Lwiikö 17

‑Wa bhlɩɛ wa 'bhɩa 'nyinyloli 'mö sɛɛ

(Matie 18.6-7,21-22; Maakö 9.42)

1-2Sɛ'ɛ Zezwii 'nyɛɛ 'ylɩ ‑bhlʋ 'mö 'ɔ ‑gänɩwaa 'dɩ nɩɩ: «‑Li ‑mimii ‑yɩ kää 'nglɩ 'n nɩkpɛ bhlinɩɛ 'nyinyloli 'mö, yɩ yia 'kwädlɩ ‑bhölɩ. ‑Maa ‑mɔ yɩ 'kää 'mö 'bhöönɩ, ɔ ‑nɩɩ 'mö yɩ 'kää 'tɛɛ. 'N wa ‑kɔɔ kpiyigwli ‑bʋlʋ 'mö gwanɩ, 'n wa ‑kɔɔ ‑mä gïnyɛ 'mö 'pää, yɩ nɛnɩ ɔ dɔ'wʋ, yɩ zi ɔ 'kä na ‑nʋa a gla'mö a ‑nɔ ‑bhlʋ, ‑ɔɔɔ dɛsɛ ‑kä nɩkpa a 'yila 'klʋ a dɔ'wʋ dula 'wʋ. 3Zaa, a nɩ ‑ligba a 'kä ‑lɛ glɩ. ‑Na 'lilagɔgänɩnyɔ ‑kamö 'nyinyloli 'wlu nʋʋ, 'nyɔ 'dɩ ɔ 'kä 'mö zlɔmanɩ. Ɔ ‑kä 'ɔ 'nyinylolii yɩbhlɩnɩɩ, 'tatinɩ yɩ gbʋ 'yi. 4Ɔ ‑kamö 'ylɩ ‑bhlʋ 'mö 'wʋ ngbi'sɔ 'nyinyloli 'wlu nʋnɩ, 'n ɔ ‑kä yi 'yize, ɔ ‑kä nɩɩ: N bhiamö yɔwʋ, na ‑nɩɩ 'nɩɛ nɛnɩ nʋʋ, 'tatinɩ yɩ gbʋ 'yi 'yize.»

Lagɔ a dlɩtɛɛnɩtɛnɛ

5 Zezwii 'a tietiewaa mʋa ghïloo ‑mä 'ylɩ ‑bhlʋ 'mö, wa lɛ naa: «‑Alowli, sɛ ‑a 'kää 'zʋ ‑a 'kä sasɛ Lagɔ dlɩ 'tɛɛnɩɩ, sʋlʋnɩnyɩ ‑sɩbhä.» 6Ɔ lɛ naa: «Suyeyii wa laa mutaadɩ, a ‑yee, ɛ 'tikëtikëyi. ‑Maa 'a sɛ a 'tɛɛnɩɛ Lagɔ dlɩɩ, ‑sɩbhä ‑kä a sa'a 'tikëyi 'wʋ ‑wʋ ‑kë, suu ‑wʋ 'nɩgböä dɛ'ɛɛ, a yu a 'dɩ 'nyɛ nɩɩ: Su nɩmä, 'lɔlɔ glu, 'bhöö dɛ'ɛ ‑n 'kä ‑mä gïnyɛ 'mö 'nɩgböä mö. Sɛ a gbää da'a wʋ nɩ 'zʋʋ, wʋ yi a ‑sɩbhä 'zʋ.

