Hch 4
4
C'ochnc Pedro yet' Juan 'a eb' yajal
1A yic wan yaln Pedro yet' Juan 'a eb' 'anma', 'ix c'och ewin ya'mal 'och sti eb' israel 'a Dios, yet' win sat stan̈mal yatut Dios,#Hch 4.1 A eb' stan̈mal yatut Dios, atn eb' saduceo; tzyal eb' to matz pitzw pax eb' chamnac. Yuj cha, 'ix cot yowl eb' 'a scuynb'il eb' schecb' Cristo. yet' pax ewin saduceo. 2'Ix cot yowl ewinac, yujto wan scuywj Pedro yet' Juan 'a eb' 'anma'. Wan yaln eb', chajtlto 'oj pitzwc pax eb' chamnac, yujto 'ixta x'aj Jesús spitzw paxi. 3Yuj cha, 'ix syamn cot ewin eb'. 'Ix ya'n 'och ewin eb' 'a preso, yujto yemc'ul xo. Yuj cha, x'ochcn eb' jun 'ac'wal. 4Palta a wal eb' x'ab'n spaxti Dios 'a scal eb' 'anma cha, til wal eb' xya'ch sc'ojl 'a 'a. Yuj cha, caw niwn x'aj eb' creyente. A sb'isl eb' winac, 'aym o'e'oc mil eb'.
5Ax 'a junx c'u, 'ix syamn sb'a eb' sat yajl 'a Jerusalén cha, yet' eb' 'ichmtac winc 'ay yopiso, yet' eb' cuywjum 'a ley yic Moisés. 6Ax win Anás, win sat ya'mal 'och sti eb' 'a Dios, 'ix c'och pax yet' eb'. An̈jtona', 'ix c'och pax Caifás, Juan, Alejandro, yet' jun tzo'n̈ xo eb' yican eb' sat ya'mal 'och sti eb' 'a Dios. 7'Ix ya'n ewin 'ijxc cot Pedro yet' Juan 'a yojltac. 'Ix sc'anb'n ewin 'a eb' 'ixtic:
—¿'Aj xeyij jun eyopiso tic, yuj cha, tze b'on jun tzo'n̈ tic? ¿Mach wal x'a'n e b'o'? xchi ewinac.
8Ax Pedro, caw 'aych Yespíritu Dios 'a 'a. Yuj cha, xyaln 'ixtic:
—Ex yajl eyaj 'a eb' chon̈ab', yet' ex 'ichmtac winc yic chon̈b' Israel, 9'in tze c'anb'j 'ayn̈ on̈, yujto 'ay jun wach' xqui b'o 'a jun win matz tac' sb'ey xon tic on̈. Tecn tze nib'j tzeyab'i, tas wal x'aj win sb'o'i. 10Yuj cha, a jun tic 'oj cal 'ayx on̈, sec 'oj yojcoc pax 'el smasnil eb' quit israelalec. A win xjaw 'a eyojltac tic, yujn̈ej spoder Jesucristo 'aj Nazaret, 'ix b'o winac. Atn Jesucristo tic xeyac' 'ajxc 'och 'a spenc culus. Palta ax Dios x'a'n pitzwc pax 'a scal eb' chamnac. 11Ax tic, 'icha junc b'om n̈a, 'ixta 'ex. Ax Jesús, lajn 'icha junc q'uen patcab'il can 'el eyu'uj. Palta a xwach' 'ajx 'och yopiso. 12May junc xo mach 'aj wach' tzo'n̈ colchjec, yujto a 'a yolyib'n̈q'uinl tic, may junc xo mach 'ix yac' Dios yopiso ya'n qui colnb'ilec, cojxn Jesús, xchi Pedro.
13Ax 'ix yiln ewin yajl cha, chajtlto caw te'n xyutj sb'a Pedro yaln yet' Juan. 'Ix yiln pax ewinac, to may 'aj cuywnac eb', comn 'anma eb'. Yuj cha, caw sat sc'ojl ewinac. 'Ix nachj 'el yuj ewinac, chajtlto jun 'e'nc eb' yet' Jesús. 14'Ix yiln pax ewinac, lin̈n 'och win xb'o yoc 'a stz'ey eb'. Yuj cha, toxn ma'ix stac' ya'n 'och ewin junc tas 'a yib'n̈ eb'. 15Yuj cha, xyaln ewinac, to tz'ijx 'el Pedro chi yet' Juan 'a yojltac ewinac, sec tzc'umj can sb'a ewin sch'ocoj. 16Xlajwn̈ej yelcn eb', 'ix yaln can ewin 'ixtic:
—¿Tas wal tzcutjec ewin schawn̈il tze na'a? Yujto c'uxn yojc eb' 'aj Jerusalén tic jun niwn milagro tic 'ix sch'ox eb'. Yuj cha, matz tac' calnec, to yes eb'. 17A ticnec, man̈x 'a cab' mach tzpucn 'el jun tic 'a scal eb' 'anma'. Yuj cha, qui xib'tquec eb', sec man̈x 'oj yal-l eb' yab'xil Jesucristo 'a junc xo mach, xchi ewinac.
