योहान 5
5
बेतसेदा सेरवुना ओड्डुंक मत्ता हेय्युं गुडसें
1पजा येसु यहुदिल्कुना उंदि पंडुगुनाहाटीं येरुसलेम सहर होत्तोर. 2येरुसलेम सहरते गोर्रे दरबाजा इनना जेगातगा उंदि सेरवु मंता, दान इब्रानि बासाते बेतेस्दा इंचि इंतुर. आ सेरवुना ओड्डुंक हेय्युं गुडसें वाटसि मत्तां. 3-4बदो उंदि वेलाते पेनदा दूता वासि अद एतुन लोपुंदु, अल्हा लोपतस्के, अद एते बोर मनकल अय्ते मुन्ने होळियंतोरो ओर मनकल ओना बसोंटा बिमार अयना बेस आयुंदु. अदुनहाटीं पेनदा दूता एतुन बस्के लोपार इंचि एदुर हूळसेक गुड्डोर्कु, गूनोर्क, कुंटोर्क, लकवा बिमारतोर इल्हा वेल्लेन मंदि आ गुडसेने जेगा पीसि मनुंदुर.#5:3-4 इद वचनम कोन्नि पांडु लिपिने हिल्ले. 5अगा मत्तोरव्टे मुप्पै एनिमिदि वर्सानाल बिमार मत्ता वरोर मनकल मत्तोर. 6ओर अगा मींडसि मत्तद येसु हूळतोर. हूळसि ओर वेल्लेन वर्सानाल कुक्कि पीसि मत्तद एरपाट कीसि ओनगा होत्तोर. होंचि ओन, “नीकु बिमारताल बेस आयानद मंतना?” इंचि पूसकीतोर.
7अस्के आ मनकल, “नाकु बेस आयगोम इंचि मंता सामि! गानि बतल कीकन? एतुन लोपतस्के नाकुन आ एतगा ओयालय नहगा बोरे हिल्लुर. एतुन लोपतस्के मेल्लगा-मेल्लगा नना होननदाका बोरन्ना वरोर नाकन्ना मुन्नेन होळियंतोर,” इंचि वेहतोर.
8अस्के येसु ओन, “अय्ते तेदा! तेदसि नीवा कटुल पीसि ताकसेक होन,” इंचि इत्तोर. 9येसु ओन अल्हा इत्ता इन्मळे आ मनकल बेस आतोर. आसि, ओना कटुल पीसि ताकसेक होत्तोर. इद गटना यहुदिल्कुना नोमकेम रोजुननाड जर्गता.
10अदुनहाटीं बिमारताल बेस आता मनकन, “नोमकेम रोजुने निमे इल्हा कटुल तेहचि ताकमळ मावा दर्मसास्त्रम परकारम न्यायम आयो,” इंचि यहुदि पेद्दाल्क इत्तुर.
11जवाबुने आ मनकल, “नाकुन बेस कीतोरे, नाकुन नीवा कटुल पीसि ताकसि होन इत्तोर,” इंचि वेहतोर. 12अस्के “नीकुन कटुल पीसि ताका इंचि वेहतोर, ओर बोर आंदुर?” इंचि यहुदि पेद्दाल्क ओन पूसकीतुर. 13गानि अगा वेल्लेन मंदि मत्तुर, येसुगुडा अगटाल पेय्सि होत्तोर. अदुनहाटीं ओन बेस कीतोर बोर आंदुर इंचि, आ बेस आता मनकंकगुडा तेळिया हिल्ले.
14इदंता आतंका येसु आ मनकंक गुळिते कलियसि, “हूळा, निमे इंदके बेस आतिन! मर्रा पापि कबाह्कुना जोलिक होन्मा. होत्तिनित्ते दीनकन्ना एक्को बिमार अर्रंतिन,” इंचि वेहतोर. 15पजा आ मनकल यहुदिल्कुना पेद्दाल्कुंक कलियसि, “नाकुन बिमारताल बेस कीतोर, येसु आंदुर,” इंचि वेहतोर.
