Lwiikö 15

Wlii ‑ɛ ghïloo a ninea

(Matie 18.12-14)

1'Ylɩ ‑bhlʋ 'mö, lapoomoni a 'wʋbhliwaa ‑nyɛ nɩkpa ‑mumuë a ‑bɛ ‑wanyɩ nglɩɩ ‑nyimaa 'sɔ, mʋa yiɛ Zezwii yɔwʋ, wa 'kɔ 'yukwli ‑pʋnɩ. 2Falizɩɛwaa ‑nyɛ Moyizɩ 'a Gböö a 'cɩawaa 'sɔ, wa 'yɩɛ ‑sɩbhä 'ylɩmöö, wa'aa ‑wa 'lɩlɩlɩ, wa lɛ naa: «Nɩkpɛ ‑mɔ nɩ, sɛ ɔ glɩnɩɛ nɩkpazoku nɩ a bheyi 'n ɔ ‑nyʋä linɩɛ 'wʋ a'bhëë, ‑sɩbhä 'nɩɛ nɛnɩ.» 3‑Sɩbhä a za Zezwii 'pänuëë 'nine, ɔ lɛ naa: 4«A dɔ'wʋ, nɩkpɛ ‑kä wïla a gwlɩ ngbï ‑kä, 'n yɩ gla'mö a ‑bhlʋ ‑kä 'kwlɛ 'mö tʋʋnɩɩ, sɛ ɔ 'kä bhä 'zʋ 'nɩ? Na dɔ'wʋ, ‑mi'la a gwlɩ ‑mʋäna kʋgbä ngbï‑mʋäna ‑kpɔ 'wuë ‑yɩ tʋä ‑lɛ, yɩ ‑wʋ ‑bhlɛ 'wʋ li dɔ'wʋ, 'n ɔ 'kɩɛ ‑lɛ tɩ, ‑mɛ'la ‑bhʋlʋ ‑kpɔ ‑ɛ tʋʋä, ɔ 'kɛ sɛ tɛlɩɛ mö. 5Ɔ ‑kɛɛ sɛ tɛlɩ ‑këë, ɔ ‑kɛɛ ghlɩɩ, ɔ 'wuë 'mäna, 'n ɔ 'kɛɛ 'wʋ 'libhï, ɔ 'kɛ ‑bʋlʋ 'mö 'pä, ɔ ‑nyɛɛ 'kä yi. 6Ɔ ‑nyɛɛ ‑kä glɔ ghlɛɛ, ɔ 'bhɩa 'mö ɔ 'kää wäzɩ ɔ 'kä nɩɩ: A nɩ yi ‑a 'kä 'mäna nʋ, ‑maa 'na wlii ‑ɛ tʋʋ a‑a, n kɛ ghlɩ. 7Sɛ ‑bhʋlʋ ‑kpɔ 'la ‑sɩbhä yɩ ‑wʋä Lagɔ ‑nyɛ nɩkpa 'sɔ a dɔ'wʋ. Mä'ä dʋdʋ 'wʋ a 'nyinylolinʋnyɔ ‑bhlʋ a'bhë, 'n ɔ ‑kä ligba ɔ ‑kä 'ɔ ‑lizokuu kɛ'mö ‑sɛɛ, 'mäna 'käda wa nʋä ‑mä Lagɔ yɔwʋ. ‑Maa nɩkpa a gwlɩ ‑mʋäna nɩkpa kʋgbä ngbï‑mʋäna ‑kpɔ, ‑waaa gbʋ ‑gömö ‑kä Lagɔ a 'yila 'klʋ a dɔ'wʋʋ, wa za wa'aa ‑mä Lagɔ yɔwʋ 'mäna nʋ. ‑Maa nɩkpɛ 'la ‑bhʋlʋ ‑kpɔ, ɔ za wa nʋä ‑mä 'mäna.

