Lucas 7
7
Romanu ꞌicë capitán Jesusan pëxcüa
(Mt 8.5-13)
1Unicaman cuanun bana ñuixuntancëx ca Jesús Capernaúm ëmanu cuancëxa. 2Capernaúm anu ca Romanu ꞌicë capitán achúshi ꞌiacëxa. An a capitán ñu mëëxuncë unix ca an nuibairacë ꞌaíshbi ꞌinsíanx bamatisa ꞌiacëxa. 3Usa ꞌain ca —an uni ꞌinsíncë pëxcuti, Jesús, ax ca uaxa —quiáxa raíri unicama quia cuaxun, capitanën judíos caniacëcë uni raíri ñucáquin cacëxa:
—Jesúsnu cuanquin camina an ꞌën ñu mëëxuncë uni pëxcuia unun ꞌë caxunti ꞌain.
4Cacëx cuanxun ca capitanëan cacësabi oquin Jesús cacëxa. Caxun ca ësaquinribi cacëxa:
—A capitán ax ca upí uni ꞌicën. Minmi aín uni a pëxcuxunti ca asábi ꞌiti ꞌicën. 5An ca nuxnu judíos unibu ꞌicë nu nuibaquin nuxnu anu timë́ti xubu nu ꞌamixuanxa.
6Usaquian cacëx ca Jesús atubë cuancëxa. Cuanquían aín xubu raraobiancëbëtan ca capitanën aín ꞌunáncë uni raíri xuquin ësaquin Jesús camiacëxa:
—Mixmi ꞌësamaira ꞌain cana mibë sënë́nma ꞌixun ꞌën xubunumi unun mi camiman. 7Usa ꞌixun cana mi isi cuanti ꞌixunbi judíos uni caniacëcëshi mia canun can. ꞌËn unimi ꞌë pëxcuxuni unun quixun mi camixunbi cana mi camitëcënin, anuaxbimi ꞌën unia pëxcunun quiax quinun. 8Cana ꞌunan min banáxbi ca cushi ꞌicë quixun. ꞌËn cana ꞌapun ꞌë cacësabi oquin ꞌain. ꞌËn suntárucamanribi ca ꞌën bana cuatia. ꞌËn suntáru —ca cuantan —quixun ꞌën cacëx ca cuania. —Ca ut —quixun ꞌën cacëx ca bëtsix aia. An ꞌë ñu mëëxuncë uni —ñu ca ꞌat —quixun ꞌën cacëxun ca ꞌaia. Usaribiti ca ꞌën ñu mëëmicë uni mixmi —ca pëxcúti ꞌicë —quicëbëshi pëxcúti ꞌicën.
9Usaía capitanën xucë unicama quia cuati cuëëni cuainacëquin ca Jesusan an nuibiancë unicama cacëxa:
—ꞌËn cana mitsu cain, ënë uníxa ꞌëmi catamëcësaribitia ꞌia cana judío uni achúsibi ca ꞌën bana cuatia. ꞌËn suntáru —ca cuantan —quixun ꞌën cacëx ca cuania. —Ca ut —hibi iscëma ꞌain.
10Usaía ꞌicëbë xubunu cuantëcënquin ca capitanëan xucë unicaman a ñu mëëxuncë uni asábi ꞌicë, pëxcúcë isacëxa.
Casunamëcë xanun tuá bamacëbi Jesusan baísquimia
11ꞌItsama nëtë ꞌicëbë ca Naín cacë ëmanu Jesús cuancëxa. Cuancëbë ca aín ꞌunánmicë unicama ꞌimainun ꞌaisamaira uniribi abë cuancëxa. 12Cuanx Naín ëmanu bëbaquin ca uni bamacëa, chupan rabúncë, bacë́tinën buáncania isacëxa. A unin titax ca tuá itsiñuma ꞌianan casunamëcë xanu ꞌiacëxa. Abë ca ꞌaisamaira uni Naín ëmanuax a catícabiani cuancëxa. 13A isquin nuibaquin ca Jesusan a xanu cacëxa:
—Iánxma ca ꞌit.
