Lc 7
7
B'oxnc sc'ojl smoso win capitan̈
(Mt 8.5-13)
1Xlajw xoj yaln Jesús 'a eb' 'anma', 'ix 'at 'a Capernaum. 2Ata 'ay jun win capitan̈ 'aj Roma, 'ay jun smoso win caw xajn yu'uj. Palta caw ya'ay, 'ijn wal tzcham muc'uc. 3Ax yic xyab'n win yab'xil Jesús, yuj cha, 'ix schecn cot win jaywn̈ eb' 'ichmtac winc 'ay yopiso 'a scal eb' israel. 'Ix wul tewc 'och eb' 'a Jesús, sec tz'at yac' b'oxc sc'ojl jun smoso win cha. 4Yic xjaw eb', 'ix tew eb' 'a 'a, 'ix yaln eb' 'a 'ixtic:
—A win capitan̈ cha, smoj tzach colwj 'a 'a, 5yujto caw 'ay schamc'ojlal win 'ayn̈ an̈ israel on̈ tic. 'Ix yac' win b'o jun qui capiya on̈, xchi eb' 'a 'a.
6Yuj cha, 'ix 'at Jesús yet' eb', palta yic jab'xoj sc'och eb' 'a yatut win cha, 'ix schecn cot win jaywn̈ eb' swach'c'ojl 'a 'a. Xya'n win yal eb' 'a Jesús 'ixtic: Mamin, man̈ extc a b'a a jaw 'ayin, yujto man̈ in mojc tzach jaw 'a yol watut. 7Yuj wal cha, ma'ix in te'wtzej in b'a in 'at wal 'aych yuj jun in moso tic. Ton̈j cab' tza'cn mandar, ax sb'ox can sc'ojl o'oj. 8Yujto an tic, 'ay eb' wajlil tzin 'a'n mandar. An̈jtona', 'ay pax eb' soldado tzwac' mandar an tic. Toto 'ay mach 'aj tzwala, to tz'ati, tz'atn̈ej. Toto 'ay pax mach 'aj tzwala, to tzcoti, tzcotn̈ej. An̈jtona', toto 'ay tas tzwac' sb'o junc in moso, tzb'on̈ej. Yuj cha, wojtac 'icha tzwutj wa'n mandar eb', 'ixta tzotj a'n pax mandar smasnil tas ach tic, xchi win capitan̈ cha, xchi eb' 'a Jesús.
9Ax yic 'ix yab'n jun tzo'n̈ cha, caw sat sc'ojl yab'ni, yuj cha, 'ix 'och q'ueln 'a eb' ajun xon yet' cha, 'ix yaln 'a eb' 'ixtic:
—Wal yel tzwal 'ayex, mant 'a junc israel tzwil ya'n 'och sc'ojl 'a Dios 'icha jun winc cha, xchi Jesús.
10Ax yic xc'ochx eb' schecb' win 'a yatut cha, xyiln eb', tox 'ix b'ox sc'ojl jun smoso win chi yuj Jesús.
Pitzwnac pax jun win quelem
11Xlajw cha, 'ix 'at Jesús 'a jun chon̈b' Naín sb'i yet' eb' scuywum. Til wal eb' 'anma x'at pax yet'oc. 12Ax yic wan sc'och eb' 'a jun chon̈b' cha, 'ix yiln eb' wan s'at jun xi'lb'a mucxoc yuj eb' 'anma chi ta'. Til wal eb' 'aj chon̈b' chi wan s'at yet'oc. A win xcham cha, yune jun 'ix chamnc yichmil, cojn jun c'otn̈ yune 'ix cha. 13Yic 'ix yiln Cajlil jun 'ix cha, 'ix 'o'ch sc'ojl 'a 'ix, 'ix yaln 'ixtc 'a 'ix:
—Man̈ ach 'oc'oc, xchi.
14Xlajw cha, 'ix c'och 'a stz'ey jun xi'lb'a cha. 'Ix 'och yamn 'a te sb'achte'al yaln̈ win cha. Ax ewin b'achjnac cha, 'ix 'och wan ewinac. Xlajw cha, xyaln Jesús 'ixtc 'a win chamnc cha:
—Ach quelem, an tzwal 'ayach q'uen̈ wa'an, xchi 'a winac.
