Hch 7
7
A spaxti Esteban
1Ax win sat ya'mal 'och sti eb' israel 'a Dios, 'ix sc'anb'n 'a Esteban 'ixtic:
—¿Yel am jun tzo'n̈ xyal ewin tic? xchi. 2Yuj cha, 'ix yaln Esteban chi 'ixtic:
—Ex wit chon̈ab', ex 'ichmtac winac, 'ab'ec. A Dios, caw niwn yel'chi. Sch'oxjnac sb'a 'a qui mam quichmec Abraham, yic 'ayc' 'a yol yic Mesopotamia, yic mantzac c'och cajn 'a chon̈b' Harán. 3Yaljnac Dios 'ixtc 'a 'a: 'Actj can jun a lum tic, yet' jantcn̈ej eb' ecan. 'Ixc 'a junx lugar 'aj tot 'oj in ch'ox 'ayach, xchi Dios 'a 'a. 4Xlajwn̈ej cha, xyactn can slugar eb' caldeo 'aj 'ayc' cha. Ax 'a chon̈b' Harán, axta xc'och cajan. Ax 'a yic 'ix cham smam, 'ix 'ijx cot Abraham chi yuj Dios 'a jun lugar tic, 'a 'aj 'ayn̈ec 'ec' tic. 5Palta may jac lum lum xyac' Dios yico'oc 'a tic. May xon jab'oc x'ajx 'a 'a. Palta 'ix ya'cn Dios sti 'a 'a. 'Ix yaln can 'ixtic: To 'oj wac' jun a lu'um. Ax yic 'oj a chami, 'oj can jun a lum chi yico'oc eb' en̈til, xchi Dios 'a 'a. Mant 'a xon junc yunnal Abraham, yic xyaln can Dios jun chi 'a 'a. 6Xyaln can pax Dios 'ixtc 'a 'a: A eb' en̈til, 'oj c'och eb' 'a slugar junx chuc chon̈b'al. 'Oj 'ajxc 'och eb' smosooc eb' chuc chon̈b'al cha. Chan̈e ciente ab'il 'oj yab' eb' syal yuj eb'. 7Palta an 'oj wac' yailal 'a yib'n̈ eb' chuc chon̈b'al chi 'aj 'oj 'och eb' mosoal cha. 'Oj lajwc cha, ax yelt eb' en̈tl chi 'a jun lugar cha. Ax in ya'n servil eb' 'a jun lugar tic, xchi Dios. 8An̈jtona', ya'jnac can pax Dios strato yet' Abraham cha. Yaljnac can 'a 'a, to tz'och jun senya 'a sniwnal, yet' 'a eb' yin̈til, sec chequel to 'ay strato yet' eb'. A jun senya cha, atn jun circuncisión sb'i. Yuj cha, a yic yalj jun yunnal Abraham Isaac sb'i, yucb'ixial xo yalji, yajx circuncidar yuj Abraham cha. An̈jtona', 'ix 'alj pax jun yunnal Isaac, Jacob sb'i. 'Ix 'ajx pax circuncidar yuj Isaac cha. Ax Jacob, lajchwan̈ eb' yunnal 'aljnac. C'uxn xyac' circuncidar eb' smasnil. A eb' lajchwan̈ cha, atn eb' qui mam quichmec an̈ israel on̈c tic.
9A eb' qui mam quichmec cha, 'ay jun yu'tac eb' José sb'i. Ax 'a jun 'el, sutmjnac eb' schichn 'och 'a 'a. Yuj cha, schon̈n can 'at eb' 'a chon̈b' Egipto. Palta ax Dios, 'ochnc yet' José cha. 10A coljnac can 'elt José chi 'a scal syail. Ya'jnac sjelnal 'a 'a. 'Ochnc yet'oc, sec caw wach' 'ajnc 'a sat win faraón, win sreyl Egipto. Yuj cha, ya'jnac 'och win yopiso yajlil 'a Egipto cha. An̈jtona', ya'n pax 'och win yajloc yatut.
