Naiˍ htangˍ 10
10
Peˍtruˆ nae Kawˉneˍliˆ awˍ lawng
1Kaeˉsaˍriˆ vengˍ hkaoˍ veu, Kawˉneˍliˆ nae maengˉ jiˉ Iˍtaˍliˍ luk suikˆ ang muˉ na upˆ peungˍ naeˍ yinˍ cangˉ htiˍ hu ca jiˉ. Yaˇ Iˍtaˍliˍ luk suikˆ ang muˉ htiˍ tap uiˉ na up naeˉ. 2Yaˇ yang beu yumˉ tawngˍ naiˍ hkaoˍ veu ang yaˍ hkyaˉ uiˉ na Hpaˍcaoˍ na hkae hkiˍ yao saˍ nyamˉ naeˉ uiˉ yaˇ. Yaˇ hao na saˍ kyaˍ kyaˍ naeˍ hkaoˉ veu ang saˍ baeˍ yaˍ na ang byaˍ tanˍ biˍ yao, Hpaˍcaoˍ kawngˉ aˉ lawˍ beun muiˉ ang buinˉ paˉ yao ca jiˉ. 3Htiˍ nuing hingˉ ngang beu, muˍ hkiˍ sumˍ naˍ riˍ veu Hpaˍcaoˍ beu buingˍ htaˍ naiˍ htangˍ htiˍ hu yuˍ paˍ yongˍ hkaoˍ veu yang kawngˉ luingˉ jiˉ na yang ya myangˉ jiˉ. Buingˍ htaˍ naiˍ htangˍ maˇ Kawˉneˍliˆ veuˉ, nae yang na haoˉ jiˉ.
4Kawˉneˍliˆ yang na maenˍ nae hu yao hkae naeˉ hkaoˉ veu, Ang suingˉ veuˉ, ba ceuˉ ha naeˇ nae naˉ jiˉ. Buingˍ htaˍ naiˍ htangˍ yang na ciˍ sangˍ jiˍ. Nang ang buinˉ paˉ tangˍ nae tanˍ biˍ jiˍ uiˉ Hpaˍcaoˍ nuing ba ceuk yao nang na cuiˍ yaˍ laˍ jiˍ. 5Ya muiˉ Yuˆpeˍ vengˍ veu changˉ na piˉ aeˉ yao, Peˍtruˆ nae haoˉ naeˉ Siˉmunˍ nae maengˉ jiˉ mangˉ na piˉ haoˉ aeˉ voˍ. 6Yaˇ cenˍ ang hkaw kuˍ naeˍ Siˉmunˍ beu yumˉ veu ca lang naeˉ yaˇ. Yumˉ hingˉ ngaˍ chaˍ maeˍ lang ba htang veu duingˉ naeˉ nae ha biˍ jiˍ.
7Yang na ciˍ sangˍ naeˍ buingˍ htaˍ naiˍ htangˍ maˇ laengˉ laeˍ yao, yang beu yaˍ cenˍ nyiˍ hu yaˉ yetˍ, yawng kawngˉ aˉ lawˍ beun muiˉ ca naeˉ luk suikˆ uiˉ hkaoˉ veu Hpaˍcaoˍ na saˍ nyamˉ naeˉ htiˍ hu mangˉ na haoˉ jiˉ. 8Awˍ lawng hkaˉ hko laˉ hko hingˉ na yang na hkai peunˉ biˍ yao, Yuˆpeˍ vengˍ veu piˉ aeˉ jiˉ.
