San Juan 12
12
Attho poesheñarr koyaneshaꞌpaꞌ aꞌyatkaꞌtosan Jesús eñmosatho
(Mt. 26.6-13; Mr. 14.3-9)
1Oꞌ pechapmatamha oꞌch xhapaꞌmoen pascuapo, Jesúspaꞌ alla xherr Betanio. Allñapaꞌ alloꞌtsen Lázaro ñeñth rromats awaña ñeñth alla tantaterr Jesús. 2Allñapaꞌ all rrallmeꞌchatneñet. Martañapaꞌ ña nenawet rreñets. Lázaroñapaꞌ ña rrets epoet Jesús ñamha poꞌpotantañexhno. 3Allña Maríapaꞌ chetan poemharr eñmosath ñeñth otenet nardo poeseꞌ eꞌñe ñeñthocheꞌ ñeñthñapaꞌ atarr tsaꞌteꞌ. Ñañapaꞌ alloña aꞌyatkaꞌtan Jesús. Eꞌñe ña poeꞌchopaꞌ alloña aꞌporrarraꞌtkër. Ñeñthñapaꞌ ora eñmosathtatan pokollowen. 4Judas Iscariote ñeñth Simón poechemer ñeñthara poeyochreshar ñeñthchaꞌ pomoerreꞌ ñañapaꞌ ateth ot:
5—Esoꞌmartheꞌña añ eñmosathpaꞌ ama xhoyeꞌña yepome, xhochñaxhoꞌ yepomeñpaꞌ yeganañchaꞌ shonteꞌ kelle ñeñth trescientos denario allempopaꞌ yapaꞌyeseñchaꞌ wokchañneshaxhno ñeñth atarr es palltaꞌyetsa.
6Ñapaꞌ ama poellkëñotheyeꞌ wokchañneshaxhnokop ateth oto. Ñapaꞌ tharroꞌmara ateth ot, ñapaꞌ atarrkaꞌye eñeth. Ñapaꞌ eꞌñe ñakma anmampeneꞌ kellayepoꞌr ñeñth allowenakop, ñapaꞌ allothña etenña kelle ñeñth eshaꞌtenet all. 7Tharraña Jesúsñapaꞌ ateth otanet:
—Semnachñakaꞌyeña koyaneshaꞌ ñeñth ateth penen. Ñapaꞌ añekop aññoꞌtennan awathotheñ eñmosath tharrempowa allempoch aꞌyanaꞌterrneterr ñeñthchaꞌ epoet pampaꞌpesnet. 8Tharraña amaꞌtchaꞌ xho pomosaneñ eñmosath alloch es apaꞌyesaneñ wokchañneshaxhno, tharraña xhokmachkaꞌye eñallña wokchañneshaxhno arr patsro. Tharraña nañapaꞌ poꞌñoxhpaꞌ amachkaꞌye alloꞌna sentenno arr patsro.
Allempo oꞌpateñet Lázaro oꞌch alla moetseret
9Shonteꞌ judioneshaꞌ allempo eꞌmareꞌchet oꞌ alla xherr Jesús all Betanio, ñetñapaꞌ waxhaꞌtet. Ama eꞌñe ñapthekpa Jesúsokop waxhaꞌteto oꞌch enteñetaꞌ, añekpaꞌnaña waxhaꞌtet oꞌch enteñetaꞌ ñamha Lázaro ñeñth rromats awaña ñeñth tantaterr Jesús. 10Ñeñthña paꞌmhchaꞌtaretherneshaꞌ pen allowen judioneshaꞌ poꞌkornaneshar ñetñapaꞌ añeꞌna oꞌpatenet Lázaro ñaꞌnach moetset. 11Tharroꞌmar allempo tanterra Lázaro shonteꞌ judioneshaꞌ ñeñth ameꞌñaya Jesús ñeñthoꞌmarña ñetpaꞌ oꞌ kexhpaꞌweretña ñet poꞌkornaneshar.
