Juan 4
4
Jaꞌ Yet Jix Kꞌanabꞌ Jesús Yetoj Jun Ix A Samaria
1Jix abꞌcha skꞌumal yu ebꞌ Fariseo tol ecꞌbꞌanxa sbꞌisil ebꞌ scuywom Jesús yintaj ebꞌ yet naj Juan. Ecꞌbꞌan pax ebꞌ jix yakꞌ bautizar. 2Manaj Jesús tuꞌ jix akꞌon bautizar ebꞌ, jaꞌ ebꞌ scuywom Naj. 3Jaꞌ yet jix yabꞌen Jesús tol jix yabꞌ ebꞌ Fariseo jun tuꞌ xin, jix el ebꞌ bꞌey Judea tuꞌ, catuꞌ jix too bꞌey Galilea. 4Sowalil jaꞌ yul yet Samaria chi ecꞌ ebꞌ yet chi too tuꞌ. 5Yuxan jaꞌ yet eyto ecꞌ Jesús yul yet Samaria tuꞌ xin, jix apni ebꞌ scawilal jun conobꞌ chi yij Sicar. Jaꞌ jun txꞌotxꞌ akꞌbꞌil can yu naj Jacob tet jun scꞌaal chi yij José yet peyxa. 6Jaꞌ tituꞌ ey jun kꞌobꞌ jotbꞌilcan yu naj Jacob tuꞌ. Chuman mi cꞌu jix apni Jesús stiꞌ jun kꞌobꞌ tuꞌ. Yutol caw chi cꞌuumbꞌi Naj sbꞌeyi, yuxan jix ey chotan stiꞌ jaꞌ tuꞌ. 7-8Jal ebꞌ scuywom xin, jix too ebꞌ sman niꞌoj sloꞌbꞌe yet chuman bꞌey jun conobꞌ scawilal jun kꞌobꞌ tuꞌ. Jaꞌ yet xax too ebꞌ tuꞌ, jix apni jun ix ix a Samaria, jix apni yu yiꞌon atej yaꞌ. Jix yalon Jesús tet ix jaxca tiꞌ:
—Akꞌ niꞌoj jaꞌ tiꞌ wuqꞌue, ẍi Naj tet ix.
9Catuꞌ jix yalon ix tet Naj jaxca tiꞌ:
—¿Tzet yuxan cha wal ey jin an, yutol jaach tiꞌ Israel jaach, catuꞌ cha kꞌanon pax jaꞌ ey jin an? ¿Tumi man ja wotaj oj tol a Samaria pax jin an? ẍi ix tet Jesús tuꞌ. Queytuꞌ jix yute skꞌanabꞌ sbꞌa ix tet Naj, yutol jaꞌ ebꞌ Israel, cꞌam chi ẍaꞌle sbꞌa yakꞌon ebꞌ yetoj ebꞌ a Samaria tuꞌ. 10Jix lawi tuꞌ xin, catuꞌ jix yalon Jesús tet ix jaxca tiꞌ:
—Chin kꞌan niꞌoj jaꞌ wucꞌ ey jaach an, man pax ja wotaj oj mac jin txequel. Man ja wotaj oj pax tzet chi yoche Dios chi yakꞌa. Kꞌinaloj ta ja wotaj, chim ja kꞌan ey jin an, catuꞌ chi wakꞌon jun jaꞌ jaꞌ chi akꞌon kꞌinale ey jaach, ẍi Jesús tet ix. 11Catuꞌ jix yalon ix jaxca tiꞌ:
—Mamin, ¿tumi ey ja neet cha wakꞌ iꞌon atej jaꞌ? Caw naat eeytoj jaꞌ. ¿Bꞌeytuꞌ ey jun jaꞌ chi akꞌon kꞌinale cha wal tuꞌ xin? 12Jaꞌ kichmam Jacob, jaꞌ jun jaꞌ tiꞌ jix yucꞌbꞌalne yetoj cꞌal yuninal, cꞌal noꞌ noꞌ. Jaꞌ yet jix cam naj, jix can jun kꞌobꞌ tiꞌ ey jon. ¿Tumi yel xacꞌal miman ja weloc apnoj yintaj naj Jacob tuꞌ? ẍi ix tet Jesús. 13Yuxan jix yal Naj tet ix jaxca tiꞌ:
—Yal cꞌal mac chi uqꞌuen jun jaꞌ tiꞌ, chi tit stajin tiꞌal junelxa. 14Jal pax ebꞌ chi uqꞌuen jun jaꞌ chi wakꞌ an, cꞌamxa bꞌakꞌin chi tit stajin tiꞌal ebꞌ junelxa. Yutol jaꞌ jun jaꞌ chi wakꞌ tiꞌ, chi el sne jaꞌ, catuꞌ chi a wolna jaꞌ bꞌey spixan ebꞌ, catuꞌ chi akꞌle skꞌinal ebꞌ ey cꞌal yin tobꞌalkꞌinal yu jun jaꞌ tiꞌ, ẍi Jesús tet ix. 15Catuꞌ jix yalon ix tet Naj jaxca tiꞌ:
—Mamin, akꞌ niꞌoj jaꞌ jaꞌ cha wal tuꞌ ey jin an, yet watxꞌ cꞌamxa bꞌakꞌin chi tit jin tajin tiꞌal, catuꞌ manxa sowalil oj chi jul wiꞌ wet bꞌey jun kꞌobꞌ tiꞌ an, ẍi ix tet Jesús.
