Juan 21
21
Ri Jesús kuk'ut uwach chikiwach wuqub' chike rutijo'n
1Tek'uchiri' ri Jesús xuk'ut tanchi rib' chikiwach rutijo'n chuchi' ri mar re Tiberias. Jewa' xu'ano: 2Junam e k'o ri Simón Pedro, ri Tomás ri kakib'i'ij “Yo'x” che, ri Natanael ri aj Caná re Galilea, ri keb' uk'ajol ri Zebedeo y ka'ib' chik chike rutijo'n ri Jesús. 3Ek'u ri Simón Pedro xub'i'ij chike:
—Kin'ek pa chapoj kar —xcha'.
Rike xkib'i'ij che:
—Koj'ek ri' awuk' —xecha'.
Xeb'ek k'ut y xeb'ok b'i chupa jun barco, pero la' la'q'ab' wi na jinta k'ana kar xkichapo.
4Echiri' katajin usaqirik, rutijo'n xkil jun achi tak'al chuchi' ri mar, pero na xketa'maj taj we e ri Jesús. 5Xub'i'ij k'u ri Jesús chike:
—Ix walk'o'al, ¿na jinta kar ichapom? —xcha'.
Rike xkik'ul pan uwach:
—Na jintaj —xecha'.
6Xub'i'ij k'u ri Jesús chike:
—Chilik'ij li'atarraya puwikiq'ab' ri barco y chiwilape' ma keb'iwesaj lo kar —xcha'.
Rike e xki'ano yey na kakich'ij ta chi k'u lo resaxik ri' ri ki atarraya pa ri ya' ruma ruk'iyal kar e k'o chupa.
7Ek'u ri jun tijo'n lik k'ax kana' ruma ri Jesús, xub'i'ij che ri Pedro:
—¡E Qanimajawal! —xcha'.
Ri Simón Pedro xew xuto e ri Jesús, xukojola' ruq'u' resam y xuk'aq b'i rib' pa ri ya'. 8Yey ri jujun chik tijo'n xek'un ruk' ri barco chuchi' ri mar, kicharem ri ki atarraya nojinaq che kar, ma laj xa cien metros e k'o wi che ruchi' ri ya'.
9Echiri' xeqaj lo chu'lew, k'ate xkilo nuk'utal jun aq', y puwi ri rachaq'a'l k'o jun kar y k'o pam chiri'.
10Xub'i'ij k'u ri Jesús chike:
—Chik'ama lo jujun chike ri kar, ri k'a e la' xeb'ichap loq —xcha'.
11Ri Simón Pedro xok pa ri barco y xucharej b'i k'a chuchi' ri mar ri atarraya nojinaq che nimaq taq kar, ma e ciento cincuenta y tres ri kar e k'o chupa. Tob' lik e k'i ri kar, na xraqaro'b' ta ri atarraya.
12Ek'uchiri', xub'i'ij ri Jesús:
—Chixpetoq, chixwo'qoq —xcha chike.
Na jinta k'u junoq chike rutijo'n xraj kutz'onoj che china Rire, ma keta'am e ri Qanimajawal.
13Ek'uchiri', ri Jesús xuk'am ri pam y xuya chike, y jela' xu'an ruk' ri kar.
14E urox laj wa' xuk'ut uwach ri Jesús chikiwach rutijo'n chwi lo ruk'astajib'al chikixo'l ri ekaminaq.
Ri Jesús kach'a't ruk' ri Simón Pedro
15Echiri' xkik'is utijik ri kiwa, ri Jesús xutz'onoj che ri Simón Pedro:
—Simón, at uk'ajol ri Jonás, ¿más nawi k'ax kinana' ri'at chwa ri k'axna'b'al we kaki'an wa jujun chik? —xcha'.
Ri Pedro xuk'ul uwach:
—Wajawal, rilal eta'am la k'o rutzil nuk'u'x che'la —xcha'.
Ri Jesús xub'i'ij che:
—Cheb'atzuqu k'u ri' ri raltaq ko nub'exex —xcha'.
16Xutz'onoj chukalaj:
—Simón, at uk'ajol ri Jonás, ¿lik k'ax kinana' ruk' ronoje ak'u'x? —xcha'.
Ri Pedro xuk'ul uwach:
—Wajawal, rilal eta'am la k'o rutzil nuk'u'x che'la —xcha'.
Xub'i'ij tanchi k'u ri Jesús che:
—Cheb'achajij k'u ri' ri nub'exex —xcha'.
17Xutz'onoj churox laj:
—Simón, at uk'ajol ri Jonás, ¿qatzij k'o rutzil ak'u'x chwe? —xcha'.
Ri Pedro lik xuchap b'is ruma e urox laj ri' xtz'onox che. Xub'i'ij k'u ri':
—Wajawal, rilal eta'am la ronoje, eta'am k'u la ri'in k'o rutzil nuk'u'x che'la —xcha che.
Xub'i'ij k'u ri Jesús che:
—Cheb'atzuqu k'u ri' ri nub'exex. 18Paqatzij wi kamb'i'ij chawe: Echiri' at ala, ri'at atukel kaxim rapas y kate'ek pa kawaj wi kate'ek. No'j echiri' katu'ana nimalaj winaq, kayak la'q'ab' y jun chik kaximow rapas y katuk'am b'i pa na kawaj ta wi kate'ek —xcha'.
19Ri Jesús xub'i'ij wa' cha' kuq'alajisaj sa' rukamik ri Pedro ka'anik re yakb'al uq'ij ri Dios. Tek'uchiri', xub'i'ij che:
—¡Chat-tereja lo chwij! —xcha'.
20Echiri' xtzu'n ri Pedro chirij, xrilo chikij teran lo ri jun tijo'n lik k'ax kana' ruma ri Jesús, wa' e ri xja'i' putzal ri Jesús pa ri jun wa'im echiri' xutz'onoj che: «Wajawal, ¿China ri kak'ayin e la?»#Jn. 13:25 21Ek'u ri Pedro echiri' xril ri jun chik tijo'n, xutz'onoj che ri Jesús:
—Wajawal, yey rire, ¿sa' ri kuk'ulumaj? —xcha'.
22Ri Jesús xuk'ul uwach:
—¿Su'chak katz'onoj? We kuaj ri'in k'a k'as rire echiri' kink'un tanchik, na jinta awe che. Ri'at chat-tereja lo chwij —xcha'.
23Ruma k'u wa xub'i'ij ri Jesús, xe'ek utzijoxik chikixo'l ri kikojom rub'i' ri Cristo: «La' la jun utijo'n na kakam taj.» Pero ri Jesús na xub'i'ij ta che we na kakam taj, ma xew xub'i'ij wa': «¿Su'chak katz'onoj? We kuaj ri'in k'a k'as rire echiri' kink'un tanchik, na jinta awe che.»
24Ek'u wa' wa jun tijo'n e ri kajikib'an uwach taq wa' y e xtz'ib'an wa'. Yey ri'oj qeta'am k'ut lik qatzij ronoje wa tz'ib'italik.
25Lik k'o uk'iyal chak xu'an ri Jesús tob' na ronoje ta wa' tz'ib'ital kan chupa wa libro. Yey we ta e la' katz'ib'ax ronoje taq ri xu'ano, ri'in kanch'ob' raqan na kok tane che ruwachulew taq ri wuj pa katz'ib'ax wi. Amén.
S'ha seleccionat:
Juan 21: acrN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2009, Wycliffe Bible Translators, Inc. All rights reserved.