Luka 15
15
Isisenio yɔ kɔndɔlɔ ngɨa ayangaa
(Mat 18:12-14)
1Ɓisi mʉngana, ɓombi ɓɔ lipisa manjanja ɨhɔ nɔ ɓombi ɓɔ mʉkyananakɨa wɔta ɓɨɓɨ, ɓɛ꞉ka anʉka yaka ngɨyɛ Yeso a꞉ɓio anʉnga. 2Ɓafalisayɔ nɔ ɓapananakɨa ɓɔ mapanʉ, ɓɔ꞉pʉnga yakanakɨa Yeso asugo ɓɔ: «Muto ngɨa atɛtɨa ɓombi ɓɔ mʉkyananakɨa wɔta ɓɨɓɨ, nɔ, dyakaka kʉ ɨhɔ naɓɔ.» 3Kʉdɔ, Yeso a꞉ɓinjo isisenio ngɨyɛ:
4«Mombi mʉngana ɔɓieni nɔ ɓakɔndɔlɔ mɨa mʉngana, nɔ mʉngana ɔngɔ ɛ꞉panɨa. Angɔkwanana ndɨ sɨa ʉɓa ɓɔmɔ ɓatɛkɛɓɛ ɨsaɓɔkʉ nɔ ɨsaɓɔkʉ akɔ ɨda yɔ dyakaka, nɔ, nɨsa ahata ɨya aɓio ɓɔ ɛpanɨeni aɓɔya ta aka a꞊mijeyo-ɔɔ? 5Ɨyɛ amijeyo, a꞊kwa tɨa ɨgyagya, nɔ, ɔ꞊mʉtʉmba amapaka. 6Ndʉ atɔa andei, ɛsokoko ɓawai ɓangɔ nɔ ɓamabana ɓangɔ asugo ɓɔ: ‹Kweni ɨgyagya ɨhɔ nɛmɨ, dɔ, nejeyo kɔndɔlɔ ngɨasɛmɨ ɛ꞉ngɨtɨa pɔngɔ.› 7Ngbanga kʉɓanɨ, nanenu asigio ɓɔ: ‹Ya꞊ɓio nɔ ɨgyagya nɔgbɛ akʉʉ ɔ ɓisi, akɔ mombi ata ɓɨɓɨ mʉngana ngɨa ɔnecho mʉtɨma, anagaaka ɓombi ɓɔ ingono ɓatɛkɛɓɛ ɨsaɓɔkʉ nɔ ɨsaɓɔkʉ, ʉɓa ɓangɔmʉ nɔ taa yɔ necho mʉtɨma.›
Isisenio yɔ agyɛgyɛ ngɨa ɛngɨtɨa
8Nɔ ɓata, ‹moi mʉngana ɔɓieni nɔ ɓagyɛgyɛ tɛkɛɓɛ, nɔ, mʉngana ɔngɔ ɛngɨtɨa andɔngɔ ambɛnɨ.› Angɔkwanana ndɨ nʉya ʉwanga nɔ bɨaka ɨkáá tinetine, nɔ, ɔ꞊ʉhata nɔ kɛkɛɛ, aɓɔya aka a꞊biwijeyo-ɔɔ? 9Ɨyɛ a꞊wijeyo ɓanɨ, ɛsoko tɨa ɓadii nɔ ɓamabana ɓangɔ, ɔ꞊ɓusigio ɓɔ: ‹Kweni ɨgyagya ɨhɔ nɛmɨ, dɔ, nejeyo agyɛgyɛ ngɨa ɛ꞉ngɨtɨa pɔngɔ.› 10Ngbanga kʉɓanɨ, nanenu asigio ɓɔ: ‹ya꞊ɓio nɔ ɨgyagya akʉʉ ɔ ɓisi, apɛɨ ɓamalaika ɓɔ Asɔɓɨɨ, akʉʉ ɔ mombi ata ɓɨɓɨ mʉngana ngɨa ɔnecho mʉtɨma.›
Isisenio yɔ mwana ngɨa ɛngɨtɨa