16—Asiꞌ, iꞌtej ja wichamil, catuꞌ chex jul je cawanil titiꞌ, ẍi Jesús tet ix.
17—Cꞌam wichamil an, ẍi ix tet Naj.
—Yel ton cha walaꞌ, cꞌam ja wichamil tinaniꞌ. 18Ecꞌnaj jowan winaj ja cꞌatan. Jaꞌ naj bꞌey ey jaach ecꞌ tinaniꞌ, man caw ja wichamil oj naj. Yuxan, yel ton cha walaꞌ, cꞌam ja wichamil, ẍi Jesús tet ix. 19Jix lawi cꞌal yabꞌen ix tzet jix al-le tet, catuꞌ jix yalon ix tet Jesús jaxca tiꞌ:
—Mamin, ẍejabꞌ jaach Dios chi wil an. 20Jaꞌ ebꞌ kichmam, jaon a Samaria* jon tiꞌ, jaꞌ bꞌey jun wonan tiꞌ chi jul kiꞌey cu bꞌa tet Dios. Jal pax jaex a Israel jex tiꞌ xin, jata cꞌal bꞌey Jerusalén sowalil chex too je yiꞌey je bꞌa tet Dios je yalaꞌ, ẍi ix. 21Catuꞌ jix yalon Jesús tet ix tuꞌ jaxca tiꞌ:
—Abꞌ tzet oj wal an, txo ix. Ey jun tiempoal oj juloj, tol manxa jaꞌ oj bꞌey jun wonan tiꞌ oj je yiꞌey je bꞌa tet cu Mam Dios. Manxa sowalil oj jex toj pax bꞌey Jerusalén tuꞌ. 22Jaꞌ jaex a Samaria jex tiꞌ, che yiꞌey je bꞌa tet Dios je yaloni, man pax je yotaj oj Dios tuꞌ. Jal jaon Israel jon tiꞌ, caw kotaj cu Diosal bꞌey chi kiꞌey cu bꞌa. Jaꞌ cu xol chi eltej jun Colwawom. 23Ey ebꞌ, jaꞌ tet cu Mam Dios chi yiꞌey sbꞌa yin yel. Tinaniꞌ jix jul stiempoal yiꞌon ey sbꞌa ebꞌ yin yel yin spixan junjun. Jaꞌ cu Mam Dios, queyton tuꞌ chi yoche scꞌul chi yun yiꞌon ey sbꞌa ebꞌ ánima tet. 24Jaꞌ Dios Espíritu toni, yuxan ta ey mac chi yiꞌey sbꞌa tet, sowalil chi yiꞌey sbꞌa ebꞌ yin yel yin spixan ebꞌ, ẍi Jesús tet ix. 25Catuꞌ jix yalon ix tet Naj jaxca tiꞌ:
—Jain tiꞌ, wotaj an, ey jun Naj Mesías,* jaꞌton Naj Cristo* oj juloj. Jaꞌ yet oj jul Naj tuꞌ, jichan cꞌal oj yute yalon masanil tzetyetal, ẍi ix tet Naj.
26—¿Tumi mactxequel cha naꞌ? jain ton lalan jin kꞌanabꞌ ja wetoj tiꞌ an, ẍi Jesús tet ix. 27Jix lawi yalon Jesús wan tuꞌ, catuꞌ jix apni ebꞌ scuywom tuꞌ. Caw jix qꞌueya scꞌul ebꞌ yet jix yilon ebꞌ, tol chi kꞌanabꞌ Jesús yetoj jun ix ix tuꞌ. Cꞌam cꞌal junoj ebꞌ jix kꞌanlen el tet Naj tzet chi yoche scꞌul chi skꞌanle el tet ix, ma tzet chi yal yetoj ix. 28Jix lawi jun tuꞌ, catuꞌ jix sbꞌejoncan smooc ix stiꞌ jaꞌ tuꞌ, catuꞌ jix too ix yalon yabꞌ ebꞌ ánima yul conobꞌ tuꞌ jaxca tiꞌ:
29—Ey jun winaj, caw yotaj masanil tzet jix el wuneni. Jix yaltej masanil. Toonwej wetoj an, toonwej kilaꞌ. Tejan jaꞌ Cristo, ẍi ix tet ebꞌ. 30Yuxan, jix too ebꞌ a conobꞌ tuꞌ, bꞌet yilon bꞌey eyecꞌ Jesús tuꞌ. 31Jaꞌ yet cꞌamto chi apni ebꞌ ánima tuꞌ scꞌatan Naj, catuꞌ jix yalon ebꞌ scuywom tuꞌ tet Naj jaxca tiꞌ:
—Jaach Cuywam, lowan niꞌoj, ẍi ebꞌ tet Naj.
