མ་ཏི། 2

ཤར་ག་རྩིས་པ་བ་ ཡི་ཤུ་མཇལ་བེ་ག་ ཨོ་ཕ༌ལ།

1ཡ་ཧུ་དི་ཡ་ག་ཁྲོམ་ བེད་ལེ་ཧེམ་དག་ས་ག་ ཡི་ཤུ་འཁྲུངས་མེ་གང་ཀ་ དཔོན་ཧེ་རོད་དག་ཁཱན་གི་ དབང་ཅ་གི་ཝ༌ལ། ཨུ་ཉུ་གང་ཀ་ ཤར་གེ་ཨུ་ཁཱན་རྩིས་པ་བ་ ཡ་རུ་ཤ་ལེམ་ག་ཤེག་ཉི་ 2ཡ་ཧུ་དི་པ་ག་ དཔོན་ཨ་ཉི་འཁྲུངས་ཁཱན་ ཨོ་ག་ཅ་ཡ། རོ་ཀ་སྐར་མ་སྨིན་དྲུག་ཁེ་པ་ ཨ་ཤི་ཤར་ག་ ཤར་བ་ཐོང་མ་ཨ་དེན་གེ་ ཨ་ཧ་བ་ རོ་ཀ་གསོལ་ཝ་ཏ་པེ་དེན་གེ་ ཨོ་ཕ་གི་ལ་དག་ཉི་ ཞུ་ཝ༌ལ།

3དཔོན་ཧེ་རོད་གི་ ཨོ་ཉ་ཀོར་གེ་ ན་ཐ་ལ་ཀབ་ཉི་ རོག་ཐུགས་དོགས་པ༌ལ། ཉི་ཡ་རུ་ཤ་ལེམ་ག་ སོ་ངོ་བ་བུ་ ཐམས་ཅན་རང་ སྡུག་བསྔལ་ཨ་ཝ༌ལ། 4ཧེ་རོད་གི་ ཡ་ཧུ་དི་པ་ག་ བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ ཐམས་ཅན་རང་ ཏབ་ཐུར་རཱན་ཐཱན་ ཁིརིས་ཨོ་ག་འཁྲུངས་མེ་ཡ་ཨ་ཉི་ ཇི་མ༌ལ། 5ཉི་རོག་ཏེ་བ་ཀི་ ཞུ་ཝ་ལ་ ཁིརིས་ཁེ་པ་ ཡ་ཧུ་དི་ཡ་ས་ཆ་ག་ཆོ་ཁཱན་ བེད་ལེ་ཧེམ་ག་འཁྲུངས༌མེ། ཧང་ཡ་དག་ནེ་ལ་ ལུང་བསྟན་པ་གི་ ཨོ་ཐེན་འབྲི་བ་ཅ་

6ཡ་ཧུ་ད་ག་ཆ་འོག་ག་ཆོ་ཁཱན་ ཁྲོམ་བེད་ལེ་ཧེམ་ ནཱན་ཤོ་ ཡ་ཧུ་ད་དབང་ཁཱན་བ་ཀ་པོང་ཀེ་ ཟེ་མུ་མང་གི། ཧང་ཡ་དག་ནེ་ལ་ ཇ་ག་སོ་ངོ་ཨིས་རེལ་བ་ དབང་པེ་དེན་གེ་ དབང་ཁཱན་ཐུར་ ནཱན་གེ་ཨ་ཉི་འཁྲུངས༌མེ།#2:6 མི་ཀ་ག་དཔེ་ཆ་ 5:2 དག༌ཉི།

7ཉི་ཧེ་རོད་གི་ རྩིས་པ་བ་ བཱརའ་གི་མ་སེ་ཝ་ཨ་ཉི་རཱན་ཐཱན་ སྐར་མ་སྨིན་དྲུག་ཁེ་པ་ ཧ་ལ་ཤར་བ་གི་ལ་སྨོ་ ཨོ་ཉ་ཀོར་གེ་ ཏེན་ཏེན་ཨ་ཉི་ ཇི་མ༌ལ། 8ན་ཧ་བ་ བེད་ལེ་ཧེམ་ག་དིན་ཐཱན་ ཝག་ཙ་ཁེ་པ་ལེག་པུ་ཨ་ཉི་ ལམ༌ཤོ། ཉི་ཝག་ཙ་མཇལ་དེན་གེ་ ཇ་ག་བཱརང་ཀ་ ལོག་ཉི་ཡེག་པེ་ག་ཨོ་དོ། ཧང་ཡ་དག་ནེ་ལ་ ཇང་བུ་ རོ་ཀ་གསོལ་ཝ་ཏ་པེ་ག་ དི་ལེ་དག་ཉི་ ཧེ་རོད་གི་ རོག་ཏེ་བ་ཀ་གསུངས་ཐཱན་ ཀུན་ཏི་ཝ༌ལ།

