ሜቴ ማጻፋ 9
9
ጾሲ ኖሄራ ጌሊዳ ጫቆ ቃላ
1ጾሲ ኖሄኔ ኢዛ ናይታ፥ «ዬሌቲቴ፤ ጮራቲቴ፤ ቢታ ኡባ ኩሚቴ።#ሜ 1፡28 2ቢታ ዶኣቲ፥ ካፎቲ፥ ቢታን ዎጺ ቃጺዛ ሚሻቲኔ ኣባ ጊዶን ዲዛ ሞሌቲ ዉሪ ኢንቴስ ያዬቶኔ ዳጋሜቶ፤ ኢስቲ ኢንቴ ሼኔን ዴቶ። 3ታ ኢንቴስ ቢታፌ ሞኪዛ ዱማ ዱማ ካታ ኢሚዳ ማላካ ሼምፖራ ፓጻ ዲዛ ሜቴቲ ዉሪ ኢንቴስ ቁማ ጊዳና። 4ሼምፖይ ሱ ጊዶን ዲዛ ጊሻስ ሱ ኢዛፔ ጉኮንታ ኣሾ ሞፒቴ።#ሌዌ 7፡26-27፤ 17፡1-16፤ 19፡26፤ ዛሬ 12፡16፥23፤ 15፡23 5ታኒ ኢንቴ ሼምፖይ ኢዛን ዲዛ ኢንቴ ሱ ሜሄፔኔ ዶኣ ኡባፌ ቱሙ ታ ኦይቻና፤ ቃሴ ኣሳ ኡባፌካ ኢዛ ማላ ኣሳ ሱ ኦይቻና። 6ጾሲ ኣስ ባና ሚሳቲሲዲ ሜዳ ጊሻስ ኣሳ ሱ ጉሲዛ ኦናካ ጊዲኮ ኢዛ ሱካ ኣሳ ኩሼን ጉካና።#ሜ 1፡26፤ ኬሳ 20፡13 7ኢንቴ ዬሌቲቴ፤ ጮራቲቴኔ ቢታ ቦላ ኬሂ ዳሪቴ» ጊ ኣንጂዴስ።#ሜ 1፡28
8ሄሳፌ ጉዬ ጾሲ ኖሄኔ ኢዛራ ዲዛ ኢዛ ናይታ ሂዝጊዴስ፤ 9-10«ሂስቲን ሃኢ ታኒ ታ ጫቆ ኢንቴናራ፥ ኢንቴፌ ጉዬ ኢንቴ ዜሬራኔ ኔናራ ሼምፖራ ዲዛ ሜቴታራ ጫቄታዲስ፤ ኤ! ታኒ ታ ጫቆ ካፎራ፥ ሜሄራ፥ ቢታ ዶኣ ኡባራኔ ማርካቤፔ ኢንቴናራ ኬዚዳ ፓጻ ዲዛ ሜቴ ኡባራ ጫቄታዲስ። 11ታኒ ኢንቴናራ ጫቄታዲስ፤ ሃይሳፌ ሲንን ፓጻ ዲዛይ ዉሪ ይሲዛ ሃን ሙሌካ ዬና፤ ሃ ቢታ ይሲዛ ሃ ሃይሳፌ ጉዬ ሙሌካ ዴና» ጊዴስ።
12ቃሴካ ጾሲ፥ «ታኒ ታፔኔ ኢንቴፌ፥ ኢንቴናራ ዲዛ ፓጻ ሜቴታስ ኡባፌ ጊዶን ያና ዬሌታ ኡባራ ጫቄቲዛ ጫቆዛስ ማላታይ ሃይሳ፤ 13ታኒ ታ ዙላ ሳሎ ቦላ ኤሳና፤ ኢዚ ታፔኔ ሃ ቢታ ቦላ ዲዛ ሜቴፌ ጊዶን ዲዛ ጫቆዛስ ማላታ ጊዳና። 14ታኒ ቢታፌ ቦላን ሻራ ኤሂዳ ዎዴኔ ሻራ ቦላን ዙላይ ቤቲዳ ዎዴ፥ 15‹ፓጻ ዲዛ ሜቴ ኡባ ይሳናስ ሃይሳፌ ሲንን ሙሌካ ይሳ ሃ ዬና› ጋዳ ታፔኔ ኢንቴፌ ፓጻ ዲዛ ዱማ ዱማ ቆሞ ሜቴታ ኡባፌ ጊዶን ጫቂዳ ታ ቃላ ታ ቆፓና። 16ዙላይ ሻራ ቦላ ቤቲዳ ዎዴ ኣይዴካ ታኒ ኢዛ ቤያዳ ታፔ ጾሳፌኔ ሃ ቢታ ቦላን ፓጻ ዲዛ ዱማ ዱማ ቆሞ ሜቴ ኡባፌ ጊዶን ጫቆ ጌሊዳ ሜርና ጫቆ ቃላ ታ ሃሳኣና» ጊዴስ።
