Gn 1
1
'Ix 'el yich sb'o smasnil tas
1A 'a yic x'el yich sb'o smasnil, 'ix sb'o Dios satcha'an̈ yet' lum lu'um. 2A yic jun tiempoal cha, may stzol-l yaj lum lum tic sb'o'i, sictac yilxi, mayn 'ec' a 'a yib'n̈ lu'um, q'uic'q'uinl yilx smasnil. Ax Yespíritu Dios, a tz'ec' 'a yib'n̈ smasnil a a cha.
3'Ix yaln Dios 'ixtic: 'Ay cab' sacq'uinal, xchi.
Yuj cha, 'ix jaw sacq'uinal. 4Ax xyiln Dios to wach' sacq'uinl cha. 'Ix spojn 'el sacq'uinl chi 'a scal q'uic'q'uinal. 5A sacq'uinl cha, xya'n Dios sb'ic c'ual, ax q'uic'q'uinal, xya'n sb'ic 'ac'wal. X'ec' jun 'ac'wal, yet' jun c'u, 'ixta x'aj yec' b'ab'l c'u.
6Xlajw cha, xyaln pax Dios 'ixtic: 'Ay cab' junc tas jen̈n 'ec' 'a yolyib'n̈q'uinl tic, sec tzpoj sb'a a a yu'uj, xchi. 7Yuj spaxti xyal cha 'ix b'o jun spojmb'il snan̈l a a cha, chamacn̈ x'ajcn 'el a', jun macn̈ a xcan 'a yaln̈ jun jen̈n 'ec' cha, junx macn̈ a xcan 'a yib'an̈.
'Ixta x'aji. 8A jun tas jen̈n 'ec' 'a yib'n̈ yolyib'n̈q'uinl tic, satchan̈ sb'i yuj Dios. X'ec' junx 'ac'wal, yet' junx c'u, 'ixta x'aj yec' schab'l c'u.
9Xlajw cha, 'ix yaln pax Dios 'ixtic: Syam cab' sb'a a a 'ay 'a yaln̈ satcha'an̈, sec junxn̈ej tz'ajcn a', yic tzcheclj can chan̈ lum lum taquin̈, xchi.
'Ixta x'aji. 10Ax 'aj xcheclj can chan̈ jun tacn̈ cha, 'ix ya'n Dios sb'ic lu'um, ax a a 'ix syamcn sb'a cha, 'ix ya'n sb'ic mar.
'Ix yiln Dios to caw wach' x'aji. 11Xlajw cha, xyaln Dios 'ixtic: Pa' cab' smasnil junjn c'aj te te 'a sat lum lum tic: te 'itj tzyac' yin̈til, yet' te te tzyac' sat, a tzyal yin̈tl te', xchi.
'Ixta x'aji. 12'Ix pac' smasnil junjn c'aj te 'a sat lum lum tic, smasnil te c'ultac, te 'itaj, yet' te te tzyac' sat, a tzyal yin̈til. 'Ix yiln Dios to caw wach' x'aj 'el'chi. 13'Ix 'ec' junx 'ac'wal, yet' junx c'u, 'ixta x'aj yec' yoxl c'u.
14-15Xyaln pax Dios 'ixtic: 'Ay cab' junc tz'a'n sacq'uinl 'a satcha'an̈, yic tzictajn 'emt sat lum lum tic, yuj spojn snan̈l c'ual, yet' 'ac'wal, yuj sch'oxn pax junjn c'u, yet' ab'il, yet' junjn tiempoal, xchi.
'Ixta x'aji. 16Yuj spaxti xyal cha xb'o chab' niwc luz: a jun caw ow sc'aq'uil, tz'och yopiso 'a c'ual, ax jun jab' wal sacq'uinlal, tz'och yopiso 'a 'ac'wal. Xb'o pax smasnil c'anal. 17'Ix ya'n 'och Dios jun tzo'n̈ chi 'a satcha'an̈, yic tzya'n 'emt sacq'uinl 'a sat lum lum tic 18'a c'ual yet' 'a 'ac'wal, yic tzpojn pax snan̈l sacq'uinal yet' q'uic'q'uinal. 'Ix yiln Dios to caw wach' x'aj 'el'chi. 19X'ec' junx 'ac'wal, yet' junx c'u, 'ixta x'aj yec' schan̈l c'u.
