Génesis 1
1
Dios tukuy imaymanata unanchasqanmanta
1Diosqa qallariyninpin hanaq pachata hinallataq kay pachatapas unancharan. 2Qallariypiqa kay pachaqa mana formayoq hinallataq mana imayoq ch'usaqmi karan. Tutayaq ch'ak limbotaqmi pakaykuran ukhu-ukhupi unukunata. Diospa Espirituntaqmi unu hawapi kay lawman waq lawman muyuran.
3Hinaqtinmi Diosqa niran:
—¡K'anchay kachun! nispa.
Chaymi k'anchay karan. 4Hinaspan Diosqa qawariran chay k'anchayqa allin kasqanta. Hinaspan chay k'anchayta tutayaqmanta rakiran. 5Chay k'anchaytan Diosqa suticharan “p'unchaw” nispa. Chay tutayaq limbotataqmi Diosqa suticharan “tuta” nispa. Hinaqtinmi tutayaykuran hinallataq achikhamuranpas. Chay p'unchawmi primer kaq p'unchaw karan.
6Chaymantan Diosqa niran:
—Unukunata rakinanpaqyá chay unukunapa chawpinpi huk ch'usaq kachun, saynapi chay unukunata chay ch'usaq rakinanpaq, nispa.
7Chaymi sayna ruwasqa karan. Diosmi chay ch'usaqtaqa ruwaran. Chay ch'usaqmi unukunata rakiran, wakin unukuna altopi kananpaq, wakin unukunataq allpa hawapi kananpaq. 8Diosqa chay ch'usaq unanchasqantan suticharan “cielo”, nispa. Hinaqtinmi tutayaykuran hinallataq achikhamuranpas. Chay p'unchawmi ishkay kaq p'unchaw karan.
9Chaymantan Diosqa nillarantaq:
—Cielopa pachanpi kaq unukuna huk hawallaman huñukuchun, saynapi ch'aki allpa rikhurinanpaq, nispa.
Saynata Dios niqtinmi sayna ruwasqa karan. 10Ch'aki kaqtan Diosqa suticharan “allpa”, nispa. Unukunapa huñukusqantataqmi suticharan “*lamar qocha” nispa. Hinaspan Diosqa qawariran chay unanchasqanqa allin kasqanta.
11Chaymantan Diosqa nillarantaq:
—Tukuy clase plantakuna kay pachapi wiñachun, mukhuyoq plantakuna hinallataq rurunpi mukhuyoq sach'akunapas, nispa.
Chaymi sayna ruwasqa karan. 12Chay allpapin wiñamuran tukuy clase plantakuna. Mukhuyoq plantakuna hinallataq rurunpi mukhuyoq sach'akunapas. Chay sach'akunaqa unanchasqa karan clasenman hinan. Hinaspan Diosqa qawariran chay unanchasqanqa allin kasqanta. 13Hinaqtinmi tutayaykuran hinallataq achikhamuranpas. Chay p'unchawmi kinsa kaq p'unchaw karan.
14Chaymantan Diosqa nillarantaq:
—Cielopi k'anchaykuna kachun, p'unchawta tutamanta rakinanpaq. Chay k'anchaykunan huk señal hina kanqa, imay tiempos, imay p'unchawsi, imay watas kasqanta runakuna yachanankupaq. 15Hinaspapas chay k'anchaykunaqa cielopiyá kachun, chaymanta allpa pachata k'anchananpaq, nispa.
Chaymi sayna ruwasqa karan. 16Diosmi ruwaran ishkay hatun k'anchaqkunata: intita p'unchawpi k'anchananpaq, killatataq tutapi k'anchananpaq. Hinaspapas Diosqa ruwallarantaqmi qoyllurkunatapas. 17Hinaspan Diosqa chay ruwasqan k'anchaykunata cielopi churaran, chaymanta kay allpa pachata k'anchananpaq. 18Diosmi chay k'anchaykunataqa churaran, p'unchawta hinallataq tutatapas k'anchaspa munaychakunanpaq hinallataq k'anchayta tutamanta rakinanpaq ima. Hinaspan Diosqa qawariran chay ruwasqanqa allinpuni kasqanta. 19Hinaqtinmi tutayaykuran hinallataq achikhamuranpas. Chay p'unchawmi tawa kaq p'unchaw karan.
20Chaymantan Diosqa nillarantaq:
—Lamar qochapi tukuy clase animalkuna kachun. Saynallataq kay pachapipas alton phawaq tukuy clase animalkuna kachun, nispa.
21Diosmi unancharan lamar qochapi kawsaq hatunkaray animalkunata hinallataq lamar qochapi kawsaq tukuy clase huk animalkunatapas. Saynallataqmi Diosqa alton phawaq tukuy clase animalkunatapas unancharan. Hinaspan Diosqa qawariran chay unanchasqanqa allin kasqanta. 22Hinaspan Diosqa chay unanchasqankunata bendeciran khaynata:
—Lamar qochapi kawsaqkuna ashkaman miraychis; hinaspa lamar qochaman hunt'aychis. Saynallataq alton phawaq animalkunapas ashkaman miraspa, kay pachaman hunt'aychis, nispa.
23Hinaqtinmi tutayaykuran hinallataq achikhamuranpas. Chay p'unchawmi pishqa kaq p'unchaw karan.
24Chaymantan Diosqa nillarantaq:
—Tukuy animalkuna clasenman hina allpa pachapi rikhurichun: salqa animalkuna, uywana animalkuna hinallataq qasqonpallan puriq animalkunapas, nispa.
Chaymi sayna ruwasqa karan. 25Saynatan Diosqa ruwaran tukuy clase animalkunata: salqa animalkunata, uywana animalkunata hinallataq qasqonpallan puriq animalkunatapas. Hinaspan Diosqa qawariran chay ruwasqanqa allin kasqanta.
26Chaymantan Diosqa nillarantaq:
—Runata ruwasunchis noqanchispa rikch'ayninchisman rikch'akuqta. Hinaspa chay runa dominachun lamar qochapi kawsaq llapallan animalkunata, alton phawaq animalkunata, salqa animalkunata, uywana animalkunata hinallataq qasqonpallan puriq animalkunatapas, nispa.
27Diosmi runataqa rikch'ayninman rikch'ayniyoqta unancharan.
Qarita warmitan unancharan.
28Hinaspan Diosqa paykunata bendeciran khaynata:
—Wawayoq kaychis; hinaspa ashkaman miraychis.
Kay pachaman hunt'aychis; hinaspa tukuy unanchasqakunata gobiernaychis.
Dominaychis lamar qochapi tukuy animalkunata,
alton phawaq animalkunata hinallataq kay allpa pachapi tukuy clase animalkunatapas, nispa.
29Hinaspapas Diosqa nillarantaqmi:
—Qankunamanmi qoykichis mukhuyoq llapallan plantakunata hinallataq rurunpi mukhuyoq llapallan sach'akunatapas. Tukuy chay plantakunamantayá mikhuychis alimentakunaykichispaq. 30Ichaqa salqa animalkunamanqa, alton phawaq animalkunamanqa hinallataq qasqonpallan puriq animalkunamanpas, tukuy kay pachapi wiñaq verde qorakunatan qoni, chaykunata mikhuspa kawsanankupaq, nispa.
Chaymi sayna ruwasqa karan. 31Chaymantan Diosqa tukuy unanchasqanta qawarispa niran: “ancha allinpunin”, nispa. Hinaqtinmi tutayaykuran hinallataq achikhamuranpas. Chay p'unchawmi soqta kaq p'unchaw karan.
S'ha seleccionat:
Génesis 1: QEAÑT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional