ལུ་ཀ། 21

མོ་རེན་མ་ག་སྙན་དར།

1ཡི་ཤུ་གི་ ག་ཏཱན་གཟིགས་པ་ཀབ་ཉི་ བེ་དིང་སོ་ངོ་བ་ཀི་ སྙན་དར་སྒྲོམ་ནང་ཀ་ སྙན་དར་ཕུལ་བ་ག་ གཟིགས་པ༌ལ། 2མོ་རེན་མ་དུག་པུ་ཐུར་གི་ ཤི་ཀི་ཉིག་ཙིང་ ཕུལ་བ་ག་བུ་ རོ་ཀི་གཟིགས་པ༌ལ།

3ཉི་རོ་ཀི་གསུངས་མ་ལ་ ཇི་གི་ ན་ཧ་ཐྲང་ཉི་ཡེག་པེ་ ཐམས་ཅན་གེ་མང་པུ་ ཨོ་ཐ་མོ་རེན་མ་དུག་པུ་གི་ ཕུལ༌བ། 4ཧང་ཡ་དག་ནེ་ལ་ བཱརའ་ཐམས་ཅན་གི་ རོག་ཏེ་བ་ཀ་ རྒྱུ་ནོར་ལོངས་སྤྱོད་ མང་པུ་ཆོ་ཝ་དང་ཏུ་ཉི་ ཕུལ༌བ། དག་པ་ཀབ་ཉི་ རོ་ཀི་ རོག་ ཧབ་ཏུར་རང་ དུག་པུ་ཆོན་ཐཱན་རང་གི་ནེ་བུ་ རོ་ཀི་ རོག་ཟཱན་ཇ་མེ་དེན་གེ་ཆོ་ཁཱན་ ཐམས་ཅན་རང་ ཕུལ་བ་དག༌ཉི༎

ཡི་ཤུ་གི་ མཆོད་ཁང་ཆེད་ཉི་དི་ལེ་དག་ཉི་ གསུངས་མ༌ལ།

5ཉི་སློ་མ་ཚེ་བང་གི་ མཆོད་ཁང་ག་ཀོར་གེ་ གཏམ་ཨ་ཉི་ དབའི་ ཨོ་ཐ་མཆོད་ཁང་ ལུང་ཅེམ་པུ་ཅེམ་པུ་ཨ་ཝ་དང་ སོ་ངོ་བ་ཀི་ཕུལ་ཁཱན་ ཕུལ་ཆ་བ་ཀི་ བཞེངས་པ་ལ་ཉི་དག་ཉི་ ཡེག་པ་ཀབ་ཉི་ ཡི་ཤུ་གི་གསུངས་མ་ལ་ 6ཨོ་ཐ་ ན་ཤི་ཐོང་ཁཱན་བ་ ཆེད་ཇོང་ཉི་ ལུང་ཐུར་གི་ཐུང་ཀ་ཙེག་ཉི་ ཐུར་བུ་མ་ལུས་པེ་ག་ དུས་ཤར་བེ་དག༌ཉི།

7ཉི་རོག་ཏེ་བ་ཀི་ ཞུ་ཝ་ལ་ སློབ་དཔོན་ ཨོ་ཐ་བ་ ཧ་ལ་ཇུང་མེ་ཡ། ཉི་ཨུ་ཐུ་ད་བུ་ ཇུང་མེ་རེན་པ་ཀབ་ཉི་ རྟགས་ཧང་ད་བུ་ཐུར་ ཨོ་ཕེ་ཡ་དག༌ཉི།

8ཉི་རོ་ཀི་གསུངས་མ་ལ་ ནའི་ལམ་མང་གི་ཝ་གེ་ མ་རིག་པེ་དེན་གེ་ རིག་པ་སྒྲིམ༌ཅོ། ཧང་ཡ་དག་ནེ་ལ་ ཇ་ག་མིང་ག་ མང་པུ་ཐུར་གི་ཨུན་ཐཱན་ ཡེག་པེ་ ཇང་རོག་གི༌ལ། ཉི་དུས་ཙུན་རེན་པ་དག༌ཉི། རོག་ཏེ་བ་ཀ་ཚིང་ཚིང་མ་དི། 9ཉི་ན་ཤི་ ཕྱད་མདའ་དང་ ངོ་ལོག་ཨ་ན་དག་ཉི་ ན་ཐ་ལ་ཀབ་ཉི་ ཡོང་མ་ཙུང༌ཤོ། ཧང་ཡ་དག་ནེ་ལ་ གོ་རང་ ཨོ་ཐ་བ་ ཇུང་མེ་ཁེ༌ལེ། ཨོ་ཉ་ཁྲེ་ཀེ་རང་ ཇུག་དུང་མེ་མང་གི་དག༌ཉི། 10ཉི་རོ་ཀི་ རོག་ཏེ་བ་ཀ་ གསུངས་མ་ལ་ མི་རིགས་གི་ ཐུར་གི་ཐུར་ཀབ་ཉི་ ཕྱད་མདའ་ཕི༌ལེ། ཉི་རྒྱལ་ཁབ་བུ་ ཐུར་གི་ཐུར་ག་ ཕྱད་མདའ་ཕི༌ལེ། 11ཉི་ན་ཀ་ ཡོང་ཁེ་སི་སི་ཨ་ཝ་ཨོ་ཕེ། ཉི་ས་ཆ་ མ་འདྲ་ཝ་མ་འདྲ་ཝ་ག་ ཟ་ལེ་ག་བེས༌པེ། ཉི་ཨོ་ག་རང་ རེམ་པ་ཁེ༌ལེ། ཉི་ཞིང་ཁམས་ག་ རྟགས་ཆི་ལུ་ ཡོང་ཁེ་སི་སི་ཨ་ཝ་བ་ ཇུང༌མེ།

12དག་པ་ཀབ་ཉི་ ཨོ་ཐ་བ་ མ་ཇུང་མེ་གོ་མ་ རོག་ཏེ་བ་ཀི་ ན་ཧ་ཐུང་ཀ་ ག་དང་ཀེ་ཉི་ མ་ལེག་པ་ཨ༌ལེ། ཉི་ཡ་ཧུ་དི་པ་ ཆོས་འཛོམས་དང་ བཙོན་ཁང་ག་ཙུག༌པེ། ཉི་ནའི་ ཇ་ག་མིང་ག་ཡོར་ཀེ་ དཔོན་དང་ དཔོན་སློབ་བ་ཀ་གུབ་ཀ་ ཀེ༌བེ། 13ཉི་ཨུ་ཉུ་ཤོ་ ན་ཤི་ ཇ་ག་འཛོམས་དཔང་ ཨ་ལེ་ག་དུས་གི༌ལ། 14ཨོ་ཉི་ཨ་དེན་གེ་ སེམས་ཀ་ཐ་ཉི་ ལན་ཧང་ཏེན་བི་ལེ་གི་ས་ཨ་ཉི་ གོ་མ་གེ་རང་མ་མི། 15ཧང་ཡ་དག་ནེ་ལ་ ན་ཧ་དགྲ་བྱང་ཕིཤི་བ་ཀི་ ཐིང་ཐཱན་ ན་ཤི་ཡེག་ཁཱན་ཆཱས་ག་ ཁ་མ་དོག་པཱན་ མ་དེན་མ་དག་ཉི་ ཡེག་པེ་མར་བེ་ག་ ནོ་ཝང་དང་རིག་པ་ ཇི་གི་ ན་ཧ་བི༌ལེ། 16ནའི་ རང་ཏེན་ག་ ཕ་མ་དང་ཡུང་ཟི་ ཉི་ཉེ་ཝ་ཐུང་མ་དང་ ཇ་རོ་བ་ཀི་ཆང་ ག་ཀེ༌བེ། ཉི་ནའི་ ཚེ་བང་ཏ་ རོག་ཏེ་བ་ཀི་ ཤེ་ལེ་ཙུག༌པེ། 17ཉི་ཇ་ག་མིང་ག་ཡོར་ཀེ་ ནའི་ཐུར་གི་རང་ མ་ཟེས༌པ། 18དག་པ་ཀབ་ཉི་ ན་ཧ་ཤ་རང་ག་ ཚམ་བུ་དང་ཐུར་རང་ མ་གེ་མ་ན། 19ན་ཤི་ཐེས་ཉི་ ན་ཧ་ཚེ་ཉོང་པེ་རེ༌བེ༎