‑Lʋayi a glʋ ‑wʋ ghïloo a ninea

8N 'kanyɩ nine ‑mämaa 'pänɩ: 'Nglɔ ‑bhlʋ, ɔ ‑kä ‑lʋayi a gwlɩ kʋgbä ‑kä, 'n glʋ ‑bhlʋ kä tʋʋ, sɛ ɔ 'kä bhä 'zʋ 'nɩ? 'Napɛ ɔ 'kää 'yi ‑dɩ, ɔ 'kä ‑mä ‑buduu a këtiea 'wuë 'mö yɩlɩpö, ɔ 'kä sɛ tɛlɩ. 9Ɔ ‑kä sɛ tɛlɩ ‑këë, ɔ ‑kʋʋ ghlɩɩ, ɔ 'bhɩa 'mö ɔ 'kää wäzɩ, ɔ 'kä nɩɩ: A yi ‑a 'kä 'mäna nʋ, ‑maa na ‑lʋayi a glʋʋ ‑wʋ tʋʋ a‑a, n kʋ ghlɩ. 10Sɛ ‑bhʋlʋ ‑kpɔ 'la ‑sɩbhä yɩ ‑wʋä Lagɔ ‑nyɛ nɩkpa 'sɔ a dɔ'wʋ. Mä'ä dʋdʋ 'wʋ a 'nyinylolinʋnyɔ ‑bhlʋ a'bhë, 'n ɔ ‑kä ligba ɔ ‑kä 'ɔ ‑lizokuu kɛ'mö ‑sɛɛ, Lagɔzuzukuu, 'mäna yɩ nʋä tenyii.»

