Juan 11
11
Rukamik ri Lázaro
1K'o k'u jun achi yewa', Lázaro rub'i'. Rire aj Betania, y chila' ejeqel wi ri ranab' María y Marta. 2Wa' wa María e ri xuq'ej kunab'al lik ki' ruxlab' che ri raqan ri Jesús y xuchaqisaj ruk' ruwi'.#Jn. 12:1-8 3Ek'u ri keb' ixoqib' kichaq' kib' jewa' xkitaq ub'i'xikil che ri Jesús: «Qajawal, ri jun lik k'ax kana' la, lik yewa'.»
4Echiri' ri Jesús xuta wa', jewa' xub'i'ij: «Wa' wa yab'il na re ta kamik, ma re yakb'al uq'ij ri Dios y re yakb'al uq'ij Ruk'ajol ri Dios» xcha'.
5Ek'u ri Jesús lik k'ax keb'una' ri oxib' kichaq' kib': Ri Marta, ri María y ri Lázaro. 6Na ruk' ta k'u ri', echiri' xuto yewa' ri Lázaro, k'a xkanaj chi kan keb' q'ij pa ri luwar pa k'o wi. 7Tek'uchiri', xub'i'ij chike rutijo'n:
—Jo' tanchi Judea —xcha'.
8Ek'u rutijo'n xkib'i'ij che:
—Lal tijonel, ¿na k'ak' ta neb'a la' raj judi'ab' ya laj xkikamisaj la pa'b'aj? Na ruk' ta k'u ri', ¿wo'ora ke'ek tanchi la chila'? —xecha'.
9Ri Jesús xub'i'ij chike:
—¿Na qatzij ta neb'a la' kab'lajuj ora k'o che ri jun q'ij? Yey e junoq kab'in paq'ij na kuchiq ta ri raqan, ma karil rub'e ruma ri q'ijsaq re ruwachulew. 10No'j we junoq kab'in chaq'ab', ri' kuchiq ri raqan ma pa q'equ'm k'o wi —xcha'.
11Tek'uchiri', xub'i'ij chike:
—E ri qamigo Lázaro, kawarik. Kin'ek k'u che uk'osoxik —xcha'.
12Xkib'i'ij k'u rutijo'n che:
—Qajawal, utz we kawarik, ma ri' e k'utub'al re kutzir uwach —xecha'. 13Ri xkich'ob' rike e xa kuxlan ri Lázaro; no'j ri Jesús e kach'a't puwi rukamik ri Lázaro.
14E uwari'che ri Jesús xuq'alajisaj chike:
—Ri Lázaro kaminaq chik. 15Yey iwuma k'u ri'ix, lik kinki'kotik ri na in jinta chila' ruk' echiri' xkamik, ma jela' kanimar ri kub'ulib'al ik'u'x wuk'. Wo'ora jo', je'qila' —xcha'.
16Ek'uchiri', ri Tomás ri kab'i'x “Yo'x” che, xub'i'ij chike ri jujun chik rachb'i'il:
—Koj'ek ri' cha' jela' kojkam junam ruk' ri Jesús —xcha'.
Ri Jesús e ri kak'astajisan lo ke ri ekaminaq
17Kajib' q'ij chi lo ri' muqutal ri Lázaro echiri' ri Jesús xopon Betania. 18Wa' xa chunaqaj Jerusalem k'o wi, laj oxib' kilómetro k'o wi lo che. 19E k'i chike raj judi'ab' e petinaq kuk' ri María y ri Marta re ko'lkib'ochi'ij kik'u'x ruma rukamik ri kixib'al. 20Ek'uchiri' ri Marta xuto katajin roponik ri Jesús, xel b'i che uk'ulik; no'j ri María xkanaj kan chwa ja.
21Ek'u ri Marta xub'i'ij che ri Jesús:
—Wajawal, we ta e la' k'o la wara, na kakam ta ri' ri nuxib'al. 22Na ruk' ta k'u ri', lik weta'am, tob' ne k'a e wa', ri Dios kuya che'la ronoje ri katz'onoj la che —xcha'.
23Ri Jesús xub'i'ij che:
—Raxib'al kak'astaj lo chikixo'l ri ekaminaq —xcha'.
