Naiˍ htangˍ 20
20
Maˍkeˍdawˉniˆ ang meungˉ nae Heˍlaˍsaˆ#20:1 Aˍhkaˍyaˆ ang meungˉ veu Pawˉluˆ lae jiˉ
1Baˍ taepˍ baˍ yuing nae hingˉ kyap nga aengˉ yao, Pawˉluˆ nawˍ, ta peˍ uiˍ na haoˉ yao kaˍ piˍ peunˍ yao, yawng na hpakˍ lang yao Maˍkeˍdawˉniˆ ang meungˉ veu lae jiˉ. 2Yang Maˍkeˍdawˉniˆ ang meungˉ hingˉ na hpaiˍ yao, yumˉ naeˉ saˉ naeˉ uiˉ changˉ na kaˍ ang byaˍ piˍ htaengˍ peunˍ yao, Heˍlaˍsaˆ ang meungˉ veu hkeu lae jiˉ. 3Pawˉluˆ hiˉ keung veu sumˍ ha laˍ mawk ca peunˉ yao, heuˍ ta yao Suˉriˆ ang meungˉ veu aeˉ laeˍ naeˍ nae ca jiˉ. Haeˉ mae beu, Yuˉdaˆ changˉ uiˉ yang na saeˍ naeˍ uiˉ kanˉ sing lang jiˉ pa nae, Maˍkeˍdawˉniˆ ang meungˉ kaˉ seu aeˉ laeˍ naeˍ nae yang kuitˆ yao chiˉ jiˉ. 4Pawˉluˆ kawngˉ aeˉ jiˉ changˉ uiˉ, Beˍriˆ vengˍ changˍ Pawˉluˆ beu ang yaˍ Sawˉpaˍtaˍruˆ, Hteˉsaˍlawˉniˆ vengˍ changˍ, Aˍriˍtaˍhkuˆ nae Seˍkuˍduˆ, Deˍbeˍ vengˍ changˍ Gaˍyuˆ, Aˍsiˆ ang meungˉ changˉ Tuˆhkiˆ nae Taˍroˆhpeˍ nae Tiˉmoˉseˍ yawng yaˇ. 5Yawng kaˉ huˍ veu lae yao, Taˍroˆaˆ vengˍ veu gu na hawˍ yao ca laˍ jiˍ. 6Hkaoˍ munˉ hkaoˉ veu tangˍ chiˍ baˍ kan nae uiˉ poiˍ peunˍ yao, gu Hpiˉliˉpiˆ vengˍ veu heuˍ ta awkˍ laeˍ yae. Haeˉ mae yao, ngaˍ nuing hkeu beu, Taˍroˆaˆ vengˍ veu yawng kawngˉ hkeu lae yao, hiˉ keung veu cetˍ nuing ca yaeˉ.
Taˍroˆaˆ vengˍ veu Pawˉluˆ kaˉ nawngˍ lin lin veu lae jiˉ
7Vanˍ sin nuing ngang beu poiˉ caoˍ caˍ naeˍ uiˉ saˍ laiˍ gu hpawm lang ngaeˉ. Pawˉluˆ nawˍ na seuˇ awkˍ nga aengˉ na nae kuitˆ yao chiˉ jiˉ pa nae, muˍ hkiˍ tiˍ hkuinˍ ngang beu tiˍ hkeu yawng na maˍ biˍ jiˍ. 8Gu hpawm lang yao ca naeˉ ang htaˍ htaiˍ hiˍ keung na manˍ kawkˆ faiˍ ang byaˍ ca naeˉ. 9Uˉtuˆhkuˆ nae maengˉ jiˉ yaˍ hkaˍ htiˍ hu maˇ langˉ kaw htaˍ veu duingˉ yao ca jiˉ. Pawˉluˆ ang mangˍ nae maˍ biˍ yao yang yuˍ yaˍ mawt yao, yuˍ nuˍ awngˉ ngangˉ beu, yumˉ sumˍ htaiˍ hiˍ keungˍ ca yao yang kla aengˉ beu, siˉ jiˉ na changˉ uiˉ laˍ aeˉ jiˉ. 10Haeˉ mae beu, Pawˉluˆ lungˍ nga aengˉ yao, changˉ hiˉ mangˉ htaˍ veu bawk kumˉ ngangˉ yao, yang na hpaˉ laˉ nae ciˍ jiˍ, Aˍ kuitˍ man laeˍ jo. Yang hkaoˉ veu a sak ang ca suiˍ yaˇ nae yawng na ha biˍ jiˍ. 11Pawˉluˆ ta laengˉ laeˍ yao hkaoˍ munˉ hingˉ hpaetˍ yao caˍ jiˍ. Buingˍ paenˉ laˉ beu htiˍ hkeu yawng kawngˉ ang mangˍ nae ang changˍ taeng peunˉ lang yao, yang awkˍ taw aengˉ jiˉ. 12Yawng ngaˍ kaˍ hpaˍ yaˍ hiˍ mangˉ na ang taeˍ nae ya suiˍ laengˉ laeˍ yao, mawnˍ saˉ jiˉ.
