Lukas 13
13
Ba Galiléa tse bo zwite yub là. Tuba' Siloé
(Yoha. 8.24)
1Tsemo' benntùn se' be num yen ngelaṅ nà, nsoṅ Yésu nu num tshen ba Galiléa là tse Pilato zwite yube, ntamte lem tshob num tshob tshu nele'te Nsi là. 2Yésu bùnte ntshob bo ndù: Bin kwate ndù tshen ba Galiléa là, mba bo na' njen nge' ndùlala là, ba ben kebwô ntshùa tsemo' ba Galiléa ké? 3Me tshob bin ndù nga; là, a be ze bin ke' kaṅ ntù tsin nà, mba mba bin nsi bi be ndaṅndaṅ.
4Bin bèn nkwate mba ndù ben ntshob fom gham tse tuba' Siloé na' ngwù nzwite yub là na' mb'a ghantsha ntshùa ba Yérusalém bo tù' là ké? 5Me tshob bin ndù nga; là, a be ze bin ke' kaṅ ntù tsin nà, mba mba bin nsi bi be ndaṅndaṅ.
6A tshob yen tànkùt li ndù: Mo' mèn lo ghù tù mbatsi ntùm nà i, nèn nediag ntàm mi ke fon sàm ju. 7A tshob ngafa' ndù: Tshù, a ndonni ngu' tat mba me be nse' ndiag ntàm tù li ke fon nà; keb i, numke a nke ntshètte dù' banban à? 8Ngafa' bùnte ntshob yi ndù: Tshùaben, bèn mfaṅ i là mba num yen ngu'njù li, me nsi tswe' tun i diaṅ bume, naṅ mbètmbwe bwe. 9Mo' ndù a nsi be be ndù mànjam a yame; a be z'a ke' yam nà, k'o nkeb i.
Mba Yésu yate ngokèt lé'njù Sabbat là
(Mat. 12.9-13; Luk. 14.1-6)
10A lo be mum lé'njù Sabbat, Yésu nke ntswite ntùm mo' sinagogue. 11Mo' mènnzwi lo be bwe ndù a ghù mo' ywèt ts'a na' ndo' i ngù nke'kèt yi tà fe ngu' ntshob fom gham nà. A lo ṅam i, k'a ke ku' nebù' wul i ntsin ndaṅndaṅ. 12Yésu lo be yen i ntsiaṅ i ntshob yi ndù: Mènnzwi, lo' o mi. 13A yab mbu mi num i. Be ngelaṅ mbile, a tsin ndaṅndaṅ, ngamte Nsi. 14Là #Netu. 20.9-10; Neb. 5.13-14ngalôte sinagogue ya ntù mba Yésu yate mèn lé'njù Sabbat là, bùnte ntshob bwoṅ benntùn ndù: Lé'njù ntôg num bwe, ts'a bwô nefa' fa' bwe là; bin ke nse' ntùm tshen lé'njù là ndù bo yate zine, ke b'a lé'njù Sabbat.
15Là Tshùaben bùnte yi ndù: Ghamfùm, mba we lo netèt bin ke' be kiag mfô i ke kekwèn i lo ntùm ndà nyàm, nèn yi a nu ntse lé'njù Sabbat ké? 16Yen mènnzwi li, mo' ngon Abraham ze Satan na' nkul i fe tà ngu' ntshob fom gham nà, a lo ke bwô ndù bo kiagt'é num yen nkù tùn nà lé'njù Sabbat ké? 17Ngelaṅ a tshob yen nu li là, tuswe ko ghakeban tse, njoṅ bwoṅ benntùn fa nke ntsiaṅte num njoṅ tshu nekuni fa tse Yésu ke ngù là.
Tànkùt lag metsit nzwit tù bo tànkùt ntsha'
(Mat. 13.31-32; Mark. 4.30-32)
18Yésu lo ke ntshob ndù: Nufen Nsi fut'a ke? Be me fà mfi' i à num ke? 19A fut'a lag mo' metsit tù se mo' mèn na' ndo' ma' ntùm nà i là; lag se bit, ntù' kua' ta' tù ndùb, kà nsaṅ mfe kamànyam nke mfite ntùm nkaṅ mi là.
