Ruk. 19
19
Sakíu Jesusja̱i̱
1Nuyá̱ Jirikiúnam wayá̱ nui̱ wekaikiní̱ ajamiayi. 2Nui̱ kuítrintin áishmaṉ ni naari̱ Sakíu pujumiayi. Nu Sakíu kuítian juu úuntri̱yayi. 3Aents ti kaunkamtai Sakíu ti sútarach asa Jesusan íistaj tukamá tujintkiamiayi. 4Tuma asa Jesus nuke naṉkaamaktin asamtai emki̱ tsékeṉki̱ sikiumúru numi wajamunam wakamiayi íistaj tusa. 5Jesus nui̱ naṉkaamak paṉkái̱ íimias chicharuk “Sakíu wárik akaikitia. Ame je̱e̱miin yamái kanartiniaitjiai” tímiayi. 6Tutai Sakíusha wárik akaikí̱ shiir enentáimias Jesusan itiaamiayi. 7Ashí aents nuna wáinkiar “Maaj, Jesus tunáa áishmaṉka je̱e̱n pujawai” tusa mai̱ tunaim ajarmiayi.
8Nuyá̱ Sakíu wajaki̱ Jesusan chicharuk “Iistá Uuntá, wi takakjana ju̱na jímiapetek nakakán kuítrincha ainia nuna súsartatjai. Tura waitruan chikichan kasarkaitkiuncha menaintiú patatsan awaiṉkittiajai” tímiayi. 9Tutai Jesus chichaak “Ju̱ áishmaṉ Aprajáma shuárintiat yamái nisha níniuja̱i̱ uwempra asa nekas Aprajáma shuari̱ ajasuíti. 10Wisha Aents Ajasu asan meṉkakaru ainia nuna e̱a̱kan uwemtikrartaj tusan táwitjiai” tímiayi.
Kuítian nekapmá chichasma
11Nu aents Jesusan anturkarmia nu “Jerusaréṉnum jeawakrin Ni, Yus anaikiamu asa wárik akupin ajastatui” tu enentáimsarmiayi. Tuma asamtai wésar Jerusaréṉnum nuntumsarai̱ nuna enentáimsara̱i̱ṉ tusa Jesus ju̱na métektakun chichasmiayi. 12“Áishmaṉ peṉkeri̱ amai. Nú aishmaṉsha jeachat chíkich nuṉkanam akupin náamkan tátaj tusa wemai. 13Tura wétsuk ni takarniúri̱n tias armia nuna untsukarmai. Tura aṉkant aṉkant kuit kuriji̱a̱i̱ naṉkaamas péṉker armia nuna suíniak ‘Ju̱ kuitji̱a̱i̱ wi táatsa̱i̱ṉ takakmá ajatarum’ timiai. 14Tura ni nuṉke̱ni̱a̱ shuarka nakitiarmai. Túmainiak ‘nú aishmaṉ ii uuntri̱ ajasá̱i̱ṉ tusar nakitiaji’ nu titiá tusar áishmaṉkan akatrar akuptúkarmai.
15 Tuma ai̱ṉ akupin ajas ni nuṉke̱n waketki̱ tamai. Taa winia kuítruja̱i̱ warí túrarum titiaj tusa ni takarniúri̱n kuítian súsarmia nuna untsukarmai. 16Ni takarniúri̱ emka chikichik taa ‘Ame kuítrumja̱i̱ takakmasan tias patasan achikmajai’ timiai. 17Tutai uunt chichaak ‘Péṉker túrame. Ishichik susamjamna núja̱i̱ṉᵏⁱ wi tímiajna tímiatrusmek túrame. Tuma asakmin tias péprun akupin awajsattajme’ timiai. 18Chíkich tarí ‘Iistá Uuntá, ame kuítrumja̱i̱ takakmasan seṉku patasan achikjiai’ timiai. 19Nunasha chicharuk ‘Amincha seṉku péprun akupin awajsattajme’ timiai. 20Nuyá̱ chíkich tarí ‘Uuntá, ame kuítrumin paniiji̱a̱i̱ ijian ikiusmajai. 21Amesha kakaram chicháu asakmin ikiuschiatam achin asakmin tura arakmachiatam juu asakmin ashamkamjame’ timiai. 22Tutai uunt timiai ‘Maaj, amesha ti yajauchitme. Ame támena nuke makurmawai. Wi kakaram chicháu ai̱sha ikiuschiatan achin ai̱sha tura araknasha arakmachiatan juu ai̱sha 23nuiṉkia ¿urukamtia kuit ikiutai̱niam ikiuschamam? Nuiṉkia wi atak winiakun patasan achikia̱a̱jna’ timiai. 24Tura nui̱ wajarmia nuna chicharuk ‘Kuit takakma juruktiarum túrarum tiásan takakna nú shuar susatarum’ timiai. 25Tura nisha chichainiak ‘Túrasha Uuntá, tiásan takakja’ tiarmai. 26Tutai uunt chichaak ‘Takakna nuja̱i̱ takaakuiṉkia patatnástatui tájarme. Tura takakna nuja̱i̱ takaachkuiṉkia ishichik takakkuisha jurunkíttiawai. 27Tura winia nemasur uunt ajasá̱i̱ṉ tusar nakitrurarmania nu itiatárum. Tura wisha íimiai̱ṉ mátarum’ timiai” tímiayi Jesus.