Allempo xhap Jesús Jerusaléño
(Mt. 21.1-11; Mr. 11.1-11; Lc. 19.28-40)
12Tsapathña shonteꞌ acheñeneshaꞌ ñeñth shontetsa pascuakop Jerusaléño, ñetñapaꞌ eꞌmareꞌteñet Jesús oꞌ xhapmoch ñamha Jerusaléño. 13Ñetñapaꞌ tsorroꞌtyesnomoet shekëpan ñeñth anemyeset allo topanetyesnomoet thoñ allchaꞌ oñmos Jesús. Ñetñapaꞌ poerranareshet awanmoet oꞌch poktet Jesús ñeñthpaꞌ ateth otyesnomoet:
—¡Aksherrapoꞌch alloweney! ¡Ayeꞌchoxhtaterrapoꞌch Jesús ñeñth llesensen Yompor! ¡Ayeꞌchoxhtaterrapoꞌch Jesús ñeñthchaꞌ Paꞌmhchaꞌtarether perr israelneshaꞌ!
14Ñewa, Jesúsñapaꞌ all entnoman patherr ashnathollpaꞌ allentha montaꞌnma allo. Ñeñthpaꞌ añekop ateth pha ñeñth ateth anwareth awathotheñ eꞌñe ñokop, ñeñthñapaꞌ ateth oten:
15Amach xha semhchaꞌtatsto siónoꞌmarneshachaꞌ ñeñtharasa jerusaléñoꞌmarneshas. Sekweꞌthach theꞌchkaꞌyeña waponasaña ñeñthchaꞌ Saꞌmhchaꞌtarether seperr. Ñapaꞌ añakaꞌye montaꞌnena ashen rreꞌptorechor.
16Ñewa, ñeñth ñoñets allempoña poeyochreshaꞌpaꞌ ama xhapaneto poeyoxhreto. Tharraña tsapathonethña allempo rroma Jesús, oꞌ alla tanterra alla awerr poeꞌntaño all atarr kowentatapoer Pompor, ñetñapaꞌ allempaña xherranetña poeyoxhreto theꞌña poꞌñoxhpaꞌ oꞌkaꞌye etsoterra eꞌñe ateth anwareth ñokop amaꞌt awathotheñ.
17Acheñeneshaꞌ ñeñth alloꞌtsaꞌyen allempo xhoreꞌtenan Lázaroñ poepamproth attho tantater, ñetñapaꞌ ñeñtha aꞌpothayeset. 18Ñeñthoꞌmareꞌnaña awanmaña shonteꞌ acheñeneshaꞌ oꞌch poktet tharroꞌmar ñetpaꞌ oꞌ eꞌmareꞌchet ñamet ñapaꞌ orrtatenanet poꞌpartsoña. 19Allempoña fariseoneshaꞌpaꞌ ateth otannaꞌtyeset:
—Señchtheꞌkaꞌyeꞌm yapaꞌ amatheꞌ erroth es yepho amaꞌt koñeꞌtha. Sekweꞌ shonteꞌkaꞌye ñamha acheñeneshaꞌ errapharenoth oꞌ eꞌñe kothaꞌwanmet.
Allempo griegoneshaꞌpaꞌ moeneñet oꞌch eñchet Jesús
20Patantaꞌtets griegoneshaꞌpaꞌ awanmoet ñamet oꞌch koshapretenetaꞌ pascua; ñetpaꞌ añekop awanmoet oꞌch konkorposet all. 21Ñetñapaꞌ ponmosyet Felipe ñeñth betsaidoꞌmarneshaꞌ ñeñthara galileoꞌmarneshaꞌ. Ñeñthñapaꞌ ateth otoset:
—Nomporchaꞌ yapaꞌ añkaꞌye yemnen oꞌch yeserrpareꞌtos epay Jesús.
