Mʉkpanganɨa 6
6
Ɓʉɓɨɓɨ ngʉɓɔ ɓombi ɓɔ dɔdɔ
1Ɨyɛ ndʉ ɓombi ɓa꞉pʉnga tɨa anucho akɔ dɔdɔ, nɔ, ɓɔ꞉nɔta ɓana ɓeɓoi, 2ɓombi ngʉɓa akʉʉ ɓisi ɓɛ꞉na ɓɔ ɓana ɓeɓoi ngʉɓɔ ɓombi ɓa꞉ɓio manjanja. Kʉdɔ, ɓɔ꞉chwa ɓuso nɔ nganangana ati eɓo, nɔ, ɓɔ꞉ɓʉsɨka ndʉ ɓoi. 3Ga MAKWƆƁƗƗ ɓɔ: «Yangɔmʉ iɗo ɓɔ nɨsɨa mʉhʉmʉ wɔ uɓei#6:3 mʉhʉmʉ wɔ uɓei: pɔ ɓɔ Mʉtɨma ngʉwɔsɛmɨ, akɔɓio amati ɔ ɓombi mago nɔ mago, dɔ, ɓa ta ɓombi ɓɔ dɔdɔ ɓʉtʉʉ. Anɨngwa ɨtakɨtakɨ ngɨyɛ, uɓei ngʉwangɔ wa꞊ɓio tɨta mago mɨa mʉngana nɔ ɓatɛkɛɓɛ ɓapɨnɨ ɓʉtʉʉ.»
4Akɔ angbinga ngɨananɨ jɛnɛ, ya꞉ɓio nɔ lagʉ lɔ ɓague, ngʉɓa ɓa꞉tɨɓisoko ɓɔ Ɓanefili. Ɓombi ngʉɓɔnanɨ, ɓa꞉ɓio akɔ dɔdɔ, apɛɨ nɔ ambise ngɨa ɓombi ngʉɓa akʉʉ ɔ ɓisi ɓɛ꞉ka jɛnɛ-ɔɔ, akɔsɨkana nɔ ɓana ɓeɓoi ngʉɓɔ ɓombi. Ɨɓɔ ɓana ɓeɓoi ngʉɓɔnanɨ, ɓɔ꞉ɓʉnɔtɨa tɨa ɓana ngʉɓa ɓa꞉ɓio jɛnɛ pɛɨ anʉkɨa kʉ ingono. 5MAKWƆƁƗƗ ɛ꞉na ɓɔ, ɓʉɓɨɓɨ ngʉɓɔ ɓombi ɓɔ dɔdɔ ɓɔbeluo tɨa beluoni, nɔ, ɓa꞉tɨsaakɨa tunguo ta ɓʉɓɨɓɨ amati ɔ mɨtɨma ngɨyeɓo, masi ta maɓomu. 6MAKWƆƁƗƗ ɔ꞉tungwonoko ɓɔ, ambɔ a꞉kɨamʉ jɛnɛ gɔ mombi akɔ dɔdɔ. Mʉtɨma ngʉwangɔ wɔ꞉dya ikoko ɓɔ chʉ chʉ chʉ. 7Ga MAKWƆƁƗƗ ɓɔ: «Na꞊dʉkiso ɓombi ɓaɓomu, ngʉɓa na꞉ɓʉkɨa akɔ dɔdɔ ta ɓɔ gbatata. Na꞊dʉkiso kʉ nɔ ɓanama ngʉɓa ɓɔta ɓakpɔkpɔ, nɔ ʉɓa ɓɔta bele bele, gʉtʉ ta ɓanoi. Dɔ ɨmɨ natungwonoko ɓɔ, ambɔ nɔ꞉kɔɓʉkɨamʉ jɛnɛ gɔ akɔ dɔdɔ!» 8Yakamɛngana, Nɔa ɛ꞉nɨanɨa nɔ ɨjɨɔ apɛɨ ɔ MAKWƆƁƗƗ.
9Ɨsaʉ ngɨyɔ Nɔa ya ɓɔ: Nɔa a꞉ɓio mombi ata ngbingbii, nɔ ɨya, a꞉tɨpɛmakɨa mapanʉ ngʉkɔ Asɔɓɨɨ, ati ɔ ɓombi ngʉɓɔ ngbinga ngɨananɨ angɔ, nɔ, a꞉tɨkyɛndaka ɨhɔ nɔ Asɔɓɨɨ. 10Nɔa a꞉nɔta ɓana ɓegue ɓaatʉ, atɨ Sɛmʉ, nɔ Hama nɔ Yafɛtɨ. 11Dɔdɔ a꞉ɓio tɨa mʉyangaɛ, akɔ mesu kɔ Asɔɓɨɨ nɔ ɔhueni nɔ ɓʉkaɓʉkaɨ tɨa kyɛɛ. 12Asɔɓɨɨ a꞉kanga dɔdɔ ɓɔ gbɔɔ, ɛ꞉na ɓɔ ɔ꞉yangaɔ yangaanɨ, dɔ, ɓombi ɓaɓomu ɓa꞉ɓio akɔkpata tɨta lɨngbaa lɔ ɓʉɓɨɓɨ.