11Palta 'ay jun tiempoal, jawnc jun niwn wejl 'a yib'n̈ smasnil eb' 'aj Egipto cha, yet' 'a yib'n̈ eb' 'aj Canaán. Caw yab'jnac eb' syal jun wejl cha. 'Ixta pax eb' qui mam quichmec 'ay 'a Canaán cha, caw wal man̈xtzac 'ilchj jac tas tzc'ux eb'. 12Palta ax xyab'n Jacob, chajtlto 'ay 'ixm trigo 'a Egipto. Yuj cha, xchecn 'at eb' yunnal ta'. A eb' yunnal cha, atn eb' qui mam quichmec. Sb'ab'l to xitc' eb' jun 'ejm cha. 13Ax yic schecx pax 'at eb' 'a scha'ejmal, yaln José chi 'a eb', chajtlto yu'tac sb'a yet' eb'. 'Ixta 'ajnc yojcan 'el win faraón, mach eb' yit chon̈b' José cha. 14Ax José cha, xya'n 'awtxoc 'at Jacob 'a 'a, atn smam. Ya'n pax 'awtxoc 'at eb' yu'tac, yet' yistl eb', yet' eb' yunnal eb', 75 sb'isl eb' 'a smasnil. 15'Ixta 'ajnc Jacob chi sc'och 'a Egipto cha. Ata chamnac. Junjnal chamnc pax eb' qui mam quichmec ta'. 16'Ixta to b'i'an, x'ijx pax 'at sniwnal eb' jun 'ejm xo 'a chon̈b' Siquem. Ata x'ajx can 'och sniwnal eb' 'a yol jun q'uen olb'il. A jun q'uen cha, a 'a yic yaln̈taxi manb'il can yuj Abraham 'a eb' yunnal Hamor 'a Siquem cha.
17Ax yic wan sjaw stiempoal tz'el'ch tas yaljnac can Dios 'a Abraham cha, yic ya'n can sti 'a 'a, 'ix q'uib' chan̈ sb'isl eb' yin̈tl 'a Egipto cha. Caw niwn x'aj sb'isl eb' ta'. 18C'ojnc'ojnilt 'ix 'och junx win sreyl Egipto. A win cha, man̈x yojcoc win yab'xil José, yujto pectitax chamnac. 19A win rey cha, caw xyixtj win eb' qui mam quichmec cha. Caw xyac' win stul 'a eb'. 'Ix yaln win 'a eb', to yowlal tzjulx 'el jantcn̈ej swinc 'unnal eb' tzat 'alji, sec mun tzlaj cham eb'. 20Atn 'a yic jun tiempoal cha, 'ix 'alj Moisés. Caw wach' 'a sat Dios. 'Oxen̈ej 'uj 'ix q'uib'tzax yuj smam snun 'a yol yatut. 21Xlajwn̈ej cha, sc'ub'n 'el eb' yuj jun ley cha. Palta 'ix 'ilchj yuj 'ix yisl win rey cha. 'Ix yi'n 'at 'ix 'a yatut. 'Ix sq'uib'tzan 'ix, 'icha wal yune', 'ixta xyutej. 22Ax Moisés cha, c'uxn 'ix 'ajx scuy jantcn̈ej sjelnal eb' 'aj Egipto. Yuj cha, caw wal jeln yalni. Jeln pax sb'on smasnil tas.
23Ax 'a yic 'ayx schawinquil ab'il sq'uinal, 'ix jaw 'a sc'ojol. X'at yilnc eb' yit chon̈ab', atn eb' quit israelalec. 24Palta ax 'ix c'ochi, 'ix yilni, 'ay jun win 'aj Egipto wan ya'n stul 'a jun win yit chon̈b' Moisés cha. Yuj cha, 'ix colwj Moisés cha, ax x'a'n spac win 'a win 'aj Egipto cha. 'Ix sma'n chamoc. 25A snan Moisés cha, to tznachj 'el yuj eb' yit chon̈ab', chajtlto a Dios 'oj c'anlb'anoc, ax scoln can 'elt eb' 'a libre. Palta ma'ix nachj 'el yuj eb'. 26Ax 'a yic junx c'u, 'ix c'och 'a chawn̈ xo eb' yit chon̈ab'. 'Ix yilni, wan ya'n eb' owal. Tznib'j Moisés tzcan eb' 'a junc'ojlal. Yuj cha, xyaln 'a eb' 'ixtic: Ex winac, ¿tas yuj tzeyac' owal? 'In eyit chon̈b' e b'a, xchi 'a eb'. 27Palta ax win wan ya'n owl cha, 'ix slemn 'och win sc'ab' 'a Moisés cha. 'Ix yaln win 'ixtc 'a 'a: ¿Mach ach 'a'n 'och juezal, yuj cha, tzon̈ a'n mandar on̈? 28¿Tom tza nib'j tzin a ma' cham 'icha otj win 'aj Egipto 'ewi? xchi winac. 29Xlajw yab'n Moisés jun cha, s'at 'eloc. Sc'och cajn 'a scal eb' chuc chon̈b'al 'a yol yic Madián. Ata 'aljnac chawn̈ yunnal.
30Schawinquil ab'il xo xc'och ta', x'at 'a lum witz Sinaí, 'a lum cusltac lu'um. Ata sch'ox sb'a jun ángel 'a 'a. 'Ayc' 'a scal jun c'ac', 'aj wan stz'a jun te q'ui'ix. 31Ax yic xyiln 'at jun cha, caw 'ix sat sc'ojl yu'uj. Yuj cha, x'at yilnoc. Ax Cajlil 'ix aln 'ixtc 'a 'a: 32An ton tic, sDiosal in eb' a mam echam. sDiosal in Abraham, Isaac, yet' Jacob, xchi 'a 'a. Ax Moisés cha, caw 'ix 'ib'x chan̈ yuj xiwlal. Man̈x 'ic 'och q'ueln 'a 'a. 33Xlajw cha, xyaln pax Cajlil 'ixtc 'a 'a: 'Ij 'el a xan̈ab', yujto a jun lugar 'aj 'aych 'ec' tic, caw niwn yel'chi. 34A eb' in chon̈b' 'ayc' 'a Egipto, tzwila, caw wan yab'n eb' syal ta'. Tzwab'i, caw tzc'acw eb' yab'n syail. Yuj cha, in jaw wul wic' 'elt eb' 'a scal syail. Yuj cha, 'ixic. To ach 'oj ach in checb't 'a Egipto cha, xchi Dios 'a Moisés.
35Palta ax yic xc'och 'a eb' yit chon̈b' cha, toxn may yel'ch 'a sat eb'. 'Ix yaln eb' 'ixtc 'a 'a: ¿Mach ach 'a'n 'och juezal, yuj cha, tzon̈ a'n mandar on̈? xchi eb' 'a 'a. Palta a Dios, 'ix 'a'n yopiso Moisés chi ya'n mandar eb'. 'Ix ya'n pax yopiso yi'n 'elt eb' 'a scal syail. A jun ángel chi 'ix sch'ox sb'a 'a Moisés 'a scal te q'ui'ix, a 'ix 'och yet'oc. 36Atn Moisés chi x'i'n 'elt eb' quit chon̈b' 'a Egipto. Chawinc ab'il 'ix sch'ox jun tzo'n̈ milagro 'a Egipto cha, yet' 'a a Chac Mar sb'i, yet' pax 'a lum cusltac lu'um. 37Atn Moisés chi 'ix aln 'ixtc 'a eb' quit israelalec cha: A Dios 'oj si'nc 'elt jun schecb' 'a scal eb' quit chon̈b'ec, 'icha in yutj in si'n 'elt an tic. [Caw tze chaj eyab' 'a 'a,] xchi 'a eb'. 38Atn Moisés chi 'e'nc yet' eb' 'anma 'a lum cusltac lu'um. 'Ayc' pax jun ángel yet' eb', atn jun xpaxtin yet' Moisés chi 'a lum Sinaí. Ata 'ayc' pax eb' qui mam quichmec yet'oc. A 'a Moisés cha, ata ya'jnac can Dios jun tzo'n̈ spaxti tzyal yuj qui q'uinlec. Yuj cha, a 'a'jnac can pax 'ayn̈ec.