Peˍtruˆ yuˍ paˍ yongˍ myangˉ jiˉ
9Kaˉ nawngˍ veu htiˍ nuing yawng lae yao, Yuˆpeˍ vengˍ htang veu hkeu lae jiˉ. Nuing kawngˉ kawngˉ yuing ngang beu Peˍtruˆ nawˍ ang buinˉ paˉ naeˉ nae, yumˉ ang htaˍ htaiˍ hingˍ veu ta yao lae jiˉ. 10Haeˉ mae beu, yang hangˍ baeˍ laˉ yao, hangˍ caˍ siˍ laˉ jiˉ. Hao caˍ keungˍ haenˍ yao ca beu, mae buinˉ buinˉ yaˍ jiˍ laˉ mae yuˍ paˍ yongˍ hkaoˍ veu buingˍ htaˍ hingˍ hpawng nga jiˉ na yang ya myangˉ jiˉ. 11Aˍ hpenˍ ang huiˍ laˍ mae hingˉ htiˍ lumˍ, laˍ ce hanˍ ce nae hpui yao nuingˉ chaˍ htaˍ veu poiˉ luiˍ nae na yang ya myangˉ jiˉ. 12Hingˉ hkaoˉ veu, laˍ puˍ laˍ hkuiˍ hanˍ hkuiˍ nae ca naeˉ uiˉ cenˍ ang ku hkaˉ hko laˉ hko, tawˍ yao cong yao aeˉ hkiˍ naeˍ uiˉ ang ceuˉ hkaˉ hko laˉ hko nawˍ, buingˍ htaˍ veu pyamˉ yao ha yaˍ uiˍ muiˉ ang ceuˉ hkaˉ hko laˉ hko ang ca aeˍ. 13Haeˉ mae beu, Peˍtruˆ veuˉ, hta laˉ yao saeˍ yaˍ vo nae ciˍ naeˍ ang tangˍ na yang ya kyaˍ jiˍ.
14Caˇ, Peˍtruˆ nawˍ, Ang suingˉ veuˉ, baˍ kaˍ lae taw. Tatˆ yao chiˉ jiˉ baˍ seungˍ baˍ sangˍ nae uiˉ ang chaˍ keungˍ ningˍ uiˉ ceuˉ gaˇ htiˍ cangˍ nae muiˉ baˍ caˍ myang nae ciˍ laeˍ sangˍ jiˍ.
15Htiˍ cangˍ ang tangˍ haengˍ nae ciˍ laeˍ jiˍ. Hpaˍcaoˍ piˉ seungˍ piˉ sangˉ peunˉ jiˉ kanˉ na baˍ seungˍ baˍ sangˍ nae aˍ ciˍ jo nae yang na ciˍ sangˍ jiˍ. 16Ningˉ mae sumˍ cangˍ hpeuˍ peunˍ yao, aˍ hpenˍ ang huiˍ laˍ mae hingˉ na htiˍ chitˍ laˍ hkaoˍ veu buingˍ htaˍ veu suiˍ ta laengˉ laeˍ jiˉ.
Kawˉneˍliˆ kawngˉ Peˍtruˆ hkeu lae jiˉ
17Peˍtruˆ nawˍ yuˍ paˍ yongˍ hkaoˍ veu ya myangˉ jiˉ hingˉ ba ceuˇ a tekˆ paeˍ jeuˇ nae, yang nuing ba hkaoˉ veu baˍ kuitˍ awkˍ nga laeˍ nae ca beu, Kawˉneˍliˆ caiˍ yaˍ yao lui jiˉ changˉ uiˉ aˍ, langˉ kaw htang veu hkeu lui yao, Siˉmunˍ beu yumˉ hingˉ na naˉ lui jiˉ. 18Peˍtruˆ nae ha naeˉ Siˉmunˍ nae maengˉ jiˉ mangˉ ningˉ keung veu ang ca laˍ nae yawng haoˉ yao naˉ hu jiˉ.
19Peˍtruˆ nawˍ, yuˍ paˍ yongˍ hkaoˍ veu yang myangˉ jiˉ hingˉ na kuitˆ puiˉ laeˍ beu, Ang hkawˍ laˉ yang na ciˍ sangˍ jiˍ yang. Changˉ sumˍ hu nang na saˉ langˍ ngaeˇ.