24Ri Marta xub'i'ij che:
—Qatzij, ri'in weta'am kak'astaj lo che ri k'isb'al q'ij re ruwachulew echiri' kek'astaj lo konoje ri ekaminaq —xcha'.
25Ri Jesús xub'i'ij che:
—E ri'in ri kink'astajisan lo ke ri ekaminaq yey e ri'in ri kinya'w k'aslemal. China k'u ri kakub'i' uk'u'x wuk', tob' kakamik, kak'astajik. 26Yey konoje ri e k'aslik y kakub'i' kik'u'x wuk', na kekam taj ma k'o kik'aslemal na jinta utaqexik ruk' ri Dios. ¿Kakoj ri'at wa'? —xcha'.
27Ri Marta xuk'ul uwach:
—Kankojo, Wajawal, ma ri'in nukojom rilal lal ri Cristo, Ruk'ajol ri Dios, ri b'i'tisim loq kak'un che ruwachulew —xcha'.
Ri Jesús koq' chwa rumuqub'al ri Lázaro
28Echiri' ri Marta xuk'is ub'i'xik wa', xe'ek che usik'ixik ruchaq' María y xew che rire xub'i'ij:
—Ri Qajawal k'o wara y katusik'ij —xcha'.
29Xew xuta wa' ri María, na jampatana xyaktaj b'i y xe'rila ri Jesús. 30Ri Jesús k'amaja' ne kok pa ri tinamit, ma k'a k'o pa ri luwar pa xk'ul wi ruma ri Marta.
31Ek'u raj judi'ab' e k'o ruk' ri María re kakib'ochi'ij uk'u'x, xkilo echiri' na jampatana xyaktajik y kanik xel b'i. Rike xeterej k'u b'i chirij, ma e chikiwach rike e ri' ke'ek chwa ri muqub'al cha' ke'roq'ej ruxib'al.
32Echiri' ri María xopon pa k'o wi ri Jesús, xew xril uwach, xuxuk rib' chwach, y jewa' xub'i'ij che:
—Wajawal, we ta e la' lal k'o la wara, na kakam ta ri' ri nuxib'al —xcha'.
33Ri Jesús echiri' xrilo lik keb'oq' ri María y raj judi'ab' eteran lo chirij, lik xok chuk'u'x y xuchap b'is. 34Xub'i'ij k'u chike:
—¿Pa ximuq wi? —xcha'.
Rike xkib'i'ij:
—Qajawal, peta la y chilape la —xecha'.
35Ek'u ri Jesús xoq'ik.
36Xkib'i'ij k'u raj judi'ab':
—¡Chilape alaq, lik k'ax kuna'o! —xecha'.
37E k'o jujun chike raj judi'ab' xkib'i'ij:
—Wa wa'chi e xtzu'nisan re ri jun potz'. ¿Su'b'e k'u ri' na jinta xu'ano cha' na kakam ta ri Lázaro? —xecha'.
Ri Jesús kuk'astajisaj lo ri Lázaro chikixo'l ri ekaminaq
38Ri Jesús lik xok tanchi b'is chuk'u'x, xqib' chwa ri muqub'al. Wa' jun jul worotal pa'b'aj y tz'apal uchi' ruk' jun ab'aj. 39Ek'u ri Jesús xub'i'ij:
—Chiwesaj la'b'aj —xcha'.
Yey ri Marta, ri ranab' kan ri kaminaq, xub'i'ij che:
—Wajawal, la' lik chu chik, ma e ukaj q'ij wa' muqutalik —xcha'.
40Ri Jesús xub'i'ij che:
—¿Na nub'i'im ta neb'a chawe, we kakub'i' ak'u'x wuk', kawil runimal uwach uq'ij ri Dios? —xcha'.
41Ewi xkesaj rab'aj k'o chuchi' ri muqub'al.
Ek'uchiri', ri Jesús xtzu'n chikaj y xub'i'ij:
—Lal Nuqaw, maltiox ko che'la ma intom chi la. 42Ri'in weta'am lik xaqi kinta la, pero kamb'i'ij k'u wa' kuma wu'k'iyal tikawex e k'o wara, cha' rike kakikojo lal taqayom lo we —xcha'.
43Echiri' xuk'is ub'i'xikil wa', lik ko xsik'in che ub'i'xikil:
—¡Lázaro, chateluloq! —xcha'.