9དཔོན་གི་གསུངས་ཉི་ཆུམ་དེན་གེ་ རོག་ཏེ་བ་ལོག་ཉི་རང་ རོག་ཏེ་བ་ཀ་ ལམ་གེ་དི་ཝ༌ལ། ཉི་ཤར་ག་ཤར་ཁཱན་ སྐར་མ་སྨིན་དྲུག་ཁེ་པ་ ལོག་ཉི་རང་ཤར་ཐཱན་ རོག་ཏེ་བ་ཀ་གུམ་གུམ་དི་ཉི་ ཝག་ཙ་བཞུགས་ས་ ཕའི་ག་དོབ་ཏང་ག་ཤེག་པ་ཀབ་ཉི་ ནོང་མ༌ལ། 10རོག་ཏེ་བ་ཀི་ སྐར་མ་སྨིན་དྲུག་ཐོང་མ་ཀབ་ཉི་ རོག་ཏེ་བ་ གནམ་མེད་ས་མེད་ ཤོ་ནང་ཕེ་ཝ༌ལ། 11ཉི་རོག་ཏེ་བ་ ཕའི་ནང་ཀ་ནུབ་ཉི་ གོད་པ་ཀབ་ཉི་ ཝག་ཙ་དང་རོ་ཀ་ཡུམ་ མ་རི་ཡམ་མཇལ་བ༌ལ། ཉི་རོག་ཏེ་བ་ཀི་ ཕྱག་འཚལ་ཉི་ ཝག་ཙ་ག་གསོལ་ཝ་ཏ་པ༌ལ། ཉི་རོག་ཏེ་བ་ཀི་ རང་རང་ས་ག་དོ་ཕ་ཙ་ཕེག་ཐཱན་ གསེར་དང་པོས་ ཉི་དྲི་བཟང་ག་བུར་ཤོན་ཉི་ ཕྱན་ཇེ་ཨ་ཉི་ཕུལ་བ༌ལ། 12རོག་ཏེ་བ་ཀ་ མོང་ཤི་ནང་ཀ་ ཧེ་རོད་ག་བཱརང་ཀ་ ལོག་ཉི་མ་དི་དག་ཉི་ དཀོན་མཆོག་གི་ གསུངས་མ་ཨ་དེན་གེ་ རོག་ཏེ་བ་ བཱརའ་ལམ་གེ་ཀོར་ཉི་ རོག་ཏེ་བ་ཀ་ རྒྱལ་ཁབ་ག་ཏཱན་ དི་ཝ༌ལ༎

ཨི་ཇིབ་ག་ཏཱན་གཱན་དི་ཝ༌ལ།

13རྩིས་པ་བ་དི་དེན་གེ་ གཙོ་བོ་ག་ ཞིང་ཁམས་ག་འཐེན་པ་ ཡོ་སེཕ་ག་ མོང་ཤི་ནང་ཀ་བྱོན་ཐཱན་ གསུངས་མ་ལ་ ག་ཝུན་ཐཱན་ ཝག་ཙ་དང་རོ་ཀ་ཡུམ་རིག་བུ་ཉི་ ཨི་ཇིབ་ག་ཏཱན་གཱན་ཇོང༌ཤོ། ཉི་ཇི་གི་མ་ཡེག་པ་སག་པུ་ ལེ་ལ་རང་ཆོའི། ཧང་ཡ་དག་ནེ་ལ་ ཝག་ཙ་བཀྲོངས་མེ་དེན་གེ་ ཧེ་རོད་གི་ལ་མེ་དག༌ཉི།

14ཨོ་ཉ་བི་ནང་ག་རང་ ཡོ་སེཕ་གི་ ཝག་ཙ་དང་ རོ་ཀ་ཡུམ་རིག་བུ་ཉི་ ཨི་ཇིབ་ག་ཏཱན་ བྱོན་མ༌ལ། 15ཉི་ཧེ་རོད་ མ་གཤགས་པ་སག་པུ་ ལེ་ལ་ག་རང་ཆོ་ཝ༌ལ། ཉི་གཙོ་བོ་གི་ རོ་ཀ་ལུང་བསྟན་པ་ག་ཐུང་ཀེ་ཨ་ཉི་ ཇི་གི་ཇ་ག་སྲས་ ཨི་ཇིབ་གེ་ཕིས་ཀ་ར་ཝ་#2:15 ཧོ་ཤེ་ག་དཔེ་ཆ་ 11:1དག་ཉི་ ལུང་བསྟན་ཁཱན་ཁེ་པ་ དེན་ཐ་འགྲུབ་ཕ༌ལ༎