20Hta laˉ yao aeˉ bao. Nuing ba htawˇ kuitˆ nawtˆ kuitˆ nae baˍ ca jo. Yawng kawngˉ aeˉ voˍ. Aˉ mae yao nae baoˇ, ga yawng na sa luiˍ yaeˍ yaˇ nae ciˍ sangˍ jiˍ. 21Haeˉ mae beu, Peˍtruˆ changˉ hingˉ uiˉ kawngˉ lungˍ nga aengˉ yao, Gaˇ nawng saˉ yao ca naeˇ mangˉ yaˇ. Ba ceuˉ ha yao lui yaeˇ nae, yawng na naˉ jiˉ. 22Yawng ha biˍ jiˍ yang, Changˉ sui changˉ pawng, Hpaˍcaoˍ na hkae yao, Yuˉdaˆ changˉ hkaˉ hko laˍ hko yang lawng na sak seˍ hkamˉ naeˉ Kawˉneˍliˆ nae maengˉ jiˉ luk suikˆ yinˍ cangˉ htiˍ hu ang ca. Nang na yang yumˉ veu haoˉ awngˉ laˍ yao, nang beu ang tangˍ na naˉ naeˉ uiˉ saˍ laiˍ, buingˍ htaˍ naiˍ htangˍ ang seungˍ sangˉ yang na piˉ bae byaˇ nae yawng ciˍ jiˍ. 23Haeˉ mae yao, Peˍtruˆ yawng na haoˉ awngˉ yao yumˉ veu maenˍ piˉ saoˍ jiˍ.
Saw hta paenˉ laˉ yao yawng kawngˉ htuˍ yaˍ laˉ mae aeˉ jiˉ. Yuˆpeˍ vengˍ hkaoˍ veu ca naeˉ yumˉ naeˉ saˉ naeˉ changˉ uiˉ muiˉ yang kawngˉ lae jiˉ. 24Nawngˍ cangˍ nuing hingˉ ngang beu yawng Kaeˉsaˍriˆ vengˍ hkaoˍ veu hkeu lae jiˉ. Kawˉneˍliˆ nawˍ, yang beu yaˍ changˍ mawngˉ namˉ nae ang changˍ ang cumˉ uiˉ na haoˉ chawnˉ yao, yawng na tangˍ jiˍ. 25Peˍtruˆ awngˉ laˍ beu, Kawˉneˍliˆ yang na hap yuˉ yao, Peˍtruˆ tawngˍ naˍ veu bawk ngangˉ yao koˉ koiˍ jiˍ. 26Caˇ, Peˍtruˆ yang na chuingˉ hta laˉ biˍ yao, Ga muiˉ changˉ yaˇ naˇ nae ha biˍ jiˍ. 27Haeˉ mae beu, Peˍtruˆ Kawˉneˍliˆ kawngˉ hkaˍ muˍ hkai lang yao awngˉ lae beu, changˉ ang byaˍ ca chawnˉ laˉ jiˉ na ya myangˉ jiˉ. 28Peˍtruˆ yawng na ha biˍ jiˍ yang, Yuˉdaˆ changˉ htiˍ hu nae, Changˉ ceuˉ htiˍ baˍ uiˍ changˍ na baˍ upˍ, yang kawngˉ caˍ bawˍ bawˍ naeˍ na baˍ upˍ, baˍ ha cae ha yao baˍ kuingˍ lang nae yawng ang bae htaˍ yaˇ. Caˇ, aˍ sangˍ na baˍ upˍ, baˍ maenˍ nae uiˉ keungˍ, baˍ seungˍ baˍ sangˍ nae baˍ yaˍ ciˍ naeˍ uiˉ saˍ laiˍ, Hpaˍcaoˍ ga na maˍ laˍ byaˇ. 29Ningˉ pa nae ga na haoˉ laˍ beu, ga htiˍ ceuˍ ba ciˍ laeˍ sangˍ. Ba ceuˉ kanˉ ca yao ga na haoˇ laˍ yaeˇ. Ga naˉ laˍ siˍ naeˉ nae yawng na ha biˍ jiˍ.