15Ax win chamnc cha, 'ix q'ue wocnjoc winac. 'Ix syamn 'och win spaxtini. Ax Jesús 'ix 'a'n pax win 'a snun. 16Yic 'ix yiln eb' 'anma chi jun cha, caw 'ix xiw chan̈ eb' smasnil. 'Ix laj yalnc eb' wach' paxti 'ixtc 'a Dios.
—'Ay jun schecb' Dios 'ix checlj 'el 'a qui calc tic, caw niwn yel'chi, xchi eb'.
'Ix laj yalnc pax eb' 'ixtic:
—Caw 'ix jaw Dios colwjoc 'ayn̈ an̈ schon̈b' on̈ec tic, xchi eb'.
17A jun sb'o Jesús cha, c'uxn xpucl yab'xil 'a yol slugar eb' israel yet' 'a jun tzon̈ xo lugar 'a sla'nil cha.
Xit'nc eb' schecb' Juan 'a Jesús
(Mt 11.2-19)
18Ax eb' scuywum Juan Bautista xit' alnc 'a 'a, yuj jantcn̈ej tas 'ix sb'o Jesús. Yuj cha, 'ix yawtn cot Juan chi chawn̈ eb' scuywum cha. 19'Ix schecn cot eb' 'a Jesús yic tzwul sc'anb'oc toto a Jesús chi Cristo, atn jun tan̈b'il xon sjaw yuj eb', mto chuc junc xo tztan̈wj eb' sjawi. 20Yuj cha, 'ix jaw eb' 'a Jesús, 'ix yaln eb' 'ixtc 'a 'a:
—A Juan Bautista on̈ checn cot 'aych on̈, to tzwul yac' qui c'anb'c 'aych on̈, toto ach tan̈b'il xon a jaw cuj on̈, mto chuc junc xo tzqui tan̈wj sjaw on̈, xchi eb' 'a 'a.
21Ax 'a jun rato cha, til wal eb' ya'ay yuj tzann̈j yab'ilal, yet' eb' 'aych demonio 'a 'a, 'ix laj b'ox can sc'ojl eb' yuj Jesús. An̈jtona', niwn pax eb' matz uj yilni, xlaj jacw can pax sat eb' yu'uj. 22Yuj cha, 'ix yaln Jesús 'a eb' schecb' Juan chi 'ixtic:
—Paxn̈ec 'a Juan cha. C'uxn tzeyal 'a 'a, tastc xeyab'i, xeyil 'a tic. Tzeyaln 'a 'a, chajtlto 'ay eb' matz uj xon yilni, tzax stac' yiln eb' ticnec. A eb' coxo, tzax stac' sb'ey eb'. Ax eb' tzlaj c'a yuj lepra, tzlaj b'ox can sc'ojl eb'. 'Ay eb' chacan̈, tzax laj yab' pax eb', 'ay pax eb' chamnac, tzlaj 'ajx pitzwc pax eb'. Ax eb' meb'a', wan yalx wach' 'ab'x yic colnb'il 'a eb'. 23A eb' matz somchj 'el snab'en wu'uj, caw wach' yic eb'. 'Ixta tzeyutj eyaln 'a Juan chi e c'ochi, xchi Jesús 'a eb'.
24Xlajw xoj spax eb', 'ix yaln Jesús 'ixtc 'a eb' 'anma yuj Juan cha:
Nac coti, tas xit' eyiljnac 'a cusltac lu'um. ¿Tom a junc te 'aj tz'ib'x yuj 'ic' xit' eyiljnac? 25¿Tas xit' eyiljnac jun? ¿Tom a junc winc caw wach' yaj yet' spichl xit' eyiljnac? 'In eyojtac a eb' caw wach' yaj yet' spichl cha, yet' eb' til wal tas 'ay 'a 'a, a 'a yol yatut eb' rey ata 'ayc' eb'. 26Toto 'ixta', ¿tas xit' eyiljnac pax jun? ¿Am jun yalmal 'el spaxti Dios xit' eyiljnac? Atn ton jun cha. Palta a Juan cha, man̈ cojnoc yalmal 'el spaxti Dios. 27Atn yab'xil Juan chi yaljnac can Dios 'a Ch'an̈ U'un̈, yic yaln 'ixtic:
'Oj in b'ab'l checc 'at jun in checab', sec a 'oj b'ab'l b'onc a b'e yic mantzac ach c'ochi, xchi.