Nɔa ɔtuo ɨngbɔɔ yɛta ɨja
13Ga Asɔɓɨɨ nɔ Nɔa ɓɔ: «Nɔkwaisio tɨa kwaisioni akɔdʉka ɓombi ɓaɓomu. Dɔ, dɔdɔ ɔhuo nɔ ɓʉkaɓʉkaɨ akɔ yaka yeɓo. Na꞊ɓʉwa ta ɓɔ sɛ, ɨhɔ nɔ dɔdɔ tɨa kʉtaa! 14Kɨa ɨngbɔɔ yɛta ɨja nɔgbɛ, nɔ maɓaʉ kɔta ɓʉmʉ ɓʉmʉ akɔ yaka yɛsɔɔ. Wɔ꞊ɨnagbonyoko amati ɔngɔ akɔ ɓana ɓɔ lɨkáá, nɔ, wɔ꞊ɨkokokio nɔ ɓʉtɔɓɛ amati nɔ aɓei ɔngɔ kʉtaa. 15Wa꞊ɨkɨa ɓɔ: ɓʉta ɓɔngɔ, ɓa꞊ɓio ɓamɛtɛlɛ mɨya mʉngana nɔ ɓatɛkɛɓɛ ɓɔkʉ, nɔ ɓuho ɓɔngɔ, ɓamɛtɛlɛ ɓatɛkɛɓɛ ɓapɨnɨ nɔ ɓɔkʉ, nɔ ɓikongo ɓɔngɔ, ɓamɛtɛlɛ tɛkɛɓɛ nɔ ɓɔkʉ. 16Wa꞊ɨkuto nɔ ʉpaʉ, nɔ, wɔ꞊ɨsɨaniso nɔ ambamba ɔngɔ ta ɓɔ vu, tinetine ndʉ ɓʉta ɓɔ desimetele ɓɔkʉ, wa꞊napɨa umongu mʉngana anɔ ambamba ɔngɔ. Nɔ, wɔ꞊kɨa lɨkáá ɗietu, mɛngana amʉdʉʉ wɔngɔ, mɛngana ati ɔngɔ nɔ yɛmɔ tɨa nɛkʉʉ yɔngɔ. 17Ɨmɨ, na꞊tʉma suo mipo kɔta maja, ɓɔ kotu kotu akɔ dɔdɔ. Mipo ngʉkɔnanɨ, ka꞊bidʉkiso suo ɨkyɛmʉ iɓomu ngɨyɛ yahomuo asɨ ɔ ɨpá. Lɨkyɛmʉ liɓomu akɔ dɔdɔ la꞊dʉka suo ta dʉka.
18Yakamɛngana, ɨmɨ na꞊kio suo agɔmɛ nɔwɛ. Wa꞊kumonio amati ɔ ɨngbɔɔ ngɨyɛnɛnɨ, ʉwɛ nɔ moi asɔɔ, nɔ ɓana ɓɔsɔɔ nɔ ɓaneni ɓɔsɔɔ kʉtaa. 19Wa꞊kumonio suo amati ɔ ɨngbɔɔ, nɔ migbo yɔ ɓayaka ɓaɓomu ngʉɓa ɓakɨhomuo, ɓapɨnɨ-ɓapɨnɨ gue ɔngɔ, nɔ moi ɔngɔ, dɔ, ɓɨhɛya anɔ ambamba asɔɔ. 20Wa꞊kumoniso suo migbo yɔ ɓanoi di di di, nɔ ɓanama ngʉɓɔ ɓʉta ɓakpɔkpɔ di di di, nɔ ʉɓa, ɓakɨnaɗa aɨsɨ ɓapɨnɨ akɔ migbo yɔngɔ nganangana, naɓɔ akɔɓeyoko ɓɔ dɔ ɓatisiomʉ. 21Ha gue, gwakyoko tɨa kʉ nɔ migbo yɔ madyo di di di, wɔkʉnapɨa dɔ ka꞊naheiso suo ʉwɛ, nɔ ɓayaka ɓɔ ɨsɨ ɓaɓomu ngʉɓa wa꞊ɓio suo ɨhɔ naɓɔ.» 22Nɔa ɔ꞉kɨa iɓomu ngbanga ta ndʉ aka, Asɔɓɨɨ a꞉mutitio-ɔɔ ɓɔ ɨkɨa.
S'ha seleccionat:
Mʉkpanganɨa 6: buuN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.