Zaa 6

Zezwii yɛ nɩkpa a 'kɔkɔmlɛ lile 'nyɛ

(Matie 14.13-21; Maakö 6.30-44; Lwiikö 9.10-17)

1‑Mi'la 'plɩɛ 'wëë, 'n Zezwii yiɛ 'wʋ ‑sɔ, ‑mä Galilee a 'nyu 'kɔdʋʋ wa la'ɛɛ Tibeliadɩ a nyuu, 'n ɔ yiɛ ‑mä wʋ ‑gömö mö. 2Ɔ ‑wʋä mö dɔ'wʋ a nɩkpaa ‑wa bhlinɔɔɔ 'bɩwʋʋ, wa'aa muënɩ. Sɛ ɔ yɛmanɩɛ guzuwaa, ‑sɩbhä wa 'yɩɛ 'ylɩmö, nza wa bhlinɔɔɔ 'bɩwʋ. 3'N Zezwii yiɛ ‑gäga ‑bhlʋ 'wlu mö, 'n ɔ yiɛ ‑mä sɛ glɩ, ɔ ‑nyɛ 'ɔ ‑gänɩwaa 'sɔ. 4Galɛ'möwlʋfɛtɩɩ lɛ 'kä ghlɛ a 'tɛnyɩ 'la 'mö ma‑a.

5‑Maa wa ‑wʋ ‑mä ‑gägaa 'wlu, 'n Zezwii yiɛ nɩkpa a ‑bʋbʋ 'kɔdʋ 'ylɩmö wʋ ‑wɔɔ yinɩ dɔ'wʋ. 'N ɔ yiɛ Filiipö nimï 'yɩbhä nɩɩ: «Filiipö, nɩkpa 'la 'wuë, dɛ ‑a 'kä bhä wa lile pɩa wa 'kä li 'nɩ?» 6Sɛɛ Filiipö 'kää gbä, ɔ 'kä ‑sɩbhä 'ylɩmö, nza ɔ 'yɩbhɔɔ nimï, ‑maa ɔ ‑yi a ɔbhlɩ 'kɩ sɛ ɔ 'kä zʋʋ. 7Ɔ 'yɩbhää ‑sɩbhä Filiipö nimïï, Filiipö lɛ naa: «‑Atʋ, ‑a yi a fälɛgö a gwlɩ kʋgbä#6.7 fälɛgö a gwlɩ kʋgbä: Wa mä'a a dɔ'wʋ, ‑lɛ a 'tɛnyɩ 'la 'mö, fälɛgïyi ‑bhlʋ, 'ylɩ ‑bhlʋ a libho a 'pɛnaa. (200) a'bhë ‑kä ‑kë, ‑a 'kä nɩkpa nɩ a 'fɔlɔ pɩa, wa 'wuë wa 'kä 'pɩyiepɩyie ghlɩ a dɔ'wʋ, ɛ'ɛ a ‑zu.»