39Palta a eb' qui mam quichmec cha, ma'ix yal sc'ojl eb' syiclj tas 'ix yal Moisés. Yujn̈ej cha, 'ix spatquiln can 'el eb'. 'Ix snib'n eb' meltzjoc pax sb'a 'a Egipto. 40'Ix yaln eb' 'a Aarón 'ixtic: Tza b'o jun tzo'n̈ qui diosalec. Tzqui nib'j b'ab'l s'at 'a qui satec, yujto a win Moisés, win on̈ 'i'nec 'elt 'a Egipto, man̈ cojcoc, tas 'ix 'i'ni, xchi eb'. 41Xlajw cha, 'ix sb'on eb' jun yechl quelm wacax. A jun chi xyalch eb' sdiosaloc. 'Ix smiln pax eb' jun tzo'n̈ no noc'. 'Ix ya'n eb' xajmb'al-l 'a 'a. 'Ix ya'n 'och eb' sq'uin̈ jun yechl chi 'ix sb'o cha. 42Yuj cha, 'ix yi'n 'el sb'a Dios 'a scal eb'. 'Ix 'actx can eb' sch'ocoj, sec tzyac' 'ejm sb'a eb' 'a jun tzo'n̈ c'anal 'ay 'a satcha'an̈. 'Ixta yutjnac jun schecb' Dios stz'ib'n cani, 'a 'aj tzyal 'ixtic:
Ex israel, a wal yic yec' eb' e mam eyichm chawinc ab'il 'a lum cusltac lu'um, caw man̈oc 'ayn ya'jnac tz'a eb' xajmb'al yet' yofrenda.
43May jac tas ya'jnac eb'. Palta a yic eb' to scuchjnac b'ey eb' yen̈l yib'n̈ sdiosal tzcuch Moloc,#Hch 7.43 Moloc, sb'i jun comn dios tzyalch eb' 'anma sdiosaloc, tzya'n eb' yunnal xajmb'al-l 'a 'a. Refán, sb'i jun c'anal 'aj tzyac' 'ejm sb'a eb' 'anma'. yet' sb'achnb'il yaln̈ yechl jun c'anal tzcuch Refán, jun tzo'n̈ sdiosal eb' caw yajb'entac, atn jun tzo'n̈ mun sb'ojnac eb'. Yujto xe b'eylb'ej sb'eyb'al eb' cha, yuj cha, 'oj ex wa'cn 'at 'icha presoal 'a spatquil 'at Babilonia, xchi Dios 'a Ch'an̈ U'un̈.
44A yic 'ix 'ec' eb' qui mam quichmec chi 'a jun cusltac lum cha, yet' eb' jun mantiado 'a 'aj 'ay sley Dios. Atn jun yet'l ya'jnac Moisés b'o'oc, 'icha yutjnac can Dios yaln 'a 'a, yic sch'oxn jun yechl 'a 'a. 45A jun mantiado cha, c'ojnc'ojnil xcan 'a yol sc'ab' jun tzo'n̈ xo eb' qui mam quichmec. Ax Josué, 'ix 'i'n 'at jun chi yet' eb', yic 'ix yica'an eb' lum slum eb' chuc chon̈b'al. A Dios, 'ix pechn 'el jun tzo'n̈ chuc chon̈b'al chi 'a sat slu'um. Ax eb' qui mam quichmec chi 'ix 'ica'an can jun slum eb' cha. A jun mantiado cha, yet'n̈j eb', masnto x'och David sreyloc eb'. 46A David cha, caw niwn swach'c'ojlal Dios schajnac. Yuj cha, 'ix snib'j sb'o jun yatut sDiosal Jacob, atn qui Diosalec. 47Palta at wal Salomón 'ix b'on yatut Dios cha. 48Palta ax Dios, yel xo wal caw niwn yel'chi, matz can cajn 'a junc n̈a tzb'o 'anma'. 'Ixta yaj yaln can jun schecb' pecti', yic yaln 'ixtic:
49A satcha'an̈, a chi in despacho yaji. Ax lum lu'um, 'icha to sb'achnub'al woc yaji. Ax xo tic, ¿tast wal 'oj eyutc e b'on junc watut 'aj tzin 'ilji?
