1 Пачаби 6
6
Гъамас ГӀизраилалде тӀадбуссинаби
1Пилистимазул ракьалде БЕТӀЕРГЬАНАСУЛ гъамас бачӀун анкьго моцӀ бан букӀана, 2цинги пилистимаз данде ахӀана жидерго кашишзаби, палихъаби ва гьезда цӀехана: «Гьанже щиб гьабилеб гьаб БЕТӀЕРГЬАНАСУЛ гъансида? Бице нижеда, кин гьаб тӀадбуссинабилеб?»
3Гьез жаваб кьуна: «ГӀизраилазул Аллагьасул гъамас нахъбуссинабизе бокьун батани, гьеб чӀобого биччазе бегьуларо. Гьелда цадахъ гӀайиб тӀаса ккезабулеб налъи-хӀакъ кьезе ккола. Гьебмехалъ нуж сахлъизе руго, ва БетӀергьанасул ццин бахъиналъе гӀиллаги тӀатине буго».
4Пилистимаз цӀехана: «Гьеб налъи-хӀакъалъе щибдайха нижеца кьун лъикӀ?» – ин.
Гьезул кашишзабаз ва палихъабаз абуна: «Месед тӀун, рецӀцӀулел ругъназул сураталда гьабураб щуго тӀагӀелги ва гьединго месед биун тӀураб щуго кӀудияб гӀункӀкӀги лъе, Пилистималъул шагьаразул церехъабазул къадаралда рекъон. Нужееги нужер церехъабазеги цого тамихӀ-гӀазаб рещтӀун бугелъул. 5Нужер ракьал чӀунтизарулел ругел рецӀцӀулел ругъназулги кӀудиял гӀункӀкӀазулги сураталда гьаре гьел тӀагӀелал ва суждаги гьабун, гӀизраилазул БетӀергьанасе сайгъаталъе кье. Нужеда, нужер аллагьзабазда ва нужер ракьалда бахъараб Гьесул гьалагаб ццин, щиб лъалеб, гӀодобе буссинеги бегьула гьебмехалъ. 6Мисриялгун пиргӀавн гӀадин гӀасилъун рукӀун щай нужее? БетӀергьанас кьварараб тамихӀ гьабун хадубги риччазе кканагури гьез гӀизраилал.
7Гьединлъидал, цӀияб гьоко хӀадур гьабе ва, тӀоцебе къинлъараб, жинда жеги гьокоги бачӀеб кӀиго гӀака баче. Гьезул бачал батӀа тӀезарун, бокьор тӀаме ва гӀачиязда гьеб гьоко бай. 8Цинги гьеб гьакида тӀад лъе БЕТӀЕРГЬАНАСУЛ гъамас. ГӀайиб тӀаса ккеялъе Гьесие сайгъат гьарурал дол меседил тӀагӀелалин абуни, цо кӀуниялда жанирги лъун, гьеб гъансида аскӀор лъе. Цинги гьоко нухда битӀе, 9амма гьелда хадуб хал ккве. Гьеб жиндирго ракьалде Бет-Шемешалде балагьун ани, БетӀергьанас биччан бачӀараб буго гьаб кӀудияб балагь нилъеда тӀаде. ИнчӀони, нилъедаго лъан букӀина гьаб кинабго Гьесдасан бачӀараб гуреб, гьадинго ккараб жо букӀин».
10Гьез кинабго гьедин гьабуна. КӀиго гӀакаги бачана ва гьезул бачалги жанир тӀамун, гьезда гьоко бана. 11Гьакида тӀад лъуна БЕТӀЕРГЬАНАСУЛ гъамас ва меседил гӀункӀкӀалги рецӀцӀулел ругъназул сураталда гьарурал меседил тӀагӀелалги жанир лъураб кӀуниги лъуна гьениб. 12Хадур гьел гӀачи цӀан битӀун Бет-Шемешалдехун ралагьун ана. Я квегӀаб, я кваранаб рахъалде ралагьичӀого, гӀергӀелаго гьеб нухккун унел рукӀана гьел. Бет-Шемешалъул гӀорхъоде щвезегӀан гьезда хаду-хадур рилълъана пилистимазул церехъаби.