8'Ɔ ‑gänɩwaa a gla'mö a ‑nɔ ‑mɔmɔɔ, Simɔɔ Piɛlɩ a ‑daayu Adlee, ɔ lɛ naa: 9«‑Atʋ, nyɩbhɛlʋyu ‑bhlʋ ‑wʋmö dɛ'ɛ, ɔ ‑su 'fɔlɔbhï ngbï, 'n zibhïya 'sɔ. ‑Maa nɩkpa 'kɔkɔmlɛ nɩ a dɔ'wʋ, lile bhä da'a ‑a?» 10Zezwii lɛ naa: «A nɩ 'nyɛ nɩkpa 'wuë 'dɩ, wa nɩ glɩ dʋdʋ 'wʋ sɛ.» ‑Lɛ a ‑putukwëa nɛnɩ a nɛnɩɛ zaa, 'mö wa glɩɛ ‑gömö sɛ. Wa 'wuë, wa ‑bhli nɩkpa a 'dwi kʋgbä'sɔ nɩkpa a gwlɩ kʋgbä (5.000) a sɛ.#6.10 Wa'aa ngwlɩɩ ‑nyɛ yuëa 'sɔ zɛlɩmö. 11Wa glɩɛ sɛ 'wëë, 'n Zezwii yiɛ 'fɔlɔɔ 'wʋ 'libhï, ɔ bhälɩɛ wʋ za Lagɔ 'wëë, ‑wa glɩɛ ‑lɛ 'wuë, 'n ɔ yuënyɩɛ dilanɩ, zibhïï kökä, sɛ wa yɩbhää wa 'kä lii, 'n ɔ yuënyɩɛ ‑sɩbhä dilanɩ. 12Wa 'wuë, wa lʋä 'wëë, 'n Zezwii yiɛ 'ɔ ‑gänɩwaa 'dɩ 'nyɛ nɩɩ: «Lilea wa sɩɛnɩɛ, a nɩ 'libhëa, a 'ka 'wlu 'yɩbha, a tɩa nyimo.» 13'Fɔlɔbhï ngbï ‑kpɔ 'la wa liɛ, yɩ kïbhïï ‑yɩ tʋʋä 'wʋʋ, 'n wa yiɛ 'libhï. Yɩ yie ‑käkö kʋgbä'sɔ.

14Nɩkpaa 'yɩɛ zɩzɛ 'la Zezwii 'pää 'ylɩmöö, wa lɛ naa: «'Ɔɔ! Lagɔ 'a 'möbhïlanɩnyɔɔ ‑ɔ 'kä a‑a mä'ä 'pɩwʋ yii, mɔɔ ‑tiamö dɛ'ɛ.» 15Wa nʋä sa'aa, 'n Zezwii yiɛ sɛ yɩbhlɩmanɩ nɩɩ, wa yɩbhä wa 'kɔ wa 'bhlɩlowli 'wʋ 'zʋa. 'N ɔ yuëë ‑sɩbhä a za ‑gäga ‑sɛ, 'n ɔ yiɛ ɔ 'yize ‑mä ‑gäga 'la ‑bhlʋ ‑kpɔ 'wlu mö.

Zezwii yɛ ‑lɛ 'nyu 'klʋ nɛmönɩ

(Matie 14.22-33; Maakö 6.45-52)

16‑Kidosɛ ghlɛɛ, 'n Zezwii 'a ‑gänɩwaa yiɛ ‑mä 'nyu 'kɔdʋ 'la yɔwʋ mö. 17'N wa yiɛ 'gɔlʋ 'wʋ 'libhï, wa 'kä nyuu 'tʋ, wa 'kä ‑mä Kapɛnaɔmö 'bɩwʋ mö. Wa ‑wʋ mö dɔ'wʋ, 'n swe yiɛ ylu, ‑maa Zezwii 'nuëë ‑bhlɛ 'bɩwʋ mö 'yize. 18'N 'vuu 'kɔdʋ yiɛ yi. Wʋ za, nyuu gwɩ wʋ gwɩɛ tenyii. 19Wa yɛ mö ‑këë, wa yɛ 'kwili ngbï, gbʋplʋ a sɛ bhli. Wa lɛ zʋ a sɛ'ɛ cuu, Zezwii mɔɔ yi ‑mä. Ɔ nɛmönɩ ‑lɛ 'nyu 'klʋ, ɔ ‑wʋ 'wa gɔlʋʋ yinɩ dɔ'wʋ. 'N nganɔ yuëë köbhä. 20Zezwii lɛ naa: «Nganɔ nɩ tanyɩ 'lɩbhä, ‑maa ‑amöä.» 21Wa lɛ 'kɔ 'wʋ 'libhï cuu, 'n gɔlʋʋ yiɛ dɛ wa mö a‑a a kïkëa köbhä.

