Hch 5
5
A smul Ananías yet' Safira
1'Ay jun winc Ananías sb'i. Safira sb'i yistzil. Schon̈l eb' jun slu'um. 2'Ix chan win stojl jun slum cha, palta 'ix sc'ultac 'ij can 'el win nan̈l yico'. Man̈ tz'acnoc xit' yac' 'a eb' schecb' Jesús. Palta ax 'ix yutj win yalni, to tz'acn q'uen tumn chi smasnil. Ax 'ix yistl win cha, locn 'ix yet' win 'a jun nab'en cha. 3Ax Pedro 'ix aln 'a win 'ixtic:
—Ananías, ¿tas yuj xyac' win satanás a c'ojloc, yuj cha, tza'n 'es 'a Yespíritu Dios? 'In 'ix ejcan 'el nan̈l ec 'a stojl jun a lum cha. 4A 'a yic mantzac a chon̈o, yel eco'. An̈jtona', 'ixta pax 'a yic xa chon̈ni, yel ec ton stojl cha. Yuj cha, ¿tas yuj xa na jun maysch'olnil tic 'ixtic? Man̈ocn̈ej 'a 'anma xac' 'es, palta a 'a Dios xac' pax 'es, xchi Pedro 'a winac.
5Xlajwn̈ej yab'n win Ananías jun tzo'n̈ tic, 'ix telw 'ejm lan̈njoc. 'Ix chami. Ax jantcn̈ej eb' x'ab'n speclal jun tic, caw 'ix xiw chan̈ eb'. 6Ax jun tzo'n̈ eb' quelmtac winc xc'ochi, xit' sb'a'nc 'och eb' jun nip 'a sniwnal winac. 'Ix yi'n 'at eb', xit' smucnc can eb'.
7'Ayx am 'oxe'oc hora scham winac, 'ix c'och pax 'ix yistl winac. 'Ix 'och 'ix 'a yol n̈a. Man̈ yojcoc 'ix tas x'aj winac. 8Ax Pedro, 'ix sc'anb'n 'ixtc 'a 'ix:
—Al 'ayin, ¿tom yel 'ixtcn̈ej xe chon̈ jun e lum cha? xchi 'a 'ix.
—N', 'ixtnta', xchi 'ix 'a 'a. 9Yuj cha, xyaln pax Pedro 'ixtc 'a 'ix:
—¿Tas yuj xe molalej, xeya'lni cob' eya'n prowal Yespíritu Cajlilec? A ewin xit' mucnoc win echmil, ab' sjaw ewin 'a sti n̈a. Wal ach wul yi'nc pax ewin tic, xchi 'a 'ix.
10Yajn̈j wal cha, xtelw pax 'ejm lan̈njoc 'ix 'a yojltac Pedro. 'Ix cham pax 'ix jun xo. Ax yic 'ix 'ochch eb' quelmtac winc cha, 'ix yiln eb', chamnc xo pax 'ix. Yuj cha, 'ix yi'n pax 'at ewinac, xit' smucnc pax ewin 'ix 'a stz'ey win yichmil cha. 11Yuj cha, caw 'ix xiw chan̈ eb' creyente smasnil, yet' jantcn̈ej eb' x'ab'n speclal jun cha.
Til wal milagro sch'oxjnac eb' schecb' Jesús
12Ax eb' schecb' Jesús, til wal milagro 'ix ch'ox eb'. Caw 'ix ch'oxl eb' spoder Dios 'a scal eb' 'anma'. A 'a jun scorredoral yatut Dios tzcuch Yic Salomón, ata tzyam sb'a eb' creyente smasnil. 13Ax eb' man̈ creyenteoc, may eb' tzte'wtzej sb'a sc'och yet' eb', yic tzyamn sb'a eb'. Palta yojc eb', to caw wach' eb' creyente cha. 14Til wal eb' winac, yet' eb' 'ix 'ix xya'ch sc'ojl 'a Cajlil. 15Yuj cha, xlaj 'ijx 'elt eb' ya'ay 'a yoltc caye yet' swaynub'. Ata 'ix stan̈wj eb' yec' Pedro, sec toq'ue tz'ec' jac yen̈l 'a yib'n̈ eb'. 16Til wal 'anma xcot 'a jun tzo'n̈ chon̈b' 'a sla'nil Jerusalén cha. 'Ix yi'n cot eb' jun tzo'n̈ eb' ya'ay, yet' eb' 'aych ewin demonio 'a 'a. 'Ixta to b'i'an, 'ix b'ox can sc'ojl eb' smasnil.
