Génesis 8
8
Kay pachapi qochalayaq unu ch'akisqanmanta
1Diosmi Noeymanta, saynallataq *arcapi Noeywan kushka kaq salqa animalkunamantapas hinallataq uywana animalkunamantapas yuyariran. Chaymi Diosqa wayrata wayrachimuran kay pachaman. Hinaqtinmi kay pachapi qochalayaq unuqa ch'akiyta qallariran. 2Ukhu pachamanta t'oqyamuq unupas hinallataq alto cielomanta phaqchirimuq unupas thañiranmi. Hinaqtinmi paraqa manaña pararanñachu. 3Chaymi kay pachapi qochalayaq unuqa pisi-pisillamanta ch'akiyta qallariran. Saynataqa ch'akiyta qallariran 150 p'unchaw pasaruqtinñan. 4Hinaqtinmi qanchis kaq killapi, chunka qanchisniyoq p'unchawpi, chay arcaqa huk hatunkaray orqopi takyaran. Chay orqoqa Ararat lugarpin karan. 5Unuqa astawanmi ch'akispa bajaran asta chunka kaq killakama. Hinaqtinmi chunka kaq killapi primer kaq p'unchawpi, hatun alto orqokunapa puntankuna rikhuriran.
6Noeyqa 40 p'unchaw pasaruqtinmi, chay arcapa ventananta kicharan. 7Hinaspan Noeyqa kachariran *cuervo sutiyoq phawaq animalta. Chaymi chay animalqa lloqsispa phawakacharan kay lawman waq lawman. Hinaspan ashka kutita riran; hinallataq kutimuran asta kay pachapi unu ch'akinankama. 8Chaymantañataqmi Noeyqa kacharillarantaq huk palomatapas, saynapi kay allpa pachapi unu ch'akirunñachus icha manaraqchus chayta yachananpaq. 9Chay palomaqa, kay pachapi unu manaraq ch'akisqanraykun, mana tariranchu ch'aki allpata tiyananpaq. Chayraykun chay palomaqa arcaman kutiran. Hinaqtinmi Noeyqa makinta haywariran. Hinaspan chay palomata hap'ispa arca ukhuman apayuran.
10Chaymantan Noeyqa qanchis p'unchawtawanraq suyaran. Hinaspan kaqmanta chay palomata kachariran. 11Hinaqtinmi chay palomaqa ña tardeyaykushaqtinña kutiran Noeypa kasqan arcaman, siminpi *olivos nisqa aceituna sach'apa llanllarishaq rap'inta apayukuspa. Chaymi Noeyqa yacharan kay pachaqa yaqa ch'akiña kasqanta. 12Noeyqa qanchis p'unchawtawanmi suyaran. Hinaspan kaqmanta kachariran chay palomata. Hinaqtinmi chay palomaqa manaña kutimuranñachu Noeypa kasqanmanqa.
13Noeyqa 601 watanpin kasharan. Hinaqtinmi primer kaq killapi hinallataq primer kaq p'unchawpi kay pachapi qochaq unuqa ch'akiran. Hinaqtinmi Noeyqa chay arcapa techonta kicharispa qawariran. Hinaspan rikuran allpaqa ch'akiña kasqanta. 14Chaymantan ishkay kaq killapi hinallataq 27 kaq p'unchawpi kay pachapi allpaqa ch'akiña karan. 15Hinaqtinmi Diosqa Noeyta niran:
16—Qanpas, warmiykipas, kinsantin qari wawaykikunapas hinallataq qachunniykikunapas chay arcamanta lloqsiychis. 17Orqollaytaqyá chay arcamantaqa tukuy clase kaq animalkunatapas: alton phawaq animalkunata, salqa animalkunata, uywana animalkunata hinallataq qasqonpallan puriq animalkunatapas, saynapi kay allpa pachapi miraspa hunt'anankupaq, nispa.
18Chaymi Noeyqa warmintin, qari wawankunantin hinallataq qachunninkunapiwan ima chay arcamanta lloqsimuran. 19Saynallataqmi chay arcamantaqa llapallan animalkunapas clasenman hina lloqsimuranku: alton phawaq animalkuna, salqa animalkuna, uywana animalkuna hinallataq qasqonpallan puriq animalkuna ima. 20Hinaqtinmi Noeyqa Señor Diospaq ruwaran huk *altarta. Hinaspan kay pachapi puriq ch'uya kaq animalkunamanta hinallataq alton phawaq ch'uya kaq animalkunamantawan ima hap'ispa, chay altar hawapi k'anaspa, Diosman *sacrificio ofrendata ofreceran.
21Hinaqtinmi Señor Diosqa chay sacrificio ofrendapa sumaq q'apayninta repararan. Hinaspan kikillanta khaynata nikuran:
—Runakunaqa warma kasqankumantapachan mana allin ruwaykunallapi piensanku. Ichaqa manañan runakunapa kawsanpiqa kay allpa pachataqa kaqmanta maldecisaqñachu. Hinaspapas noqaqa manañan ni hayk'aqpas kaqmantaqa kay pachapi llapallan kawsaqkunataqa chinkachisaqchu, imaynan chinkachirani saynataqa. 22Chayraykun kay pacha kanankamaqa kallanqapuni tarpuykuna, cosechakuna, chiriy tiempo, ruphay tiempo, poqoy tiempo, chiraw tiempo, p'unchawpas hinallataq tutapas, nispa.
S'ha seleccionat:
Génesis 8: QEAÑT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional