Lwiikö 18

'Kuzlenglɔɔ ‑nyɛ ‑zijlitunyɔɔ 'sɔ a ninea

1Zezwii gbää sa'a 'ɔ ‑gänɩwaa a dɛ 'wëë, 'n ɔ yuëë 'nine 'pänɩ ɔ 'kʋä 'dɩ 'mö zʋ nɩɩ, Lagɔ a bhibhebhibhe dɔ'wʋ, swɩ nɩ tuë 'kwädlɩ yɔwʋ 'kunɩ. 2Ɔ lɛ naa: «‑Zijlitunyɔ ‑bhlʋ mɔɔ ‑wʋä glɔ ‑bhlʋ 'mö, ɔ gbʋ 'nɩɛ Lagɔ 'mö ‑wʋ, ɔ'ɔ 'zʋ nɩkpɛ 'klʋkpamö. 3‑Maa 'kuzlenglɔ ‑bhlʋ ‑wʋ a 'yɛ ‑mä. Nglɔ 'la, ‑bi 'wʋ wa nɔɔ wɛlɩ ‑bhlʋ 'mö. Yɩ za ɔ 'tʋtʋnɩɛ ‑mä ‑zijlitunyɔ 'la a ma 'mö, ɔ 'kɩ 'mö ‑dɩnɩ. 4‑Maa sɛ ɔ 'plɩplɩnɩɛ sa'a ‑mä 'mö 'yize, ‑zijlitunyɔ 'nɩ yiloo 'klʋ. Sa'a ‑këë, 'n ‑zijlitunyɔ a'bhë yia'aa nɩɩ: 'Ɔ! ‑Tiamö abhlɩ, Lagɔ a 'bɛyɩ, na gbʋ 'nɩɛ ‑mä ‑wʋ, n'n zʋ'ɛ nɩkpɛ 'klʋkpamö. 5‑Maa 'kuzlenglɔ nɩ, 'nyɩɛ ɔ yɔlɔaa tenyii zaa, 'ɔ wɛlɩɩ n 'kɩɛ ‑ka 'klʋ yɩlɩ n 'kɩ 'wlu ‑dɩ. ‑Maa 'n n 'nɩ ‑sɩbhä 'zʋʋ, mä'ä ɔ 'kää 'mö 'tʋtʋnɩ 'yize, ɔ ‑tɩɩa'a na a bhäla gbʋ 'wʋ sɛ bhlɩ.» 6-7‑Lɛ yɩ ‑gömö, 'n ‑Alowli yi'ɛɛ nɩɩ: «‑Zijlitunyɔ 'la ‑ɔɔɔ ɔbhlɩ 'mö zlɔnɩɩ, ɔ yɩlɩ'ɛ nglɔ 'la a wɛlɩɩ 'klʋʋ, mɛɛ 'kä zi'e Lagɔ ‑ɔ zlɔnɩɛ 'mö, ɔ ‑nʋa ɔ ‑sɛɛ ‑lɛ, wa nʋä 'kwädlɩ mä'ä dʋdʋ 'wʋ ‑bi 'wʋ, 'n wa 'winɔɔ zila 'wuë 'mö 'möö, mɔɔ 'naa 'kä bhä wa wɛlɩ 'klʋ yɩlɩ ‑a? ‑Maa ɔ 'kʋä 'wʋ yi a dɔ'wʋ, a pä bhä dlɩ nɩɩ, ‑lɛ 'mö a 'kä bhä gwälɛ ‑a? 8N nyanyɩ 'dɩ nɩɩ: Ɔ 'kʋä 'wʋ yi ɔ 'kʋä ‑li 'la 'wuë ngli ‑sɛ a dɔ'wʋ, ‑lɛ 'naa 'kä 'mö gwälɛ. ‑Maa nɩkpɛ a 'Yu ‑kä yii, nɩkpa a ‑muëë 'tɛɛnɔɔ dlɩɩ, ɔ yuë bhä mä'ä dʋdʋ 'wʋ ghlɩ ‑a?»