ཧེ་རོད་གི་ཝག་ཙ་བ་ཤེ་ཝ༌ལ།

16རྩིས་པ་བ་ཀི་ རོ་ཀ་མགུ་སྐོར་ཕི་ཝ་ལ་དག་ཉི་ ཧེ་རོད་གི་མཁྱེན་ཉི་ རོག་གནམ་མེད་ས་མེད་ དགོངསམ་ཁྲེལ་པ༌ལ། ཉི་བེད་ལེ་ཧེམ་དང་ ཨོ་ཉ་ཁོར་ཀ་ཆོ་ཁཱན་ ཉིང་ཉིག་ཙིང་དང་ ཉིང་ཉིག་ཙིང་གེ་དོང་ཆོ་ཁཱན་ ཝག་ཙ་ཟ་ག་བ་ ཐམས་ཅན་རང་ཤེ་དག་ཉི་ བཀའ་གནང་མ༌ལ། ཧང་ཡ་དག་ནེ་ལ་ རྩིས་པ་བ་ཀི་ཡེག་པ་དང་ཏུ་ཉི་ རྩིས་ཕིན་གོད་པ་ཀབ་ཉི་ སྐར་མ་སྨིན་དྲུག་ཤར་ཉི་ ཉིང་ཉིག་ཙིང་ཕང་ དི་ཝ་ཆོ་ཝ༌ལ། 17ཨོ་ཐེན་ཨ་ཉི་ ལུང་བསྟན་པ་ ཡར་མི་ཡ་གི་ གསུངས་ཁཱན་ཁེ་པ་ དེན་ཐ་འགྲུབ་ཕ༌ལ།

18ཁྲོམ་ར་མ་གེ་ ཀཱན་ཐུར་ན་ཐ་ན། གནམ་མེད་ས་མེད་ མརང་ཉི་ཤོག་ཉི་གེབ༌ལ། ར་ཧེལ་ རོ་ཀ་ཝག་ཙ་བ་ཀ་དེན་གེ་ གེབ༌ལ། ཉི་རོག་ཏེ་བ་ ཤི་ཝ་ཨ་དེན་གེ་ རོ་ཀ་སེམས་གསོ་ཨ་ནེ་བུ་ རོ་ཀི་ན་ལུ་མ༌ལ་#2:18 ཡར་མི་ཡ་ག་དཔེ་ཆ་ 31:15 དག༌ཉི༎

ནཱས་རཱད་ག་ཏཱན་ལོག་པ༌ལ།

19ཧེ་རོད་གཤགས་ཏེན་གེ་ ཨི་ཇིབ་ག་ཆོ་ཁཱན་ ཡོ་སེཕ་ག་མོང་ཤི་ནང་ཀ་ གཙོ་བོ་ག་ ཞིང་ཁམས་ག་འཐེན་པ་བྱོན་ཐཱན་ གསུངས་མ་ལ་ 20ཝུན་ཐཱན་ ཝག་ཙ་དང་ རོ་ཀ་ཡུམ་རིག་བུ་ཉི་ ཨིས་རེལ་ག་ས་ཆ་ག་ཏཱན་དི། ཧང་ཡ་དག་ནེ་ལ་ ཝག་ཙ་ཤེ་ལེ་མིག་པ་ཕི་ཁཱན་བ་ ཤིན་ཆུ་མ་དག༌ཉི།

21ཉི་ཡོ་སེཕ་ཝུན་ཐཱན་ ཝག་ཙ་དང་ རོ་ཀ་ཡུམ་རིག་བུ་ཉི་ ཨིས་རེལ་ག་ས་ཆ་ག་ཏཱན་ བྱོན་མ༌ལ། 22དག་པ་ཀབ་ཉི་ ཧེ་རོད་ག་ཚབ་ཀ་ རོ་ཀ་སྲས་ཨར་ཁི་ལཱས་གི་ ཡ་ཧུ་དི་ཡ་དབང་ཅ་དག་ཉི་ ཡོ་སེཕ་གི་མཁྱེན་མ་ཀབ་ཉི་ རོག་ལེ་ལ་བྱོན་མེ་ག་ ཡོང་ཁེ་ཝ༌ལ། ཉི་རོ་ཀ་མོང་ཤི་ནང་ཀ་ དཀོན་མཆོག་གི་ གསུངས་མ་ཨ་དེན་གེ་ རོག་ག་ལིལ་ག་ ཆ་འོག་ག་ཏཱན་ བྱོན་མ༌ལ། 23ཉི་རོག་ཏེ་བ་བྱོན་ཉི་ ཁྲོམ་ནཱས་རཱད་དག་ས་ག་ བཞུགས་པ༌ལ། ཉི་ཨུ་ཐུ་བུ་ ལུང་བསྟན་པ་བ་ཀི་ རོག་ཤོ་ ནཱས་རི་པ་ཨ་ཉི་ཆིན་མེ་དག་ཉི་ གསུངས་ཁཱན་ཁེ་པ་ དེན་ཐ་འགྲུབ་ཕེ་དེན་གེ་ ཇུང་མ༌ལ༎

S'ha seleccionat:

མ་ཏི། 2: TNTB

Subratllat

Comparteix

Copia