1 Пачаби ЦеберагӀи
ЦеберагӀи
ЖугьутӀазул гӀадаталда рекъон, Пачабазул ТӀоцебесеб ва КӀиабилеб тӀехьалда Шамуилил тӀахьалилан абула, щайгурелъул гьезда бицунеб буго Шамуил авараг гьавиялъул ва доб заманалда ГӀизраилалъул халкъалъул тарихалда жаниб гьес кӀвар бугеб бакӀ кквеялъул хӀакъалъулъ. Шамуил вукӀана БетӀергьанасул авараглъун ва ГӀизраилалъул ахирисев къадилъун.
Гьаб тӀехьалъул тӀоцересел бутӀрузда (1–7 бетӀ.) бицунеб буго Шамуил аварагасул гӀумруялъул ва гӀизраилазда тӀад гьес нухмалъи гьабиялъул хӀакъалъулъ. Гьев я пачалъун, я кашишлъун вукӀинчӀо, амма гьес БетӀергьанасул амраби пачаясдасаги кашишзабаздасаги камилго ва мухӀканго тӀуразарулел рукӀана. Кашишлъун вукӀарав Элидайин абуни, жиндирго хъизан-къайгицин битӀараб нухда бачун бажаричӀо ва жиндирго васаз БетӀергьанасул къанун хӀатӀикь мерхьаниги, гьезие гӀадлу гьабизе кӀвечӀо.
Амма гьаб тӀехьалда аслияб къагӀидаялда Шамуил аварагасул гуреб, гьес зайтуналъул нах жидеда бахарал ГӀизраилалъул тӀоцересел пачабазул хӀакъалъулъ бицунеб буго. (ХӀакъикъаталда, тӀоцебе Шамуилица бачана ГӀизраил пачабазул нухмалъиялда гъоркье, ва ГӀизраилалда тӀад пачабиги тӀоцере гьес тана.) Хадусел бутӀрузда (8–15 бетӀ.) бицунеб буго ГӀизраилалда пачабазул нухмалъи чӀезабиялъул ва гьезулгун тушманлъиялда рукӀарал халкъазулгун ккарал рагъазул хӀакъалъулъ.
БетӀергьанасул халкъалъе нухмалъи гьабизе тарав ГӀизраилалъул тӀоцевесев пача Шаулица, Шамуил аварагги гьоркьов ккун, БетӀергьанас загьир гьарурал Гьесул амруялги гӀадахъ росичӀого, жиндехунго божилъи хвезабуна. Цинги БетӀергьанас Шамуил авараг витӀана гӀолохъанав гӀиял вехь Давудида зайтуналъул нах бахеян абун, гьев пачалъун тезе вукӀине. Гьелдаса хадуб Давудица кӀвар цӀикӀкӀараб бакӀ ккуна гӀизраилазул тарихалда жаниб.
Амма циндаго гуро Давудица пачаясул тах ккураб. Цин гьев Шаулил кӀалгӀаялда гьесие хъулухъалъе чӀана. Хадуб гьев, жиндирго гӀумру хвасар гьабун, Шаулидаса гӀемерав лъутанхъизе ва мегӀер-гӀалахалда вахчаризе ккана (16–30 бетӀ.). БетӀергьанас тӀаса вищарав пачалъун вукӀаниги, Давуд хӀал-зулму гьабун пачаясул тахиде вахинчӀо, Шаул хун хадуб гурони.
Пачазабазул ТӀоцебесеб тӀехьалъул ахиралда бицунеб буго Шаулица БетӀергьанасде мугъ рехун хадуб БетӀергьанас гьевги рехун тедал, Аллагьас гьукъараб иш бугониги, хваразул рухӀазда кӀалъалей гӀадамалъухъе Шаул иналъул ва, гьеб кинабго сабаблъун, гьевги гьесул васалги рагъда чӀваялъул хӀакъалъулъ (31 бетӀ.).
ТӀехьалда буго
Пачазабазул ТӀоцебесеб тӀехь
Пачаби телалде цебесеб заман (1 Пач. 1:1–7:17)
Шамуил гьави ва гьесул лъимерлъи; гьев авараглъун вахъин ва кашиш Элие хӀукму къотӀи (1 Пач. 1:1–3:21)
Пилистимаз КъотӀиялъул гъамас кверде боси ва гьеб тӀадбуссинаби (1 Пач. 4:1–7:17)
Шаул пачалъун вищи (1 Пач. 8:1–12:25)
Шаул пачалъиялдаса рехи ва гьев Аллагьас нахъ чӀвай (1 Пач. 13:1–15:35)
Давудги Шаулги (1 Пач. 16:1–30:31)
Давудида пачалъун тезе зайтуналъул нах бахин (1 Пач. 16:1-23)
Давудги Голиафги (1 Пач. 17:1-58)
Давуд чӀвазелъун Шаулил къеркьей; Ионатанилги Давудилги гьудуллъи; Давуд лъутизе ккей (1 Пач. 18:1–30:31)
Шаул ва гьесул васал хвей (1 Пач. 31:1-13)
S'ha seleccionat:
1 Пачаби ЦеберагӀи: АварАК
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Институт перевода Библии, 2005-2023