32Catuꞌ jix yalon Jesús tet ebꞌ jaxca tiꞌ:
—Ey jin loꞌbꞌe, man pax je yotaj oj jun loꞌbꞌe tuꞌ, ẍi Naj tet ebꞌ. 33Jaꞌ yu tzet jix yal tuꞌ, yuxan jix cꞌoli skꞌanlen ecꞌ ebꞌ xol jaxca tiꞌ:
—¿Ey mi mac jix jul akꞌon can sloꞌbꞌe? ẍi ebꞌ. 34Catuꞌ jix yalon Naj tet ebꞌ:
—Caw yochwan jin cꞌul chi wun tzet chi yoche scꞌul Naj mac chejnen jintej, chin waꞌne el smulnail, wan jix yaoc yul jin kꞌabꞌ. Jaꞌ yet chi wunen jun tuꞌ, jaxca tol jaꞌ chi oc jin loꞌbꞌeoj. 35Jaex tiꞌ, canebꞌ to xꞌaaw catuꞌ chi oc cꞌupo tiriw je yaloni. Jain tiꞌ chi wal pax ey jex an: “Ilaꞌla, jix jul stiempoal scꞌuplei.” Jaꞌ yu ebꞌ tol to oj jin chaꞌonoj, yuxan chi wal jaxca tuꞌ an. 36Ey ebꞌ ecꞌnajxa mulna xol ebꞌ, jaxca mac chi txiwi tiriw. Ey pax ebꞌ chi mulna xol ebꞌ jaxca mac chi cꞌupon a tiriw, yet watxꞌ chi ẍaꞌ ebꞌ ánima tiꞌ jun kꞌinale tol ey cꞌal yin tobꞌalkꞌinal. Jaꞌ ebꞌ chi mulna tuꞌ, oj ẍaꞌ spaj jun smulnail ebꞌ tuꞌ, yet watxꞌ jun laan cꞌal oj yun stzala a ebꞌ masanil. 37Yuxan yel ton taꞌ chi al-le jun kꞌane: “Ey ebꞌ chi txion ey tiriw. Txꞌoj pax ebꞌ chi cꞌupon aoj,” ẍi. 38Chex jin chejtoj mulna xol ánima jaxca junoj cꞌupom a tiriw. Man pax jaex oj jix jex bꞌabꞌi mulna xol ebꞌ jaxca junoj txiom ey tiriw. Jaex tiꞌ, jaxca tol tuxa cꞌal oj je cꞌupa tzet awbꞌil yu ebꞌ tuꞌ, ẍi Jesús tet ebꞌ. 39Jaꞌ bꞌey jun conobꞌ yul yet Samaria tuꞌ, ecꞌal ebꞌ jix yaoc scꞌul yin Jesús, yutol jix yal jun ix ix tuꞌ xol ebꞌ jaxca tiꞌ: “Yotaj Naj masanil tzet jix el wuneni, jix yal ey jin masanil an,” ẍi ix tet ebꞌ. 40Yuxan jix oc tean ebꞌ a Samaria yin Jesús tuꞌ, yet watxꞌ chi can yetoj ebꞌ yul conobꞌ tuꞌ. Yuxan jix eecꞌ caabꞌ cꞌu yetoj ebꞌ. 41Ecꞌal tocꞌal mac jix yaoc scꞌul yin Naj yet jix yabꞌen ebꞌ tzet jix yal Naj. 42Catuꞌ jix yalon ebꞌ tet ix ix tuꞌ jaxca tiꞌ:
—Jaꞌ yet sbꞌabꞌelal, jaꞌ yu tzet jix ja wal ey jon yuxan jix kaoc cu cꞌul yin Jesús. Jal tinaniꞌ xin, jaꞌcaw Jesús jix alon ey jon. Yuxan, caw chi kaoc cu cꞌul yin tinaniꞌ, caw kotajxa sicꞌlebꞌil, tol jaꞌ Jesús tiꞌ, caw yel /Cristo,/ jaꞌton cu Colomal cu masanil jaon a yul yibꞌankꞌinal jon tiꞌ, ẍi ebꞌ tet ix.
Skꞌaneal Naj Scꞌaal Jun Naj Yaaw Waꞌxinaj Can Scꞌul Yu Jesús
43Jix lawi yecꞌ caabꞌ cꞌu bꞌey Samaria tuꞌ, catuꞌ jix too Jesús tuꞌ bꞌey Galilea. 44Jaꞌton Jesús alnen canoj, tol cꞌam yeloc apnoj junoj ẍejabꞌ Dios yul sat ebꞌ yet conobꞌ. 45Jaꞌ yet jix apni ebꞌ bꞌey Galilea tuꞌ, caw tzalacