1 Пачаби 18
18
Давудидаги Ионатанидаги гьоркьоб гьудуллъи ккей
1Шаулилги Давудилги ккараб гьеб кӀалъа-басаялдаса хадуб, Давуд цӀакъ рекӀелъ восана Ионатанил, ва жиндирго рухӀгӀанги хиралъана гьесие гьев. 2Гьелдаса нахъе Шаулица Давуд жиндаго аскӀов чӀезавуна, – тӀокӀав инсул рокъове тӀадвуссине виччачӀо гьес гьев. 3Ионатаница Давудилгун гьудуллъиялъул къотӀи-къай гьабуна, щайгурелъул гьесие гьев жиндирго гӀумругӀанги хиралъидал. 4Ионатаница тӀаса бахъун жиндирго гӀаба, къолденгун, хвалченгун, хечгун ва рачелгун цадахъ, Давудие кьуна.
5Шаулица щиб иш тӀад къаниги, киве витӀаниги, Давудица кинабго мухӀканго ва цӀодорго гьабулаан. Гьединлъидал, Шаулица гьев рагъухъабазул цевехъанлъун гьавуна; халкъалъулги Шаулил рагъухъабазул церехъабазулги ракӀ рекъана гьеб ишалда.
Шаулил Давудидехун жахӀда ккей
6Давудица пилистимавги чӀван гьел тӀадруссун рачӀунаго, ГӀизраилалъул тӀолалго шагьараздаса руччаби рачӀунел рукӀана Шаул пачаясда данде сухӀмат-кечӀгун, кодор жергъабигун ва гьитӀинал арфабигун. 7Цадахъ кьурдиги гьабулаго, руччабаз ахӀулеб букӀана:
«Азаргоясда тӀад бергьенлъи босарав – Шаул,
анцӀазаргоясда тӀад бергьенлъи босарав – Давуд!» – ин.
8Гьебмехалъ кутакалда ццин бахъана Шаулил. Гьел рагӀаби цӀакъ рекӀелъ хӀунсана гьесда.
«Давудица анцӀазарго чӀваравила, дица азарго гурони чӀвачӀевила! Пачалъи хутӀун батӀияб тӀокӀаб гӀолареб жо хутӀичӀо гьанже гьасие?!» – ян ццидалаб пикру гьабуна Шаулица. 9Гьеб къоялдаса нахъе Давудидехун ракӀхъублъун, гьесда щакдаризе лъугьана Шаул.
10Нахъисеб къоялъ жиндирго рокъов вукӀаго, БетӀергьанас квешаб рухӀ рещтӀинабуна Шаулиде, ва тӀури бачӀун, хӀалалдаса ун лъугьана гьев. Цинги Давудица арфаялда бакънал рачана, – гьедин гьабулаан гьес къоялдаса къоялде. Шаулихъ хеч букӀана кодоб ккун. 11«Дица къеда рекӀинавила гьав», – ин пикруги гьабун, гьес хеч Давудида речӀчӀана. Амма Давуд нахъе кӀанцӀун ворчӀана; кӀиго нухалъ ккана гьедин.
12Шаул Давудихъа хӀинкъулаан, щайгурелъул Давудие БЕТӀЕРГЬАНАСУЛ рахъалдаса квербакъи букӀана, Шаулин абуни Гьес тун вукӀана. 13Цинги Шаулица гьев жиндасаго рикӀкӀад гьавун, азарилбетӀерлъун тана, ва гьес рагъда аскариязе цевехъанлъи гьабуна. 14Давудица гьабулебщиналъулъ кӀудияб цебетӀей букӀана, щайгурелъул БЕТӀЕРГЬАНАС квербакъи гьабулеб букӀиндал гьесие. 15Давудица гьабулебщинаб цебетӀолеб бихьун, Шаул гьесдаса хӀинкъулев вукӀана. 16Амма тӀолалго гӀизраилазеги ягьудиязеги Давуд хиралъана, щайгурелъул гьев бажари бугев цевехъан вукӀиндал.
Давуд Шаулил дурцлъун вахъин
17Цо къоялъ Шаулица Давудида абуна: «Гьале дир кӀудияй яс Мерав. Дица дуе лъадилъун кьела гьей; ритӀухъго хъулухъ гьабе дие, ва БЕТӀЕРГЬАНАСЕ гӀоло рагъулъ цебехъанлъи гьабе», – ян.
«Дица квер хъваларо гьасда. Пилистимаз гьабе абе гьеб иш», – ин жанисанго пикруги гьабуна Шаулица.
18Амма Давудица Шаулида абуна: «Дунги дир инсул хъизан-къайги, гьесул гӀагарлъиги щал кколел ГӀизраилалда, дун пачаясул дурцлъун вахъине ккани?» – ян.
19БукӀаниги, Шаулил яс Мерав Давудие рукъалде кьезе заман щвараб мехалъ, гьей Мехолаялдаса Адриэлие кьун ятана.
20Амма Шаулил цогидай яс Михалал рокьи ккана Давудихъ. Гьелъул хӀакъалъулъ Шаулида бициндал, гьесул гьелда ракӀ рекъана. 21«Дица гьесие кьела гьей – гьей гьесие къорлъун йикӀа абе. Биччанте пилистимазул квердасан босизе гьес гӀажал», – ин пикру гьабуна Шаулица. Давудида гьес абуна: «Дица цогидай яс кьела дуе», – ян.
22Хадуб Шаулица жиндирго чукъбузда абуна: «Давудида балъго кӀалъай, ва гьесда абе: „Нижехъ гӀенекке, пачаясул ракӀ рекъон буго дуда, ва гьесул тӀолабго чукъа-рахьаналъеги хирияв вуго мун. Гьесул дурцлъун вахъине разилъе“, – ян».
23Гьез гьел рагӀаби Давудида цере такрар гьаруна. Амма Давудица абуна: «Пачаясул дурцлъун вахъин бигьаяб жойиланищ нужеда ккараб? Дун вуго гӀадатияв мискинчи», – ян.
24Гьез Давудица гьадин абунин Шаулида бициндал, 25гьес абуна: «Давудида абе: „Гьей бахӀаралъухъ, гьесул тушбабаздаса рецӀелалъе къотӀараб, нусго пилистимасул бихьинлъиялъул рагӀал тун тӀокӀаб щибго хӀажат гьечӀо пачаясе дудасан“, – ин».
Шаулил пикру букӀана пилистимазул квердасан Давудида тӀаде хвалил кваркьи бачине.
26Гьеб хабар Давудида бициндал, гьев разилъана пачаясул дурцлъун вахъине. Гьелъие цӀараб заман щвелалдего, 27рачун жиндирго чагӀигун, кӀинусго пилистимав чӀвана Давудица ва гьезул киназулго бихьинлъиялъул рагӀалал къотӀун пачаясда цере лъуна, гьесул дурцлъун вахъине вукӀине. Гьебмехалъ Шаулица жиндирго яс Михала Давудие рукъалде кьуна.
28Амма БЕТӀЕРГЬАНАС Давудие кумек гьабулеб букӀин ва гьесул яс Михалае гьев вокьулев вукӀин бихьидал, 29Шаул жеги цӀикӀкӀун хӀинкъана гьесукьа, ва даимго тушманлъи ккуна гьесдехун.
30Пилистимазул рагъул церехъабаз рагъ къотӀизе толароан, ва щибаб нухалда Шаулил рагъухъабазда гьоркьоб Давудил тӀокӀлъи бихьулаан. Гьединлъидал, киса-кибего гьесул цӀар рагӀана.
S'ha seleccionat:
1 Пачаби 18: АварАК
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Институт перевода Библии, 2005-2023