44Ewi ri Lázaro xel loq, b'olq'otim ri raqan y ruq'ab' pa k'ul yey rupalaj ch'uqutal ruk' jun k'ul. Ruma k'u la', ri Jesús xub'i'ij chike:
—Chikira ri k'ul k'o che cha' utz ke'ek —xcha'.
Ri e aj wach re ri tinamit kaki'an tzij chikiwach cha' kakikamisaj ri Jesús
(Mt. 26:1-5; Mr. 14:1-2; Lc. 22:1-2)
45E k'i k'u chike raj judi'ab', ri e petinaq che ub'ochi'ixik uk'u'x ri María, echiri' xkil ri xu'an ri Jesús, xkikub'a' kik'u'x ruk'. 46No'j e k'o jujun chike xeb'ek kuk' ri fariseos, y xe'kitzijoj chike ri xu'an ri Jesús.
47Ek'u ri nimaq e aj chakunel pa Rocho Dios y ri fariseos xkimol kib' kuk' jujun chik chike ri e aj q'atal tzij y jewa' xkib'i'ij:
—¿Sa' ri kaqa'ano? Ma wa'chi lik uk'iyal k'utub'al re ruchuq'ab' ku'ano. 48We na kaqaq'atej taj, konoje kakub'i' kik'u'x ruk' y kek'un k'u lo ri' raj wach re Roma cha' ko'lkiwulij wa Luwar pa kaqaloq'nimaj wi ri Dios y wa qatinamit —xecha'.
49Ek'uchiri' ri Caifás, ri kajawal raj chakunel pa Rocho Dios che la' la junab', jewa' xub'i'ij chike:
—Ralaq na jinta eta'am alaq. 50Na kach'ob' ta alaq raqan chi utz, ma e más utz we xa jun chi achi kakam puk'axel ri tinamit chwa ri kasach kiwach konoje ri qatinamit —xcha'.
51Ri Caifás na xa ta pa re rire xub'i'ij wa'. Ma ruma e kajawal raj chakunel pa Rocho Dios che la' la junab', ri Dios xuya che kuq'alajisaj e kakam ri Jesús pakik'axel konoje ri tinamit e aj judi'ab'. 52Y na xew ta kuma ri tinamit Israel xkam ri Jesús, ma xkamik cha' ku'an xa jun chike konoje ri e ralk'o'al ri Dios ekicherinaq b'i che ruwachulew.
53Ek'u raj judi'ab' chwi la' la q'ij wi xki'an tzij chikiwach cha' kakikamisaj ri Jesús. 54Ruma k'u wa', ri Jesús na xb'in ta chi chikixo'l chiwachil. Ewi xel b'i pa ri luwar re Judea y xe'ek chunaqaj ri luwar katz'intz'otik, pa jun tinamit Efraín rub'i'. Chiri' xkanaj kan wi junam kuk' rutijo'n.
55Xa naqaj chi k'o wi lo ri Pascua, wa' e kinimaq'ij raj judi'ab'. Uk'iyal winaq re taq ri tinamit xepaqi' Jerusalem re kaki'an ri kijosq'ikil chwach ri Dios,#11:55 Chupa ri Tzij Pixab' tz'ib'ital kan ruma ri Moisés kub'i'ij sa' taq ri kajawaxik kaki'an ri tikawex we xkich'ulaj kib' o we k'o xkichapo lik ch'ul y ruk' wa' na utz taj kaki'an juna nimaq'ij chwach ri Dios. Chirajawaxik k'u ri' nab'e na kaki'an ri kijosq'ikil chwach ri Dios. Lv. 7:21; Nm. 9:1-13 y 2 Cr. 30:17-18 cha' jela' taqal chike kaki'an ri nimaq'ij Pascua. 56E taq k'u ri winaq ketajin che utzukuxik ri Jesús, yey echiri' e k'o pa ri Rocho Dios, kakitz'onob'ej chikiwach: «¿Sa' nawi kich'ob' ri'ix? ¿Kak'un nawi pa wa nimaq'ij?» kecha'.
57Yey ri fariseos kuk' ri nimaq e aj chakunel pa Rocho Dios etaqaninaq che we k'o junoq kareta'maj pa k'o wi ri Jesús, chub'i'ij cha' ke'kichapa uloq.
S'ha seleccionat:
Juan 11: acrN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2009, Wycliffe Bible Translators, Inc. All rights reserved.