'Ochnc 'a yib'n̈ Pedro yet' Juan
17Ax win sat ya'mal 'och sti eb' israel 'a Dios, yet' smasnil ewin yitb'eym winac, atn ewin saduceo, caw xchacb' 'el sat ewin yuj schichnc'ojlal. 18Yuj cha, xya'n ewin yamchjoc eb' schecb' Jesús. 'Ix ya'n 'och ewin eb' 'a jun preso yic chon̈ab'. 19Palta ax 'a 'ac'wal, 'ay jun yángel Cajlil, xwul jacn te preso cha. 'Ix yi'n 'elt eb'. Xlajw cha, xyaln 'a eb' 'ixtic:
20—'Ixquec 'a yamq'uil yatut Dios. Tzex q'ue lin̈an, tzeyaln 'el wach' 'ab'x yic jun q'uinl tic tzat 'ajx 'ayx tic, xchi jun ángel chi 'a eb'.
21Yuj cha, ax 'a yic wan sacb'i, 'ix c'och eb' 'a yamq'uil yatut Dios. 'Ix syamn 'och eb' scuywj ta'.
Ax win sat ya'mal 'och sti eb' israel 'a Dios, yet' ewin yitb'eyum, 'ix yawtn cot ewin eb' sat yajal, atn jantcn̈ej eb' yajl yaj 'a eb' israel. Xlajw cha, xchecn 'at ewin jaywn̈ ewin policía, yic tz'at cob' yi'nc 'elt ewin eb' schecb' Jesús 'a preso snani. 22Palta ax yic xc'och ewin 'a te preso cha, man̈x 'a mach 'ayq'ui. Xlajwn̈ej yiln ewinac to may mach, yuj cha, x'at yalnc pax ewinac. 23'Ix yaln ewin 'ixtic:
—Xquil on̈, caw wach' yajch sc'ab' te preso cha. Ax eb' tan̈m preso cha, lin̈n 'ec' eb' 'a sti'. Palta ax xqui jacn te on̈, xquiln on̈, man̈x 'a mach 'ayq'ui, xchi ewinac.
24Ax win sat ya'mal 'och sti eb' israel 'a Dios, yet' ewin yitb'eyum, yet' win sat stan̈mal yatut Dios, yic 'ix yab'n ewin jun tzo'n̈ cha, caw 'ix sat sc'ojl ewin si'mb'il. Ma'ix nachj 'el yuj ewinac, tas wal yaji. 25Palta yajn̈j wal cha, 'ay pax junx winc 'ix c'ochi. 'Ix yaln 'a ewin 'ixtic:
—A wal eb' xcob' eya'ch 'a preso, 'ayc' eb' 'a yamq'uil yatut Dios ticnec. Wan scuywj eb' 'a eb' 'anma', xchi winac.
26Yuj cha, ax win sat stan̈mal yatut Dios, yet' ewin policía, x'at yi'nc cot ewin eb'. Palta man̈toc amancotn xit' yutc ewin yi'n cot eb', yujto xiw ewin sjul q'uenax yuj eb' 'anma'. 27'Ix 'at ya'nc ewin eb' schecb' Jesús 'a yojltac eb' sat yajal. Ax win sat ya'mal 'och sti eb' israel 'a Dios, 'ix aln 'a eb' 'ixtic.
28—'In tox 'ix cham wal caln 'ayx on̈, to man̈xtzac ex cuywj 'a scuynb'il Jesús. ¿Tom matz eyiclj jab'oc? A ticnec, c'uxn 'ix pucl e cuynb'il 'a Jerusalén tic. 'In tze nib'j to tzon̈ e checltej 'el on̈, chajtlto cuj on̈, 'ix cham Jesús cha, xchi win 'a eb'.
