Génesis 13

Abram sobrinon Lotwan t'aqanakusqanmanta

1Abramqa Egipto *nacionmanta lloqsispanmi *Neguev sutiyoq lugarman riran, warmintin, tukuy kaqninkunantin hinallataq sobrinon Lotpiwan ima. 2Abramqa nishu qapaqmi karan, ashka animalniyoq, qoriyoq hinallataq qolqeyoq ima. 3Hinaspan Abramqa asta-astarikuspa Neguev sutiyoq lugarmanta asta Betel lugarkama kutimuran. Hinaspan payqa riran ñawpaq campamento ruwasqan lugarman. Chay campamentonqa karan Betelpa hinallataq Hai sutiyoq lugarpa chawpinpin. 4Chay lugarpin Abramqa ñawpaqta huk altarta hatarichiran. Hinaspan Señor Diosta yupaycharan.

5Saynallataqmi Abramwan kushka puriq sobrinon Lotpapas kallarantaq ovejankuna, wakankuna hinallataq carpankunapas. 6Chaymi chay tiyasqanku lugarpiqa mana campoqa ayparanñachu, sapankamankupa ashkallaña animalninku kasqanrayku. Chayraykun Abramqa sobrinon Lotwanqa manaña kushkaqa kaq lugarllapiqa tiyayta atirankuñachu. 7Hinaspapas Abrampa animalninkunata cuidaq runakunaqa, Lotpa animalninkunata cuidaq runakunawanmi michisqankupi pelearanku. Hinaspapas chay lugarkunapiqa tiyallarankutaqmi Cananeo runakunapas hinallataq Ferezeo runakunapas.

8Chaymi Abramqa sobrinon Lotta khaynata niran:

—Noqanchisqa familiantinmi kanchis. Chayraykun noqanchis ukhupiqa hinallataq animalninchiskunata michiq runakuna ukhupipas mana kananchu ch'aqwakunaqa. 9Qawariy, kay enteron allpan qanpa ñawpaqniykipi kashan. Chaymi qanta valekuyki t'aqanakunanchispaq. Sichus qan lloq'e lawman rinki chayqa, noqaqa phaña lawmanmi risaq. Sichus qan phaña lawman rinki chayqa, noqaqa lloq'e lawmanmi risaq, nispa.

10Hinaqtinmi Lotqa qawarispa, Jordán mayupa patanpi huk sumaq hatun pampa urayta rikuran, asta Zoar nisqa llaqtakama. Chay Jordán pampa urayqa allin riegoyoqmi karan, Edén nisqa huerta hina hinallataq Egipto nación allpa hina. Sayna sumaqmi chay Jordán allpaqa karan, Señor Dios manaraq Sodoma llaqtata hinallataq Gomorra llaqtata castigashaqtinqa. 11Chaymi Lotqa akllakuran chay Jordán mayupa patanpi hatun pampa urayta. Hinaspan Lotqa chay kasqankumanta ripuran intiq lloqsimunan lawman. Saynapin Abramqa sobrinon Lotwan t'aqanakuran. 12Hinaspan Abramqa Canaán allpapi qepakuran. Ichaqa Lotñataqmi tiyaq ripuran chay Jordán mayupa patanpi hatun pampa uyayman. Hinaspan Lotqa campamentonta armaran Sodoma llaqtapa cercanpi. 13Chay Sodoma llaqtapi tiyaq runakunaqa millay yana alma runakunan karanku. Hinaspapas chay runakunaqa Señor Diospa contranpin milla-millay huchakunata ruwaspa kawsaranku.

14Lotpa ripusqanpa qepanmanmi Señor Diosqa Abramta niran:

—Qawariy muyuriqniykikunata chay sayasqayki lugarmanta *norte nisqa lawta, *sur nisqa lawta, intiq lloqsimunan *este nisqa lawta hinallataq intiq haykunan *oeste nisqa lawta ima. 15Kay enteron allpa rikusqaykitan qanman hinallataq qanpa mirayniykikunamanpas wiñaypaq qosqaykichis. 16Qanpa mirayniykikunaqa polvo allpa hinaraqmi ashkallaña kanqa. Imaynan polvo allpatapas mana yupayta atinkuchu, saynallataqmi mirayniykikunatapas mana ni pipas yupaytaqa atinqachu. 17Kunanqa sayarispa riy. Hinaspa qawamuy chay allpata, largonta hinallataq anchonta ima. Qanmanmi chay allpataqa qosqayki, nispa.

18Hinaqtinmi Abramqa campamentonta aparikuspa, Mamre sutiyoq runapa tiyasqan lugarman riran. Hinaspan chay encinar nisqa sach'akunapa kasqan lugarpi campamentonta ruwaspa tiyaran. Chay lugarqa Hebrón nisqa sutiyoq lugarpin karan. Chay lugarpin Abramqa ruwaran huk altarta, Señor Diosta yupaychananpaq.

S'ha seleccionat:

Génesis 13: QEAÑT

Subratllat

Comparteix

Copia