14Caí anu cuanquian anun buáncë bacë́ti mëëcëbë ca an a buáncë unicamax niracëacëxa. Niracëcëbëtan ca Jesusan cacëxa:
—Bëná uni, cana mi cain, ca nirut.
15Usaquin cacëxëshi ca bamacë uni baísqui tsóracëti banacëxa. Usai ꞌicëbëtan ca Jesusan —ca asábi ꞌicën, ca mibë ꞌitëcënti ꞌicë —quixun aín tita cacëxa. 16Usaía ꞌia isi ratuti racuëtibi cuëëni ca unicamax Nucën Papa Dios rabi quiacëxa:
—An Nucën Papa Dios quicë bana unicama ñuixunti uni aira ca ënëx ꞌicë —quianan ca —Nucën Papa Diosaxbi ca aín unicama ꞌaquini uaxa —quiacëxa.
17Usaquian Jesusan ꞌacëa chanioia ca Judea menu ꞌicë unicama ꞌimainun axa Judea ꞌurama ꞌicë menu ꞌicë unicamanribi cuacëxa.
An uni nashimicë Juanëan aín uni rabë́ Jesúsnu xua
(Mt 11.2-19)
18Usa ꞌain ca Jesusan ꞌacë ñucama ñuiquin aín ꞌunánmicë unicaman Juan cacëxa. 19Cacëxun ca Juanën aín uni rabë́ Jesúsnu cuantánun xuquin ësaquin ñucáquin catánun quixun cacëxa: ¿Mix caramina asérabi axa uti nun caíncë a ꞌain? ¿Ama mix ꞌain caranuna bëtsíxa uti caínti ꞌain? 20Usaquian canun quixuan xucëx cuanx bëbaquin ca Jesús cacëxa:
—Juan an uni nashimicë an ca mi ñucánun quixun xuquin ësaquin mi canun quixun nu caxa: ¿Mix caramina asérabi axa utinu nun caíncë a ꞌain? ¿Mixmi ama ꞌain caranuna bëtsi uníxa uti caínti ꞌai? —quixun.
21Juanën xucë unicamaxa anu ꞌain ca Jesusan ꞌitsa uni ñucë pëxcüanan ñunshin ꞌatimanën ubíocë unicamaribi pëxcüanan bëxuñu unicamaribi bëpëxcüacëxa. 22Usaquin ꞌaxun ca Juanën a ñucánun quixun xucë unicama Jesusan cacëxa:
—Camina ꞌën unicama ñuixuniami cuacë banacama ñuixuanan ꞌën ñu ꞌaiami iscëcama ñuixunquin Juan cai cuanti ꞌain. Cuanxun camina cati ꞌain: Bëxuñu unínbi ca bërí isia, aín niti bëtsicë uníxribi ca bërí upiti nitsia, an aín nami chëquimicë ꞌinsínñu unix ca pëxcutia, pabë unin ca bana cuatia, bamacë uníxbi ca baísquia, ñuñuma unínribi ca anun Nucën Papa Diosnan ꞌinux ië́ti bana cuatia. 23Usaquin canan camina, ꞌë ñui Nucën Papa Diosan xucëma ca ax ꞌicë quima ax ꞌëmi sináncë unicamax ca chuámarua ꞌi cuëënia, quixunribi Juan cai cuanti ꞌai —quixun ca Jesusan Juanën xucë unicama cacëxa.