20Xyaln pax Dios 'ixtic: Yune'oc cab' sb'a smasnil no noc' 'a yoltc a a', yet' smasnil no ch'ic tz'ec' jen̈n̈oc 'a yib'n̈ lum lum tic, xchi.
'Ixta x'aji. 21Yuj spaxti xyal cha, xb'o no niwc noc' 'ay 'a yojl a mar, yet' smasnil junjn c'aj no noc' 'ay 'a yoltc a a cha, yet' smasnil junjn c'aj no ch'ic.
Caw wach' 'ix yil Dios. 22'Ix ya'n syaxilal 'a yib'n̈ smasnil no noc' cha, 'ix yaln 'ixtic: 'Unewoc cab' e no', b'ut'j cab' 'el yojl a mar yuj e no', 'ixta pax no ch'ic, b'ut'j cab' 'el yolyib'n̈q'uinl yuj e no', xchi.
23'Ix 'ec' junx 'ac'wal, yet' junx c'u, 'ixta x'aj yec' yol c'ual.
24Xlajw cha, 'ix yaln pax Dios 'ixtic: Yune'oc cab' sb'a junjn c'aj no noc' 'a sat lum tic, no cajb'en noc', no calte'al noc', yet' pax no tzjuc sb'a 'a sat lu'um, xchi.
'Ixta x'aji. 25Yuj spaxti xyal cha 'ix b'o smasnil junjn c'aj no cajb'en noc', e no 'ay 'a sat lum lum tic, a tzyal yin̈tl e no', yet' junjn c'aj no tzjuc sb'a a sat lu'um. Caw wach' 'ix yil Dios.
26Xyaln pax Dios 'ixtic: A ticnec qui b'oc 'anma 'icha on̈c tic, sec wach' a tzyac' yajlil 'a yib'n̈ no chay 'ay 'a yojl a mar, 'a yib'n̈ smasnil no ch'ic, 'a yib'n̈ no cajb'en noc', 'a yib'n̈ no calte'al noc', yet' 'a yib'n̈ no tzjuc sb'a 'a sat lum lum tic, xchi.
27Xlajw cha, sb'on Dios 'anma', 'icha wal Dios cha, 'ixta xyutej, sb'o win winac, yet' 'ix 'ix.
28Xya'n Dios syaxilal 'a yib'n̈ eb', xyaln 'a eb' 'ixtic: 'Alj cab' eyunnal, q'uib' cab' e b'isul, b'ut'j cab' 'el sat lum lum tic eyu'uj. 'Oj eyac' yajlil 'a yolyib'n̈q'uinl tic, 'a yib'n̈ no chay 'ay 'a yojl a mar, 'a yib'n̈ no ch'ic tz'ec' jen̈n̈oc, yet' 'a yib'n̈ smasnil no noc' tz'ec' 'a sat lum tic, xchi.
29'Ix yaln pax 'a eb' chawn̈ chi 'ixtic: An tzwac' junjn c'aj te te tic 'ayex, te 'itj 'ay yin̈til, yet' smasnil te te tzyac' sat. A te tze lo'o, yic tz'ec' tiempo eyu'uj. 30Smasnil no cajb'en noc', no calte'al noc', no tzjuc sb'a 'a sat lu'um, yet' no ch'ic, an tzwac' te c'ultc tzlo no' yet' te te' 'ay sat, xchi.
'Ixta x'aji. 31Xyiln 'och Dios smasnil tas 'ix b'o'i, to caw wach' smasnil. 'Ix 'ec' junx 'ac'wal yet' junx c'u, 'ixta x'aj yec' swacl c'ual.
S'ha seleccionat:
Gn 1: CSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Chuj San Sebastian © Sociedades Bíblicas Unidas, 1999.