29Palta 'ix ta'w Pedro chi 'ixtc yet' jun tzo'n̈ xo eb' schecb' Jesús:
—Yowlal a tas tzyal Dios, a tzqui yiclj on̈. Ax jun tzo'n̈ schecnb'il 'anma', toto matz chaj sb'a yet' yic Dios, matz qui yiclj on̈. 30Ax tic, xeyac' milxoc cham Jesús, yic xeya'n t'un̈x q'ue 'a jun te culus. Palta a Dios, atn 'aj yaljnac sb'a eb' qui mam quichmec, a x'a'n pitzwc pax 'a scal eb' chamnac. 31A x'a'n yopiso, xyi'n 'at 'a swach' c'ab'. 'Ix ya'n 'och Cajliloc, qui Colmaloquec. Yuj cha, a Jesús, a tz'a'n qui nac qui b'a an̈ israel on̈c tic, sec tzlajw can qui mulc yu'uj. 32An̈ tic on̈, caw tzcac' testigoal qui b'a yuj jun tzo'n̈ tzcal 'ayx tic on̈. An̈jtona', 'ixta pax Yespíritu Dios, tzyac' pax testigoal sb'a quet' on̈. A Dios tz'a'n Yespíritu tic 'a jantcn̈ej mach tzyiclni tas tzyala, xchi eb'.
33A yic xyab'n ewin yajl chi jun tzo'n̈ tic, xq'ue jucnjoc ewin yowx 'a eb'. Caw snib'j ewin smil eb' muc'uc. 34Palta a 'a scal ewin yajl cha, 'ay jun win fariseo, Gamaliel sb'i. Caw cuywjum 'a sley Dios. Caw wal wach' win 'a sat eb' 'anma'. 'Ix q'ue lin̈an. 'Ix ya'n 'ijxc 'el eb' schecb' Jesús jun rato. 35Xlajw yel eb', 'ix yaln win 'ixtc 'a eb' yit yajlil cha:
—Ex wit israelal, nac wal si'mb'il, tas wal tzeyutj e b'onyaj jun tzo'n̈ eb' tic. 36Qui nac cot win Teudas#Hch 5.36-37 A Teudas yet' Judas, a eb' xjucb'tzan eb' 'anma 'a owl yet' eb' 'aj Roma 'a yic am stiempoal yalj Jesús. sb'i 'e'nc 'a yic yalan̈. Cob' ya'jnac 'och sb'a win yajlil 'a scal eb' 'anma'. Cob' yaljnac winac, to caw 'ay yopiso. 'Aym chan̈e'oc ciente 'anma 'ochnc cob' yet' winac. Palta xmilx cham winac. Ax jantcn̈ej eb' cob' 'ochnc yet'oc, c'uxn sactzic can pax eb', satnc can pax 'ejm jun yic eb' cha. 37Xlajw cha, 'ay pax jun win Judas 'aj Galilea, cob' ya'jnac 'och sb'a win yajlil, yic yijx q'ue wan sb'isl eb' 'anma yuj eb' yajal. Til wal 'anma cob' 'ochnc pax yet' winac. Palta milb'il pax cham junx win cha. Ax jantcn̈ej eb' cob' 'ochnc yet' winac, c'uxn sactzic can pax eb'. 38Yuj cha, tzwal 'ayex, cactquec quixtn eb' schecb' Jesús tic, yilx eb'. A jun yic eb' tic, toto yic comn 'anma', mun 'oj satx can 'ejmi. 39Palta toto yic Dios, ma'oj stac' ca'nec lajwoc. 'Ay smay, toq'ue a Dios tzca'c owl yet'oc, xchi winac. 40'Ix schaj sc'ojl ewin yajl chi tas 'ix yal win Gamaliel cha. Xlajw cha, x'awtx pax 'och eb' schecb' Jesús jun 'ejm xo. 'Ix ma'x eb'. 'Ix alx 'a eb', to man̈xtzac yal-l eb' yab'xil Jesús. Xlajwn̈ej cha, 'ix 'ajx can pax 'elt eb' 'a libre. 41Yuj cha, 'ix 'elt eb' schecb' Jesús chi 'a yojltac ewin sat yajl cha. Caw 'ix tzalj eb', yujto yujn̈ej Jesús, 'ix yab' eb' syal 'icha tznib'j Dios. 42Caw ma'ix yactj can eb' yaln 'el yab'xil Jesucristo 'a junjn c'u. C'uxn x'ec' yal-l eb' 'a yamq'uil yatut Dios, yet' 'a scal n̈a.
S'ha seleccionat:
Hch 5: CSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Chuj San Sebastian © Sociedades Bíblicas Unidas, 1999.