Falizɩɛyii ‑nyɛ lapoomoni a 'wʋbhlinyɔɔ 'sɔ a ninea

9Nɩkpa ‑mumuë, ‑wa pää dlɩ nɩɩ, wa ‑gä wabhlɩ kɛ Lagɔ a 'yila 'klʋ a dɔ'wʋ, 'n ‑wa flanɩɛ ‑sɩbhä a za wa 'bhɩa 'ylimöö, wa za Zezwii 'pää nine nɩ. 10Ɔ lɛ naa: «Nɩkpa 'sɔ mʋa ‑wʋä ‑lɛ. ‑Mɔ ‑lɛ Falizɩɛyi, ‑mɔ ‑lɛ lapoomoni a 'wʋbhlinyɔ. Wa 'sɔ ‑kpɔ mʋa möä ‑mä Lagɔbudu 'Kɔdʋʋ 'mö, wa 'kä Lagɔ bhibhe. 11Falizɩɛyii, ɔ 'nɩgbönɩ ghäyɩ 'n ɔ yiɛ Lagɔ bhibhe, ɔ lɛ naa: ‑Atʋ Lagɔ, n bhälɩmö. Nɩkpa ‑muë'la 'wuë ‑wa ghliɛ 'wii, ‑waaa ‑kpöö 'wʋ ‑wʋʋ, ‑wa glɩnɩɛ nglʋsɛtɛlɩwaa, sɛ n'n‑ä wa saa ‑wʋ, ‑sɩbhä a za n bhälɩmö ‑këë. Lapoomoni a 'wʋbhlinyɔɔ ‑ɔ 'nɩgböä mä'ä na nimï, sɛ n'n‑ä ɔ sɛ a 'nyinylolinʋnyɔ glɩnɩ a za, Lagɔ, ‑ayo ‑këë! 12'Dimasi ‑bhlʋ 'mö, n plɛnɩ 'wʋ 'sɔ su. 'Saa 'wuë n ghlɩɛ, n ‑kɩɩ zɛlɩ 'yize a kʋgbänanɩɩ, 'mö n libhïä 'wʋ, 'n n nyɩamiɛ. 13‑Maa lapoomoni a 'wʋbhlinyɔɔ, ɔ 'nɩgbö ‑mä nimï nimï, ɔ ‑glɛ 'wlu glu, 'n ɔ yiɛ kɛ sɛ bhlɩ, 'n ɔ yiɛ Lagɔ bhibhe, ɔ lɛ naa: ‑Aa‑a! ‑Atʋ Lagɔ, n bhiamö, 'pä na ngäzɩdlɩ, ‑maa 'nyinylolinʋnyɔ n glɩnɩɛ. 14‑Maa n nyanyɩ 'dɩ nɩɩ, ɔ bhibhee ‑sɩbhää, Lagɔ a 'yila 'klʋ a dɔ'wʋ, ɔ yɛ 'mö zlɔmanɩ 'wë, 'n ɔ yiɛ 'ligbë 'mö mö. ‑Maa Falizɩɛyii ɔbhlɩ, Lagɔ a 'yila 'klʋ a dɔ'wʋ, ɔ'ɔɔ 'mö zlɔmanɩ 'lɩlɩlɩ. ‑Sɩbhä a za n gbää nɩɩ, ‑ɔ ‑kä ɔnyɩ 'kɔdɔ 'mö 'wʋ 'libhïï, Lagɔ yo dʋdʋ 'wʋ ‑lɛ. ‑Maa ‑ɔ ‑kä ɔnyɩ 'tikëyi 'mö 'wʋ 'libhïï, 'mö Lagɔ 'kää 'kɔdɔ 'wʋ 'zʋa.»