13Бет-Шемешалъул гӀадамал расалъиялда ролъ бакӀарулел рукӀана гьеб мехалъ. БетӀер тӀаде борхидал, гьезда бихьана БетӀергьанасул гъамас ва гьезул ракӀал рохана. 14Гьеб гьоко Бет-Шемешалдаса Егьошуал хурибе балагьун ана ва гьениб цо кӀудияб ганчӀида аскӀоб эхетана. Цинги халкъалъ гьеб гьокоги къотӀ-къотӀана, кӀиябго гӀакаги БЕТӀЕРГЬАНАСЕ тӀубан бухӀулеб къурбаналъе хъуна. 15Левитаз БЕТӀЕРГЬАНАСУЛ гъамасги меседил тӀагӀелал жанир лъураб кӀуниги, гьакида тӀаса росун, кӀудияб ганчӀида тӀад лъун рукӀана. Гьебго къоялъ Бет-Шемешалъул жамагӀаталъ БЕТӀЕРГЬАНАСЕ тӀубан рухӀулел къурбаналги цогидал къурбаналги тӀоритӀана. 16Пилистималъул щуявго цевехъанасда бихьана гьеб кинабго ва добго къоялъ Экроналде тӀадруссана.
17РецӀцӀулел ругъназул суратазда гьарурал меседил тӀагӀелал щибаб шагьаралъул цевехъанасул цӀаралдасан цо-цо битӀана пилистимаз – Ашдодалъул, Газаялъул, Ашкелоналъул, Гаталъул ва Экроналъул церехъабазул цӀаралдасан; гӀайиб тӀаса ккезабулеб сайгъат хӀисабалда ритӀана гьел, гӀицӀго БЕТӀЕРГЬАНАСЕ цӀар чӀван. 18Меседил кӀудиял гӀункӀкӀалин абуни, пилистимазул щуго цевехъанас жидеда тӀад нухмалъи гьабулел сверун къарал шагьаразул къадаралда ва гьединго кӀудияб ганчӀихъе щвезегӀан ругел росабазул цӀаралдасанги ритӀана. Доб БЕТӀЕРГЬАНАСУЛ гъамас тӀад лъун букӀараб кӀудияб гамачӀ жакъа къоялъги Бет-Шемешалдаса Егьошуал хуриб эхетун буго.
19Бет-Шемешалъул жамагӀаталда гьоркьоса цо-цо чагӀаздеги Аллагьасул ццин рещтӀана, щайгурелъул гьел БЕТӀЕРГЬАНАСУЛ гъансинире жанире раккун рукӀун; гьезда гьоркьоса лъабкъоялда анцӀго чиясе#6:19 Цо-цо цересел тӀахьазда хъван буго лъабкъоялда анцӀго… кӀикъоялда анцӀазарго. гӀажал щвана гьеб бакӀалда. Гьебмехалъ, БЕТӀЕРГЬАНАС гьезие гьабураб кьварараб тамихӀ бихьун, кӀудияб магӀу бахъана халкъалъул. 20Бет-Шемешалъул жамагӀаталъ абуна:
«Лъихъа бажарулеб жо гьадигӀан вацӀцӀадав БЕТӀЕРГЬАН Аллагьасда цеве эхетизе? Нилъер берда цебесаги босун, лъихъедай гьаб гъамас щвезабилеб?»
21Цинги Кириат-Еарималъул жамагӀаталъухъе вакилзаби ритӀана гьез: «Пилистимаз БЕТӀЕРГЬАНАСУЛ гъамас нахъе бачӀун буго. Гьеб нужехъего босизе гьанире рачӀа», – ян.
S'ha seleccionat:
1 Пачаби 6: АварАК
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Институт перевода Библии, 2005-2023