Jerusaréṉnum Jesus waya̱mu
(Mat. 21:1-11; Mar. 11:1-11; Jṉ. 12:12-19)
28Nuna tuasua amik Jesus Jerusaréṉnumaani̱ wémiayi. 29Petpajái pepru tura Petania péprusha Uriwiu nainnium tíjiu̱chiyi. Nui̱ jeastatuk ajatémas ni unuiniamuri̱n jímiaran chicharuk 30“Tíjiu̱ch péprunam wetarum. Túrarum nui̱ umpuruch ekemtukchamu jiṉkiamu wajá wainkiattarme. Nu atíarum itiatárum. 31Tura ‘¿urukamtai atíarum?’ turamainiakuisha ‘ii uuntri̱ atsumawai’ titiarum” tímiayi.
32Tutai unuiniamuri̱ wéar Jesus timia ímiatrusaṉ wáinkiarmiayi. 33Tura umpuruchin atíakui nérentin chichainiak “¿Urukamtai umpuruchsha atíarum?” 34Tutai unuiniamusha “Ii uuntri̱ atsumawai” tiármiayi. 35Tura umpuruchin Jesusan itiariármiayi. Túrawar ni pushiri̱n umpuruchiniam awantkar Jesusan ekenkarmiayi. 36Tura Jesus wétinniumaani̱ ni pushiri̱n ayapá̱rar jintiá áintrarmiayi. 37Tura Uriwiu naint awaṉkénamunam tíjiu̱ch ajasármatai untsurí aents Jesusan nemariarmia nu warainiak kakantar untsumainiak Ame najankamuram íijata núurmincha untsurí túran wáinkiaru ásar Yusan shiir awajsarmiayi.
38 “Yusa náari̱i̱n winiana ju̱ ii uunt Akupniuiti. Nincha Yus shiir awajsati. YKan. 118:26
Nayaimpiniam pujuinia nu shiir enentáimsar Yusa náari̱n uunt awajsarti” tiármiayi.
39Tura Pariséu aents nui̱ páchitra pujuarmia nu Jesusan chicharainiak “Uuntá, nemartamainia nu ‘takamátsata’ tiartá” tiármiayi. 40Tutai Jesus chichaak “Nuiṉkia ju̱ takamátsarmataiṉkia kayasha untsumkarainti. Nuna paant tájarme” tímiayi. 41Jerusaréṉnum tíjiu̱ch ajatémas péprun wainiak úutuk jú̱nis chichaak 42“Jerusaréṉnumia̱ shuartiram, ju̱ tsawantinkesha shiir pujustintrum nekaarmeka maak. Túrasha yamaikia nekaatin naṉkaamasai. 43Kame ti itiurchat tsawant jeartámtatrume. Atumí nemasri̱ nuṉkaja̱i̱ a̱a̱ tanishan tanishmarar téntatramkattarme. Mesetan najatramattarme tura aatusha ju̱ni̱sha mash árentmaktatrume. 44Túrutma nuṉká aju̱nmártatrume. Tura atumíin pujuinia nuna máwartatui. Tura ashí emesrarmatai ishichkisha kaya irumpramusha peṉké atsuttawai. Wi Yusa anaikiamuri̱n tarijrumna nu nekaachu asakrumin túrutmattarme” tímiayi.
Yusa Uunt Je̱e̱n wariṉkish suruktinian Jesus surimkiamu
(Mat. 21:12-17; Mar. 11:15-19; Jṉ. 2:13-22)
45Nuyá̱ Jesus Yusa Uunt Je̱e̱n wayá̱ suruktasa pujuarmia nuna sumaktasa pujuarmia nunasha ji̱i̱ki̱ awemarmiayi. 46Túrak chichaak “Yus Papinium yaunchu aarma awai ‘Winia je̱a̱rka Yus áujsatin jé̱a̱iti’ Isa. 56:7 tu áarmaiti. Túrasha átumka kasá matsamtaiyaJrm. 7:11 nútikiarme” tímiayi.
47Tuke tsawantin Yusa Uunt Je̱e̱n Jesus uwempratin chichaman unuiniak pujái̱ Yúsnan pujurniu úuntri̱sha, Israer shuara jintinniuri̱sha tura pepru úuntri̱sha itiur mámniakit tusar ti enentáimsarmiayi. 48Túrasha ashí aents émamkes anturainiakui mátniun tujintkiarmiayi.
S'ha seleccionat:
Ruk. 19: jiv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2009 Avant Ministries in cooperation with Wycliffe Bible Translators, Inc. All rights reserved.