Nɩkpaa Zezwii 'nyɛ a‑a 'fɔlɔɔ wa tɛlɔ sɛ

22Nɩkpaa a ‑bʋbʋʋ ‑wa tʋʋ a‑a ‑mä nyuu a kïkë ‑mä'la ‑gömöö, zlɩ zɩɛ, wa ‑yi sɛ nɩɩ, 'gɔlʋ ‑bhlʋ cuu, mʋʋ ‑wʋ a‑a ‑lɛ 'nyugbë 'wʋ, 'mö Zezwii 'a ‑gänɩwaa 'libhïä 'wʋ, 'n wa yiɛ mö. Wa ‑yi'ɛ sɛ nɩɩ, Zezwii 'nɩɛ ‑mä gɔlʋʋ mö ‑gbälɛmö, ‑maa 'ɔ nɩkpaa a 'yize mʋa möä. 23Wa glɩ ‑bhlɛ dɛɛ Zezwii bhälɩnɩ a‑a Lagɔ 'wë 'n ɔ yuë a‑a 'fɔlɔɔ dilanɩɩ, 'n gwälɩ ‑mimii yɩɛ ‑mä Tibeliadɩ 'bhöönɩ 'n yɩ yiɛ yi. 24Nɩkpaa yɩbhlɩnɩɛ sɛ nɩɩ, Zezwii ‑nyɛ 'ɔ ‑gänɩwaa 'sɔ 'nɩɛ ‑mä ‑wa yiɛ jijo'wʋ ‑wʋʋ, 'n wa yiɛ ‑mä gwälɩ 'la 'mö ‑gbälɛ, 'n wa yiɛ ‑mä Kapɛnaɔmö mö, wa 'kɔ ‑mä yɩlɩ.

Lilea ‑a nyɛɛ ‑tiamö a ‑bhölɩbhölɛ

25Wa möä, ‑mä nyuu a kïkë ‑mä'la ‑gömö, 'n wa yiɛ ‑mä Zezwii ghlɩnɩ, wa lɛ naa: «'Ɔ! ‑Atʋ, ‑zlɩmɛ ‑n yi a bhä mä'ä 'nɩ? 26Ɔ lɛ naa, ‑tiamö n nyanyɩɛ dɛ'ɛ 'dɩ nɩɩ, 'fɔlɔɔ n 'nyanyɩɛ 'n a yiɛ li 'n a yiɛ lʋʋ, wʋ za a tɛlɩɩɛ sɛ cuu, ‑maa zɩzɛli n ‑bhɛɛ, sɛ yɩ sɛɛ zɛmöö, a'aa ‑bhlɛ ‑sɩbhä 'mö 'nʋ. 27Lilea ‑a glɩnɩɛ nylii, a za a nɩ tɩ yɔlɔ, ‑maa lilea ‑a nyɛɛ nɩkpɛ 'kwadlɩ a ‑bhölɩbhölɛɛ, a za a nɩ yɔlɔ a 'ka ghlɩ. ‑Lɛ a lile 'la, Nɩkpɛ a 'Yu, ‑ɔnyɩ wɛlɩɩ ɔ dɩba Lagɔ 'zʋä kɛ ‑gömöö, mɔɔ 'kanyaa 'nyɛ.» 28Ɔ gbää sa'aa, wa lɛ naa: «Zaa, ‑lii Lagɔ yɩbhää ‑a nɩ nʋʋ, sʋlʋnɩnyi.» 29Ɔ lɛ naa: «‑Lu ‑bhlʋ Lagɔ yɩbhää a nɩ nʋ cuu, muä nɩɩ, ‑mɔ ɔ tieanyɩɛ 'wʋʋ, a nɩ kɔ dlɩ 'wʋ.» 30Wa lɛ naa: «Zaa, zɩzɛ ‑mɛ ‑n 'kä bhä dɛ'ɛ ‑aa 'yila 'klʋ 'pänɩ ‑a 'kä bhä 'ylɩmö, a‑a ‑kamö bhä dlɩ 'wʋ ‑kä 'nɩ? 'Saa‑lu ‑mu ‑n 'kä bhä nʋ? 31‑Aa dɩbawa a dɩbawa, wa ‑wʋ a‑a mä 'muse 'klʋʋ, Lagɔlilea wa laa maanɩ 'mö wa li a‑a. Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ: Lilea ‑a 'bhöönɩɛ ‑mä ghäyɩ 'wʋʋ, 'mö ɔ 'nyʋä a‑a.#6.31 Soomö 78.24; Ɛzoodɩ 16.4-36.»