Taˍroˆaˆ vengˍ veu hta yao Meˍleˍtuˆ vengˍ veu aeˉ jiˉ
13Gu aˍ heuˍ ta yao Aˍsoˆ vengˍ veu kaˉ huˍ veu lae naeˉ. Pawˉluˆ nawˍ kaˉ ba yawˍ yao, hiˉ keung veu hkeu lae beu gu kawngˉ heuˍ ta naeˉ nae yang haenˍ htaˍ yao chiˉ jiˉ. 14Aˍsoˆ vengˍ veu yang gu na myangˉ lang beu, yang na gu heuˍ hkaoˍ veu hap yuˉ yao, Miˍtuˆleˍ vengˍ veu ta yao aeˉ yaeˉ. 15Hiˉ keung veu awkˍ taw aengˉ yao, na seuˉ htiˍ nuing hingˉ ngang beu gu Hkiˆoˆ cunˉ htang veu hkeu lae yao, hpaiˍ seuˇ laˉ mae htiˍ nuing veu Saˍmoˆ cunˉ veu hkeu lae yaeˉ. Nawngˉ suing nuing laˉ mae htiˍ nuing hingˉ ngang beu hiˉ keung veu awkˍ taw aengˉ yao Meˍleˍtuˆ vengˍ veu hkeu lae yaeˉ. 16Pawˉluˆ nawˍ Aˍsiˆ ang meungˉ veu ang mangˍ nae baˍ ya ca naeˉ uiˉ saˍ laiˍ, Eˉfeˉsuˆ vengˍ veu baˍ saoˍ nae lae lotˍ lotˍ yao kaˉ huˍ veu lae naeˉ nae yang kuitˆ chae laeˍ jiˍ. Ang kaˍ taw nae baoˉ vaˍ, Peˍteˍkoˆteˍ nuing veu Yeˍruˆsaˍlaemˍ vengˍ veu ya ca taw naeˉ uiˉ saˍ laiˍ, yang ang vaiˍ nae lae siˉ naeˉ.
Eˉfeˉsuˆ Hkritˆ yanˍ awn hoˉ yaˍ mangˍ uiˍ na Pawˉluˆ maˍ biˍ jiˍ
17Pawˉluˆ nawˍ Meˍleˍtuˆ vengˍ veu ca yao, Eˉfeˉsuˆ vengˍ veu changˉ na caiˍ yao, Hkritˆ yanˍ ang muˉ awn hoˉ yaˍ mangˍ uiˍ na piˉ haoˉ aeˉ jiˉ. 18Yawng yang kawngˉ hkeu laˉ beu, Pawˉluˆ yawng na ha biˍ jiˍ. Gaˇ Aˍsiˆ ang meungˉ veu kaˉ huˍ veu hkeu lui jiˉ hingˉ nuing tangˍ yao, ga nawng kawngˉ aˉ lawˍ beun muiˉ aˉ mae ha yao cangˉ ngaeˉ nae nawng ang bae yaˇ. 19Ga Ang suingˉ Hpaˍcaoˍ beu kanˉ na vaˍ beu, nuing ba dawˍ lawˍ nae kuitˆ yao, mae hpuiˉ ang byaˍ taw luingˉ jiˉ ningˉ ngaˍ, Yuˉdaˆ changˉ uiˉ ga na saeˍ laˍ naˇ nae sing lang jiˉ pa nae, hao hpawngˍ laˍ naeˉ uiˉ ang byaˍ ceuˍ ga ya hkamˉ buˉ naeˉ na muiˉ nawng ang bae yaˇ. 20Ga nawng na maˍ laˍ upˍ laˍ beu, nawng saˍ laiˍ ang buinˉ ca naeˉ uiˉ ceuˉ na, htiˍ ceuˍ na muiˉ ga baˍ chawng laˍ. Changˉ hkaˉ hko laˉ hko uiˉ tawngˍ naˍ veu na baˍ upˍ, htiˍ yumˍ nae htiˍ yumˍ veu na baˍ upˍ, ga nawng na maˍ laˍ naeˍ yaˇ. 21Hpaˍcaoˍ tawngˍ na veu naˍ hokˍ na kuitˆ puiˉ laeˍ na baˍ upˍ, gu beu Yeˍsuˆ Hkritˆ na yumˉ naeˉ na baˍ upˍ, Yuˉdaˆ changˉ nae Changˉ ceuˉ htiˍ baˍ uiˍ na ga saˉ hkiˉ hkamˉ peunˉ jiˉ awˍ lawng na muiˉ nawng bae byaˇ. 22Ya muiˉ gaˇ, Ang hkawˍ laˉ hkaoˉ veu aˉ miˍ na naˉ yuˉ yao, Yeˍruˆsaˍlaemˍ vengˍ veu aeˉ ngaeˉ yaˇ. Hiˉ keung veu ga aˉ mae hpeuˍ laˍ naeˉ na baˍ bae. 23Caˇ, hao hpui laˍ yao hkanˍ yaˍ chuiˍ yaˍ laˍ naeˍ uiˉ saˍ laiˍ ga na hawˍ laˍ yao cangˉ ngaeˉ yaˇ nae, cu vengˍ hkaoˍ veu Ang hkawˍ laˉ ang seungˍ sangˉ mangˉ ga na piˉ bae hko laˍ byaˇ. 24Caˇ, ga ya yaw naeˍ hingˉ kaˉ ba na tawnˍ tin veu tiˍ hkeu ga yawˍ peunˍ yao, Ang suingˉ Yeˍsuˆ ga na kanˉ piˍ laˍ jiˍ lawˉ, Hpaˍcaoˍ beu ang buinˉ na chaˍ lang naeˉ uiˉ mawnˍ pyawˉ naeˉ uiˉ ang buinˉ tangˍ na saˉ hkiˉ hkamˉ peunˉ baoˉ vaˍ, ga beu a sak ningˉ ang huˍ ang hka nae gaˇ baˍ sawnˍ. 25Hpaˍcaoˍ beu ang meungˉ lawng hingˉ ga aeˉ yao maˍ bae laˍ byaˇ. Nawng ya kyaˍ jiˉ changˉ hkaˉ hko laˉ hko uiˉ aˍ, kaˉ nawngˍ veu htiˍ cangˍ nae muiˉ ga beu mae kaˍ na baˍ ya myangˉ laˇ nae ga ang bae yaˇ. 26Hingˉ pa nae, nawng hkaˉ hko laˉ hko beu ang hkaw laˉ a sak hingˉ ya sumˍ baoˉ vaˍ ga beu baˍ yeˍ nae, miˉ nuing ga nawng na saˉ hkiˉ hkamˉ laˍ naeˍ yaˇ. 27Aˉ mae yao nae baoˉ vaˍ, Hpaˍcaoˍ beu a loˍ hkaˉ hko laˉ hko na maˍ laˍ naeˍ uiˉ saˍ laiˍ ga baˍ hpaeˍ saˍ. 28Nawng ngaˍ aˍ sangˍ yang beu ang to na baˍ upˍ, soˉ ang muˉ hkaˉ hko laˉ hko na baˍ upˍ, maenˍ nae hak sa laˍ voˍ. Ang suingˉ Hpaˍcaoˍ nawˍ, yang beu siˍ nae vuiˉ jiˉ ang muˉ na piˉ caˍ piˉ tangˉ naeˉ uiˉ saˍ laiˍ, Ang hkawˍ laˉ ang seungˍ sangˉ nawng na piˉ hak sa laˍ naeˍ uiˉ piˉ hpeuˍ laˍ byaˇ. 29Ga ang bae yaˇ, ga awkˍ taw aeˉ yao kaˉ nawngˍ veu, soˉ ang muˉ uiˉ na tiˍ kangˍ tiˍ chaw naeˉ uiˉ ang haiˉ ceuˉ nawng hkaoˉ veu awngˉ laˉ naeˉ. 30Ningˉ htaˍ veu muiˉ, nawng hkaoˉ veu changˉ htiˍ baˍ baˍ hta laˉ yao, ta peˍ htiˍ baˍ uiˍ na yawng kawngˉ lae naeˉ uiˉ saˍ laiˍ saw saeˉ yao ciˍ tangˍ ang pawng uiˉ na piˉ koiˍ laˉ naeˉ. 31Ningˉ pa nae, hawˍ yao ca voˍ. Ga nawng hkaˉ hko laˉ hko na sumˍ nuing pi veu tiˍ hkeu, muˍ hkiˍ nuing kawngˉ baˍ saoˍ baˍ duingˍ nae mae hpuiˉ taw naeˉ hkaoˉ veu saˍ tiˍ piˍ laˍ naeˍ na kuitˆ puiˉ laeo. 32Gaˇ, ya muiˉ nawng na Hpaˍcaoˍ beu laˍ puˍ hkaoˍ veu nae yang beu ang buinˉ huiˍ naeˍ tangˍ hkaoˍ veu ap laˍ naeˍ yaˇ. Ang buinˉ huiˍ naeˍ ang tangˍ hingˍ nga, nawng na huiˍ laˉ mawng laˉ laˍ hkiˍ yao, seungˍ sangˉ ngangˉ laˉ jiˉ changˉ uiˉ kawngˉ htuˍ yaˍ laˉ mae nawng na ca kyaˉ piˍ laˍ hkiˍ naeˍ yaˇ. 33Gaˇ, aˍ sangˍ beu hpuˉ, hkamˍ, ang kaˍ ang tum na muiˉ baˍ seu lai. 34Ga beu laˍ puˍ ningˉ ngaˍ, Gaˇ, ga kawngˉ ca naeˉ changˉ uiˉ hkaˉ loˉ naeˉ uiˉ na ya naeˉ uiˉ saˍ laiˍ kanˉ vaˍ naeˍ na nawng ang bae yaˇ. 35Nawngˍ muiˉ, ningˉ mae ya caeˉ ha yao, kaˍ dawˍ naeˍ uiˉ changˉ na, ya pawngˍ taw naeˍ uiˉ saˍ laiˍ, ga nawng na vaˍ yao piˉ hu laˍ byaˇ. Piˍ naeˍ ningˉ ngaˍ ya jiˉ taˍ chae ang buinˉ huiˍ naeˍ nae, Ang suingˉ Yeˍsuˆ ciˍ saˍ jiˍ ang tangˍ na kuitˆ puiˉ laeˍ naeˍ uiˉ muiˉ, hkaˉ hko laˉ hko uiˉ hkaoˉ veu ga nawng na vaˍ yao piˉ hu laˍ byaˇ nae yawng na ha biˍ jiˍ. 36Yang ningˉ mae ciˍ peunˍ yao, yawng kawngˉ htuˍ yaˍ laˉ mae hpaˍ tuˍ laˍ hku nae ha yao ang buinˉ paˉ jiˉ. 37Yawng hkaˉ hko laˉ hko kaˍ haengˍ nae ungˉ yao Pawˉluˆ na nuingˉ chuiˍ veu hpaˉ kap yao yang na hawmˉ jiˉ. 38Kaˉ nawngˍ veu yang beu mae kaˍ na htiˍ cangˍ nae muiˉ baˍ ya myangˉ laˇ nae yang ciˍ jiˍ ang tangˍ hingˍ pa nae yawng kuitˆ manˍ hko laeˍ jiˍ. Haeˉ mae yao, yawng Pawˉluˆ na heuˍ htaˍ veu tiˍ hkeu suiˍ yao sa lae jiˉ.
S'ha seleccionat:
Naiˍ htangˍ 20: pyy
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Wycliffe Bible Translators, Inc. All rights reserved.