18Xlajw cha, 'ix yawtn paxt ewin eb'. 'Ix cham wal yaln ewin 'a eb', chajtlto man̈x b'a'n̈ tzyal-l eb' jac yab'xil Jesús, man̈x b'a'n̈ tzcuywj eb' 'a eb' 'anma'. 19Palta 'ix ta'w Pedro chi yet' Juan 'a ewin 'ixtic:
—Palta tzcham wal e nani. ¿Tom wach' 'a sat Dios tze na'a, toto a eyic tic tzqui yiclj on̈, ax Dios, matz qui yiclj tas tzyal on̈? 20Yuj cha, toxn matz tac' cactn can caln 'el yab'xil tas xquil on̈, yet' tas xcab' on̈, xchi eb'.
21Yuj cha, swach' xib'tn cob' ewin eb'. Xlajw cha, xya'n 'el ewin eb' 'a libre. Ma'ix nachj 'el yuj ewinac, tas tzyutj ewin ya'n 'och syailal eb', yujto smasnil eb' 'anma xaln wach' paxti 'a Dios, yuj jun xb'o yuj eb' cha. 22Ax win xb'o yoc yuj jun milagro cha, 'ec'b'al xo chawinc ab'il sq'uinl winac.
Tzc'an eb' creyente ste'nal 'a Dios
23Xlajwn̈ej yel Pedro yet' Juan 'a libre, 'ix 'at eb'. 'Ix c'ochx eb' 'a 'aj 'aycn jun tzo'n̈ xo yitb'eym eb'. Cuxn xyal eb', jantcn̈ej tas 'ix alx 'a eb' yuj ewin sat ya'mal 'och sti eb' israel 'a Dios, yet' eb' 'ichmtac winc 'ay yopiso. 24Yic 'ix yab'n eb' yitb'eym eb' cha, junn̈j xleslwi eb' smasnil 'a Dios. 'Ix yaln eb' 'ixtic:
—Mamin, ach qui Diosal on̈, ach a b'ojnac satcha'an̈, yet' lum lum tic, yet' a mar, yet' smasnil tas 'ay 'a 'a. 25Ach paxtinnac ach yet' Espíritu 'a sti jun a checb' David, yic yaln can 'ixtic:
¿Tas yuj caw tzq'ue 'awjoc eb' chuc chon̈b'al? ¿Tas yuj a jun tzo'n̈ may jac yel'ch 'aj tzya'ch eb' snab'en?
26A eb' rey yet' eb' syajlil junjn chon̈ab', 'oj cot yowl eb', jun lajnxoj 'oj yutc eb' yaln 'a spatc Cajlil, yet' pax 'a jun Rey sic'b'il 'el yu'uj, xchi 'a Ch'an̈ U'un̈.
27Wal yel, a win Herodes, win Poncio Pilato, eb' man̈ israeloc, yet' pax eb' quit israelal on̈, 'ix syam sb'a eb' 'a yol chon̈b' tic. 'Ix sc'umj sb'a eb' 'a spatc Onnal, atn jun sic'b'il 'el o'oj. Palta ach a'jnac can yopiso. 28C'uxn 'ix sb'o eb' jantcn̈ej tas alb'il can oj pecti'. Yujto 'elnc xon 'a a c'ojol, to 'ixta tzb'o eb'. 29Al ticnec Mamin, 'ilt wal eb' tic, caw tzcot yowl eb' 'ayn̈ on̈. Yuj cha, 'ac' qui te'nal on̈, sec matz on̈ xiw caln 'el a paxti on̈, yujto a checb' caj on̈. 30'Ac' wal a poder 'ayn̈ on̈, sec 'oj b'oxc sc'ojl eb' ya'ay. A yet' Jesús tza b'o jun tzo'n̈ milagro tzch'oxn 'el a poder. A Jesús cha, Onnal, atn jun sic'b'il 'el o'oj, xchi eb' 'a Dios.
31Yic 'ix lajw sleslwi eb', ax jun n̈a 'aj 'ayc' eb' cha, caw 'ix tzicb'tan̈x yuj Dios. 'Ix wach' 'och Yespíritu 'a junjn eb'. Yuj cha, caw te'n xyutj sb'a eb' yaln 'el spaxti Dios.
Junn̈j yaj smasnil tas yuj eb'
32Ax eb' creyente smasnil, jun lajnn̈ej xyutj eb' snab'en. Junc'ojlaln̈ej x'aj eb'. May junc mach 'ix aln yico'oc junc tas sch'ocoj. Yujto jantcn̈ej tas 'ay 'a eb', junn̈j yaj yuj eb' smasnil. 33Ax eb' schecb' Jesús, caw te'n xyutj sb'a eb' yaln 'eli, chajtlto xpitzw pax Cajlil Jesús. Ax Dios, caw x'och yet' eb' creyente smasnil. 34May junc mach meb'a 'a scal eb', yujto jantcn̈ej eb' 'ay slu'um, mto yatut, 'ix chon̈l eb'. Ax stojol, xyij 'at eb', 35xya'n eb' 'a yol sc'ab' eb' schecb' Jesús. Ax eb' xpojn 'ec' 'a eb' creyente cha, a tzyala jantc 'ay tz'och yuj junjn eb'. 36'Ay jun creyente José sb'i, 'ix 'ajx sb'ic can Bernabé yuj eb' schecb' Jesús. A Bernabé, tzyal 'el'chi, 'A'm Niwnc'ojlal. A jun cha, yin̈tl Leví 'aj Chipre. 37'Ay jun slum schon̈li. 'Ix yi'n 'at stojol, xit' ya'nc 'a eb' schecb' Jesús.
S'ha seleccionat:
Hch 4: CSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Chuj San Sebastian © Sociedades Bíblicas Unidas, 1999.