32Zezwii lɛ naa: «‑Tiamö n nyanyɩɛ dɛ'ɛ 'dɩ nɩɩ, Moyizɩ mɔɔ 'nanyɩɛ a lilea ‑a 'bhöönɩɛ ‑mä ghäyɩ 'wʋ 'nyɛ, ‑maa na dɩba Lagɔ mɔɔ 'nyanya a‑a. Mɔɔ nyanyɩ'ɛɛ zɩ'ɛ dɛ'ɛ ‑mä ghäyɩ 'wʋ a ‑tiamö a lilea. 33Nyɩasɛ n'n‑ä ‑sɩbhä gbä, ‑maa ‑ɔ 'bhöönɩɛ Lagɔ dlɩ 'möö, mɔɔ glɩnɩɛ lilea Lagɔ nyɛɛ nɩkpa, mɔɔ nyɛɛ 'bhlɩbhëa ‑bhölɩbhölɛ.» 34Ɔ gbää sa'aa, wa lɛ naa: «'Ɔ! ‑Alowli, ‑lɛ a lile 'la, nyɩanya 'kwädlɩ.» 35Zezwii lɛ naa: «‑Amöä dɛ'ɛ, ‑amöö glɩnɩɛ lilea ‑a nyɛɛ nɩkpɛ ‑bhölɩbhölɛ. Nɩkpɛ a ‑mɔ ‑kaa yinɩ, ngɔmʋ 'naa 'kɔ 'lɩbhä 'lɩlɩlɩ, ‑ɔ ‑kaa dlɩ 'tɛɛnɩ, 'nyutʋ 'naa 'kɔ 'lɩbhä 'lɩlɩlɩ. 36‑Maa sɛ'ɛ n gbää nɩɩ, abhʋa abhlɩ, a yɛ 'na nʋnʋlii 'ylɩmö, ‑maa a'aa 'yɩbhä a ‑kaa dlɩ 'wʋ ‑kä.

37Nɩkpaa 'wuë na dɩba Lagɔ nyɩaaa wa ‑yii yinɩ. ‑Ɔ ‑kaa yinɩɩ, 'naa 'kɔ kpëti. 38Ɛ'ɛ ‑bhö nyɩasɛ, ‑maa n 'bhööä ‑mä ghäyɩ 'wʋ 'n n yiɛ mä'ä dʋdʋ 'wʋ yii, 'na 'saa n yɩbhää, n 'kʋ nʋ a za, nza n'n‑ä yi. ‑Maa Lagɔ ‑ɔ tieaaa, 'ɔ 'saa ɔ yɩbhää n 'kʋ nʋ a za, nza n yiɛ. 39‑Ɔ tieaaa, 'ɔ sɛ ɔ yɩbhää ‑sɩbhä ma‑a nɩɩ: Nɩkpaa 'wuë ɔ nyɩaaa, n nɩ tɩ wa gla'mö a ‑bhlʋ a'bhë tɩ. ‑Maa ‑zlɩ 'pɩwʋ a 'ylibhɩɛzlɩɩ ‑kä ghlɛɛ, wa 'wuë n nɩ gölʋä, n 'kʋä glu ‑sɛ. 40Na dɩba Lagɔ, sɛ'ɛ ɔ 'yɩbhää nɩɩ, nɩkpaa 'wuë ‑wa ‑kaa 'ɔ yuu 'mö yɩbhlɩnɩ 'n ‑wa ‑kaa dlɩ 'wʋ ‑kää, 'pɩwʋ mää 'naa 'kää 'yli bhɩɛ, wa nɩ ghlɩ ‑mä.»