28An tzwal 'ayex, a 'a scal eb' 'anma 'a yolyib'n̈q'uinl tic, may junc mach 'ec'b'al yel'ch 'a yib'n̈ Juan Bautista cha. Palta ax eb' 'aych 'a yol sc'ab' Dios, wach'xam eb' caw may yel'chi, yel xo wal 'ec'b'al swach'l yic eb' 'a yib'n̈ yic Juan cha.
29A eb' comn 'anma', yet' eb' tecm 'el tumin, yic xyab'n eb' tas 'ix yal Juan, 'ix sch'oxl eb' to caw tojl Dios, yujto xyac' eb' 'ajxc bautisar sb'a yuj Juan cha. 30Palta ax ewin fariseo yet' ewin cuywjum 'a ley yic Moisés, man̈ schajnac ewin 'ajxc bautisar sb'a yu'uj. 'Ixta xyutj ewin sch'oxni, to a tas tznib'j Dios 'a ewinac, may yel'ch 'a sat eb'.
31A wal ax 'anmax 'a jun tiempoal tic, 'oj wal 'ayex tas yaj e nab'en. 32Lajn e nab'en 'icha jun tzo'n̈ 'unn tztajn 'a plas. 'Ay eb' tzaln 'a jun tzo'n̈ xo eb' yit 'unnal 'ixtic: Niwnoc xcob' quixtj qui b'a cutz'n 'amay eyu'uj, palta ma'ix eyac' chan̈al. An̈jtona', niwnoc xcob' qui b'itnoc jun tzo'n̈ b'it caw cusltac yochi, palta ma'ix e tz'ac 'oc' pax e b'a quet' on̈, xchi eb'. 'Icha eb' 'unn ma'ix tajn tic, 'ixta 'ex. 33Yujto a sb'eyb'al Juan Bautista, matz 'och wac 'a 'aj 'ay jun tzo'n̈ q'uin̈. Yuj cha, 'ayx tzeyala to a jun demonio tz'ixtni. 34Xlajw cha, in jaw an 'Ochnc in 'Anmal tic, an xo tic, tzin 'ochn̈j wac 'a 'aj 'ay jun tzo'n̈ q'uin̈. Palta 'ayx tzeyal pax wu'uj: A Jesús cha, cojn wal snib'n wa sb'a, 'u'm 'an̈ paxi, caw swach'c'ojl sb'a yet' eb' tecm 'el tumin, yet' jun tzo'n̈ xo eb' maysch'olnil sb'eyb'al, xe chi wu'uj. 35Palta a eb' 'ay sjelnal Dios 'a 'a, tzcheclj 'el sjelnal eb' chi yuj tastc tzb'o'o, xchi Jesús 'a eb'.
Xit'nc Jesús 'a yatut win Simón
36A 'a jun 'el, 'ay jun win fariseo 'ix 'awtn 'at Jesús wac 'a yatut. Xlajw sc'ochi, 'ix 'em wocn swa yet' win 'a smexa. 37Palta 'ay jun 'ix 'aj chon̈b' cha, caw maysch'olnil sb'eyb'al. 'Ix yab'n 'ix to xc'och Jesús chi wac 'a yatut win fariseo cha. Yuj cha, 'ix c'och 'ix 'a 'a. Yet' 'ix jun q'uen limita alabastro#Lc 7.37 'Ilt nota 'a Mateo 26.7. sb'i, b'ut'n q'uen yet' jun yal su'q'ui sjab'. 38'Ix c'och cumn 'ix 'a stz'ey. 'Ix 'oc' 'ix, sb'icn 'el 'ix yoc Jesús yet' yal sat. Xlajwn̈ej cha, sucn tacjc 'ix yet' xil sjolom. 'Ix stz'ub'n 'elt 'ix yoc Jesús cha. 'Ix stob'n pax 'och 'ix jun su'q'ui sjab' chi 'a 'a. 39Ax yic xyiln win fariseo chi jun cha, snan win 'ixtic: Toto yel schecb' Dios jun winc tic, to 'ixta', xnachj 'el yuj winac, mach jun 'ix tic tzyamn yoc. Xnachj pax 'el am yuj winac, tas yaj 'ix, yujto caw tu sb'eyb'al 'ix, xchi win yet' snab'en. 40'Ix yaln Jesús 'ixtc 'a win fariseo cha:
—Simón, 'ay jab' tzin nib'j tzwal 'ayach, xchi 'a winac.