50An tic, an b'ojnac smasnil tas, xchi Dios 'a Ch'an̈ U'un̈.
51Ax xo tic, caw pit ex. Caw lajn e nab'en yet' eb' man̈ 'ojtnacoc xon jac Dios. Caw matz eya'ch e chicn 'a spaxti'. Ton̈j tzeya'ch e b'a 'ajc'ojlal 'a Yespíritu Dios. Yuj cha, caw lajn ex yet' eb' qui mam quichmec. 52A eb' schecb' Dios pecti', c'uxn xlaj yab' eb' syal yuj eb' qui mam quichmec cha. 'Ay jun tzo'n̈ eb' aljnac cani, chajtlto 'oj jawc jun tojl snab'en, 'ix milx cham eb' yuj eb'. Ax yic 'ix jaw jun cha, ax xo xeya'ch 'a yol sc'ab' chamel, xeya'n milxc chamoc. 53Wach'xam 'ac'b'il jun tzo'n̈ schecnb'il Dios yuj eb' ángel, chab'il cujec, palta matz eyiclej, xchi Esteban 'a eb'.
A schamlil Esteban
54Ax yic 'ix yab'n ewin jun tzo'n̈ tic, caw xcot yowl eb' 'a Esteban cha. Xcaw xjuch'ch'i ye eb' scot yowal. 55Palta ax Esteban cha, caw 'aych Yespíritu Dios 'a 'a. Yuj cha, 'ix q'ue q'ueln 'a satcha'an̈, 'ix yiln q'ue stzictznil Dios. 'Ix yilni lin̈n 'ec' Jesús 'a swach' c'ab' Dios. 56Yuj cha, 'ix yaln 'ixtic:
—'Iltec, tzwila to jacn satcha'an̈. Tzwila to a jun 'Ochnc 'Anma'il, 'ayc' 'a swach' c'ab' Dios ticnec, xchi.
57Ax eb' 'ayc' ta', 'ix q'ue b'uynjoc eb' yawji. 'Ix smacn eb' schiquin. C'uxn xcot jucnjoc eb' 'a 'a, 'ix stzicn cot eb'. 58'Ix yi'n 'at eb' 'a sti 'el chon̈ab'. A eb' x'a'n 'och 'a yib'n̈ Esteban cha, xyij 'el eb' junjn spotil, 'ix ya'n eb' 'a jun quelm winc Saulo sb'i, sec ax tztan̈wni. Xlajwn̈ej cha, syamn 'och eb' sjuln cham Esteban chi yet' q'uen q'ue'en.
59Wan xo sjuln cham eb', 'ix leslwi Esteban, 'ix yaln 'ixtic:
—Ach Wajlil Jesús, chaj in pixan, xchi. 60Xlajwn̈ej cha, 'ix 'em cuman. Caw 'ip xq'ue yaw sleslwi:
—Mamin, man̈ a'cn 'och jun smul eb' tic 'a yib'an̈, xchi.
Xlajw xoj yaln jun cha, 'ix cham yuj eb'.
S'ha seleccionat:
Hch 7: CSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Chuj San Sebastian © Sociedades Bíblicas Unidas, 1999.