41'Kïbhëa Zezwii nʋä nɩɩ: «‑Amöö glɩnɩɛ lilea ‑a 'bhöönɩɛ ‑mä ghäyɩ 'wʋ,» a'aa Zwiiföwaa dlɩ yɔwʋ nɛnɩ, nza wa 'ngungwanɔɔ zɛmö. 42'N wa nʋä nɩɩ: «‑Nn'nn! Ɛ'ɛ ‑bhö ɔ da'a Zɩzɛɛfʋ ‑yowli Zezwii mɔ ‑a? ‑A yi yɩ ɔ dɩba ‑nyɛ ɔ ‑da 'sɔ nɩɩ, sɛ yɩ ‑wʋ ɔ 'mö, 'n ɔ nʋ bhä nɩɩ, Lagɔ dlɩ 'mö ɔ 'bhöönɩ 'nɩ?» 43Zezwii lɛ naa: «A nɩ tɩ 'fʋ 'ngungwa. 44‑Maa nɩkpɛ 'nɩɛ bhɛnɩ ɔ ‑kaa yinɩ, 'n na dɩba ‑ɔ tieaaa, ɔ'bhë mɔɔ ‑nɩ'mɔ 'wʋ wäzɩɩ. ‑Mɔ ɔ wäzɩɩɛ 'wʋʋ, 'pɩwʋ a 'ylibhɩɛzlɩɩ ‑kä ghlɛɛ, n yo gäla ɔ 'kɔ glu ‑sɛ. 45Lagɔ 'a 'möbhïlanɩwaa a 'bɔgwɩɩ 'mö, sɛ'ɛ yɩ cɛlɩɛ ‑mä nɩɩ: ‑Ɔ ‑pʋnɩɛ dɩba 'a 'cɩawɛlɩɩ 'yukwli, ‑ɔ ngwliɛ 'wʋʋ, mɔɔ yinɩɛ.#6.45 Ezayii 54.13. 46N ‑kä ‑sɩbhä gbää, mɩɩ 'nɩɛ zɛmö ‑sɛ nɩɩ, nɩkpɛ yɛ tɛkäsɛ na dɩba Lagɔ 'ylɩmö. Ɔ 'bhöönɩɛ ‑mä na dɩba Lagɔ yɔwʋʋ, ɔ 'yize mɔɔ kɔɔ 'ylɩmö.

47Tiamö n nyanyɩɛ dɛ'ɛ 'dɩ nɩɩ, ‑ɔ ‑kaa dlɩ 'tɛɛnɩ, ɔ yɛ 'kwädlɩ a ‑bhölɩbhölɛɛ ghlɩ 'wë. 48‑Amöö glɩnɩɛ lilea ‑a nyɛɛ ‑bhölɩbhölɛɛ. 49A dɩbawa a dɩbawa ‑wa linɩ a‑a ‑mä 'muse 'klʋ Lagɔlilea wa laa maanɩ, wa yɛ 'ku. 50‑Maa lilea ‑a 'bhöönɩɛ ‑mä Lagɔ dlɩ 'möö, 'mö nɩkpɛ ‑kä lii, ma‑a 'kää 'nglɩ ‑kä ɔ 'kä 'kwädlɩkwädlɩnɩ ‑bhölɩ. 51‑Amöö glɩnɩɛ lilea ‑a 'bhöönɩɛ Lagɔ dlɩ 'mö ‑a nyɛɛ ‑bhölɩbhölɛɛ. ‑Ɔ ‑kä ‑lɛ a lile 'la lii, 'kwädlɩ ɔ 'kää ‑bhölɩ. Lilea n 'kää 'nyɛɛ, 'na kpökpaa ma‑a. 'Mö n 'kää 'bhlɩbhëa 'nyɛ, wa 'kä 'kwädlɩ ‑bhölɩ.»

