Matsiyù 7

Yesù ci moo mà kitsi kunùn mòò tsɛ waa

(Lukì 6.37-42)

1Yesù yè dzin kɔn ci: «Àwà, e maà kitsi kunùn dzyee rèè tsɛ waa, tɔ̀ ye fa, mòò fa kitsi kunun e tsu tsɛ waa. 2#Mar 4.24.E maà tɔ̀ fa waa, kàtsu, ye mòdzian kitsia kitsiu'n kur'liì rà, ye sa nà kitsi tɔ̀ rii tsuru. Ye to dzyee rèè raà gɔ̀ɔn gè niì ka, tɔ̀ rii nà ka ye raà sa gɔn. 3Fee bèe à to ɲɔ̀ùniin nìi ni wo mòdzìnsia jaa tsɛ, wo jaa ni tɔ̀ ra, tɔ̀ to y'à tàrà, gɔ̀ɔ blà riì ni wo yɛ̀r'la raà tsɛ, wo na tɔ̀ jàa waa ? 4Wo dzia dzin a modzìnsia rà dzùrù, à to m'a jaa tsɛ ɲɔ̀ùniɛ̀n bo, tɔ̀ to y'à tàrà gɔ̀ɔ blàa ni wo raà tsɛ. 5Mòdzin duungoofiitsi, a jaa tsɛ raa gɔ̀ɔ blàa bo ŋe. Tɔ̀ ye fa, wo nà dzi a modzìnsia jaa tsɛ raa ɲɔ̀ùniɛ̀n jà cɛyn, wo y'à bo.

6Nìi Ŋaablà raà, e maà tɔ̀ sìn vì tsuru mòdzin neè rà waa, è mà nà to e jaa kere e kpɛyn, yè e vyɛ vyɛ̀ waa. E to mà e re sɛnu ma ge kpàxɔù rèè maa bɛy tsuru mòdzin neè bììn, yè nà à tɔ̀rɔ̀ e san dzuun waa.

Yesù ci Ŋaabla mòò kɔ̀ɔ nìi tsuru

(11.9-13)

7E ye gè o ge fyɛ̀n, à nà sìn e ra. E ye gè o ge gaa, e naà à tàrà. E ye dziɛ̀ màban, à nà san e re. 8Àwà, a moo o moò ye Ŋaablà fyɛn, à nà a kɔ. A moo o moò ye gè gaa à re, a naà à tàrà. A moo o moò to ye dziɛ̀ màban, Ŋaabla nà à san a re. 9Ye ɲan, tsì rii soo dzin dzia buru fyɛn à re, è kpàà sin à ra, ci tɔ buru ? 10À to ye ji fyɛ̀n, à ni myɛn sin à ra ci tɔ ji ɔ ? 11Ye ko e re ɲanbee sa, ye wù, ye yè gè niì sìn e dzin nèè rà è bà wù, ye tɔ̀ tɔ̀. Ye ye ba tɔ̀ tɔ̀, ye Fà Ŋaablà riì ni jìrànxɔ rɔ̀n, gooma na ni tɔ̀ mà waa. Nìì reè y'à fyɛ̀ɛn, à nà twɛy kɔ̀ gè rà, nìi wù. 12#Luk 6.31.Tà doùn, ye sào ni mòdzian yè nìi sapɛ fa ye re, e sa yeè tɔ̀ soo fa mòdzian rè. Sàrìyaa gooma reè tɔ̀ rii kpàdeò, Kɛɛra reè sa yeè bà ci tɔ̀ tsuru.

Dɔ̀nmàdzii kiɲaaniàn ko dɔ̀nmàdzii blaa

(Lukì 13.24)

13Ye dɔ̀n dɔ̀nmàdzii kiɲaaniàn nà. Ye tɔ̀ fa, kàtsu shi niì bèe mòdzian barama nɔ̀n, tɔ̀ dziɛ̀ blà, à shia yè bà blà. Mòò giri to dɔ̀ɔn tɔ̀ rii lè, kàtsu à dɔn dzi. 14Ŋà shi niì bèe jaamabee rà, tɔ̀ dɔ̀nmàdziɛ dzyɛ̀n à nɔ̀ɔ̀dzii yè bà ɲaan. Mòò bɛrɛ na tɔ̀ tàr'la waa.