Yuu ‑ɔ 'bhööä ɔ dɩba yɔwʋ a ninea

11'N Zezwii yuë'ɛɛ nine ‑mämaa 'pänɩ, ɔ lɛ naa: «Nɩkpɛ ‑bhlʋ mɔɔ glɩɛ ‑lɛ. Ɔ kä nyɩbhɛlʋyuë 'sɔ. 12'Ylɩ ‑bhlʋ 'mö, 'tikëyinɔɔ, 'n ɔ yiɛ ‑mä ɔ dɩba ghlɩ, ɔ lɛ naa: ‑Atʋ, n ‑nyɛ na ‑daayu 'sɔ, ‑n ‑kä 'ku a gugbëa ‑n ‑kanyɩɛ yɔwʋ tɩɩ, dlinaa 'ylimö ‑n ‑kaa 'na da yowʋ 'nyɛ. Dɩbaa lɛ naa: ‑Aa, n kɩ 'nʋ. 'N ɔ yiɛ gugbëa 'ylimö dlinɩ. 13'Ylɩya 'plɩɛ, 'n 'tikëyinɔɔ yiɛ ɔ ‑naa 'pɛlʋ 'pä, 'n ɔ yiɛ a monii 'wʋ 'libhï 'n ɔ yiɛ mö. Käböbhölɩ ‑gömö 'yuku 'yuku, 'n ɔ yiɛ ‑mä mö. ‑Mä ɔ ‑bhölɩnɩɛ 'zokwësɛ 'n ɔ yiɛ moni 'wuë nyima. 14Sa'a ‑këë 'n ɛ yiɛ ‑lɛ bhɩɛ. ‑Mä bhlɩ 'la 'mö, 'n ngɔmʋgupegupe yiɛ ‑mä yi. ‑Maa 'ɔ monii 'wuë, ɛ yɛ ‑lɛ bhɩɛ zaa, ɔ'ɔa'a sɛ ɔ 'kä 'zʋä ‑yi. 15'N ɔ yiɛ ‑mä a nɩkpɛ ‑bhlʋ ‑mä ghlɩ, ɔ 'kä ɔ libhonʋnyɔ 'zʋ. Nɩkpɛ 'la 'n ɔ yoo 'wʋ 'libhï, 'n ɔ yoo ‑mä 'ɔ kokotiea 'bɩwʋ kwä, ɔ 'kɩ ‑kʋ. 16Kokotie nɩ, ɔ ‑kɩɩ ‑kʋä möö, ngɔmʋ a za ɔ yɩbhä a nyɩasɛ ɔ 'kä yɩ lilea li, ‑maa ‑bɛ 'nɩ 'nyɔnyɩ. 17Zaa, 'n ɔ yiɛ ɔnyɩ a gbʋ 'mö yɩlɩ, 'n ɔ yiɛ dlɩ 'pä ‑këë, 'n ɔ yiɛ ligba, ɔ lɛ naa: Na dɩba 'a libhonʋwaa 'wuë, lilea wa nyʋää, kɛ a 'kplɛnuëë, 'n n 'kunɩɛ na a mä'ä ngɔmʋʋ ngli. 18Yɩ ‑kä sɛ'ɛ 'mö ‑wʋ, 'wʋ n 'kää ‑sɔ n 'kä 'wlu sɩbhä, n 'kä ‑mä na dɩba ghlɩ. N ‑kä ‑mä ghlɛɛ, sɛ'ɛ n 'kää nɩɩ: ‑Atʋ, n yɛ Lagɔ a dɛ 'nyinyloli 'kädɩ nʋ, n yɛ'ɛ ‑na dɛ 'nyinyloli a ‑bɛ nʋ. 19N'n‑a'a ‑na 'yu a ‑gba 'mö mlɩnɩ, ‑maa ‑yayaya, libhïïa'a ‑na libhonʋnyɔ 'mö 'wʋ. 20Sa'a ɔ 'pää dlɩ, 'n ɔ yiɛ 'wʋ ‑sɔ 'n ɔ yiɛ mö. Ɔ möä, ɔ'ɔɔ ‑bhlɛ sasɛ ‑mä 'ligbë 'mö ghlɛ, ɔ nɛmö ‑mä ngëbleblu, ɔ dɩba 'yoo 'ylɩmöö, 'n ɔ ngäzɩ yoo tenyii 'lɩbhä 'n ɔ yiɛ guë 'n ɔ yoo gbanɩɛ mö 'n ɔ yoo dlɩ gbönɩ. 21Yuu lɛ naa: ‑Atʋ, n yɛ Lagɔ a dɛ 'nyinyloli nʋ, n yɛ'ɛ ‑na dɛ 'nyinyloli nʋ. N'n‑a'a ‑na 'yu a ‑gba 'mö mlɩnɩ, ‑maa ‑yayaya, libhïïa'a ‑na libhonʋnyɔ 'mö 'wʋ. 22‑Maa ɔ dɩba ‑nyɔɔ ghlɛɛ ‑mä 'ligbë 'möö, 'n ɔ yiɛ 'ɔ libhonʋwaa wäzɩ, ɔ lɛ naa: 'Na yuu yɛ yi. A 'päpanɩ 'wʋ, ‑bäna 'kädaa ‑a nɛnɩɛ tenyii 'ylimöö, a ‑nyaa 'kä yi, a 'kɔnyɩ 'mö päla, a nɩ 'zo ‑kpatɩwieyi wïleyi 'mö, #15.22 Wa 'bhibɛyɩ a dɔ'wʋ, ‑na dɩba ‑kamö ‑kpatɩwieyi ‑a la'ɛɛ ‑kɔnɩleyi wïleyi 'mö zʋʋ, mɩɩ sɛɛ zɛmö nɩɩ, ɔ yu ‑n glɩnɩɛ ‑tiamö, 'ɔ 'saa ɔ kää 'wuë, ‑na ‑li yɩ glɩnɩmöä. a 'kɔ 'siikpli 'mö päla. 23'Bhilidɩgbaa ‑a zia a‑a, a ‑nyaa nɩ yi, a 'ka ‑sɩkaa 'wlu ‑dɩ, a 'kä lile 'käda pi, ‑a 'kä zɩ'ɛ 'mäna 'käda nʋ. 24‑Maa 'na yu nɩ a yɩlɩɛ dɛ'ɛ 'wʋʋ, 'kwie a ‑mɛmɛɛ ɔ 'ku a‑a 'n ɔ yiɛ gɔlɔ, ɔ yɛ a tʋʋ, 'n ɔ yiɛ zɩ'ɛ ghïlo. Wa 'wuë 'n wa yiɛ 'mäna 'käda nʋ.