ཡ་རུ་ཤ་ལེམ་ ཇཝ་ཆུ་མེ་དག་ཉི་ ཡི་ཤུ་གི་གསུངས་མ༌ལ།

20དག་པ་ཀབ་ཉི་ ན་ཤི་ ཡ་རུ་ཤ་ལེམ་ དམག་མི་བ་ཀི་ ཉ་གེ་ཐ་གེ་ལོ་མ་ ཐོང་མ་ཀབ་ཉི་ དཱན་ཇཝ་ཆུ་མེ་ རེན་པ་ལ་དག་ཉི་ ན་ཤི་སེ་ལེ་ཁེ༌ལེ། 21ཉི་ཡ་ཧུ་དི་ཡ་ག་ཆོ་ཁཱན་བ་ ཕུ་ག་ཏཱན་ གཱན་ཇོང་མེ་ཁེ༌ལེ། ཉི་ཁྲོམ་ནང་ཀ་ཆོ་ཁཱན་བ་བུ་ ཕིས་ཀ་ཏཱན་ ཤོན་ཇོང་མེ་ཁེ༌ལེ། ཉི་ཁྲོམ་གེ་ཕིས་ཀ་ དུང་ཁོན་ཆོ་ཁཱན་བ་ ལོག་ཉི་ཁྲོམ་ནང་ཀ་ ནུ་ཕེ་མང་ཕ། 22ཧང་ཡ་དག་ནེ་ལ་ གསུང་རབ་ག་ འབྲི་ཁཱན་བ་ ཐམས་ཅན་རང་ དེན་ཐ་འགྲུབ་ཕེ་དེན་གེ་ ཨོ་ཐ་བ་ཤོ་ ཧིང་འགྲམ་ལོག་པེ་ག་དུས་གི༌ལ། 23ཨའི་ ཨུ་ཉུ་གང་ཀ་ ལུས་པུ་མ་ཉམ་པ་ཆོ་ཁཱན་དང་ ཝག་ཙ་ག་ ནུ་བི་ལེ་ཁེ་ཁཱན་བ་ ཧབ་ཏུར་ དཀའ་ཝ་ཅཱད་པེ་ཡ། ཧང་ཡ་དག་ནེ་ལ་ ཨོ་ཐ་ས་ཆ་ག་ གནམ་མེད་ས་མེད་ ཀ་ལུ་ཨོ་ཕེ། ཉི་ཨོ་ཐ་སོ་ངོ་བ་ཀི་ ཁྲིམས་ཉོང༌པེ། 24རོག་ཏེ་བ་ ཚེ་བང་ མཚོན་ཆ་ག་ཐུང་ཀེ་ཤི༌ལེ། ཉི་རྒྱལ་ཁབ་ཁོན་ བཙོན་པ་ཨ་ཉི་བུ༌ལེ། ཉི་དད་པ་མ་ཨ་ཁཱན་བ་ཀ་དུས་ ཇུག་མ་དུང་མ་སག་པུ་ ཡ་རུ་ཤ་ལེམ་ དད་པ་མ་ཨ་ཁཱན་བ་ཀི་ དབང༌པེ༎

སོ་ངོ་ག་ཟ་བྱོན་མེ་ཀོར་གེ།

25ངམ་ ལ་ཉི་ངམ་དང་ སྐར་མ་སྨིན་དྲུག་བ་ མ་འདྲ་ཝ་རི་ཉི་ ཉི་མཚོ་ག་རི་ལག་ཉི་ ཀཱན་ཇིག་པ་ཀབ་ཉི་ འཛམ་གླིང་ཐམས་ཅན་ག་ སོ་ངོ་བ་ ཧང་རང་ཨ་ལེ་མ་སེ་ཝ་རི་ཉི་ གནམ་མེད་ས་མེད་ སྡུག་བསྔལ་ཨ༌ལེ། 26འཛམ་གླིང་ག་ ཧང་ཇུང་མེ་གི་ལ་སྨོ་ མ་སེ་ཝ་ཨ་དེན་གེ་ སོ་ངོ་བ་ ཡོང་ཁེ་ཉི་ དྲཱན་མ་མ་ཝ་རི༌ལེ། ཧང་ཡ་དག་ནེ་ལ་ ཞིང་ཁམས་བ་ཀ་ དབང་ག་བ་དྲེང༌མེ། 27ཉི་ཤ་ རོག་ཏེ་བ་ཀི་ སོ་ངོ་ག་ཟ་ མུག་པ་ནང་ཀ་ དབང་དང་ གཟི་བརྗིད་ཆི་ལུ་ཀབ་ཉི་ ཨོ་ཕ་ག་ཐོང༌མེ། 28ཨོམ་ ཨོ་ཐ་བ་ ཇུང་མ་ཀབ་ཉི་ ན་ཧ་བ་ ཐིང་ཐཱན་ ག་ཏཱན་གོད༌ཅོ། ཧང་ཡ་དག་ནེ་ལ་ ནའི་ཐར་པ་ཉོང་པེ་ག་ ཅམ་པ་ཅ་གི་ལ་དག༌ཉི༎