24Juan, an uni nashimicë, an xucë unicama cuancëbëtan ca Jesusan anu ꞌicë unicama ꞌaisamaira ꞌicë, Juan ñuiquin ësaquin cacëxa:
—¿Uisa uni isi caramina mitsux anu uni ꞌicëma menu cuancën? Bëtsi bëtsi oquin sináncë uni ax ca tutísha suñun bëcacësa ꞌicën. ¿Usa uni isi caramina cuancën? 25¿Ax usama ꞌain caramina uisa uni isi cuancën? ¿Upíira ꞌaísha cupíira chupa pañucë uni isi caramina cuancën? Usama ca. Camina ꞌunanin, upíira ꞌaísha cupíira chupa pañucë ꞌianan uisa ñu cara cuëënia a ñuñu unix ca anu ꞌapu ꞌicë xubunushi ꞌia. 26¿Usa uni isi cuanima caramina añu isi cuancën? An Nucën Papa Dios quicë bana uni ñuixuncë uni a isi camina cuancën, ¿usa cat? Asérabi cana ꞌën mitsu cain, an Nucën Papa Dios quicë bana uni ñuixuncë unicaman ñuixuncë bana ꞌiásamaira ca Juanën uni ñuixuncë bana ꞌicën. 27Juan ñuiquian ënë menu ucëma pan ꞌicë ꞌë cacë bana a ca Nucën Papa Diosan Isaías cuënëomiacëxa, ësai quicë:
A caxu mi cuanun cana ꞌën uni xutin. Ax pain cuanquin ca anun cuanti bai mëníoquin racanacësaribi oquin, camabi unían min bana cuanun atun nuitua upí ꞌinun sinanamiti ꞌicën.
28Usaquin cuënëo bana ñuitancëxun ca Jesusan anu ꞌicë unicama cacëxa:
—ꞌËn cana mitsu cain, an Nucën Papa Dios quicë bana uni ñuixuncë unicaman ñuixuncë bana ꞌiásamaira ca Juanën ꞌë ñuicë bana ꞌiaxa. Usa ꞌain ca a unicama ꞌiásamaira Juan ꞌicën. Usa ꞌaínbi ca axa Nucën Papa Diosan nëtënu ꞌiti ꞌën unicamax, unían ñuumara iscë ꞌaíshbi Juan ꞌiásamaira ꞌicën.
29An Jesús Juan ñui quicë bana cuacë unicama, ꞌimainun an ꞌapu buánmiti curíqui bicë unicamaribi a Juanën nashimicë, acamax ca —Nucën Papa Diosan mëníosabi oi ca asábi ꞌicë —quiax quiacëxa. 30Acamaxa usai quicëbëbi ca fariseo unicama ꞌimainun an Moisésnën cuënëo bana ꞌunáncë unicaman, Juanën bana cuaisama tani an nashimicë ꞌiti cuëëncëma ꞌixun, Nucën Papa Dios cuëëncësa oi ꞌiisama tanquin Jesusan banaribi cuaisama tancëxa. 31Juan ñuiquin catancëxun ca Jesusan ësaquinribi cacëxa:
—¿Ënë nëtënua bërí bucucë unicamax cara uisa ꞌicë quixun cana mitsu cati ꞌain. 32Ca tuáratsucuxa cuaicësaribi ꞌicën. Cuainux timë́cë ꞌaíshbia cuaitisa tantancëx camáxbi tsotan ca raírinën raíri ësaquin caia: Cuai chirini cuëënun nun paca banocëbëbi camina masá sinani cuaitisama tan. Cuaitisama tancëbë nux —anpan caniacëcë unicama ꞌicësaribiti cananuna ini rarumati ꞌai —quicëbëbi camina masá sinani usairibi ꞌiisama tan. 33Usaribi ca ënë nëtënua bucucë unicamax ꞌicën. Juanëx ca ñu mëscú picëma ꞌianan vino xëacëma ꞌicën. Usa ꞌicë ca unicaman —a unix ca ñunshin ꞌatimañu ꞌicë —quixun caxa. 34Usoquian Juanën ꞌacësoquin ꞌaquinma ꞌën camabi ñu pianan xëaia isquin ca unicaman ësaquin ꞌë ñuia: A unix ca picën tapun ꞌianan xëairacë uni ꞌicën. Ax ca an ꞌapu buánmiti curíqui bicë unicama ꞌimainun ꞌuchañu unicamabë nuibanania quixun. 35Usaquian Juancëñun unin ꞌë ñuicëbëbi ca Nucën Papa Dios, an ënë menu unun ꞌë xuá, an ꞌacë ñucamax asábi ꞌicën. —Usa ca —quixun ca axa ami sináncë unicaman ꞌunania.
Fariseo uni, Simón, aín xubunu Jesús ꞌiá
36Fariseo uni achúshi aín anë Simón, an aín xubunuxun abëtan pi unun cacëx cuanx ca Jesús aín xubunu atsíntancëx abëtan pi tsoócëxa. 37Anua ꞌain ca a ëmanu ꞌicë xanu achúshi ꞌuchañu, —Jesusan ca fariseon xubunuxun piia —quixuan ñuicania cuati, xaxu ꞌacënu ꞌarucë sanuira ꞌinínti ro a bëi uacëxa. 38Uxun ca a caxu uax aín taë ꞌicë anu nitsax inquin aín bëun Jesusan taënu tuscaquin tachabocëxa. Usaquin ꞌaquin ca aín bunbi tatërëanan tatsucucaquin ꞌinínti ron ꞌacëxa. 39Usoia isquin ca fariseo uni an Jesús pi unun cacë, an sináncëxa: Ënë unix asérabi an Nucën Papa Dios quicë bana unicama ñuixuncë ꞌixun ca uin cara a tamëëtia quixun ꞌunánan an tamëëcë ax cara uisa xanu ꞌicë quixun ꞌunántsianxa. Ënëx ca xanu ꞌaisama ꞌicën. 40Usaquin sinania ꞌunánquin ca Jesusan cacëxa:
—Simón, cana mi achúshi ñu caisa tanin.
Cacëxun ca cacëxa:
—Asábi ca, ꞌë ca cat.
41Cacëxun ca Jesusan ësaquin Simón cacëxa:
—Ënëx ca ësa ꞌicën. Achúshi uni ca uni rabëtan curíqui ribíanxa. Achúshinën quinientos curíqui ribínmainun ca bëtsin cincuenta curíquishi ribíanxa. 42Ribínxunbia cupíocëxunma oquin ca a unin an ribíncë uni rabë́ a caxa: ꞌËmi cupíocëxmabi ca asábi ꞌicën, cupíoima camina cuanti ꞌain. Simón, ¿usa ꞌain cara min sináncëx a uni rabë́ uinu ꞌicë́xira bëtsix ꞌicësamaira oi a ribíncë unimi sinani cuëënti ꞌic?
43Cacëxun ca Simonan cacëxa:
—ꞌËn sináncëx ca an ꞌitsaira curíqui ribíncë, ax bëtsíxa ꞌicësamaira oi a unimi sinánti ꞌicën.
Quia ca Jesusan cacëxa:
—Usa ca.
44Usaquin cai ami bësuquin xanu isquin ca Jesusan Simón cacëxa:
—¿Ënë xanúan ꞌaia caina isin? ꞌËx min xubunu atsiniami anun ꞌëx tachucanun min ꞌunpax ꞌinaniamabi ca ënë xanun aín bëunan tachaboxun aín bun ꞌë tatërëanxa. 45Minmi bëtsucucacëmabi ca an ꞌëmi sinánquin ënquinma ꞌë tatsucucaxa. 46Minmi xënin ꞌën maxcá ꞌacëmabi ca an ꞌiníntisa xënin ꞌën taë ꞌaxa. 47Usa ꞌain cana mi cain, an ꞌitsaira ꞌë nuibatia isquin camina ꞌunánti ꞌain, aín ꞌucha ꞌitsaira ꞌaíshbi ca tërë́ncë ꞌicë quixun. An, ꞌën ꞌucha ca ꞌitsamashi ꞌicë quixun sináncë uni, ax ca aín ꞌucha tërë́ncë ꞌaíshbi ꞌitsamashi ꞌë nuibatia.
48Ësoquin Simón catancëxun ca Jesusan a xanu cacëxa:
—Min ꞌuchacama ca tërë́ncë ꞌicën.
49Usoquian Jesusan caia cuati ca axa abë tsócë unicamax ratuti canancëxa:
—¿Uisa uni cara ënëx ꞌic? Anbi ca ꞌucha tërënia.
50Usaía cananmainun ca Jesusan a xanu cacëxa:
—ꞌËn min ꞌucha tërë́nti sinani ꞌëmi catamëti camina min ꞌucha tërëncë ꞌain. Chuámashi ꞌaish camina cuanti ꞌain.
S'ha seleccionat:
Lucas 7: cbrPB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1978, 1995, 2008, 2022 Wycliffe Bible Translators, Inc. All rights reserved.