San Lucas 22
22
Lëë Judas xyub dyon xa kyab Jesús ña xaa xñabey
(Mt. 26:1‑5, 14‑16; Mr. 14:1‑2, 10‑11; Jn. 11:45‑53)
1Lëë paskw sëëd yob. Lo lni go xtyaaw kyaxtily nii xkyëdy levadur. 2Aan lëë xaa nii xñabey lo pxosy ni lëë maestre ley byub dyon xa kuty Jesús, per pchilodyo porñee ptsyeb xaa meñ.
3Lëë xaatox kwsëëb leñ styoo Judas. Xpëëdscuel Jesús nak Judas. Iscariote kwnee meñ lo Judas. 4Aan lëë Judas kwey lo xaa nii xñabey pxosy ni lo xaa nii xkyënap lidzy Dios parñee këb xaa dyon xa jkaa Jesús. 5Ble xaa go lo Judas, aan lëë xaa chëb nii stee xaa tumi. 6Byo xtiits xaa go styoo Judas. Por ngo lëë xaa bislo byub xaa xa jkaa Jesús tu laañee kindy meñ parñee jko xaa Jesús ña xaa xñabey.
Lultime paskw nii kwte Jesús ksa xpëëdscuel
(Mt. 26:17‑29; Mr. 14:12‑25; Jn. 13:21‑30; 1Co. 11:23‑26)
7Lëë paskw kol. Lo lni go xtyaaw kyaxtily nii xkyëdy levadur, ni chuty meñ mëkwxiily. 8Por ngo lëë Jesús chëb lo Pedre ni lo Juan:
—Kol tsikuuñlo nii tyaaw xtsee no na paskw.
9Lëë xaa kwnabtiits chëb xaa lo Jesús:
—¿Pa kyokuuñloo noow?
10Tsigo lëë Jesús chëb:
—Tsiñee ktsiñ do leñ kyedzy, lëë do kan tu xaa nii nsob yañ tub che nis. Kol tsinal xaa axte laañee ktsiñ xaa, 11aan kol këb lo xpixwan yu: “Lëë maestre pxaal lëë noo parñee kñabtiits noo pa sob yu laañee kawxtsee xaa ksa xpëëdscuel xaa na paskw.” 12Lëë xaa kluuy tu cuart ngol nii sob kik lidzy xaa, xixkwaalew. Siko kol kuuñlo nii tyaaw xtsee no.
13Lëë xpëëdscuel xaa si aan lëë xaa ptsil yu nii chëëbpee Jesús, aan lëë xaa beeñlo nii kak xtsee paskw.
14Tsiñee lëë xwor xtsee kol, lëë Jesús kwsob lo mezh ksa xaa apostle. 15Aan lëë Jesús chëb:
—¡Penaadle non gan kawnin lëë do na paskw antes nii ketyaa! 16Por axte nii klañche xkyalwnabey Dios kuñaa paskw stub.
17Loxsye ngo lëë xaa kwseñ tu vas viñ, aan loxsye ptee xaa skizh lo Dios, lëë xaa chëb:
—Kol ki nrii ni kol kiisyo lo xcombañer do. 18Por nli xñen nii kidraa viñ sink lëën kwës axte klyañche xkyalwnabey Dios.
19Lëë Jesús kwseñ tu kyaxtily, aan loxsye pteedy xaa skizh lo Dios, lëëw beeñ grol xaa, aan lëëw pteedy xaa lo xpëëdscuel xaa chëb xaa:
—Lëë xcuerpaa nrii. Kol kawo parñee ksaladzy to naa, por lëën kety parñee telaa do.
20Singo gak tsiñee lëë xtsee kwlox, lëë xaa kwseñ tu vas viñ aan lëë xaa chëb:
—Tu cheñaa nrii. Lëëw kxee parñee kpily xtol do.
21’Lëë na lëë xaa nii kakniladzy naa sob lo mezh nu. 22Per no nii ktsiiñaa laañee pxaal Dios naa. Per ¡brobsye xaa nii kakniladzy naa!
23Tsigo lëë xpëëdscuel xaa bislo xñabtiits lo xcombañer dyon cho xaa kokniladzy Jesús.
