Masmur 21
21
Akari titi apa ransyeran kangkaman weye po anasineko marova rai
1Ransyeran Masmur Daud po ratoe. Nto irati akari po vatano matayao ukiny maugavo ransyerane rai ai.
2AMISY, Nya vambunine mirati mbewaramo akari titi ananibe;
opamo anayanambe rave, weye Amisye Winyo anasineko raunande ai!
3Apa bekere mamo Nyo raunande ti mamaisyo ai,
muno apa ana danajo mamo Nyo rawatambe ramu.
4Weye Winyo aovambe irati Nya kove rai ti manakoe ai,
muno Winyo kakion#21:4 kakion: Ayao Ibrani ama ine mare ‘‘mahkota.’’ emasi kakui raugasya akari rai.
5Po kove ranajo Winai ra Nyo raude ai indamu opamo jayaisy tutir,
muno Nyo apa tume raveti nggwaravainy merere nto tutir.
6Apa tame ntiti weye Amisy Winyo anasineko raunande ai no marova rai,
Winyi Nyo aijaseo titive muno Nyo aveti apa tame manakoe.
7Tugae, Nyo kovo manakoe raugaje ai ti merere nto tutir,
opamo ananibe muno anayanambe weye Amisye wintuna autan.
8Weye akari titije umaso anaveano AMISY obo amen,
muno Amisy Titi Rave Apa muinyo no tawane mo akom weti tindimu tutir.#21:8 tindimu tutir: ayao so ama ine mare akari titi so apinde jewen, yara be akarive tutir.
9 # 21:9 Ayao Ibrani anemo 9-10a muno 11-13 mbar kobe jewen, weti kuruno Ayao Amisy inta wo ratantona ware aneme so mo akari titi aura, yara kuruno kaijinta wo ratantona ware mo Amisye aura. Indati apa marova inta nin da to jewen,
muno po vatano manuga mamuno ai mawatan ti po maijar.
10Arono apa marova maugav ude no amun,
indati po mansamero tanamo mbadurure rai.
Indati AMISY Apa pari mamoane mo maubaisy,
muno taname mo mansanen ti mangkur bintabo ti mewen.
11Awa arikainye, ajavije nawamo indati akari titi po maotar ti makanive no mine vone so,
awa susyo wo mampame umaso nawamo makanive tenambe.
12Ranivara apa marova manatantonave kakai raijo ai,
weramu awa ana wo ratantona ti mamuno ai somamo mamaisye jewen bayave.
13Weye po ato veano maivuiny,
weti usakinav muno unanajibe.
14Reama AMISY, reamare mbeseo ra Nyo Nya vambunine raroron!
Reamare reangkinyo ransyerane rai, reamo Nya vambunine rangkakivambe!
S'ha seleccionat:
Masmur 21: yva
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)