Yohan 3

Nikodimu Yesu yv́ng dì ráì we

1Parisi vsv̀ng, Nikodimu tǿò we Yuda vsv̀ngrì shølshú tiqpè vle. #Yoh. 7:50; 19:39 2Àng nø yaqdø̀:ngí Yesu yv́ng dì ráì nø̀, “Rabiá, Nà nø Gvray yv́ngkèní èdì daqì we shvngøtshú èí we sv̀ng sháìe. Kadø íe wani Gvray màbá nìnø, Nàí èwàò we shálv́m mvshv́lpvrá yarì sv̀ng kagǿí gø wá mvngu:tnò,” a:lòe. #Mat. 22:16

3Yesuí, “Ngàí kàdøng vlvtnø̀ng, kagǿ gø àngshv́r tiqkvt màgv́lshaq#3:3 “Mvdv̀m kèní màgv́lshaq” wa nø̀ gø rø daqe. nø, Gvray móngdàn yv́ng mvlúnshì,” wa vtá:nòe. #Mat. 18:3; 1Pt. 1:23

4Nikodimuí rá, “Vbat tevm we tiqgǿ nø kadøwa vrá gv́l shvla má? Àngmè zèshøp sv̀ng vrá tiqkvt gòng nø̀ gv́l da mvlúnshì ni!” a:lòe.

5Yesuí, “Ngàí kàdøng vlvtnø̀ng, tì nv̀ng Pvlàcèí màgv́lshaq kagǿ í nìgø, Gvray móngdàn sv̀ng góng mvlúnshì. #Ezk. 36:25-27; Eps. 5:26; Tit. 3:5 6Shagú:ngí gà:lò we nø shagóng íe. Pvlàcèí gà:lò we nø pvlàcè íe. #Nnp. 5:3; Shz. 51:5; Yoh. 1:13 7Ngàí nà sv̀ng ‘Nàmaq nø àngshv́r gv́lshì ràe,’ wvng rvtnø̀ mènàtiqni. 8Nv̀mbø̀ng#3:8 “Pvlace” wa nø̀ gø rø daqe. nø àng wá mvyǿ yv́ngsv̀ng wa nø̀, nàí àngshaq ètáò we ínìgø, kayv́ng kèní wà ráì we nv̀ng kayv́ng sv̀ng wavm we mèsháò. Pvlàcèí vgv́lshaq vsv̀ng gǿ vrv̀m gø welòng dø ni íe,” wa vtá:nòe. #Shú. 11:5

9Nikodimuí Àng sv̀ng, “Yarì nø kadøwa bǿn lvdaq ni?” wa rø:tnòe.

10Yesuí àng sv̀ng, “Nà nø Israel dvcì kaq shvngøtshú tiqpè èí we, yarì sv̀ng mèrà:lò má? 11Ngàí kàdøng vlvtnø̀ng, nøngmaqí nø vsháshaq rì shø̀:nì nø̀, vyv́ngshaq rì dang shvkse wáshàì we, nøngmaq shvksekà sv̀ng nàmaqí mènàtoashà. #Yoh. 7:16; 8:26,28; 12:49 12Ngàí nàmaq sv̀ng rvgaq tø̀m nv̀ng singrì shø̀nò we dv́ng mèkv́mnø̀ng nìnø, muqlàng taqlap nv̀ng singrì shø̀nò kvt téwa kadø lekv́mnø̀ngni? #Luk. 22:67 13Muqlàng kèní lashì daqì we Vsv̀ng Àngcèpè wa mø̀í nìnø, muqlàng sv̀ng rvlv̀ng yà:ngì we kagǿ gø màvl. #Ksh. 30:4; Eps. 4:9 14Rvgaq mvgung móngø Moshií vbø̀ hàng yà:ngà dø tiqdvchá, Vsv̀ng Àngcèpè gø wedøni hà:ngò we vhǿm ràe. #Dcr. 21:8-9 15Pàwá wani Àng kaq kv́m vsv̀ng í dv́ngte nø dvciqlvpat gø̀nshaq lúnlv́m dvpvt íe.

16Àng kaq kv́m vsv̀ng kagǿ ínìgø màmvng nø̀ dvciqlvpat gø̀nshaq lúnlv́m dvpvt, Àngcè Lòngzàpè zí daqì høqshaq ni Gvray nø rvgaq tø̀m vsv̀ng kaq gvzà shóngshìe. #Rom. 5:8; 8:32; 1Yh. 4:9 17Kadø íe wani rvgaq tø̀m sv̀ng Gvrayí Àngcèpè dvzv́r daqà lòng nø, rvgaq tø̀m vsv̀ngrì kaq mvrà shvrilv́m dvpvt mø̀í, Àng taqkèní rvgaq tø̀m vsv̀ngrì kaq gø̀nshaq shvlutlv́m dvpvt mv̀ng íe. #Yoh. 5:22; 12:47; Luk. 19:10; Dzr. 17:31 18Àng kaq kv́m gǿ nø mvrà shvri we màhǿ:mò. Àng kaq mvkv́m gǿ nø, Gvray Àngcè Lòngzàpè bø̀ng sv̀ng mvkv́m rvtnø̀ mvrà shvrishaq íá:mì. #Yoh. 3:36; 5:24 19Kàngéò we nø yaciq íe. Gálòng nø rvgaq tø̀m sv̀ng gòng daqì nìgø, vsàngí wàò rì nø mvgvm màshvla we í rvt, àngmaq nø gálòng tvle dølòng sv̀ng lè shóngshìe. #Yoh. 1:5,9-11; 12:48 20Mvgvm màshvla we wàò gǿ vrv̀m nø, gálòng sv̀ng shvngoshì nø̀, àng bv̀nlì mvgv́mrì dvtánshì long we sv̀ng svre rvt, gá yv́ng sv̀ng mvdi ra. #Eps. 5:13 21Íwe, dìnglòng taq cúnshì gǿ mv̀ng, à:ngí wàò bv̀nlìrì nø Gvray nøt cà:nò nø̀ wàò we sv̀ng dèdè shvyvnglv́m dvpvt, gá yv́ngsv̀ng di rae,” a:lòe.