Cho mastre non
24Lëë xpëëdscuel Jesús ptilytiits parñee kaknan dyon cho xaa mastre non. 25Tsigo lëë Jesús chëb:
—Nan do gon xa chuuñtsyey xaa nii xñabey lo kislyu ni nan do nii chakladzy xaa nii këb meñ nii tir buen xaa. 26Per lëë lëë do nody nii kak to singo, sink deelñee no tu do chakladzy kñabey no nii kak to sinak tu xaa nii xsoob tiits ni sinak tu xaa wiñ. 27Kol në dyon cho mastre non, ¿pe xaa nii xsyob lo mezh chawo ote xaa nii xkyë niskwaano yak? ¿Pe lëdy xaa nii xsyob lo mezh nak xaa non? Per lëë naa, lëën no lady to sinak tu xaa nii chuñ mandad.
28’Ni kon gaa to kchë kyalnë ptsyoolaa aan psaandy to naa. 29Por ngo lëën knetsy kyalwnabey lo do sinak nii bneetsy Tat Tioso lon, 30aan lëë do kaw ni lëë do ki laañee xñabeyaa ni lëë do sob parñee kñabey do lo ksa tsiipchop tiiy meñ nii no tañ Israel.
Lëë Pedre këb nii xyuumbeydy xaa Jesús
(Mt. 26:31‑35; Mr. 14:27‑31; Jn. 13:36‑38)
31Loxsye ngo lëë Jesús chëb:
—Simoñ, lëë xaatox gon kwnab lëë do parñee kuxso xaa to sinak xchooxso xobxtily. 32Per lëën kwnab lo Dios nii kakni xaa lii, parñee kchosody styool kaazhkaa, aan tsiñee lëë styool kpikche, pchoobladzy styoo xcombañeeroo parñee kchosody styoo xaa.
33Tsigo lëë Simoñ Pedre chëb:
—Nikle win tso skiib, ni nikxe kety no tusyke, per ksandyaa lii.
34Per lëë Jesús chëb:
—Pedre, na kyool kazh tson vuelt këëboo nii xyuumbeydyoo naa antes nii jkwetsy nguidy kol.
35Tsigo lëë Jesús chëb:
—Tsiñee pxalaa lëë do sin bols, ni sin tumi, ni sin kyalkidy, ¿pe no dyon pe cos kok falt lo do?
Tsigo lëë xpëëdscuel xaa chëb:
—Ni tu pe kokty falt.
36Lëë Jesús chëb:
—Lëë na, deelñee no cho do chap bols, kol koyo, ni kol koy tumi. Aan deelñee chapty to spad, kol kto xchaket to aan kol si tuwo. 37Por no nii kak cumplir xkitsy Dios nii xñee nii win pkab lady xaa mal. Kchë laañee chakyety nii ktsyoolaa kak cumplir.
38Lëë xpëëdscuel xaa chëb:
—Maestre, lëë chop spad xoob nu.
Tsigo lëë Jesús chëb:
—Kol ksaano.
Lëë Jesús chutiitsni Dios
(Mt. 26:36‑46; Mr. 14:32‑42)
39Loxsye ngo lëë Jesús si kiy nii lë Olivos aan lëë xpëëdscuel xaa sinal. 40Tsiñee lëë xaa ptsiñ siko, lëë xaa chëb:
—Kol kutiitsni Dios parñee kyabty to lo tol.
41Aan lëë xaa kwsë lal laañee xyab tu kyo tsiñee xkëë meño, aan lëë xaa psoxib par kutiitsni xaa Dios, 42chëb xaa:
—Tat Tios, pteelaa naa lo kyalnë re, per kuuñtsyeydyoo nii chakladzyaa, sink beeñtsyey nii chakladzyoo.
43Ngo nonee xaa tsiñee lëë tu angly byety kpaa par ktee xfuersy xaa. 44Lo xkyalnë Jesús mastre chutiitsni xaa Dios, aan axte lo lyu byab nis nii psinis xaa, xñaw si xña cheñ.
45Tsiñee lëë xaa lox bitiitsni Dios, lëë xaa sey laañee nche xpëëdscuel xaa. Per ksasy xpëëdscuel nche nixyesy, porñee tir xteenë xaa. 46Tsigo lëë xaa chëb:
—¿Penak nche nixyesy to? Kol tsische aan kol kutiitsni Dios, parñee kyabty to lo tol.
Lëë meñ xñaasy Jesús
(Mt. 26:47‑56; Mr. 14:43‑50; Jn. 18:2‑11)
47Lëë Jesús bii nonee, tsiñee lëë tubtsoon meñ ptsiñ. Lëë xpëëdscuel xaa nii pcholë Judas nech lo meñ, aan lëë xaa ptee tu pxit kwesy Jesús, 48per lëë Jesús chëb:
—Judas, ¿con tu pxit nawen jkol naa ña meñ re?