Zezwii yɛ 'yuë 'tikïyiea 'nyu 'pä

(Matie 19.13-15; Maakö 10.13-16)

15'Ylɩ ‑bhlʋ 'mö, nɩkpa ‑mumuë mʋa ‑lɛmöä Zezwii 'wa 'yuë 'tikïyiea, ɔ 'kʋä kätɩkpö 'wlu zʋ ɔ 'kuä 'nyu 'pä. ‑Maa 'ɔ ‑gänɩwaa 'yɩɛ nɩkpa 'la 'ylɩmöö, 'n wa yuëë 'lʋnɩ. 16‑Maa Zezwii, ɔnyɩ ɔ wäzɩnɩɛ 'yuë 'tikïyiea yɔwʋ, ɔ lɛ naa: «A nɩ ‑sɛ yuëa kɛ yɔwʋ, wa ‑kaa yɔwʋ yi, ‑maa a nɩ tuë 'yio 'wʋ ‑sɛ. Ɛ'ɛ ‑bhö nyɩasɛ, ‑maa nɩkpa a ‑muëë ‑wʋä wa saa, 'pɩwʋ mää Lagɔ 'kämanɩɛ, mʋa 'kää ‑mä 'bhle ghlɩ. 17‑Tiamö n nyanyɩɛ dɛ'ɛ 'dɩ nɩɩ, ‑ɔnyɩ dlɩɩ 'nɩ 'yu a ‑nɛ a sɛ 'zʋ, 'pɩwʋ mää Lagɔ 'kämanɩɛ, ɔ 'naa 'kä ‑mä 'bhle ghlɩ 'lɩlɩlɩ.»

Wʋlʋnɩnyɔɔ a wɛlɩɩ

(Matie 19.16-30; Maakö 10.17-31)

18'Ylɩ ‑bhlʋ 'mö, Zwiiföyi 'kɔdɔ ‑bhlʋ mɔɔ ghlɩɛ ‑mä Zezwii 'n ɔ yoo nimï 'yɩbhä, ɔ lɛ naa: «‑Atʋ ‑ɔ ‑gä kɛ, n bhiamö, 'pɩwʋ mää 'naa 'kää 'yli bhɩɛ, sɛ n 'kää 'zʋ 'n n 'kää ‑mä ghlɩɩ, sʋlʋnɩɩ ‑sɩbhä.» 19Zezwii lɛ naa: «'Saa ɔ n laa ‑ɔ ‑gä kɛ? ‑Ɔ 'kää kɛ ‑gää, ɔ'ɔɔ ‑bhölɩ 'n ɛ 'nɩ ‑bhö Lagɔ a 'yize mɔɔ. 20‑N ‑yi Lagɔ 'a Gböö. Lagɔ lɛ naa: Tɩ ‑na 'li a 'nglɔ sɛ tɛlɩ, tɩ ‑na 'li a 'luwli sɛ tɛlɩ. Tɩ 'ku 'lɩbhä. Tɩ ‑na 'li a ‑lu 'wi ghli. Tɩ ‑na 'lilɛ gbʋ ‑gömö 'pä. 'Zʋ ‑na dɩba ‑nyɛ ‑na ‑da 'sɔ 'klʋkpamö.#18.20 Ɛzoodɩ 20.12-16; Detlenɔɔmö 5.16-20.» 21Nɩkpɛ lɛ naa: «‑Atʋ, tɛɛnɩ ‑mä 'na 'yuëda 'wʋ ‑këë zɩ'ɛ, ‑mi'la 'wuë 'klʋkpamö n zwiɛ.» 22Ɔ gbää sa'aa, Zezwii lɛ naa: «‑Lu ‑bhlʋ mʋʋ tʋʋmöä ‑mä. Mö, ‑lii 'wuë ‑n kää ‑n 'kɩ 'pɛlʋ 'pä, ‑n 'kä yɩ moni 'pʋäwa dilanɩ, ‑maa ‑mä Lagɔ yɔwʋ ‑n yi ‑mä wʋlʋnɔ ghlɩ. ‑N ‑kɩɩ 'pɛlʋ 'pä 'wëë, yi ‑n ‑kaa ‑gänɩ.» 23Zezwii 'nyɔɔ sa'a 'dɩɩ, 'n yɩ yoo tenyii swɩ yɔwʋ 'kuanɩ. Ɛ'ɛ ‑bhö nyɩasɛ, ‑maa 'ɔ lɩɩ ɔ kää, tenyii yɩ ‑zuä.