Tiløp Yohan dang

22Yadv́ng pv̀n mèpvng Yesu nø Àng coqcv́nrì nv̀ng Yuda móng sv̀ng gòng ráì nø̀, àngmaq nv̀ng weyv́ngø vl sórí tìløpmaòe. #Yoh. 4:1-2 23Wedvgvp Salim shvnvng Enon yv́ngø tì gvzà vl rvtnø̀, Yohaní gø weyv́ngø tìløpma ma:nòe. Vsv̀ngrì gø di mvnshì ra nø̀ tìløp lún ma:nòe. 24Yalòng nø Yohan sv̀ng tung taq shini mvrú:ngò dvgvp íe. #Mat. 4:12; 14:3

25Yohan coqcv́nrì nø shǿlshìlv́m vtóng dang Yuda vsv̀ng tiqgǿ nv̀ng vzø̀ng lú:ngì. 26Àngmaq nø Yohan yv́ng sv̀ng di ráì nø̀, “Rabiá, ku, Yordan tìwàng kupaø nà nv̀ng tiqdø èvlvpshà pè, nà shvkse èwáshìa:pmì pèí tìløpmaò nø̀ vsv̀ng shvngbe Àng yv́ngsv̀ng wa die,” a:lòe. #Yoh. 1:26-34

27Yohaní, “Muqlàng kèní Gvrayí zi daq we mø̀í nìnø, kagǿí gø pàgø lún mvdaq. #Heb. 5:4 28‘Ngà nø Kristu mvǿngà. Ngà nø Àng vzv̀ngzv̀ng dèzv́r dakngà pè mv̀ng ǿngàe,’ wvng nø̀ shø̀nvpmà we ètávpshà rvt, nàmaq nø ngà dvpvt shvkse èínø̀nge. #Mat. 11:10; Mak. 1:2; Yoh. 1:20,23,27 29Zvmìshv́rmè nø lvngàshv́rpèò íaòe. Lvngàshv́rpèò vrashúpè nø rip nø̀ lvngàshv́rpè kàshaq táò ke shaqshaqwa dvbùe. Welòng dø ngà gø dvbònge.#3:29 “Ngà gø dvbù lù:ngí dv̀nzø̀nge” gø rø daqe. #Mat. 9:15; 22:2 30Àng nø té mvnshì ràe, ngà mv̀ng nø cv́m mvnshì rànge,” wa vtá:nòe. #2Sm. 3:1

31Mvdv̀m kèní dì daqì pè nø, shvngbe mvdv̀m ringe. Rvgaq kèní í pè nø, rvgaqò pv̀n í nø̀, rvgaq dang wa shø̀ne. Muqlàng kèní dì daqì pè mv̀ng nø, shvngbe mvdv̀m ringe. #Yoh. 8:23 32À:ngí vyv́ngshaq vtáshaq rì dang shvkse wáshì nìgø, Àng shvkse kà sv̀ng kagǿí gø màtoò.#Yoh. 3:11 33Íwe Àng shvkse kà sv̀ng vtoò gǿí nø, Gvray nø dìnge, wa lòng sv̀ng shvdøngò we íe. 34Gvrayí dvzv́r daqà pèí nø Gvray kàrì shø̀:nòe. Pàwá wani, Gvrayí Àng sv̀ng Shanshér Pvlàcè shvdún zìdvng màvl dø vzíshaq íe. #Yoh. 1:33,34 35Àngpèí nø Àngcèpè sv̀ng shù:ngò rvt, vl dv́ngte Àng wur sv̀ng tvleshaq íe. #Mat. 11:27; Yoh. 5:20; 17:2 36Àngcèpè sv̀ng kv́m gǿ nø dvciqlvpat gø̀nshaq lú:nòe. Àngcèpè kà màtoshì gǿ nø gø̀nshaq mvlú:nò. Gvray shv̀mná høpnøt nø àng mvdv̀mø vhap dv̀ng wae. #Yoh. 3:18; Luk. 3:7; 1Yh. 5:12

S'ha seleccionat:

Yohan 3: GSM

Subratllat

Comparteix

Copia