16येसु इसोंटा कबाह्क नोमकेम रोजुननाड कीतोर इंचि यहुदि पेद्दाल्क येसुन तकलिप कियालय दल्गतुर. 17अस्के येसु ओर्कुन, “ना बाबाल बस्केळ्क कबळ कीसेकेने मनंतोर. अदुनहाटीं ननागुडा कबळ कीसेकेने मनंतन,” इंचि इत्तोर. 18येसु इल्हा इत्ताहेंका यहुदि पेद्दाल्क ओन हव्कालय उंदे पट्टु पीतुर. बारित्ते नोमकेम रोजुने कबळ कियानायो इत्ता नियमतुन ओर हेळाहतोर. आनि पोर्रोटाल, पेनदुन “ना बाबाल,” इंचि वेहचि “नना पेनदुक समानमतोन” इंचि ओनद ओरे वेहकुत्तोर.
येसुनगा पेनदा अदिकारम मंता
19अस्के येसु ओर्क इल्हा वेहतोर: “नना मीकु निजम-निजम वेहचंतन, मर्रि ओनद-ओर बतले किय्योर. गानि बाबो बतल-बतल अय्ते कींतोर, बाबो कियनदुन हूळसि मर्रि अल्हेन कींतोर. 20मर्रिनपोर्रो बाबोंक वेल्लेन पावरम मंता, अदुनहाटीं ओर कियानव अन्नि कबाह्कुन ओना मर्रिंक हुपिच्चंतोर. वायना रोजकुने इवुंकन्ना पेद्दा-पेद्दा कबाह्क कीसि मर्रिंक हुप्सना मंता. अस्के मिमेट हूळसि अंटोर इचंत्रम आकिर. 21बल्हा अय्ते बाबो हातोर्कुन मर्रा जीवाते तेहंतोरो, अल्हेन मर्रिगुडा ओन्क इस्टमातोर्कुन मर्रा जीवाते तेहंतोर. 22-23बाबोनद अंटोर कदर कींतुर. अल्हेने मर्रिना कदरगुडा अंटोर लोकुल्क कियना इंचि बाबाल बोनदे न्यायम कियाकोंटा, न्यायम कियना पूरा अदिकारम मर्रिंक हीतोर. मर्रिना कदर बोर किय्युरो, ओर मर्रिन लोहचीता बाबाना कदरगुडा किय्युर. 24नना निजम-निजम वेहासेक, बोर अय्ते नना वेहना पोल्लेन केंजसि नाकुन लोहतोना पोर्रो विस्वासम इर्रंतोर, ओन्क बस्केळ्क पिस्सना पिस्वर दोर्कंता. पेन ओन्क सिक्साता आदेस हिय्यो, ओर हामुरताल पेय्सि पिस्वरतुन संपादिंच्कुंतोर. 25नना निजम-निजम वेहासेक, हासोत्तोरगुडा पेनदा मर्रिना अल्किर केंजना वेला वासेक मंता. अद अय्ते वासे मंता. बोर अय्ते अद अल्किरतुन केंजांतुर, ओर्क पिस्वर दोर्कार. 26बल्हा अय्ते पेनबाबाल कुद्दु पिस्वरता मालक आंदुर, अल्हेन मर्रिनगुडा पिस्वरता मालक कीतोर. 27इच्चोने आयाका, पेनबाबाना मर्रि मनकना रूपमते पुटताहाटीं ओन्क लोकुल्कुना न्यायम कियना अदिकारम हीतोर. 28मिमेट इदुन केंजसि इचंत्रम आयमटु. बारित्ते मुन्ने इसोंटा वेला वायनद मंता गदा, हातोर अंटोर पेनदा मर्रिना अल्किर केंजानुर. 29पजा बोर अय्ते बेस पुन्नेम कबाह्क कीतुरो ओर अंटोर बस्केळ्क पिस्सना पिस्वरहाटीं मर्रा जीवाते तेदानुर. आनि पापि कबाह्क कीतोर बारे सिक्साताहाटीं मर्रा जीवाते तेदानुर. 30नावद नना बतले किया पर्रोन. पेनबाबानाहेंदाल केंजतापे न्यायम कींतन. नना नावा इच्चातुन पूरा कियालय वाया हिल्लेन, नाकुन लोहचीता पेनबाबाना इच्चातुन पूरा कियालय वातन. अदुनहाटीं नना कियना न्यायम सत्तेम मंता.”