Sɛ'ɛ Zezwii gbää Lagɔ a libhonʋnyɔ a dɛ

7A gla'mö a nɩkpɛ ‑kä libhonʋnyɔ ‑kä, libhonʋnyɔ 'la, ɔ ‑kä libho 'mö 'bhöö, ɛ yi 'kwlɛlibho oo, 'bhila ɔ yi ‑gänɩɛ 'bhöö oo, ɔ ‑kä yii, ɔ 'bhidɩba yi bhä nɩɩ: 'Päpanɩ 'wʋ ‑n 'kä yi, ‑a 'kä li, ɔ yi bhä ‑sɩbhä nʋ ‑a? 8N'nn, ɔ 'naa 'kä ‑sɩbhä nʋ. ‑Maa, ‑mɔ'la ‑kä glɔ ghlɛ cuu, sɛ'ɛ ɔ 'kɔɔ 'dɩ 'nyɛ nɩɩ: Pi na lile. ‑N ‑kä pi 'wëë, gïganɩ ‑nanyɩ 'wlu, ‑n ‑nyɛ lilea 'kä yi, n ‑kä li dɔ'wʋ ‑wʋʋ, n ‑kamö tie. N ‑käa'a na a li 'wëë, ‑n 'kä bhäla li. 9Ɔ ‑kä sa'a libhonʋnyɔɔ 'dɩ 'nyɛ, 'n ɔ ‑kä ‑sɩbhä 'zʋʋ, 'bhidɩbaa 'naa 'kɔ ‑sɩbhä a za bhälɩ. 10Abhʋa Lagɔ 'a libhonʋwaa, ‑sɩbhä 'a wɛlɩɩ ‑wʋmöä. Zaa, sɛɛ Lagɔ nyanyɩɛ 'dɩɩ, a ‑kä ‑sɩbhä 'zʋ 'wëë, a nɩ nʋ nɩɩ: Lagɔ a libhonʋwa a 'yize ‑a glɩnɩɛ. 'Saa ‑a kä a‑a ‑a 'kä nʋʋ, mö ‑a nʋä da'a.»

Zezwii yɛ 'zlalɩbhäwa kʋgbä yɛmanɩ

11Zezwii ‑wʋ ‑mä Zeluzalɛɛmö mö dɔ'wʋ, 'n ɔ yiɛ ‑lɛ Galilee‑bhölɩɩ ‑nyɛ Samalii‑bhölɩɩ 'sɔ a ‑känɩdɛ 'wʋ ghlɛ. 12Lɛ a glɔ ‑bhlʋ 'mö, ɔ lɛ 'kä ‑mä plɛ, 'n nɩkpa kʋgbä yoo gbanɩɛ yi. Nɩkpa 'la, zlaa lɩbhʋää zaa, wa 'nɩgbö 'yuku, 13'n wa yiɛ 'mö 'kpa, wa lɛ naa: «‑Atʋ Zezwii aaa, 'pä ‑aa ngäzɩdlɩ aaa!» 14Zezwii 'yuëë 'ylɩmöö, ɔ lɛ naa: «A nɩ ghlɩ ‑mä Lagɔbʋbɔwaa, wa 'kanyɩ 'ylɩmö.» Nɩkpa 'la 'n wa yiɛ mö. Wa ‑wʋ mö dɔ'wʋ, wa lɛ zʋ a sɛ'ɛ cuu, wa yɛ yɛmanɩ. 15‑Maa wa gla'mö a ‑nɔ ‑bhlʋ, ɔ yɩbhlɩnɩɛ sɛ nɩɩ, ɔ yɛ yɛmanɩɩ, 'n ɔ yiɛ 'wlu sɩbhä, ɔ ‑wʋ Lagɔ a 'nglɩ 'ghlimanɩ dɔ'wʋ 'n ɔ yiɛ Zezwii yɔwʋ 'bɩwʋ mö. 16Ɔ ghlɛɛ ‑lɛ, 'n ɔ yiɛ ‑lɛ ɔ dlɩ 'mö 'klʋ glu 'pä, ɔ lɛ naa: «‑Atʋ ‑ayo, ‑ayo ‑këë.» ‑Maa nɩkpɛ 'la ‑ɔ 'ghlimanɩɛ ‑sɩbhä Lagɔ a 'nglɩɩ, Samalii a nɩkpɛ ɔ glɩnɩɛ. 17-18Zezwii 'yɩɛ ‑sɩbhä 'ylɩmöö, ɔ lɛ naa: «Nɩkpaa ‑wa yɛmanɩɛ, wa'a bhä kʋgbä ‑bhli ‑a? Zaa, ‑muë'la ngbï‑mʋäna ‑kpɔ 'naa? Nɩkpɛ nɩ ‑ɔɔɔ Yizlaɛlɩ 'a ngëyii 'mö a ‑nɔ glɩnɩɩ, ɔ 'yize mɔɔ yi bhä Lagɔ a 'nglɩ 'ghlimanɩɛ ‑a? 'N ‑muë'la wabhlɩ 'naa?» 19'N ɔ yia'aa nɩkpɛɛ 'dɩ 'nyɛ nɩɩ: «‑Sɔ 'wʋ ‑n 'kä mö. ‑Maa sɛ ‑n 'tɛɛnɩɛ Lagɔ dlɩ a za, ‑n yɛ 'pʋ.»

'Pɩwʋ mää Lagɔ 'kämanɩɛ a 'yliwlʋnɩtɛnyɩ

(Matie 24.23-28,37-41)

20'Ylɩ ‑bhlʋ 'mö, Falizɩɛwaa mʋa 'yɩbhää Zezwii nimï, wa lɛ naa: «‑Zlɩmɛ 'pɩwʋ mää Lagɔ 'kämanɩɛ 'kä bhä 'yli 'wlʋnɩ? Nyɩanyɩ 'dɩ.» Ɔ lɛ naa: «'Pɩwʋ mää Lagɔ 'kämanɩɛ ‑kä 'yli 'wlʋnɩɩ, nɩkpabhë 'naa 'kä ‑mä 'ylimö 'ylɩmönɩ. 21'Pɩwʋ mää Lagɔ 'kämanɩɛ ‑kä 'yli 'wlʋnɩɩ, wa 'naa 'kanyɩ 'dɩ 'nyɛ nɩɩ: A yi, ‑maa wʋ yɛ ‑lɛ 'yli 'wlʋnɩ. Wa 'naa 'kanyɩ'ɛ 'dɩ 'nyɛ nɩɩ: A nɩ mö mä'a, ‑maa 'pɩwʋ mää Lagɔ 'kämanɩɛ yɛ ‑mä 'yli 'wlʋnɩ. ‑Maa a'bhï a nɩ yɩbhlɩnɩ sɛ nɩɩ, 'pɩwʋ mää Lagɔ 'kämanɩɛ ‑wʋ mä'ä a jijo'wʋ.» 22'N ɔ yia'aa 'ɔ ‑gänɩwaa 'yi gö, ɔ lɛ naa: «'Tɛnyɩ ‑mɛmɛɛ yi ghlɛ, dɛ a 'kää nɩɩ: ‑A yɩbhä a nyɩasɛ, Nɩkpɛ a 'Yu, 'ɔ 'kämanɔɔ, ‑a 'kʋ ‑bhlɛ zɩ'ɛ a 'yize 'ylɩmö. ‑Maa a 'naa 'kʋ 'ylɩmö. 23‑Lɛ a 'tɛnyɩ 'la 'mö ‑mumuë yeanyɩ 'dɩ 'nyɛ nɩɩ: A nɩ yi, ‑maa Puënyɔɔ Lagɔ ‑sɛɛ ‑lɛ, mɔɔ mä'ä. ‑Mumuë yi'ɛ nɩɩ: A nɩ mö mä'a, ‑maa ɔ ‑wʋ ‑mä. Wa ‑kä ‑sɩbhä nʋʋ, a nɩ tuë 'yukwli ‑pʋnɩ. 24‑Maa Nɩkpɛ a 'Yu, 'ɔ yiyizlɩɩ ‑kä ghlɛɛ, sɛɛ ‑gbägbadɛ a 'dɛlɩ ngla'ɛ zlɩ 'wuë 'wʋʋ, ‑sɩbhä nɩkpa 'wuë 'kɔɔ 'ylɩmö. 25‑Mi'la 'wuë yɩ yi 'yli 'wlʋnɩ. ‑Maa ‑sɩkaa a nɩkpaa 'maa 'kɔ nimï ‑sɛ, ɔ 'maa 'kä 'zwɩ a ‑bɛ zi 'wë, 'n yɩ 'kää bhäla 'yli 'wlʋnɩ. ‑Sɩbhä Lagɔ 'yɩbhɩɛ. 26‑Maa Nɩkpɛ a 'Yu, ɔ ‑kä yie yii, sɛɛ nɩkpaa zʋ a‑a Nowee a 'tɛnyɩ 'möö, ‑sɩbhä wa 'kää 'zʋ. 27Nowee a 'tɛnyɩ 'mö a nɩkpaa, lililibho, nʋnɩmälibho, nglʋkwälibho, ghïlamölibho, 'mö wa kä a‑a. Sa'a ‑këë 'n Nowee yiɛ 'gɔlʋ 'kɔdʋʋ ‑wʋ 'kä ‑bhɩɛɛ ‑buduu zɛmö bhɩɛ, 'n ɔ yiɛ ‑mä plɛ. 'N 'nyizakwëa yiɛ nɩkpaa zɛmö ‑vu, a ‑wʋ lɩbhä dɔ'wʋ ‑këë 'n nyuu yiɛ 'bhlɩbhëa 'wʋ yie 'n wʋ yiɛ wa 'wuë 'yli bhɩa. 28Sɛ ‑bhʋlʋ ‑kpɔ 'la, Lɔɔtɩ a 'tɛnyɩ 'mö a nɩkpaa, ‑sɩbhä wa 'zʋmö a‑a. Lililibho, nʋnɩmälibho, 'pɛlʋpälibho, pɩapɩalibho, glʋglʋlibho, ‑bïdisɩbhälibho, 'mö wa kä a‑a. 29‑Maa ‑zlɩ Lɔɔtɩ ‑sɔɔ 'wʋ 'n ɔ yiɛ ‑mä Sodɔɔmö a ‑glɔɔ 'mö 'wlʋʋ, ‑kosu 'kɔdʋ 'bhöönɩ ‑mä ghäyɩ 'wʋ, 'n wʋ yiɛ ‑mä ‑glɔ 'la 'mö sɛ 'sulo, 'n wʋ yiɛ ‑mä a nɩkpaa 'yli bhɩa. 30Nɩkpɛ a 'Yu, ɔ ‑kä zɩla'a 'yli 'wlʋä yii, sɛ ‑bhʋlʋ ‑kpɔ 'la ‑sɩbhä nɩkpaa 'kää 'zʋ.

31‑Maa ‑ɔ ‑kä ‑lɛ 'ligbë 'mö glɩ 'n ‑lɛ a 'tɛnyɩ 'la ‑kä ghlɛɛ, ɔ nɩ tɩ ‑mä ‑budu 'mö plɛ, ɔ nɩ tɩ 'ɔ ‑lii kie mö 'wë, ‑maa ɔ nɩ futo cuu. 'N ‑ɔ ‑kä'ɛ 'lagblɛ 'mö ‑wʋ, 'n ‑lɛ a 'tɛnyɩ 'la ‑kä ghlɛɛ, ɔ nɩ tɩ ‑glɔ 'mö yi 'wë, ‑maa ɔ nɩ futo cuu. 32Lɔɔtɩ 'lɛnglɛ a da, 'a dilaa nɩ bhlinɩ ‑lɛ. 33Sɩbhä a za n gbää nɩɩ: ‑Ɔ ‑kä 'ɔ pɩwʋʋ 'wʋ gwɩ ɔ 'käa 'pʋ a za‑a, mɔɔ 'kää 'yli bhɩɛ, ‑maa ‑ɔ ‑kä ɔnyɩ dlɩ ‑sɛ ɔ 'kä na gbʋ 'mö 'kuu, ɛ nɩkpɛ 'la mɔɔ 'kää 'pʋ.

34Zlɩ 'la a sabʋ, nɩkpa 'sɔ wa yi ‑bhɛlɛ ‑bhlʋ 'wʋ pö, wa yi ‑bhlʋ 'wʋ 'libhï, ‑mɔ'la yi ‑lɛ tʋʋ. 35'Ngwlɩ 'sɔ wa yi libhï dɔ'wʋ ‑wʋ, wa yi ‑bhlʋ 'wʋ 'libhï, ‑mɔ'la yi ‑lɛ tʋʋ. [36Nɩkpa 'sɔ, wa yi 'lagblɛ ‑bhlʋ 'mö ‑wʋ, wa yi ‑bhlʋ 'wʋ 'libhï, ‑mɔ'la yi ‑lɛ tʋʋ.]» 37Zezwii 'nyɛɛ sa'a 'ɔ ‑gänɩwaa 'dɩɩ, 'n wa yoo nimï 'yɩbhä, wa lɛ naa: «‑Alowli, ‑li 'la 'wuë, dɛ yɩ 'kä bhä 'wʋ 'plɩnɩ?» Zezwii lɛ: «Wa lɛ naa, dɛɛ ‑gäzɛ pöä, ‑lɛ kökaa yɩbhää 'wlu.»

S'ha seleccionat:

Lwiikö 17: bet

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre BdG2

Lwiikö 17

Versets bíblics populars de
Lwiikö 17

Escolta Lwiikö 17

La Bíblia:

Bété, Guiberoua

Versió: BdG2 - bet

Lwiikö 17

Lwiikö 17

Versets bíblics populars de Lwiikö 17

Escolta Lwiikö 17

La Bíblia:

Bété, Guiberoua

Versió: BdG2 - bet

Lwiikö 17

Versets bíblics populars de
Lwiikö 17