22Felipeñapaꞌ allentha otenanaꞌ Andrés. Ñetña eꞌñe epsheñoꞌmaretpaꞌ awanmoet oꞌch oteñetaꞌ Jesús. 23Jesúsñapaꞌ ateth otapanet:
—Theꞌña poꞌñoxhpaꞌ oꞌ etsoterra allempoch na Ñeñthen Acheñetosetspaꞌ oꞌch alla kowentaterren Nompor. 24Ñeñthpaꞌ eꞌñech poꞌñoxh ateth netmaꞌntatasa ateth pena poerets. Amaꞌt erraꞌtsena poertsor ama xho pampallmeꞌcho patso allchaꞌ poetsowa paꞌtall ñeñthach pathrrara poeꞌllomer. Tharraña ñerraꞌm xho pampallmeꞌcha patso allchaꞌ poetsaꞌ paꞌtall atthochña chop. Amaꞌt poellmharra pampallmeꞌchatsa atarrchaꞌ aton ellomhreꞌterr. Ñeñthpaꞌ añ notenes eꞌñe pokteꞌ oꞌch nerroma na ñeñthen poesheñarrana atthochña shonterra ñeñthchaꞌ nameꞌñerraya. 25Ñeñthoꞌmarña notenes: Ñeñth atarr morrentenaya attho koshena arr patsro, ama pokteyeꞌ entenano oꞌch es sowanom Yomporekop, ñeñthña pokrreña atarr morrentena, ñeñth ateth petsapaꞌ xhach aꞌchenkatena eꞌñe ñañeña. Tharraña ñeñth ama morrentenaye attho koshena arr patsro, eꞌñe pokteꞌ enteñ oꞌch es sowanom Yomporekop amaꞌt pokrreñowen, ñeñth ateth petsa ñetñapaꞌ korretsetach poksheñeshokmañen thayotheñ eꞌñe errponañowen. 26Ñerraꞌm eseshaꞌ moenats oꞌch thorrenet nokop, kothaꞌnetepaꞌ atthochña eꞌñe neyochreshaꞌ neperranet. Tharroꞌmar ñerraꞌm erroꞌtsenenchaꞌ na ñeñth thorretsa nokop ñetpaꞌxhoꞌña alloꞌtsenetchaꞌ ñamet. Eꞌñe allowen erraꞌtsenchaꞌ thorrerrtsa nokop, Nomporñapaꞌ atarrchaꞌ kowentaterranet.
Allempo Jesús eñotatanet ñapaꞌ xhoch moetseret
27‘Theꞌ na neyoxhropaꞌ xha atarr nellkëna. Tharraña amaꞌt attheñpaꞌ Nomporña napaꞌ amach xha notatsche amach moenatano oꞌch wapona ñeñth atarr amoeroxhtatañ nenten. Ñeñth atethpaꞌ amach notatsche tharroꞌmarña napaꞌ ñeñthekopkaꞌyeña nowapa nach amoeroxhtatarethterrtsa. Añchaꞌña noch Nompor:
28—Theꞌpaꞌ pepaꞌchña Apa ayeꞌchoxhtatarethterrtsa.
Allempoñapaꞌ xha eꞌmorrtatsa ñoñets entoth, Yomporñapaꞌ ateth ot:
—Napaꞌ oꞌ nekowentatwa, elloña oꞌch alla nekowentaterrerr nañeña.
29Shonteꞌ acheñeneshaꞌ ñeñth thomxhets all, ñetña ateth eꞌmoeñetpaꞌ ateth otyeset:
—Xhotheꞌkaꞌye thekorena.
Poꞌpotantaññapaꞌ ateth otyeset:
—Añkaꞌye eñoranaꞌtenaya Yompor poꞌmhllañotheñer.
30Jesúsñapaꞌ ateth oterraneterr:
—Ama nokpayeꞌ wenoña añ ñoñets. Ñeñthpaꞌ eꞌñe sokop wena. 31Theꞌpaꞌ oꞌ anarethta allowen acheñeneshaꞌ arr patsro ñeñth ama nameꞌñenaye ñetpaꞌ amñarethterretchaꞌ koñcheñtso. Ñamha oneñeth ñeñth paꞌmhchaꞌtarether pen acheñeneshaꞌ arr patsro, theꞌ ñokoppaꞌ oꞌ anarethta awaporeꞌtarethterrach esempowañen. 32Na ñerraꞌm esempoch echantamperrnet korsocho allempoña napaꞌ nexhoreꞌterchaꞌ allowen paꞌnamen acheñ atthoch ameꞌñerrnet.
