Jṉ. 4
4
Jesus Samarianmaya̱ nuwa̱ja̱i̱ chichasma
1Kame Jesuska imiakrateak Juáṉja̱i̱sha naṉkaamas ni nemarniuri̱ awajénawai táman Pariséu shuar antukarman Jesussha nekaamiayi. 2Túrasha Jesuska imiakratchamiayi nekaska ni unuiniamuri̱ imiakratiarmiayi. 3Nuna nekáa Jutanmaya̱ṉka jiinkí̱ Kariréanam waketkimiayi.
4Wáketuk Samarianmaani̱ naṉkaamaktiniuyayi. 5Tuma asa Jakup ni uchirí̱n Jusen nuṉkan yaunchu susamia nui̱ tíjiu̱ch Samarianam Sekar péprunam jeamiayi. 6Nui̱ Jakupa taurma yumirmatri̱ ámiayi. Tutupin ai̱ Jesussha pimpiki̱ winiá asa yumirmat ayamach pujusmiayi. 7Nui̱ pujái̱ Samarianmaya̱ nuwa̱ yumí áimkiattsa támiayi. Tura Jesus chicharuk “Entsa ajamprusta” tímiayi. 8Kame Jesusa unuiniamuri̱ṉkia yurumkan sumaktaj tusar péprunam wéaru ásarmatai nui̱ṉkia Jesusak pujumiayi.
9Samarianmaya̱ nuwa̱ Jesusan chicharuk “¿Urukamtai Israer shuaraitiatmesha Samarianmaya̱ nuwa̱ ai̱sha entsasha seatam?” Warí Israer shuarka Samarianmaya̱ aentsja̱i̱ṉkia peṉké nawamnaichu ásar nuna tímiayi. 10Tutai Jesus chichaak “Yus súamu nékakmeka tura entsan seatmana nusha nékakmeka nekaska ame seawaintme tura Niṉkia iwiaaku entsan amasainti.” 11Tutai nuwa̱sha chicharuk “Uuntá, entsasha ¿wariji̱a̱i̱ṉ shikiktam warí entsasha tí initchakait? ¿Tuyá̱ iwiaaku entsasha takakam? 12Nuikia ¿amek nekaska ii uuntri̱ Jakupja̱i̱ṉkia naṉkaamas úuntaitiam? Warí ¿níṉkichuk ju̱ taurma yumirmatnasha ikiurtámkimiajⁱ? Nuyá̱ nisha tura ni uchirí̱sha núnisaṉ waakarí̱sha ju̱ya̱ṉkechuk umararmia” tímiayi. 13Tutai Jesus chichaak “Ashí shuar ju̱ entsan úmuiniakka ataksha kitiarartatui. 14Antsu Wi súajna nú entsan umarka atakka peṉké kitiamchattawai. Antsu nu entsaka ni enentái̱n púkuni̱ya̱ ántsaṉ tuke pajamtitiawai tura nuja̱i̱ tuke iwiaaku pujustatui.” 15Tutai nuwa̱ chichaak “Uuntá, winiasha nu entsa surusta. Wisha atakka kitiamcha átaj. Tura ju̱ entsan shikiakun waketrú puju̱i̱j” tímiayi. 16Nuya̱sha Jesus chichaak “Áishrum untsukam utitiá túram ju̱i̱ tatá” timiayi. 17Takui̱ nuwa̱sha “Winia áishruka atsawai” tutai Jesus chichaak “Maa, nekasa tame. Áishrum atsawai. 18Túrasha áishrum seṉku takusuítme. Yamái takakmena nusha ame áishrumchaiti. Nekas tame” tímiayi. 19Nuna antuk nuwa̱sha chichaak “Uuntá, Ámeka Yúsnan etserniuitme. 20Kame ii úuntri̱ṉkia jú̱ nainnium Yusan tuke tikishmátrarmiayi. Túrasha átumka aya Jerusaréṉnum Yus tikishmátratniuiti tárume” tímiayi. 21Jesus chicharuk “Nawantru nekaata. Tsawant jeatémai Yus Apa tikishmátratin aya jú̱ nainniumkechu núnisaṉ aya Jerusaréṉnumkesha áchattawai. 22Átumka tikishmátrumna nusha nékatsrume. Iikia neka asar tikishmáteaji. Warí, uwempratniuka Israer shuarnumaani̱ winiawai. 23Tsawant winittiana nu yamái jeayi. Ashí shuar Yus Apan nekas tikishmátainiakka wakaní̱ji̱a̱i̱ nekas enentáimtusar awajitsuk tikishmátrartatui. Tímiatrusar tikishmátrurat tusa Yus Ápaka wakerawai. 24Yuska Wakaniti tuma asamtai ashí Nin tikishmátainia nuka nekas tikishmátainiakka wakaní̱ji̱a̱i̱ nekas enentáimtusar awajitsuk tikishmátrartiniaiti” tímiayi. 25Tura nuwa̱sha chichaak “Misías ‘Kristu’ tutai tátiniaiti. Nisha taa ashí jintintrámattaji.” 26Takui̱ Jesus nuwa̱n chicharuk “Nuka Witjiai, Ámiji̱a̱i̱ chichaana nu” tímiayi.
