Matiyew Me key ka’ar ɗaf ma guma
Me key ka’ar ɗaf ma guma
Ka Matiyew da Mey Hayna Wayna a wuɗey ma tsatar guma na a kretiyeŋ na Zuif ahiya na hay. Taya na, a səradəmata ɗeriwel gurəma na hay tabiya ha. Matiyew a ɓadatara Yezu na andza ndaw ana ma ndaslada tek ma ɗeriwel ana ma tsəmawa kava na hay. A sləfata na zarra. Andza Matiyew ma windərawa ɗeriwel aŋga neney na, kretiyeŋ na Zuif ahiya na hay na, ka ɓələmatərawa ba da ’ay ma ɗuley mey ma Zuif hay.
Da kominite ata na na, ma ta na, a ŋgələmata ndaw na Zuif ahiya kakay ana hay tiyata. Ka Matiyew na, Yezu na Miter ana ma tsey guma ta mazlaɓ aha na, ka tek ma Bay ma Bəla me tsəhey ka ndaw ma pey ’ar ana hay. Miter ana ma ŋga, a ɓey na ndaraw waya ha ma tsənada mewey ana ma sawa da ɗeriwel gurəma na hay. Yezu ana satsa na, Ndaw na ma vahara ’ar ana, na Zuif hay ma hutam ana. Da me tsey aŋga ka slala ma ’ərlem na, a ɓada tek a neney: Bay’ərlam na bay ɗuhwa na, bay ŋga na a ɓey aha vaw zla ekəɗey ka dala.
Mey Hayna Wayna ka Matiyew na, ma ka ha a səpey na me key ta na asləta da ɗeriwel na makar tsəfəmey ana hay.
Da huɗa ma ka ha na, Matiyew ma dzəmadata bəzay ma guma ma Yezu hay da bəzay guma ŋga me təkərey ana hay dey zlam:
Guma ŋga me təkərey da lamba ɗuhwa na 5 kasl ka 7 na na, dakay na guma ŋga me təkərey ka ’ar ma mamba na, a ɓey na metsekesley ma mendzey ma gawla ma Yezu hay. Ka masləta ha a nəkey dey satsa na, ka me dzəmey vaw ma ndaw hay ta me dzəmey vaw ta Bay ma Bəla.
Da me təkərey ma guma ma lamba ɗuhwa na 10 na: a vəley slam har ta ma tsey guma a ’ar a ndaw ma dawam ma da ɓey mey ta Mey Wayna na hay.
Da me təkərey ma guma ma lamba ɗuhwa na 13 na: A tsəhadatara ’ar ta ’ərmbez ma Yezu me təkərey ma ɓada ka tsənadama tek ana me key andza Bay ma Bəla ŋga bay ɗuhwa ha na.
Da me təkərey ma guma ma lamba ɗuhwa na 18 na: A wendzeley na, ɗagay ma slafa mendzey ka masləta ha andza malam mawal ana ta dey ŋgwas ana hay da kominite ma kretiyeŋ hay na teŋgey.
Da me təkərey ma guma ma lamba ɗuhwa na 24 ta 25: a ɓada na gawla ma Yezu hay a da slafama ma da huta ma da zəgey ’ar ma sleɗ ma Bay ma Bəla madakwaydok ana na teŋgey.
Sa ma bəzay ma guma na me təkərey ana sa na hay da dəba dakay ka mey ana hay na, a təkəram ma ta na, ɗagay Yezu me ndeley ndaw dzedzey ana hay, a vəlatar tek mezəmey a ndaw ma kusa na hay, a təkərey ’ərmbez hay ma dzalada ’ar, dakay na a kəɗam waway andza miter Zuif ana hay na teŋgey.
Da mezley ma ɗeriwel aŋga tsəfəmey ana na, Matiyew a tsey ka ma yawa ma Yezu ta ma kawa ma bəza hay ŋga, bay ɗuhwa na ma Zuif hay (lamba ɗuhwa na 1 ta 2) Andza da ma dakwaydok ma ɗeriwel aŋga na, Yezu bay ɗuhwa na ma Zuif hay, ma dzuwama a memətsey, arka ma daradama ka’ar ma tuwaw ma gazləla ha (lamba ɗuhwa na 27) Ama na, Bay ma Bəla ma pərkadərawa da memətsey. Arka Yezu ma ɓatar vaw a gawla ŋga hay. Ŋga ma tsəhafata ka taləkadama mey ta Mey Hayna Wayna a səkway ma dala hay tabiya ha (lamba ɗuhwa 28)
Amba ka yəmərawa na, a zəlamar a Yezu na Emanuwel, ka ləva na «Bay ma Bəla ta lakwa» (1.23) ɗeriwel ma Matiyew a ndəvey na, ta bəzay ma guma neney Yezu ma tsatərawa kava na: «Arka yah ana tey na, i daha ta kuray ka pas ka pas, kasl ka bəla ma ndəvey» (28.20) Yezu na a ɓada Bay ma Bəla na ŋga daha da walaŋ ma ndaw hay.
S'ha seleccionat:
Matiyew Me key ka’ar ɗaf ma guma: MOF
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Le Nouveau Testament en langue Mofu © 2007 Alliance Biblique du Cameroun