30Kawˉneˍliˆ ha biˍ jiˍ yang, Caeˉ langˉ saˍ jiˍ hanˍ nuing veu, miˍ hkiˍ sumˍ sumˍ naˍ riˍ ningˉ nyamˍ veu, ga yumˉ veu ang buinˉ paˉ yao ca yaeˉ. Haeˉ mae beu, ang chit ang pa ang kaˍ tum tum nga laeˍ jiˍ changˉ htiˍ hu ga tawngˍ na veu chung yao ciˍ ngaeˉ. 31Kawˉneˍliˆ veuˉ, nang ang buinˉ paˉ naeˉ na Hpaˍcaoˍ ya kyaˍ yao, nang saˍ kyaˍ kyaˍ yao tanˍ biˍ jiˍ uiˉ na muiˉ Hpaˍcaoˍ kuitˆ puiˉ yao ang ca yaˇ. 32Hingˉ pa nae, Yuˆpeˍ vengˍ veu changˉ na piˉ lae yao, Peˍtruˆ nae maengˉ jiˉ Siˉmunˍ mangˍ na piˉ haoˉ lae voˍ. Yaˉ chaˍ mae langˍ ba hingˉ tawngˉ kyaˉ veu ca naeˉ cenˍ ang hkaw kuˍ naeˍ Siˉmunˍ yumˍ veu ca lang naeˇ yaˇ nae buingˍ htaˍ naiˍ htangˍ ha langˍ ngaeˇ yaˇ. 33Ningˉ pa nae, ang vaiˍ nae nang kawngˉ changˉ na piˉ lui yaeˉ yaˇ. Nang laˉ jiˉ ningˉ ngaˍ ang maenˍ yaˇ. Ang suingˉ Hpaˍcaoˍ nang na hkaˉ piˉ hkai laˍ jiˍ uiˉ hkaˉ hko laˉ hko na naˉ hkiˍ naeˍ uiˉ saˍ laiˍ. Ya muiˉ gu hkaˉ hko laˉ hko Hpaˍcaoˍ tawngˍ naˍ veu ca byaˇ nae, Kawˉneˍliˆ hkai laeˍ biˍ jiˍ.
Peˍtruˆ ang buinˉ tangˍ maˍ jiˍ
34Haeˉ mae beu, Peˍtruˆ tangˍ yao ciˍ jiˍ. Hpaˍcaoˍ nawˍ changˉ beu mae kaˍ na baˍ hu nae ga maˉ manˉ ya bae byaˇ. 35Changˉ ceuˉ hkaˉ hko laˉ hko hkaoˉ veu Hpaˍcaoˍ na hkae yao, ang suing pawng kanˉ na vaˍ naeˍ uiˉ changˉ na yang nuing ba capˆ naeˉ. 36Hpaˍcaoˍ, Iˉsaˍreˍlaˆ changˉ uiˉ na piˍ jiˍ uiˉ ang tangˍ na nawng ang bae yaˇ. Ciˍ tangˍ hingˉ ngaˍ, hkaˉ hko laˉ hko htaˍ veu Ang suingˉ hpeuˍ naeˍ, Yeˍsuˆ Hkrit pa nae mawnˍ pyawˉ naeˉ uiˉ ang buinˉ tangˍ na chaˍ lang naeˉ ang buinˉ tangˍ hingˍ yaˇ. 37Yoˉhanˍ maˍ jiˍ baˆtiˆsamˍ piˍ naeˍ htiˍ ceuˍ hingˍ nawngˍ veu, Gaˍliˉlaeˉ ang meungˉ veu tangˍ yao Yuˉdaˆ ang meungˉ ku ti ti veu mawnˍ pyawˉ naeˉ uiˉ ang buinˉ tangˍ hingˍ pya aengˉ jiˉ. 38Ang buinˉ tangˍ hingˍ nga, Naˍzaˍraet changˉ Yeˍsuˆ awˍ lawng yaˇ. Hpaˍcaoˍ nawˍ Ang hkawˍ laˉ ang seungˍ sangˉ na baˍ upˍ, tanˉ hkoˇ na baˍ upˍ, yang na hawt puing biˍ jiˍ awˍ lawng, Hpaˍcaoˍ yang kawngˉ ca yao, yang htiˍ tawngˍ peunˉ yao htiˍ tawngˍ veu aeˉ beu, ang maenˍ na vaˍ yao, deˍ yaˍ ang haiˉ hkanˍ yaˍ naeˍ hkaˉ hko laˉ hko na taeng pyo biˍ jiˍ awˍ lawng yaˇ. 39Yuˉdaˆ changˉ uiˉ beu ang meungˉ veu na baˍ upˍ, Yeˍruˆsaˍlaemˍ vengˍ veu na baˍ upˍ, yang hkaˉ vaˍ jiˍ uiˉ na gu aˍ sak seˍ hkamˉ naeˉ uiˉ changˉ hpeuˍ naeˍ yaˇ. Changˉ uiˉ aˍ yang na laˍ kang htaˍ veu htaˍ saeˍ jiˍ. 40Caˇ, sumˍ nuing hkeu beu, Hpaˍcaoˍ yang na piˉ teˍ laˉ laeˍ yao, changˉ htiˍ baˍ baˍ uiˍ na yang ang to hingˉ piˉ myangˉ jiˉ. 41Changˉ hkaˉ hko laˉ hko na piˉ myangˉ jiˉ baˍ aˍ. Sak seˍ hkamˉ naeˉ uiˉ saˍ laiˍ kaˉ huˍ veu Hpaˍcaoˍ cheˉ yuˉ jiˉ gu na yang myangˉ laˍ ngaeˉ yaˇ. Siˉ kyaˉ veu yang teˍ laˉ laeˍ naeˍ nawngˍ veu, gu yang kawngˉ caˍ yaeˍ tangˉ yaeˉ yaˇ. 42Gu aˍ, changˉ niˉ mawk na ang buinˉ maˍ naeˍ uiˉ yang gu na ang tangˍ piˍ laˍ byaˇ. Ningˉ htaˍ veu muiˉ, teˍ yaˍ yao ca naeˉ uiˉ changˉ na baˍ upˍ, siˉ peunˉ jiˉ changˉ na baˍ up, Yeˍsuˆ nawˍ aˉ muˍ tatˆ naeˉ mangˉ hpeuˍ yao Hpaˍcaoˍ yang na cheˉ yao chiˉ jiˉ awˍ lawng sak seˍ hkamˉ naeˉ uiˉ muiˉ, yang gu na ang tangˍ piˍ laˍ jiˍ yaˇ. 43Yang na hkaˉ yumˉ naeˉ uiˉ changˉ hkaˉ hko laˉ hko, yang beu ang maengˉ pa nae, naˍ hokˍ poiˉ naeˉ na ya naeˉ yaˇ nae Hpaˍcaoˍ beu pa rawˉ hpaet hkaˉ hko laˉ hko uiˉ yang awˍ lawng na sak seˍ hkamˉ yao chiˉ jiˉ nae, Peˍtruˆ ciˍ sangˍ jiˍ.
Changˉ ceuˉ htiˍ baˍ uiˍ nuing ba penˉ laeˍ yao baˆtiˆsamˍ hkamˉ yuˉ jiˉ
44Ciˍ tangˍ hingˍ uiˉ Peˍtruˆ ciˍ yao ca beu, ya kyaˍ jiˍ uiˉ changˉ hkaˉ hko laˉ hko htaˍ veu Ang hkawˍ laˉ ang seungˍ sangˉ lungˍ nga luingˉ jiˉ. 45Changˉ ceuˉ htiˍ baˍ uiˍ kawngˉ muiˉ, Ang hkawˍ laˉ ang seungˍ sangˉ piˍ yao, Peˍtruˆ kawngˉ laˉ naeˉ Yuˉdaˆ Hkritˆ yanˍ htiˍ baˍ uiˍ manˍ jiˍ. 46Aˉ mae yao nae baoˇ, Changˉ hingˉ uiˉ aˍ, ciˍ tangˍ ang byaˍ ceuˍ ciˍ nae chiˍ mawng yao Hpaˍcaoˍ na chiˍ huiˍ chiˍ mawng naeˉ na yawng ya kyaˍ jiˍ. 47Haeˉ mae beu, Peˍtruˆ ciˍ jiˍ. Gu Ang hkawˍ laˉ ang seungˍ sangˉ ya jiˉ lawˉ, Ang hkawˍ laˉ ang seungˍ sangˉ ya jiˉ uiˉ changˉ uiˉ na langˉ hkaoˉ veu baˆtiˆsamˍ ya piˍ naeˍ, aˍ sangˍ jeuˇ haenˉ tap taw naeˉ nae naˉ jiˉ. 48Yeˍsuˆ Hkritˆ beu ang maengˉ hkaoˉ veu baˆtiˆsamˍ hkamˉ yuˉ voˍ nae, Peˍtruˆ yawng na ha biˍ jiˍ. Haeˉ mae beu, changˉ uiˉ yang na ang mangˍ nae ca sangˍ laˍ beun nae paˉ jiˉ.
S'ha seleccionat:
Naiˍ htangˍ 10: pyy
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Wycliffe Bible Translators, Inc. All rights reserved.