25‑Lɛ a 'tɛnyɩ 'la 'mö, yu 'la a ‑daayu 'kɔdɔ, ‑mä ɔ ‑wʋ a‑a 'lagblɛ 'mö. Ɔ yiɛ, ɔ'ɔɔ ‑bhlɛ sasɛ ‑mä 'ligbë 'mö ghlɛ, ɔ lɛ zʋ a sɛ'ɛ, ‑klɩmö gbä, 'lwɩ gbä. 26'N ɔ yiɛ ɔ dɩba a nɩkpɛ ‑bhlʋ wäzɩ, ɔ lɛ naa: 'Ɔɔ! ‑Jiji ‑yɩ gbää da'a, sɛ yɩ sɛ bhä zɛmö 'nɩ? 27Ɔ lɛ naa: ‑Na ‑daayu 'tikëyi mɔɔ yiɛ, ɔ nɛnɩ 'mö 'tɩɩ 'n ɔ yiɛ yi. Yɩ za 'bhilidɩgbaa ‑na dɩba zia a‑a, ɔ lɛ ‑a nɩ 'lɩbha zaa, ‑a ka 'lɩbhä. 28Wa 'nyɔɔ sa'a 'dɩɩ, 'n ɔ yiɛ tenyii 'klɛ 'pä, ɔ lɛ ɔ 'naa 'käa'a ‑mä 'ligbë 'mö plɛ. Ɔ dɩba 'nwiɛ, 'n ɔ yoo kie mö. 'N ɔ yoo ‑bɛlɩ 'pä, ɔ ‑nyɔɔ 'kä yi. 29‑Maa yuu lɛ nɩɩ: 'Ylʋbö a ‑bɛ yɛ 'plɩ, sɛ n nʋ ‑na'a libhoo. N'n‑ä ‑bhlɛ tɛkäsɛ ‑na wɛlɩ ‑lɛ ‑sɛ. ‑Maa ‑sɩbhä yɩ ‑wʋ 'mö, ‑n ‑nɩɩɛ ‑bhlɛ tɛkäsɛ sɛ'ɛ wlike a'bhë 'nyɛ n 'kä lile pi, n ‑nyɛ na 'bhɩa 'sɔ ‑a 'kä 'bhli. 30‑Maa ‑na'a yuu ‑ɔ 'bhööä ‑mä 'tutungwlɩɩ kä'mö ‑na'a gugbëa 'wuë a monii plɩnɩɛ, ɔ 'kää yii, 'bhilidɩgbaa ‑a zia a‑a, mö ‑n ‑dɩɛ ɔ za 'wlu. 31Dɩbaa lɛ naa: Na 'yu, ‑nmö ‑naa, na yɔwʋ ‑lɛ ‑n glɩɛ 'kwädlɩ. 'Saa n ‑kä ‑kää, ‑na ‑lu wʋ glɩnɩmöä. 32‑Maa 'mäna kä a ‑kanyɩ zɩ'ɛ 'lɩbhä tenyii, ‑a 'kä 'bhli. Ɛ'ɛ ‑bhö nyɩasɛ, ‑maa ‑na ‑daayu ‑ɔ yiɛ dɛ'ɛɛ, 'kwie a ‑mɛmɛɛ ɔ 'ku a‑a 'n ɔ yiɛ gɔlɔ, ɔ yɛ a tʋʋ 'n ɔ yiɛ zɩ'ɛ ghïlo.»

S'ha seleccionat:

Lwiikö 15: bet

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre BdG2

Lwiikö 15

Versets bíblics populars de
Lwiikö 15

Escolta Lwiikö 15

La Bíblia:

Bété, Guiberoua

Versió: BdG2 - bet

Lwiikö 15

Lwiikö 15

Versets bíblics populars de Lwiikö 15

Escolta Lwiikö 15

La Bíblia:

Bété, Guiberoua

Versió: BdG2 - bet

Lwiikö 15

Versets bíblics populars de
Lwiikö 15