11Kʉdɔ, Yeso e꞉njo ɓata isisenio ɓɔ: ‹Gue mʉngana a꞉ɓio nɔ ɓana ɓangɔ ɓegue ɓapɨnɨ.› 12Gwa ngɨa a mwana ɔ꞉sigio ɨsɛ ɓɔ: ‹Aba, atʉpakɨa lɨkyɛmʉ, nɔ, wɔnenjo ʉgbaa ngawɔsɛmɨ.› Kʉdɔ, ɨsɛ ɔ꞉ɓʉpakɨa lɨkyɛmʉ ngɨlangɔ, nɔ ɔ꞉minjo ʉgbaa ngawangɔ. 13Ta ambise ɔ makwaa bele, gwa ngɨa mwana, ɔ꞉gaba ɓayaka ɓaɓomu, ɔ꞉sa nɔ ɓagyɛgyɛ ɓɔngɔ akɔ ɨkʉmbʉ yɛta ɨja yɛta ɗu. Inani, ɔ꞉yangiso ɓagyɛgyɛ ngʉɓɔnanɨ akɔ uɓei wɔta yaya. 14Ɨyɛ a꞉pipo gabaka ɓagyɛgyɛ ɓaɓomu ɓɔ gba, ayende ata kisoɓa ɔ꞉kwa aɨkʉmbʉ ngɨyɛnɛnɨ, kʉdɔ ɨyɔ, ingainga ɔ꞉pʉnga nɨkwa angɨɔ. 15Ɔ꞉sa akumonio tɛa atɨ mombi mʉngana ɔ ɨkʉmbʉ ngɨyɛnɛnɨ. Mombi ngɨananɨ ɔ꞉mʉtʉma aɨda yɔ ɓeyoko ɓanɛmbʉ. 16Tɨa inani, taa yɔ꞉mʉkwa aɓɔya tɨta aka apʉnga-ɔɔ tatanɨa anuhuso ɓʉa nɔ lɨpapɨ lɔ lipumo ngɨlɛ ɓanɛmbʉ ɓa꞉ɓio anɨdya. Yakamɛngana, sɔkɔmʉ mombi pɔ mʉngana ɨmutunguo nɔ ɨkyɛmʉ yɛta ɨdyɛ.
17Kʉdɔ, mʉtɨma wɔ ɓuɓombi wɔmijeyo, nɔ, ɔ꞉pʉnga tunguono ɓujangi ngʉɓa a꞉ɓio amati ɔngɔ. Ga ɨyɔ ɓɔ: ‹Ɓombi ɓɔ tɛa ɓapɨtanɨ ɓa atɨ aba, ʉɓa ɓanɔ idyo ɨja, ɨnadɔ ɨmɨ ɨya, naniwo nɔ taa aka! 18Na꞊nɨngwa atɔa ta atɨ aba›, nɔ, na꞊musigio ɓɔ: ‹Aba, na꞉kɨa pɔngɔ ɓʉɓɨɓɨ apɛɨ ɔ Asɔɓɨɨ nɔ apɛɨ asɔɔ kʉtaa. 19Nɔsisekiomʉ pɔ ɓata anɨsokonio ɓɔ mwana asɔɔ. Anasɨka gʉtʉ tɨta ndʉ mʉngana ɔ ɓombi bɔ tɛa ngʉɓɔsɔɔ.› 20Kʉdɔ, a꞉ngwɨa kyɛnda, nɔ, ɔ꞉pʉnga tɔwa atɨ ɨsɛ.
Ɨyɔ-sɨ ta ɗu, ɨsɛ ɔ꞉mɨna, nɔ, ɔ꞉mɨnɨa ikoko. Ɔ꞉sa bangʉ nayɔ akɔtɛtɨa, nɔ, ɔ꞉mʉnaputo ga putu. 21Mwana ɔ꞉musigio ɨsɛ ɓɔ: ‹Aba, na꞉kɨa ɓʉɓɨɓɨ apɛɨ ɔ Asɔɓɨɨ nɔ apɛɨ asɔɔ kʉtaa. Nɔsisekiomʉ ɓata anɨsokonio ɓɔ mwana asɔɔ.› 22Yakamɛngana, ɨsɛ ɔ꞉sigio ɓombi ɓɔ tɛa ngʉɓangɔ ɓɔ: ‹Ikeni gagaa nɔ ɨpʉkʉ ngɨyɛ yɛta iɗo nɔgbɛ, nɔ́mupenyiso, nɔ, nɔmʉbagana kʉ nɔ pɛtɛ akɔ kpɛngbɛ nɔ lɨkpakʉ amɨtɨndɨ. 23Nɔ, ikeni nɔ ingbou yɔ ngɔmbɛ ngɨa tanayɔ, nɔ́mʉwa. Tidyiseni-sɨ ʉmbɔ wɔta ʉja, 24dɔ, mwana ngɨasɛmɨ akɛ, a꞉ɓio pɔngɔ ɓɔ ɔweni woni, yakamɛngana, a-sɨ ɓata kʉɔ, a꞉ɓio pɔngɔ ɓɔ ɛ꞉ngɨtɨeni, yakamɛngana, ɛnɨanɨɔ ɓata-sɨ kʉ ɨnɨanɨanɨ!› Kʉdɔ, ʉmbɔ wɔ꞉pʉnganɨa.
