Utumbulilu 9
9
Chapanga atenda lulaghilu na Nuhu
1Chapanga akumpengalili Nuhu na bhana bhaki, akabhapwaghilaje, “Mbelakanaje na kujonjukeka, mkautwelakya ndema. 2Kila chinyama cha pundema, hijuni yokapi ya kunani, ihumbi yokapi yeikwabha panani ja ndema na homba yokapi ya mubahali anayunjoghupa na kunhola mwehapa. Yokapi ibhekakiki pahi ja lujiniku lwinu. 3Hinyama yokapi yeibhi yomi anaibya chilebhi chinu, ngati monakumpekihe makolu gha mahamba kubha chilebhi chinu, bhelabhela numpekeha na ayeyi yokapi. 4Nambu ngamwikula chinyama chechibhi na mwahi ng'o, maghambu mwahi nde womi. 5Chakaka mwahi wa womi winu ananundayaje. Ananundaya kuhuma kwa kila chinyama na kila mundu. Na mundu joanaankoma njaki, ananundaya womi waki. 6Jokapi joanaajitala mwahi waka mundu, najombi mwahi waki anaujitalika na mundu, maghambu mundu akabhombakiki kwa ulenganesu waka Chapanga.
7“Mwehapa, mbelakanaje na kujonjukeka, mbelakanaje pundema na kujonjukeka pundema.”
8Panihapa Chapanga akumpwaghi Nuhu na bhana bhaki, akapwaghaje, 9“Lingalya! Nepani meka lulaghilu lwangu na mwehapa, papamu na lubheleku lwinu baada jinu mwehapa, 10na kila chiumbi chomi chechibhi papamu na mwehapa, hijuni, hinyama ya kudimakika na hinyama ya muchitengu, yokapi yeipita mu safina, na kila chiumbi chomi pundema. 11Meka lulaghilu lwangu na mwehapa: Ihumbi yomi yokapi ngaiyonangeki kwa ghalika, wala ngajipitalili kabhete ghalika kuuyonanga ndema ng'o.” 12Kabhete Chapanga akapwaghike, “Hajeji nde nginyulila ja lulaghilu jemeka pachilanda jangu nepani na mwehapa na kila chiumbi chechibhi chomi papamu na mwehapa kwa ibheleku yokapi yeihika hata mileli. 13Meka lusisi lwangu kumahunde, nalwombi analubya nginyulila ja lulaghilu pachilanda jangu nepani na ndema. 14Kila panauyekaje ndema kwa mahundi gha iyula, na lusisi lwa ihula kubhonikana kumahunde, 15anangombukaje lulaghilu lwangu lomekiki pachilanda jangu nepani na mwehapa, na ihumbi yokapi yeibhi na womi. Machi ngaghikubhi kabhete ghalika ja kuyonanga ihumbi yokapi yeibhi na womi ng'o. 16Chikahi chokapi lusisi lwa ihula palwibhonikanaje kumahunde, ananulubhonaje na kulukomboka lulaghilu loniholu lwa mileli pachilanda jangu nepani na ihumbi yokapi yeibhi na womi pundema.” 17Bhela Chapanga akapwaghike, “Hajeji nde nginyulila ja lulaghilu lomekiki pachilanda jangu nepani na ihumbi yokapi yeibhi na womi pundema.”
Nuhu na bhana bhaki
18Bhana bhaka Nuhu bhabhapitiki mu safina bhakabhi Shemu, Hamu na Yafeti. Hamu akabhi tati waka Kanaani. 19Bhanihabha nde bhana bhatatu bhaka Nuhu, na kubhokana na bhanihabha bhandu bhakajendali kujonjukeka pundema pokapi.
20Nuhu akabhi ndemi wa kutumbula, na akalemiki ngonda wa mizabibu. 21Akanywi divai na kulobhela, bhela akaghonili heu mkati ja lihema laki. 22Hamu, tati waka Kanaani, akauweni utopu waka tati waki, akapitiki kunja na kubhapwaghila bhalongu bhaki bhabheli. 23Nambu Shemu na Yafeti bhakatoliki lishuka na kulibheka mumabhegha ghabhu bhokapi bhabheli, bhakajendiki chihanganyuma, na kuuyeka utopu waka tati wabhu. Bhakalingalili kunkeghi, wala ngachebhuweni utopu waka tati wabhu. 24Nuhu paakapatiki malangu kuhuma mu kulobhela kwaki, akamanyi ntundu mwana waki nchoku moakuntendile. 25Akapwaghike,
“Kanaani apata masolu!
Anaabya mtumwa wa pahi nakanope kwa bhalongu bhaki.”
26Kabhete akapwaghike, “Apengalikaje Bambo, Chapanga waka Shemu!
Kanaani na abya mtumwa waka Shemu.
27Chapanga na ajonjukya malindakanilu ghaka Yafeti!
Yafeti na atamaje na bhandu bhaka Shemu!
Na Kanaani abya mtumwa waka Yafeti.”
28Pajajomwiki ghalika Nuhu akatami hyaka mia tatu na hamsini. 29Nuhu akatami hyaka mia tisa na hamsini, panihapa akapotile.
S'ha seleccionat:
Utumbulilu 9: MpBV
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The New Testament in Mpoto Language ©The Word for the World International and Mpoto Language Translation, 2020 All rights reserved.