17ጾሲ ኖሄ፥ «ታኒ ታፔኔ ሃ ቢታ ቦላን ፓጻ ዲዛ ኡባፌ ጊዶን ጫቂዳ ጫቆዛስ ማላታይ ሃይሳ» ጊዴስ።
ኖሄኔ ኢዛ ናይታ
18ማርካቤዛፔ ኬዚዳ ኖሄ ናይቲ ሴሜ፥ ካሜኔ ያፌቴ፤ ካሜይ ካናኔ ኣዋ። 19ሃይቲ ሄይካ ኖሄ ናይታ፤ ቢታ ኡባን ዲዛ ኣሳይ ኢስታፌ ዬሌቲዴስ።
20ኖሄይ ጎሻንቻ፤ ኢዚ ዎይኔ ሚ ቶኬ ኦይኪዴስ። 21ኢሲ ጋላስ ኢዚ ዎይኔፔ ኦሴቲዳ ጫጄ ኡዪ ማቲዲ ባ ዱንካኔዛ ጊዶን ፓጻ ካሎ ኢቺዴስ። 22ካናኔ ኣዋ ካሜይ ባ ኣዋ ካሎቴ ቤኢዲ ካሬ ኬዚዲ ባ ኢሻታ ናምኣታስ ዮቲዴስ። 23ጊዶ ኣቲን ሴሜይኔ ያፌቴይ ማይኦ ኤኪዲ ናምኣይካ ባ ሃሼ ሃሼ ቦላ ጋ ኦይኪዲ ጉንዲጉ ሄሜቲ ጌሊዲ ባ ኣዋ ካሎቴ ካሚዳ፤ ኢስቲ ባ ኣዋ ካሎቴ ቤኦንታ ማላ ባ ኣይፌሶ ጉዬ ዛሪዳ።
24ኖሄይ ማይ ኣን ቤጊዲ ኡባፌ ካሎ ናዚ ባ ቦላ ኦዳይሳ ኤሪዲ፥
25«ካናኔይ ቃንጌቲዳዝ ጊዶ!
ኢዚ ባ ኢሻታ ኣይሌታስ
ኣይሌ ጊዶ!» ጊዴስ።
26ቃሴካ ኖሄይ፥
«ጎዳይ፥ ሴሜ ጾሲ ጋላቴቶ!
ካናኔይ ሴሜ ኣይሌ ጊዶ!
27ጾሲ ያፌቴ ቢታ ኣሶ!
ያፌቴ#9፡27 ያፌቴ፡ ያፌቴ ጉሲ ኣሶ ጉሳ ሚሳቴስ። ዜሬቲ
ሴሜ ዜሬታራ ዴቶ!
ካናኔይ ያፌቴ
ኣይሌ ጊዶ!» ጊዴስ።
28ይሳ ሃፌ ጉዬ ኖሄይ 350 ላይ ዴኢዴስ። 29ኖሄይ ሙሌራ 950 ላይ ዴዪዲ ሃይቂዴስ።
S'ha seleccionat:
ሜቴ ማጻፋ 9: ጋሞመጽቅበፊደል
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Word for the World International amp The Word for the World Ethiopia