—Ach in Cuymal, ala tas tza nib'j tzal 'ayin, xchi win 'a 'a.
41'Ix yaln Jesús 'ixtic:
—Q'uinloc 'ay chawn̈oc winc 'ay sb'oc 'a spatron̈. 'Ay junc winac 'aym chab'oc ab'il sb'oc munljel-l 'a spatron̈ cha, ax junc xo, cojn chab'oc 'ujl sb'oc 'a win patron̈ cha. 42Q'uinloc matz tac' xon stupn 'el eb' sb'oc cha, palta ton̈j tz'ec' sb'oc eb' yuj win 'ay yic q'uen tumn cha. Al 'ayin, ¿mach junc eb' yel xo wal tzalj yet' win 'ay yic q'uen tumn cha? xchi 'a winac.
43—A tzin na'a, atn win yel xo niwn yic chi x'ec' yuj winac, a win caw tzalj yet' winac, xchi Simón cha.
—Yel tzala, atn ton winac, xchi Jesús.
44Xlajw cha, 'ix 'och q'ueln Jesús 'a jun 'ix cha, 'ix yaln 'ixtc 'a win Simón cha:
—A yic in jaw 'a yol atut tic, may jac al xac' in c'ana', yic xin b'icn 'el jac woc.#Lc 7.44-46 A yic tzc'och eb' b'eymal 'anma 'a junc n̈a 'a yic pecti cha, tzb'icx 'el yoc eb', tz'ub'x 'elt sti eb', tzsucx 'och aceite 'a eb', yuj sch'oxn 'el eb' 'aj n̈a chi schamc'ojlal. Palta 'ilt jun 'ix tic, 'ix sb'icl woc yet' yal sat. Xlajw cha, 'ix sucn tacjc 'ix yet' xil sjolom. 45Ma'ix a tz'ub' in ti', yic tza ch'oxn a chamc'ojlal 'ayin. Ax jun 'ix tic, yictax in jaw 'a tic, ma'ix 'och wan 'ix stz'ub'n woc tic.
46May jac yan̈l in jolm xac' q'ue'i. Ax jun 'ix tic, 'ix stob'ch 'ix jun yal su'q'ui sjab' 'a woc tic. 47Yuj cha, tzwal 'ayach, caw niwn schamc'ojlal jun 'ix tic, yujto caw niwn smul tz'ajx lajwoc. Palta a mach jab' wal smul tz'ajx lajwoc, jab' wal schamc'ojlal tzch'oxo, xchi 'a winac.
48Xlajw cha, xyaln 'ixtc 'a jun 'ix cha:
—Tic xlajw can a mul, xchi 'a 'ix.
49Ax jun tzo'n̈ xo eb' wocn 'ejm yet' ta', xlaj yal-lanc eb' 'ixtic:
—¿Mach laj wal jun winc tic? 'In tzte'wtzej sb'a ya'n lajwc smul 'ix, xchi eb'.
50Xlajw cha, xyaln Jesús 'ixtc 'a jun 'ix cha:
—Ach colchji, yujto in a'ch 'a a c'ojol. Yuj cha, paxn̈ 'a tzaljc'ojlal, xchi Jesús 'a 'ix.
S'ha seleccionat:
Lc 7: CSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Chuj San Sebastian © Sociedades Bíblicas Unidas, 1999.