33Ñapaꞌ añekopña eñoranaꞌtenanet atthoch eñotatanet ñapaꞌ korsochoch rromoerr. 34Acheñeneshaꞌñapaꞌ ateth otyeset:
—Yapaꞌ yeñoteñ añ ñoñets ñeñth ateth anareth awathotheñ, ñeñthpaꞌ ateth oten ñeñthchaꞌ Cristoterrets ñapaꞌ ama arromñatheshayaye amaꞌt errponaña. Taꞌ, ¿esoꞌmartheꞌ phañapaꞌ photen ñeñtheph oꞌ Acheñetosetspaꞌ echantamphsarethephoꞌch korsocho allchaꞌ perromoerr? Taꞌ, ¿eseshaꞌtheꞌña ñeñth poꞌñoxh Acheñetosets? amapaꞌ ¿ñeñtharatheꞌ ñeñthchaꞌ Cristoterrets?
35Jesúsñapaꞌ ateth oterraneterr:
—Mameshamha palltena arroꞌtsenmeñen na ñeñthen aꞌpoetarsamphsañtetsa. Sokthapeꞌcherrnan eꞌñe thayekma neñoñ thayepaꞌtña arroꞌtsenmeñen ñeñthenchaꞌ aꞌpoetarsamperreꞌ sokthaphña allochñapaꞌ atthoch amach xha sechenkaꞌwerro. Poꞌñoxh ñeñth ama ameꞌñetso ñetpaꞌ ama eñoteñeto atthoch chenkaꞌwerret. Ñeñthoꞌmarña ñetpaꞌ eꞌñe ateth penet ñerraꞌmrratheꞌ chekmeta chopeꞌchenet ama eñoteñeto errenethchaꞌ tet. 36Na ñeñthen saꞌpoetarsampeneꞌ sokthaphñapaꞌ theꞌpaꞌ arroꞌtsenmeñen. Sokthapeꞌcherrnan neñoñ thayepaꞌtñapaꞌ arroꞌtsenmeñen. Allochñapaꞌ oꞌch seyexhkërra sa acheñres ñeñtheschaꞌ atarr kowen orrtatyerreꞌ ñeñth kowen enten Yompor tharroꞌmar sapaꞌ eꞌñech poetaro sokrrena.
Otwa Jesús atethpaꞌ awerr aꞌnawa; acheñeneshaꞌñapaꞌ ama eñocheto erratheꞌ awerr.
Attho judioneshaꞌpaꞌ ama ameꞌñyeto Jesús ñeñthpaꞌ añ etsoterrtsa ñoñets ñeñth anarethet ñokpoet
37Jesúspaꞌ amaꞌt shonteꞌ orrtatyenanet poꞌpartsoña tharraña amaña eseshayeꞌ ameꞌñenayoña ña. 38Ñeñthpaꞌ atthokaꞌyeña etsotaña Isaías poꞌñoñ ñeñth aꞌmhtayeꞌth awath Yompor poꞌñoñ. Ñeñthpaꞌ ateth oteꞌth ñokop:
Amach, Nomporchaꞌ, eseshayeꞌ yameꞌñayo ñeñthchaꞌ ateth yeserrpareꞌt. Ama, Nomporchaꞌ, eseshayeꞌ poktenaye pha pewamenk.