Yesù ci mìn kaàwɔ kɛɛra doo de reè rà

15Ye e yɛrɛ kaàwɔ kɛɛra doo de reè rà. È nàa ye mà, a ci saa ì, ŋà è duùn nɔ̀n, è tsuru kparan ɲan na ni. 16Ye nà è tɔ̀ e dziàn nà. Mòo ɛ̀rɛ̀nzhɛ̀ndzin ɲɔnàma boò daaku ra ɔ ? Mòò to fiigidzin ɲɔnàma boò daaku ra ɔ ? 17Tà doùn, gɔ̀ɔ wùù rii dzin wùù wɔɔ̀, gɔ̀ɔ ɲaan yeè bà dzin ɲaan wɔɔ̀. 18Gɔ̀ɔ wùù na dzia dzin ɲaan wɔ waa, gɔ̀ɔ ɲaan to na dzia dzin wùù wɔ waa. 19#Mat 3.10; Luk 3.9.Gɔ̀ɔ o gɔ̀ɔ na dzin wùù wɔɔ̀, tɔ nà jèè maa sa rɔ̀n. 20#Mat 12.33.Tà doùn, ye nà kɛɛra doo de reè tɔ̀ e dziàn nà.

Yesù ci nìì reè nà dɔ̀n Ŋaablà re màsà gane rɔn

(Lukì 13.25-27)

21Àwà, nìì reè sapɛ dziàn mun na ci: "Tsìfaà, Tsìfaà," à na ni a ci twɛy sapɛ rii nà dɔ̀n Ŋaablà re Màsà gane rɔn dɛ ! Mun Fà Ŋaablà riì ni jìrànxɔ rɔ̀n, nìì reè tɔ̀ sàɔ faa, twɛy rìì nà dɔ̀n mɔn. 22Tsìɛ̀ sii sèè, mòò giri nà dzin mun na ci: "Tsìfaà, Tsìfaà, ɲe na kɛɛrabee fa wo rìì tsoo ka ɔ ? Ɲe na kwey rèè kaa bo mòdzian kpɛyn wo rìì tsoo ka ɔ ? Ɲe na kabagoo goo giri fa wo rìì tsoo ka ɔ ?" 23#Zab 6.9.Tɔ̀un, mun nà à dè fyɛ è ra ci: "Mun na ye tɔ̀ jà ŋe fyeu ! Ye bo n tɛyn, gooɲaan fa ree reè."

Yesù nìi dèu gbà fiɛ̀ jiu'n kur'la tsɛ

(Lukì 6.47-49)

24Tɔ̀ kamà, mòò o moò mun ne gooma ree reè myɛ̀ɛn à yè è shi jiì, tɔ ni a ci mòdzin akiritsi, nìi yè e re gbàà jiɔ̀ faà tsɛ. 25Ŋaa brìsi yè nà tɔ̀un, ba rèè yè tsyɛn, fyɛn bla yeè fù, yè nà firi gbàà tsɛ. Gbàà na mɛɛy waa. À na mɛɛy waa, kàtsu à jiɔ̀ faà tsɛ. 26Ŋà mòo o moò mun ne gooma ree reè myɛ̀ɛn, à to na è shi jiɛ waa, tɔ ni a ci mòdzin akiribɛy, nìi yè e re gbàà jiɔ̀ cɛncɛɛn tsɛ. 27Ŋaa brìsi nàu tɔ̀un, ba rèè yè tsyɛn, fyɛn bla yeè fù, yè nà firi gbàà tsɛ. Àwà gbàà yè mɛɛy, fɔ à mɛrɔun'n kur'la yè ɲaanbe.»

28 # Mar 1.22; Luk 4.32. Àyìwà, Yesù nàu dò twɛy gooma reè rà waatsi riì bwèy, à re mòdzian kàràùn'n kur'la ye ji jàmaà dzii tsɛ fɔ è bè geren. 29À ko è re Sàrìryà Kaamoo reè raa mòdzìn kàràùn'n kur'la naà soo waa. À na gooma barakama ì ka è kàr'na.

S'ha seleccionat:

Matsiyù 7: BDZU

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre Bible Dzùùngoo Unicode