20A bèn ntshob ndù: Be me fà mfi' nufen Nsi à num ke? 21A fut'a ntsha' ze mo' mènnzwi na' ndo' ndem ntùm mfi' mbab bàn ntat, tà nkum ngelaṅ ze njoṅ i fa ko' là.
Nzendà z'a fét là
(Mat. 7.13-14,21-23)
22Yésu nke ntshùa ntùm ngô boa ntaṅla' nke ntswite. A nèn Yérusalém.
23Mo' mèn tshob yi ndù: Benntùn tse bo nsi yôg là b'a metsili ké? 24Là, a tshob bo ndù: Bin kagtùn num netsho à nzendà z'a fét là; nummbe me tshob bin ndù benntùn yàm nsi diag netsho bwe ke ku'ni.
25Ngelaṅ ze tàndà nsi lo nsi fùn nzendà là, bin nsi se' tsin njù, bèn ke ke'te nzendà, tshob ndù: Tshùaben, Tshùaben, tsho' nzendà bag. A nsi bùnte tshob bin ndù: Me ke' lèn dù' bin fe là.
26Bin nsi to' neke ntshob ndù: Bag lo jù, mbèn nu mbwe o, o bèn ntswite ntshob Nsi num tshag manze. 27A #Yobk. 6.9nsi bèn tshob bin ndù: Me ke' lèn dù' bin fe là! Bin nèn tà ngùanesà mbaṅ àm, njoṅ zin fa ghaghù nukebwô.
28Nekua' #Mat. 22.13; 25.30mba nefèt nsô nsi be yen ngelaṅ nà ze bin yen Abraham, Isak, Yakob #Mat. 8.11-12mba njoṅ ghatshob ntshob Nsi fa ntùm nufen Nsi, mbe be ndù bo ma' zin njù là. 29Benntùn yàm nsi fe bag ntumnyam, bag mbinyam, swe' tu, ko' mà ntèn, se' tswe num téblé ntùm nufen Nsi.
30Tshù, #Mat. 19.30; 20.16; Mark. 10.31tsemo' ba njam nsi kwé mbwe, tsemo' ba mbwe bèn ntshèt njam.
Mba Hèrodé ke ndiag nezwi Yésu là
(Mat. 23.37-39; Luk. 19.41-44)
31Be num yen ngelaṅ nà, tsemo' ba Férésia se', ntshob Yésu ndù: Tume, lo ntùm yen dù' li, nummbe Hèrodé tshwèt nkô nezwi o. 32A tshob bo ndù: Bin nèn ntshob tswenyàm nà ndù: Me tshwèt nta' ywètkebwô, nke miagte neyate ghangokèt sènni mba ndamnjù, a be mbatte lé'njù tat yôg sàm mi. 33Là, a bwô ndù sènni mba ndamnjù ke mbatte lé'njù lo, me bèn ntam manze nummbe a ke' ku'ni ndù sàm ngatshob ntshob Nsi kwù dù' ghua kà ke b'a Yérusalém.
34Yérusalém, Yérusalém, wù z'o num nke nzwite ghatshob ntshob Nsi, ntamte ben tse bo tum yub wù là ndoṅ nà, a yoṅ si' mba me diag netse'te bon tsho ndaṅndaṅ mba mà ngab be ntse'te bon tse tun mbàb mi, bin ke kô à? 35Tshù, #Yobk. 118.26; Yer. 22.5zin ba' a' tù' fam. Là me tshob bin ndù: Bin ke bèn neyen àm tà nkum lé'njù sen nà se bin ghù tshob ndù: Mbotni be mèn z'a tshwèt nse' num lén Tshùaben nà.
S'ha seleccionat:
Lukas 13: BMa
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Sainte Bible en Bamiléké-Medùmba © Alliance Biblique du Cameroun, 1993. All rights reserved.