39Ñeñthoꞌmarña amatheꞌ errothenoth ameꞌñeto. Tharroꞌmar elloneth Isaíaspaꞌ ateth oteꞌth:
40Eꞌñe pathpareꞌteñothet Yomporñapaꞌ moenatanet oꞌch echarrtet poeyoxhret. Atthochña ñetpaꞌ xhach ottenet ñerraꞌm aporoꞌyethet ñeñth ama es enteno. Ñeñthoꞌmarña ama moenatenaneto oꞌch es entet thayeꞌtoꞌtheꞌ xhapanet poeyoxhreto. Ñeñthoꞌmarña amaꞌt mameshapaꞌ amach es kothapeꞌcheneto nokop atthoch naꞌkeshphaterranetañ.
41Isaíaspaꞌ tharroꞌmar ateth oteꞌth ñapaꞌ eꞌñe entaneꞌth Cristo poꞌkowenña ñeñthoꞌmarña eñoseꞌthña ñokop.
42Tharraña shonteꞌ acheñeneshaꞌ ñeñth ameꞌñaya Jesús amaꞌt ñamha amhchaꞌtarethexhno. Tharraña ñetpaꞌ mechaꞌcheteꞌth fariseoneshaꞌ ñeñthoꞌmarña ama aꞌmetheteꞌthe. Añ mechaꞌtenet thayeꞌtoꞌtheꞌ moeñoꞌtanet judioneshaꞌ poꞌprawoth. 43Tharroꞌmar ñeñth ameꞌñetsañ ñetpaꞌ añeꞌna moenenet oꞌch eꞌñe kowen entenanet acheñeneshaꞌ. Ama añeyeꞌña moeneneto oꞌch eꞌñe kowen entanet Parets.
Attho Jesús poꞌñoñ ñeñthchaꞌña otteñeꞌcherreꞌ acheñeneshaꞌ esempowañen
44Jesúsña rranapaꞌ ateth oterrerr:
—Ñerraꞌm eseshaꞌ nameꞌñenaya na, ama napthayeꞌ ameꞌñenneto. Añeꞌnaña ameꞌñenet Nompor ñeñth nellsenseneꞌ. 45Eseshaꞌ nenteneꞌ napaꞌ añeꞌnaña entenet ñamha Nompor ñeñth nellsenseneꞌ. 46Napaꞌ añekopña nowapa arr patsro nach aꞌpoetarsampeneꞌ acheñeneshaꞌ pokthaphña, allochñapaꞌ ñerraꞌm eseshaꞌch nameꞌñaya na amach alloꞌtsenareto chekmeto. Ñeñth chekmetoꞌtsena ñetpaꞌ ama eñoteñeto ñeñth kowen enten Yompor. 47Ñerraꞌm eseshaꞌ eꞌmoeꞌ neñoñ tharraña amaꞌt ama ameꞌñerrnaneto neñoñ, napaꞌ amach nayeꞌ moeñenaweto koñcheñtso. Tharroꞌmar napaꞌ ama añekpayeꞌ nowapo arr patsro atthoch nemños acheñeneshaꞌ koñcheñtso. Napaꞌ añekopña nowapa oꞌch naꞌkeshphatos acheñeneshaꞌ arr patsro. 48Eseshaꞌchña nachmeneꞌ ñeñthchaꞌ ama ameꞌñerraye neñoñ, ñokpoetñapaꞌ eñall atthoch amñarethterret koñcheñtso. Ñeñthara añ ñoñets ñeñth neñen na theꞌpaꞌ ñeñthchaꞌña moeñaterrawetña koñcheñtso esempowañen. 49Tharroꞌmar napaꞌ ama eꞌñe nothayeꞌ neñeno. Apaña ñeñth nellsenseneꞌ ñapaꞌ ñaña noteneꞌ atethchaꞌ notas ñamha atethchaꞌ neꞌñoranaꞌtasa. 50Napaꞌ neñoteñ ñeñth ateth otenen ña ñeñthpaꞌ ñeñthchaꞌña allochña sapaꞌ korretsasach soksheñeshokmañen thayotheñ eꞌñe errponañowen. Ñeñth ateth neñen napaꞌ añkaꞌye neñen ñeñth ateth otenen Apa.
S'ha seleccionat:
San Juan 12: ame
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. All rights reserved.