27Tu áujmatu pujuiniai̱ ni unuiniamuri̱ táarmiayi. Tura nuwa̱ja̱i̱ chicháa pujan wáinkiar ti enentáimprarmiayi. Túrasha chikichkisha chichareak “¿Warí wakerakmea nuwa̱ja̱i̱sha chichaam?” tichamiayi. 28Nuya̱ṉka núwa̱ka ni yumiri̱nkia ikiukí̱ péprunam waketki̱ ashí aentsun chicharainiak 29“Shuar wi túramun ashí túruta nu winiirum iitiarum. ¿Ju̱sha Krístuittíya?” 30Takui̱ péprunmaya̱ka jíinkiar Jesus pujamunam wéarmiayi.
31Túmainiai̱ ni unuiniamuri̱ chicharainiak “Uuntá, yurumáta” tiármiayi. 32Tutai Jesus chicharainiak “Wi yúatniunka átum nékachman takakjai” tímiayi. 33Takui̱ ni unuiniamuri̱ chichainiak “¿Yaaksha yurumak itiarím tátsuash?” mái̱ tunai ajarmiayi. 34Tuíniakui Jesus áimiuk “Winia akuptúkua nuna wakeramuri̱n túrakun tura Ni takatrí̱ amuktinia nuiti Winia yurumkarka. 35Warí átumka ‘árak júuktinkia kuatru nantu tuke taasai’ tátsurmek. Túrasha Wi tájarme, shuar wininia nu iistarum. Yus Chicham ni enentái̱n araamuiti. Tura júuktin tsawant jeayi. 36Arakan juwaka akikmaiti. Tura tuke iwiaaku pujustin neren juwiniawai. Nuja̱i̱ arakan araana nusha tura juwana nusha mái̱ metek warasartatui. 37Kame ‘Chíkich araawai tura chíkich juwawai tutaiya nuka nekasaiti.’ 38Iis, chíkich arakmamu júuktinian akupkaitjiarme. Átum arakchiatrumek chíkich takasmanum atumsha pachinkiaitrume” Jesus tímiayi.
39Tura “Wi túramun ashí ujatkayi” nuwa̱ takui̱ Samarianmaya̱ shuar nu péprunam matsatainiasha untsurí Jesusan nekas enentáimtusarmiayi. 40Nuya̱ṉka Samarianmaya̱ shuar Jesusan tariar iiji̱a̱i̱ pujusta tusa seawarmiayi. Tutai Jesus jimiará tsawant nui̱ pujusmiayi. 41Kame nuyá̱ shuar ni chichame̱n anturkar nuna untsurí Jesusan nekas enentáimtusarmiayi. 42Nuyá̱ nuwa̱n chicharainiak “Yamaikia aya ame chichammiji̱a̱i̱ṉ Jesus enentáimtatsji antsu imia iik ni chichame̱sha anturkarji. Tura iisha yamaikia nékaji nekas ashí shuaran Uwemtikniuiti” tiármiayi.
Jesus akupniu takarniúri̱ uchirí̱n tsuarma
43Jimiará tsawant naṉkaamasmatai Jesus Samarianmaya̱ jiinkí̱ Kariréanam wémiayi. 44Kariréasha Jesusa nuṉke̱ asamtai “Yúsnan etserniun ashí shuar péṉker anturainiawai antsu imia ni nuṉke̱ya̱ṉka nin anturainiatsui” tíchamkia Jesus. 45Tuíniayat Kariréanam jeamtai nuyá̱ shuarsha Jerusaréṉnum Paskua nampernum wéaru ásar tura ashí ni túramun nui̱ wainkia ásar ti shiir awajsarmiayi.
46Nuyá̱ Jesus Kariréanam Kaná péprunam Jesus entsan winiu awajsámia nui̱ atak támiayi. Jesus nui̱ pujái̱ Kapernáumnumia̱ akupniu takarniúri̱ uchirí̱ jaa tepemiayi. 47Nisha Jesus Jutanmaya̱ Kariréanam táman antuk Jesusai̱ wémiayi. Tura ni uchirí̱ jákatin tepakui werí ni uchirí̱n tsuarturat tusa Jesusan seamiayi.
48Jesussha chichaak “Aya aents túrachminian túrakui íisrum aya núja̱i̱ṉ Winia enentáimturume.” 49Tura takarin chichaak “Uuntá, winia uchir jáatsa̱i̱ṉ wari winitiá.” 50Tutai Jesus chichaak “Je̱e̱miin waketkitia. Yamaikia ame uchiram péṉker ajasái.” Tutai nú aishmaṉ Jesus táman umirak wémiayi. 51Tura jintiá wéawai̱ ni takarniúri̱ iṉkiuṉ chicharainiak “Yamaikia uchirmeka péṉker ajasái” 52tutai apasha inintrak “Nantu uruka ai̱ya̱ péṉker ajasma” takui̱ chichaak “Ya̱u̱, nantu pukunta ai̱ tsué̱mun michatramai” tiármiayi. 53Nantu pukunta ai̱ Jesus “Ame uchiram péṉker ajasái” timia nuya̱i̱k michatraiti aparí̱sha tu enentáimsamai. Tuma asamtai nisha ashí ni shuari̱sha Jesusan nekas enentáimtusarmiayi. 54Jesus nu túramuja̱i̱ ni kakarmari̱n jimiará iniakmasmiayi. Nunasha Jutanmaya̱ jiinkí̱ Kariréanam jeá túramiayi.
S'ha seleccionat:
Jṉ. 4: jiv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2009 Avant Ministries in cooperation with Wycliffe Bible Translators, Inc. All rights reserved.