དཔེ་ལྕོག་མ་ཤིང་གེ་ལམ༌ཅོ།

29ཉི་རོ་ཀི་ དཔེ་གཏམ་ཐུར་གསུངས་ཉི་ ལྕོག་མ་ཤིང་དང་ བཱརའ་ཤིང་ ཐམས་ཅན་ག་ གོད་ཅོ༌ལེ། 30རོག་ཏེ་བ་ཀ་ཤ་བ་ སིང་མ་ཤོ་ཝ་ག་ ནའི་ཏེན་གི་ ཐོང་མ་ཀབ་ཉི་ ན་ཤི་སེན་ཅ་ བེར་ར་ག་ཏེབ་ལ་ན་དག༌ཉི། 31ཨུ་ཉུ་པུརུས་ཀིན་ཨ་ཉི་ ཨོ་ཐ་བ་ ཇུང་མ་ཐོང་མ་ཀབ་ཉི་ དཀོན་མཆོག་ག་རྒྱལ་སྲིད་ ར་ག་ཏེབ་ལ་ཨ་ཉི་ ན་ཤི་སེ་ལེ་ཁེ་ལེ་ན་དག་ཉི་ གསུངས་མ༌ལ། 32ཇི་གི་ ན་ཧ་ཐྲང་ཉི་ཡེག་པེ་ ཨོ་ཐ་བ་ ཐམས་ཅན་རང་ མ་ཇུང་མ་སག་པུ་ ཨོ་ཐ་མི་རབས་ མ་མུད༌པ། 33ཞིང་ཁམས་དང་ འཛམ་གླིང་ ཡེ་ཉི་ཇོང༌མེ། དག་པ་ཀབ་ཉི་ ཇ་ག་ཆཱས་ག་བ་ ཏི་ངེ་རང་ ཡེ་ཉི་མ་དི༌ལ༎

གོད་པེ་ཁེ༌ལེ།

34དག་པ་ཀབ་ཉི་ རང་ཏེན་ག་དེན་གེ་ རིག་པ་སྒྲིམ༌ཅོ། ཨུ་ཉུ་མ་ནེ་ལ་ སྤྲོ་བ་ཙི་ཉི་ ཟཱན་ཇ་མེ་ག་ ཚ་གྱང་བང་ཉི་ ཞུ་སུང་ཁུ་ཉི་ ཚེ་ད་ལྟ་ག་དེན་གེ་ཤ་མི་ཉི་ ཆོ་ལ་ཀབ་ཉི་ ཨོ་ཉ་ནོང་ཁེ་པ་ ན་ཧ་ཐུང་ཀ་ ཁ་ཤོང་ད་བུ་ཐུར་ཨ་ཉི་ ཤེག་ཏུ་ན། 35ཧང་ཡ་དག་ནེ་ལ་ ཨོ་ཉ་ནོང་ཁེ་པ་ འཛམ་གླིང་ག་ཆོ་ཁཱན་ ཐམས་ཅན་ག་ཐུང་ཀ་ ཤེག༌པེ། 36དག་པ་ཀབ་ཉི་ ཨོ་ཐ་བ་ ཇུང་མ་ཀབ་ཉི་ གཱན་ཐར་ཉི་ སོ་ངོ་ག་ཟ་ག་གུབ་ཀ་ ཐིང་མེ་དེན་གེ་ དུས་ཏ་བུ་རང་གོད་ཉི་ སྨོན་ལམ་ཞུའི་དག་ཉི་ གསུངས་མ༌ལ།

37ཉི་ནོང་དྲང་རང་ རོ་ཀི་མཆོད་ཁང་ནང་ཀ་ ཡེ་ཉི་གནང་མ༌ལ། དག་པ་ཀབ་ཉི་ བི་ནང་ག་ཤོ་ ཡ་རུ་ཤ་ལེམ་གེ་ ཕིས་ཀ་བྱོན་ཉི་ གཟིམ་མེ་ག་དེན་གེ་ ཨོ་ལིབ་ཤིང་ཕུ་དག་ས་ག་ཏཱན་ བྱོན་མ༌ལ། 38ཉི་ཝུན་བེད་པེ་རང་ སོ་ངོ་ཐམས་ཅན་རང་ མཆོད་ཁང་ག་ རོག་བཞུགས་ས་ག་ རོ་ཀེ་གསུང་ཉཱན་པེ་དེན་གེ་ ཤེག་པ༌ལ༎

S'ha seleccionat:

ལུ་ཀ། 21: TNTB

Subratllat

Comparteix

Copia