49Tsiñee lëë xaa nii nak ksa Jesús kon nii ktsyool Jesús, lëë xaa chëb:
—¿Pe stiily noo con spad?
50Aan lëë tu xaa nii nak ksa Jesús biswee tu xmos xaa nii mastre non lo pxosy, pchug xaa tyag xaa nii sob nëzli. 51Tsigo lëë Jesús chëb:
—Kol ksaan.
Lëë xaa kwseñ tyag mos ko, aan lëëw beeñ kyak xaa. 52Loxsye ngo lëë xaa chëb lo xaa nii xñabey lo pxosy, ni lo xaa nii xkyënap lidzy Dios, ni lo xaa kol nii sinaasy xaa:
—¿Penak nii sëëdxi do naa con spad ni yag nyak xaa ngbaan? 53Ksatyee tse kwyon lady to leñ lidzy Dios, aan kwnaasty to naa. Per nyoo nii lëë xaatox xchëëp lëë do nina.
Lëë Pedre xñee nii xyuumbeydy xaa Jesús
(Mt. 26:57‑58, 69‑75; Mr. 14:53‑54, 66‑72; Jn. 18:12‑18, 25‑27)
54Lëë meñ kwnaasy Jesús, aan lëë meñ kuni xaa lidzy xaa nii mastre non lo pxosy. Lëë Pedre kunal sit sit. 55Lëë meñ psaay ki groltyee lo ley. Aan wi Pedre kwsob lady meñ go chu ki. 56Siko sob Pedre tsiñee lëë tu kwnaa nii xkyë tsiiñ siko kon xaa aan lëë me chëb:
—Wi meñ gue nak ksa Jesús.
57Per lëë Pedre chëb:
—Xyuumbeydyaa xaa gue.
58Kok xtsedyako, lëë stu xaa nii so siko kon Pedre, aan lëë xaa chëb:
—Wil lë no xlad Jesús.
Per lëë Pedre chëb:
—Lëdyo.
59Nonsyak koko tu wor, lëë stu xaa chëb:
—Soot paa gon nii wi xaa gue no xlad Jesús, por xaa Galilea xaa.
60Per lëë Pedre chëb:
—Nandyaa pe cos xñeel.
Aan wor go kazh, mentre lëë Pedre bii nonee, lëë tu nguidy kol pkwetsy. 61Tsigo lëë Jesús psuugw lo buy lo Pedre. Lëë Pedre gaa psaladzy nii chëb Jesús: “Na kyool kazh tson vuelt këëboo nii xyuumbeydyoo naa antes nii jkwetsy nguidy kol.” 62Lëë Pedre pchoo siko aan lëë xaa biiñ.
Xaa nii ptee xcheñ Jesús
(Mt. 26:67‑68; Mr. 14:65)
63Lëë xaa nii kwënap Jesús ptee xcheñ xaa ni kwtsityni xaa xaa. 64Ni ptse xaa lo Jesús, aan xñee xaa:
—¡Kwnë dyon cho kwtiñ lii!
65Ni kwlootsyetsy xaa Jesús. Ndaly nii chëb xaa lo xaa.
Lëë Jesús so lo xaa xñabey
(Mt. 26:59‑66; Mr. 14:55‑64; Jn. 18:19‑24)
66Tsiñee lëë lyu byaani lëë xaa kol ni lëë xaa nii xñabey lo pxosy ni lëë maestre ley ptyop, aan lëë xaa kuni Jesús lo stu xaa nii mastre non, aan siko lëë xaa chëb lo Jesús:
67—Kwnë dyon pe lii nak Crist.
Tsigo lëë Jesús chëb:
—Deelñee kniyaa na nii naaw, knilasty to xtitsaa. 68Deelñee gaa kñabtiitsaa tu pe cos lo do, kñëdy tow. 69Per destye nina lëën soob kwi Dios nëzli.
70Loxsye ngo lëë xaa xñabey chëb:
—¿Lii tsigo busy nak Xiñ Dios?
Tsigo lëë Jesús chëb:
—Misme lëë do xñee nii naaw.
71Tsigo lëë kchë xaa go chëb:
—¿Pa jkiiñre gaa no testigw? Misme lëë no ptyon pchoo kchë tiits re chuw xaa.
S'ha seleccionat:
San Lucas 22: ztq
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2009, Wycliffe Bible Translators, Inc. All rights reserved.