ยฮ 16
16
1เฌา เยซู วี ต็อห ดี ดีแบ อัน, “ฌึร ตี ดอน โมยว โอว แฮะ กาลาง ดี เบ, แกวะ แตห เบ กาลึบ ดอ กาดูห เบ ดูก. 2เฆ ดี ซูต เลห เบ แคง พึง เฆ, ตู แตห เบ กอย แคง โฌง เฆ. อึณ ดี บอ ตัห อาคราว ดอ ทาง เฆ, เฆ ดี โบง ปี อึง เฌาพรา, เซ เฆ ง็อห ยัม เบ. 3เฆ ดี โบง ปาย ตี โกบ ตู ดึอม นับ เฆ บอ เฌาพรา บอ โอว. 4โอว แฮะ กาลาง ดี เบ ลอง อัน ตี, แตห เบ โหลห โฆรห โอว. โอว แฮะ ดึอม ดัม ซาดีก ดี เบ. โกบ กอย รึม โอว โดบ เบ คา อาต โอว ตู ดึอม กาลาง ลอง อัน ตี ดี เบ.”
ลอง น็อห พึอม เฌาพรา
5เฌา เยซู วี ต็อห, “ดอ ตี นี, โอว ดี เวณ โดง กอย อัน เฌา อี แฮะ ตึย โอว. เบ ยี ตู ดีหมอด โอว, ต็อห, ‘เหมา แม ดี ว็อะ?’ 6โกบ กาลาง โอว โฆรห ฌึร ตี ดอน โมยว, อึณ แตห เบ แบน น็อห กลึร. 7โอว ยี ต็อห อาคัร ดี เบ, เซ โอว เลห ตัะ โดง กอย เบ, อึณ ดี แบน อาฆยึร ดี เบ. เซ โอว ตู ฮาว, อี ดี จอย เบ ตู ตัห. เซ โอว ยี ฮาว, โอว ดี ตึย อัน ตัห ดี เบ. 8เซ อัน ตัห, อัน ดี แตห ดูอี แดง กาดาย นับ ซีคยา ลอง หมาบ เฆ. อัน ดี บอ แตห เฆ นับ ลอง นา หมาน นา หมึอม บอ ลอง เฌาพรา ดี ดัม หมาบ ดี อี. 9อัน แตห เฆ นับ ซีคยา ลอง หมาบ โกบ ตู หณึม เฆ ดี โอว. 10อัน ดี มาโนว ลอง นา หมาน นา หมึอม. โคว, โอว ฮาว โดง กอย ฆูณ โอว. ปัน ตี เบ อาว ฮู ปึอน ยึร โอว. 11อัน ดี มาโนว อี ลอง เฌาพรา ดัม หมาบ ดี เฆ. โคว, เฌาพรา แฮะ ฮอต ดัม หมาบ ดี ดา กาณา อี อึบ กาดาย นี.
12แดง ตี, โอว ซี มึห กืน ปี ดี กาลาง ดี เบ. เบ ยี หณัม แป ดี คัม โตต. 13อึณ ยี มูห น็อห พึอม เฌาพรา อี แตห เบ นับ นา หมาน, เซ อัน ฮี ตัห, อัน ดี บยัะ โตต ดอน โมยว ดี เบ ลอง อี หมาน อี มูห. อัน ตู กาลาง ดี เบ อี เลห แคง อางยาน อัน. อัน ดี วี แค ดี เบ แคะ ยึร อัน โฆรห เฌาพรา. อัน ดี บอ แค ดี เบ ลอง ปี ดี ปาย แบน โมยว แบน โมยว อี ดี แบน นา อาต. 14อัน ดี โทม โฆรห โอว, ปี วี กาลาง ดี เบ. ปาย ตี อึณ ดี แตห อาพูง ดังโคว โอว ลึห ดี เบ. 15แคะ มึห ฆูณ โอว โกรวกราม, อึณ มูห โตต โกรวกราม โอว. โคว อัน ตี โอว แฮะ ต็อห, น็อห พึอม เฌาพรา ตี, อัน ดี โทม โฆรห โอว, ปี วี กาลาง ดี เบ. 16อาว เหลณ, เบ อาว ฮู ยึร โอว. แฮะ ฮอต, ปอ อู กาจัน, เบ ดี วี ยึร โอว.”
17เฌา เยซู แฮะ ฮอต กาลาง โฆรห ตี, เฆ ดีแบ อัน วี ลาย กามวน, วี ต็อห, “เหมา อึณ ปาย ปี ต็อห อัน, ‘อาว เหลณ เบ อาว ฮู ยึร โอว. แฮะ ฮอต, ปอ อู กาจัน, เบ ดี วี ยึร โอว’? เหมา อึณ ปาย ปี ต็อห อัน, ‘โคว, โอว ฮาว โดง กอย ฆูณ โอว’?” 18เฆ วี ต็อห, “เย ตู นับ ลอง ดาง โฆรห อัน, ดอ ต็อห อัน, ‘อาว ฮู เหลณ’ ลอง มาเซ อึณ มูห?”