24Zezwii yɩbhlɩnɩɛ ‑sɩbhä, ɔ lɛ naa: «Nɩkpa a ‑muëë wʋlʋä, 'pɩwʋ mää Lagɔ 'kämanɩɛ wa 'kä ‑mä 'bhle ghlɩ a dɔ'wʋ, 'nyɩɛ yɩ 'tɛɛ 'mö! 25Sɛ'ɛ n gbää nɩɩ, 'n nɩmɛgwli ‑kä a 'sayi a ‑dʋ 'mö ghlɛnɩɛ yii, 'pɩwʋ mää Lagɔ 'kämanɩɛ, lɩkänyɔ yia ‑mä 'bhle ghlɩ.» 26Zezwii gbää sa'aa, ‑wa ‑pʋnɔɔ a‑a 'yukwli, wa lɛ naa: «'Ɔ! Zaa, sa'a yɩ ‑kä 'mö ‑wʋʋ, ‑ɔ 'kä bhäa'a 'pʋ 'nɩ?» 27Zezwii lɛ naa: «'Saa 'tɛɛnɩɛ nɩkpɛ kɛ'mö tenyii, Lagɔ a dɔ'wʋ yɩ'ɩɛ 'mö 'tɛɛ 'lɩlɩlɩ.»

28Ɔ gbää sa'a 'wëë, 'n Piɛlɩ yiɛ gbʋ ‑dɩ, ɔ lɛ naa: «‑Atʋ, yɩɛ, ‑na za ‑a yɛ ‑abhlɩ ‑a'a ‑lii 'wuë kɛ'mö ‑sɛ, a‑a ‑nyɛmö ‑bhlinɩa'aa 'wʋ.» 29Zezwii lɛ naa: «‑Tiamö n nyanyɩɛ dɛ'ɛ 'dɩ nɩɩ: Nɩkpɛ a ‑mɔɔ ‑kä 'ɔ 'pɩwʋ a ‑lii kɛ'mö ‑sɛ, ɛ yi 'ligbë oo, ɛ yi 'nglɔ oo, ɛ yi ‑daayuë oo, ɛ yi ‑lowluwa oo, ɛ yi 'yuë oo, ‑ɔ ‑kɩɩ kɛ'mö ‑sɛ 'pɩwʋ mää Lagɔ 'kämanɩɛ a za‑a, 30ɛ nɩkpɛ 'la, Lagɔ yo mä'ä dʋdʋ 'wʋ ‑li a ‑bɛ 'nyɛ 'wë, 'n ɔ yo'ɛ zɩla'a 'pɩwʋ mää 'naa 'kää 'yli bhɩɛ 'nyɛ.»

Zezwii yɛ'ɛ 'ɔ 'kwiea ‑nyɛ 'ɔ gluwlʋwlɛɛ 'sɔ a dɛ bhïla

(Matie 20.17-19; Maakö 10.32-34)

