugha, “Ghano ghoose neghaghöötiri korwera bhoona bhoone.”
22Hano Yesu oghwire ghayo, akamobhoorera akabhugha, “Okeere nokwëndëru ghuköra angʼana imu. Nooghi obheghori ebheghiro bheecho bhyose bhino onyi nabhyo, chambiiri chino okubhöna, obhahë abhahabhe. Gho ghuköra hangʼu, niho okubha na agharinga Mwishaaro. Oramara uche, untambane.” 23Omukangati uyo, hano oghwire ghayo, aghaghöötu na amacheeche chwee, gho kubha naare mwame chwee. 24Yesu, hano amorooche ˆakabha na amacheeche hangʼu, akabhugha, “Neekubha ghuköngʼu chwee kwo bhaame ghusöha mo‑bhutëmi bho Ryobha! 25N‑kohoho angamiya koheta mwibhanga re roshintani, ghokera omwame ghusöha mo‑bhutëmi bho Ryobha!”
26Hano abhaato bhooghwire ghayo, bhakabhoori bhakabhugha, “Ibheere, aribha hangʼu keenyi, n‑niwe uno aghotora ghotooribhu?” 27Yesu akabhabhoorera akabhugha, “Amangʼana ghano abhaato bhataaghotora ghuköra, kwo Ryobha ngaghuköru.” 28Ibheere, Bheetero akamobhoorera Yesu akabhugha, “Mööhi, itu ntotighiri bhyose, toghaghutambana!” 29Yesu akabhugha, “Mahëënë ˆnekabhabhoorera kubha, omooto woose uno atighiri anyumba yaache, hamu mkaache, hamu bhaömööbhö, hande abhiibhori bhaache, hamu abhaana bhaache, gho ghiri e bhutëmi bho Ryobha, 30hëënë nakuhaabhu bhyaru ghokera bhino atighiri hano mo‑se. Wiiki, mo‑se ino ekuucha, nakubhöna obhuhöru bho miishe ghyose.”
Yesu ˆaghasiikëra wiiki ighoro e ghoku na koryoka kooche
(Mataayo 20:17–19; Maariko 10:32–34)
31Yesu akabhiimoki abhatomu bhaache ikomi na bhabhere rubhareka, akabhabhoorera akabhugha, “Mööhi, ibheere ˆtoghatiira ghuye Yerusareemu. Niho ghoose ghano abharööti ꞉bhaandëkiri ighoro e Moona o Mooto, naghoghahikeerani. 32Naghughöötu na kohiru mo‑bhaato bha matöngö. Mbakomuchëëra na komotoka, na mbakomontwera amatë. 33Wiiki, mbakomutëma emicharicho na mbakomwita, amare orosiko ro ghatato, nakoryoka.”
34Ibheere amangʼana ghano Yesu ꞉abhabhooriire abhatomu bhaache, bhataaghamënyiri. Angʼana iyo neere ebhisuru ghokoobho. Wiiki bhataamënyiri neke aghosiikërëra.
Yesu ˆakahöri omohuku
(Mataayo 20:29–34; Maariko 10:46–52)
35Yesu naare ˆaghatingʼi omoghya o Yeriko. Hayo rubhareka ro nchëra iyo, naare ikeere omohuku umu, arasabha chambiiri. 36Hano oghwire abhaato bhaaru bharaheta hayo, akabhoori akabhugha, “Neke keenyi iyo?” 37Bhakamobhoorera bhakabhugha, “Yesu o Nasareeti niwe akoheta.”
38Hayo hayo, aghatiiri amaraka, arabhugha, “Yesu Omoona o Tawuti, ondigheri changori!” 39Abhaato bhano ꞉bhaare bhakangatiri, bhaakabha bharamokiri kwo bhuhaari. Amare iwe, akëëngëra ghotiiri amaraka akamobherekera, “Omoona o Tawuti, ondigheri changori!”
40Yesu akiimeerera, akahatëka omohuku uyo arëëtu ghokooche. Hano amwishukeriire, Yesu akamobhoori akabhugha, 41“Neke okwënda neghukörërë?” Akabhugha, “Omutëmi, neghusabha netore korighi.” 42Yesu akamobhoorera akabhugha, “Nuubhönë korighi! Obhokumi bhoocho ˆbhoghakuhöri.” 43Hayo hayo, akarighi, akamtambana Yesu, arareghongi Eryobha. Abhaato bhoose, hano bharooche ghayo, bhaghasëëma koreghongi Eryobha.
S'ha seleccionat:
Ruuka 18: ntk
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022 Wycliffe Bible Translators, Inc. All rights reserved