25Angbinga ngɨananɨ, mwana ngɨa angɔ tapio, a꞉ɓio atɛa aɓakʉbaa. Ɨyɔ tɨa atɔa, akɔɓɔya tinene nɔ ndei, ɔ꞉ka tɨa lɨtá nɔ awɨa ɔ ʉmbɔ. 26Ɛ꞉soko mʉngana wɔ ɓombi ɓɔ tɛa, ɔ꞉muɓokuo ɓɔ: ‹Ɨmanɨ ɨyɛ yakyananakɨa iyani andei?› 27Mombi ɔ tɛa ngɨananɨ ɔ꞉mutosio ɓɔ: ‹Mwana ɔ anʉ ɔtɔwɔ tɔanɨ, nɔ tɨa kʉndʉ ɔtɔɔ-sɨ kʉ ɓʉmʉ ɓʉmʉ, kʉdɔ, atɔ ɔ꞉wɔ ingbou yɔ ngɔmbɛ ngɨa a꞉kɨa aka.› 28Ʉnganga wɔ꞉huo mwana ngɨananɨ ɔ pɛɨ ta ɓɔ kyɛɛ, ɔ꞉yaa anijoo akɔ ʉmbɔ ta yaa. Ɨsɛ ɛ꞉ka, ɔ꞉mukikelekio ɓɔ ɨka ɓaka akɔ ʉmbɔ. 29Yakamɛngana, ɔ꞉mutosio ɨsɛ ɓɔ: ‹Amati ɔ mago maja nakɨa nɔwɛ akyananakɨa ndʉ baya. Nangɔyaamʉ sina pɔ ɓisi mʉngana akɨa yaka ngɨyɛ wakyɔnatitio. Nɔ tɨa akɔ ɨmɨ, wa꞉ngɔnenjo sina pɔ mwana ɔ mɛmɛ ɓɔ tɨdya nɔ nɨkwa nayɔ ɨgyagya nɔ ɓadii ɓɔsɛmɨ. 30Yakamɛngana, mwana asɔɔ ngɨa a꞉sa pɔngɔ ayangiso lɨkyɛmʉ ngɨlɛsɔɔ ɨhɔ nɔ lɨjangwɛ, ɨyɛ ndʉ ɔtɔwɔ, wɔmʉwɨɔ tɨa kʉ nɔ ingbou yɔ ngɔmbɛ.› 31Kʉdɔ, ga ɨsɛ nayɔ ɓɔ: ‹Mwana asɛmɨ, maɓisi maɓomu wakɨa ta ɨhɔ nɛmɨ, nɔ ɓayaka ngʉɓa ɓɔsɛmɨ ta ɓaɓomu ɓɔsɔɔ. 32Yakamɛngana, yɔsisekio pɛngɛ ɓɔ tiɓio nɔ ɨgyagya nɔ dyiso ʉmbɔ wɔ ɨgyagya, dɔ, mwana ɔ anʉ ngɨakɛ, a꞉ɓio pɔngɔ ɓɔ ɔweni woni, yakamɛngana a-sɨ ɓata kʉɔ, a꞉ɓio pɔngɔ ɓɔ ɛngɨtɨeni, yakamɛngana, ɛnɨanɨɔ ɓata-sɨ kʉ ɨnɨanɨanɨ!›»
S'ha seleccionat:
Luka 15: buuN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.