52Ɔ gbää sa'aa, 'n Zwiiföwaa yiɛ tenyii kïbhë 'la 'mö kpɛnɩ, wa lɛ naa: «‑Nn'n! Nɩkpɛ ‑mɔ nɩ, sɛ ɔ ‑kanyɩ bhä 'ɔ kpökpaa 'mönyɛmönyɛmö ‑a 'ka li 'nɩ?» 53‑Maa Zezwii lɛ naa: «‑Tiamö n nyanyɩɛ dɛ'ɛ 'dɩ nɩɩ: Nɩkpɛ a 'Yu, 'ɔ kpökpaa, a 'na li, 'ɔ dluu, a 'nu 'nɩmää, a 'naa 'kä ‑bhölɩbhölɛ ghlɩ. 54‑Maa ‑ɔ ‑kä 'na kpökpaa li, ‑ɔ ‑kä 'na dluu 'nɩmää, ɔ yɛ 'kwädlɩ a ‑bhölɩbhölɛɛ ghlɩ. ‑Sɩbhä a za, pɩwʋ ‑ma nɩ a 'ylibhɩɛzlɩɩ ‑kä ghlɛɛ, n yo gäla n yo glu ‑sɛ. 55Ɛ'ɛ ‑bhö nyɩasɛ, ‑maa 'na kpökpaa, ‑tiamö a lilee 'n 'na dluu, ‑tiamö a nʋä. 56Nza n gbää nɩɩ, ‑ɔ ‑kä 'na kpökpaa li, ‑ɔ ‑kä 'na dluu 'nɩmää, 'wʋ ɔ ‑glaaa, 'n n ‑nyɔɔ ‑wʋnɩɛ 'wʋ. 57Na Dɩba ‑ɔ tieaaa, ɔ ‑bhölɩ. Mɔɔ kää 'nglɩ 'n n ‑bhölɩɛ. Sɛ bhlʋ ‑kpɔ 'la, nɩkpɛ a ‑mɔɔ liɛ 'na kpökpaa, ‑sɩbhä ɔ 'kää na 'nglɩ 'mö ‑bhölɩ. 58Lilea ‑a 'bhöönɩɛ Lagɔ dlɩ 'möö, sa'a ‑sɩbhä a ‑wʋä. ‑Ma a dɩbawa liɛ 'n wa kuä, 'mö a ‑nyɛɛ 'nɩɛ 'wlʋnɩ. Lile 'la, nɩkpɛ a ‑mɔ ‑kaa lii, 'kwädlɩkwädlɩnɩ ɔ 'kää ‑bhölɩ.» 59Wɛlɩ 'la 'wuë, ‑mä Kapɛnaɔmö a Lagɔbuduu 'mö, ‑mä ɔ 'cɩanuënyɩɛ.