19เฌา เยซู วี นับ, เฆ ซี ดีหมอด อัน ลอง อัน ตี. โคว, อัน วี ต็อห ดี เฆ, “มาเซ ปี ลาย กาลาง เบ? อึณ มูห, เบ ลาย ดีหมอด ลอง ดาง โฆรห โอว ดอ ต็อห โอว, ‘อาว เหลณ เบ อาว ฮู ยึร โอว. แฮะ ฮอต, ปอ อู กาจัน เบ ดี วี ยึร โอว’? 20โอว ต็อห อาคัร ดี เบ. เฆ ดูอี แดง กาดาย, เฆ ดี โคย กาเซา. ดอ อัน ตี เบ ยี ดี ยาม บอ มึห น็อห กลึร. น็อห กลึร เบ ตี, ยี ดี วี แบน น็อห ดาคึย.
21อึณ ปี อีบึณ อู วี, เซ ฆอน อัน ฮี ดี ฆึอด, อัน ดี บอ โลว คัม เซา กาเซา. เซ ฆอน อัน ฮี ฮอต ฆึอด, อัน ปีว เซา อัน ดอน โมยว โกบ ดาคึย น็อห อัน ลอง ฆอน กามาย ตี, อี แฮะ ตัห ฆึอด กอย แดง กาดาย. 22อึณ บอ ปาย ตี ดี น็อห เบ. ดอ ตี นี น็อห เบ แฮะ กลึร. โอว ดี วี ตัห, แตห เบ วี ยึร โอว. ดอ อัน ตี น็อห เบ ดี วี ดาคึย. แฮะ ฮอต, อึณ ตู วี มึห อาเซ อี แป ดี โบง แกวะ แตห เบ ดาคึย. 23เซ อึณ ฮี ฌัม อาคราว ตี, เบ ตู วี ดีหมอด โอว ลอง แบน โมยว แบน โมยว. โอว ยี ต็อห อาคัร ดี เบ. เซ เบ หมาณ ดี เฌาพรา, ฆาว ปวน โอว, ฆูณ โอว ดี ดัว โตต ดอน โมยว ปี หมาณ เบ. 24กอ ฌัม อาตึร, เบ ตู ดึอม หมาณ มาเซ ดี เฌาพรา โกบ หณึม เบ ดี โอว. แตห เบ หมาณ, เบ ดี บอ ปึอน แคะ ปี หมาณ เบ ตี. ปัน ตี น็อห เบ ดี ดาคึย, อาว ฮู โลว มาเซ.
25โอว แฮะ ดึอม กาลาง อูพามา ดี เบ, แตห เบ นับ ลอง เฌาพรา. อึณ ยี ดี มึห อาคราว ดอ ฮู กาลาง โอว ดี เบ โฆรห ฌึร ตี. โอว ดี วี กาลาง ซืร ดี เบ ลอง ฆูณ โอว. 26ดอ อัน ตี เบ ดี หมาณ ดี เฌาพรา, ฆาว ปวน โอว. โอว มืร ตู วี หมาณ ดี เฌาพรา ดาง เบ. 27อึณ มูห เฌาพรา, อัน แฮะ ร็อก เบ โกบ ร็อก เบ ดี โอว. เบ มืร หณึม, อึณ มูห เฌาพรา อี แฮะ ตึย โอว. 28ปาย ตี, โอว แฮะ เลห โดง กอย เฌาพรา, ตัห กอย แดง กาดาย นี. ดอ ตี นี โอว ยี วี เลห ตัะ แดง กาดาย นี, วี โฮะ โดง กอย ฆูณ โอว.”
29เฌา เยซู แฮะ ฮอต กาลาง โฆรห ตี, เฆ ดีแบ อัน วี ต็อห, “ดอ ตี นี แม กาลาง โฆรห ซืร ดี เย. อาว มูห อูพามา. 30ดอ ตี นี, อึณ บอ กาหลูห ดี น็อห เย ลอง แม. แม นับ โตต ดอน โมยว อาต ดีหมอด เย ดี แม. อาว โลว กาลาง ดี แม, แตห แม นับ ปี ทาง อี. โคว อัน ตี เย หณึม, แม แฮะ เลห โดง กอย เฌาพรา, ตัห กอย ดี นี.”
31เฌา เยซู วี ดีหมอด ต็อห, “เซ อึณ ปาย ตี, ดอ ตี นี เบ หณึม?” 32แฮะ ฮอต, อัน วี ต็อห, “อึณ ดี ฌัม อาคราว อัน, มาแล, แฮะ ฮอต ฌัม ดอ ตี นี. ดอ อัน ตี เบ ดี บอ กาย็อห. เบ ดอน อี ดี เวณ กาง เบ. เบ ดี บอ แวน โอว, แตห โอว กอย อู วี. โอว ยี ตู กอย อู วี ดอ เหมา. ฆูณ โอว กอย รึม โดบ โอว เซเซ.
33โอว แฮะ กาลาง ดี เบ ลอง ฌึร ตี แบน โมยว แบน โมยว, แตห เบ หณึม โอว, แตห เบ มึห น็อห เฆียด. แดง กาดาย นี เบ ดี กาดูห ดูก. แกวะ แตห อึณ แบน น็อห ลึร ดี เบ. โอว แฮะ แป โตต ดอน โมยว อี กอย แดง กาดาย นี.”
S'ha seleccionat:
ยฮ 16: pce
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translator, Inc. All rights reserved.