येसु गवाइ वेहांतोर
31“नावा बारेमते ननाने गवाइ वेहकुत्ते, नावा गवाइ निजमतद आयो. 32गानि नावा बारेमते गवाइ वेहालय इंकावरोर मंतोर. ओर वेहना गवाइ सत्तेम इंचि नाक एरपाट मंता. 33मिमेट मीवा मनकालोर्कुन योहाननेके लोहतिर. ओर मीकु सत्तेमता गवाइ वेहतुर. 34मीकु मुक्ति दोर्कगोम, इंचि इव पोल्लें नना मीकु वेहासेक मंतन अचोने. गानि नावा बारेमते लोकुल्कुना गवाइता अव्सरम नाकु हिल्ले. 35योहान वेडसिलेह्का पोत्सि मीकु वेलगु हीतोर. मीकुगुडा गडसेमताहाटीं आ वेलगुने कूस मनालय बेस अनपिस्ता. 36गानि योहानुना गवाइकन्ना पेद्दा गवाइ नहगा मंता. बारित्ते पूरा कियनाहाटीं पेनबाबाल नाकु हीता कबाह्क आनि नना कियना कबाह्क. इवे पेनबाबाल नाकुन लोहतोर इत्तादांकु गवाइ मंतां. 37नाकुन लोहचीता पेनबाबाल कुद्दु नावा बारेमते गवाइ वेहतोर. गानि मिमेट बस्केने ओना अल्किर केंजा हिल्लिर, बस्केने ओना रूपमतुन हूळा हिल्लिर. 38अचोने आयका ओर लोहतोना पोर्रो मिमेट विस्वासम इर्रुवाहेंका, ओर कराहता पोल्लें मीवा मनसुना लोप्पो मना पर्रों. 39बस्केळ्क पिस्सना पिस्वर दर्मसास्त्रमहेंदाल दोर्कंता इंचि मिमेट अव्टे पह्कट, अदे दर्मसास्त्रम नावा बारेमते गवाइ वेहचंता. 40अयना, बस्केळ्क पिस्सना पिस्वरहाटीं मिमेट नहगा वायालय हूळिर. 41नना मनकालोराहेंदाल कदर कोरोन. 42बारित्ते मिमेट बसंटोर आंदिरो नाकु एरपाटे. मीलोप्पो पेनदाहाटीं पावरम हिल्ले. 43नना नावा बाबाना पोरोल्ते वातन, गानि मिमेट नाकुन स्विकार किया हिल्लिर. गानि बोरन्ना वेरेतोर, ओना पोरोल्ते ओरे वायानय्ते मिमेट ओन स्विकार कींतिर. 44मीवद मिमेटे कदर कीकुनमळ इत्ते मीकु वेल्लेन इस्टम. गानि पेनदाहेंदाल दोर्कना कदरतुन मात्रम बोरे पहका हूळिर. असोंटस्के मिमेट नापोर्रो बल्हा विस्वासम किया परांतिर? 45बाबाना मुन्ने नना मीपोर्रो तप्पु दोसतन इंचि इनकुन्मट. मिमेट अय्ते मूसाना पोर्रो आसे पडसि मनंतिर, आ मूसाले मीवापोर्रो तप्पु दोसंतोर. 46मिमेटगिंटा मूसान पोर्रो विस्वासम कियानय्ते, नावापोर्रो इंका विस्वासम कींतिर, बारित्ते मूसाल नावा बारेमते रासतोर. 47मूसाल रासता पोल्लेन पोर्रोगुडा मीवा विस्वासम हिल्ले अय्ते, नावा पोल्लेन मिमेट बल्हा नमकिर?” इंचि येसु इत्तोर.
S'ha seleccionat:
योहान 5: esg-Deva
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Wycliffe Bible Translators, Inc. All rights reserved.