Wɛlɩɩ ‑yɩ nyɛɛ 'pɩwʋ mää 'naa 'kää 'yli bhɩɛɛ

60Nɩkpaa ‑wa ‑gänɩ a‑a Zezwii 'a wɛlɩɩ, wa gla'mö a ‑mumuë a ‑bɛ, wa ‑pʋnɩɛ 'ɔ wɛlɩ 'la 'yukwlii, wa lɛ naa: «'Ɔ! Wɛlɩ nɩ ɔ bhïlaa dɛ'ɛ, 'mö yɩ 'tɛɛ tenyii, ‑ɔ bhɛnɩ bhä ɔ 'kɩ 'klʋkpamö zʋ 'nɩ?» 61Zezwii yɩbhlɩnɩɛ wa dlɩpäsaa, ɔ lɛ naa: «Kïbhëa n bhïlaa da'aa, ma‑a 'tɛɛnanyɩ bhä tenyii kɛ'mö ‑a? 62Zaa, Nɩkpɛ a 'Yu, mä ɔ ‑wʋ a‑a ghäyɩ 'wʋ, ‑zlɩ a ‑kɔɔ 'wʋ yɩlɩ ɔ ‑kä ‑mä 'bɩwʋ möö, sɛ a 'kä yɩa'a gbä? 63Nɩkpɛ 'kä ‑bhölɩbhölɛ ghlɩ a dɔ'wʋ, Lagɔ 'a 'Wugɔmʋʋ mɔɔ kää 'nglɩ. ‑Maa 'saa 'wuë 'bhöönɩɛ nɩkpɛ 'mö, mɩɩ 'naa 'kä 'nglɩ ‑kä. Wɛlɩ 'la n 'nyanyɩɛ, Lagɔ 'a 'Wugɔmʋʋ 'mö yɩ 'bhöönɩɛ 'mö, mɩɩ 'kää ‑bhölɩbhölɛ 'nyɛ. 64‑Maa ‑sɩbhä yɩ ‑wʋ 'mö, a gla'mö a ‑mumuë 'niɛ dlɩ 'wʋ ‑kä.» Nyɩasɛ Zezwii 'nɩɛ sa'a gbä, ‑maa, ‑wa ‑gänɩ a‑a 'ɔ wɛlɩɩ, wa 'wuë a gla'mö, ɔ ‑yi a 'kwädlɩ ‑muë 'nɔ dlɩ 'wʋ ‑kä 'n ɔ ‑yi a 'yɛ, ‑ɔ 'kɔ zɩkö tʋ kunɩɩ, nza ɔ gbää ‑sɩbhä. 65‑Lɛ ‑gömö, 'n ɔ yi'ɛɛ nɩɩ: «Sa'a a za n 'nyanyɩ a‑a 'dɩ nɩɩ, nɩkpɛ a'bhë, 'n Lagɔ 'nɩ gbää, ɔ'ɔɔ bhɛnɩ ɔ ‑kaa yinɩ.» 66‑Maa 'bhöönɩa'a da'a, ‑wa ‑gänɩ a‑a Zezwii 'a wɛlɩɩ, wa gla'mö a ‑nʋä a ‑bɛ, 'n wa yoo 'bɩwʋ 'bhöö.

67Wa möä 'wëë, 'n Zezwii yiɛ 'ɔ ‑gänɩwaa kʋgbä'sɔ ‑kpɔ nimï 'yɩbhä nɩɩ: «Abhʋa a 'naa, a yɩbhä bhä a 'kä 'mämö ‑a?» 68'N Simɔɔ Piɛlɩ yiɛ gbʋ ‑dɩ, ɔ lɛ naa: «‑Alowli, ‑na'a bhïlawɛlɩɩ mɩɩ nyɛɛ 'kwädlɩ a ‑bhölɩbhölɛ. ‑A ‑kamöa'a yɔwʋ 'bhöö, ‑mɔ ‑a 'kä bhä ‑mä ghlɩ 'nɩ? 69‑Sɩkaa a dɔ'wʋ, ‑a kɩ dlɩ 'wʋ 'n ‑a ‑yi'ɛ sɛ nɩɩ, ‑ɔ ‑wʋ 'wlɩlɩ, Lagɔ tie, mö ‑n glɩnɩɛ.» 70Piɛlɩ gbää sa'a 'wëë, Zezwii lɛ naa: «A kʋgbä'sɔ ‑kpɔ, nanyɩgäsɛ ‑amöö 'nanyɩɛ bhä'ɛ ‑lɛ ‑sɛ? ‑Maa ‑sɩbhä yɩ ‑wʋ 'mö, a gla'mö a ‑nɔ ‑bhlʋ, Sataa a ‑nɔ ɔ glɩnɩɛ.» 71Zezwii gbää sa'aa, Simɔɔ Yisikalio ‑yowli Zwidaa 'mö ɔ gaaa. Nɩkpɛ 'la, ‑ɔ glɩnɩmöä ɔ ‑nʋa kʋgbä'sɔ ‑kpɔ a gla'mö a ‑nɔ ‑bhlʋʋ, mɔɔ 'kɔɔ zɩkö 'ɔ ‑gblɩwaa kä'mö plɩnɩ.

S'ha seleccionat:

Zaa 6: bet

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre BdG2

Zaa 6

Versets bíblics populars de
Zaa 6

Escolta Zaa 6

La Bíblia:

Bété, Guiberoua

Versió: BdG2 - bet

Zaa 6

Zaa 6

Versets bíblics populars de Zaa 6

Escolta Zaa 6

La Bíblia:

Bété, Guiberoua

Versió: BdG2 - bet

Zaa 6

Versets bíblics populars de
Zaa 6