31'Tɛnyɩ ‑mɛmɛɛ ‑bhlʋ ghlɛɛ, 'n Zezwii ‑nyɛ 'ɔ ‑gänɩwaa kʋgbä'sɔ ‑kpɔ yiɛ cɩɔnɩ, 'n ɔ yuëë 'dɩ 'nyɛ, ɔ lɛ naa: «A yɩɛ, ‑mä Zeluzalɛɛmö ‑mä ‑a ‑wʋä dɛ'ɛ mö dɔ'wʋ. ‑Maa ‑a ‑kä ‑mä ‑wʋʋ, wɛlɩɩ 'wuë Lagɔ 'a 'möbhïlanɩwaa 'cɛlɩ a‑a Nɩkpɛ a 'Yu a dɛɛ, mɩɩ 'kää 'yli 'wlʋnɩ. 32Lɛgäwaa, ‑waaa Lagɔ ‑yi, 'mö wa 'kɔɔ kä'mö plɩnɩ. Mʋa 'kɔɔ nɛpɔ, wa 'kɔ 'dɔ 'klʋ ngwla, wa 'kɔ ‑di zia, 33wa 'kɔ 'sɛlɩ, wa 'kɔ 'lɩbhä ɔ 'kä 'ku. ‑Maa ɔ ‑kä 'ku 'wë a ylɩɩ a tanɛɛ 'mö, ɔ yi glu 'wlʋ.» 34‑Maa wɛlɩ 'la 'wuë, wa 'niɛ 'mö 'nʋ. 'Saa 'wuë ɔ gaaa, wa 'niɛ zɛmö yɩbhlɩnɩ 'lɩlɩlɩ.

Zezwii yɛ 'kukwlekänyɔ yɛmanɩ

(Matie 20.29-34; Maakö 10.46-52)

35‑Mä Zeluzalɛɛmöyio 'wʋ a ‑glɔɔ wa laa Zelikoo, Zezwii lɛ 'kää ‑mä plɛɛ yii, ‑lɛ 'yio yɔwʋ, 'kukwlekänyɔ ‑bhlʋ glɩ ‑lɛ. Ɔ zɛla 'plɩplɩwa moni. 36Nɩkpɛ 'la, ɔ 'nʋä nɩkpa a ‑jijii, ɔ lɛ naa: «'Ɔ! 'Saa ‑gëbë gbä bhä 'nɩ?» 37'N wa yoo 'dɩ 'nyɛ nɩɩ: «Nazalɛɛtɩ a Zezwii mɔɔ plɩɛ.» 38Wa 'nyɔɔ ‑sɩbhä 'dɩ cuu, ɔ lɛ: «Daviidɩ a 'yu a 'yu Zezwii aa, yɩlɩ na ngäzɩklʋ 'mö aa!» 39Ɔ 'kpaa sa'a 'möö, ‑wa ‑gää 'yuku, 'n wa yoo 'wʋ nylanɩ, wa lɛ: «'Pä ‑lɛ nuë!» ‑Maa ‑sɩbhä ɔ kpaa tenyii 'mö 'yize, ɔ lɛ: «Daviidɩ a 'yu a 'yu aa, yɩlɩ yɩ na ngäzɩklʋ 'mö aa!» 40'N Zezwii yiɛ 'nɩgbö. Ɔ lɛ naa: «A ‑la'mɔɔ ‑ka.» 'N wa ‑nyɔɔ yiɛ yi. 'N Zezwii yoo nimï 'yɩbhä nɩɩ: 41«'Saa ‑n yɩbhä bhä n nɩ nʋ ‑na dɛ?» Ɔ lɛ naa: «‑Atʋ, n bhiamö, ‑dɩ 'na yilaa.» 42Ɔ lɛ naa: «Sɛ ‑n 'tɛɛnɩɛ Lagɔ dlɩ a za, ‑n yɛ yɛmanɩ. Zaa, ‑na'a yilaa nɩ do.» 43'Kukwlekänyɔɔ lɛ zʋ a sɛ'ɛ cuu, 'ɔ yilaa yɛ do. Zezwii ‑wʋa'aa mö dɔ'wʋʋ, 'n ɔ yoo 'bɩwʋ bhlinɩ, ɔ 'ghlimanɩ Lagɔ a 'nglɩ. Nɩkpa 'wuë, wa 'yiɛ 'ylɩmöö, 'n wa yiɛ Lagɔ a 'nglɩ 'ghlimanɩmö.

S'ha seleccionat:

Lwiikö 18: bet

Subratllat

Comparteix

Copia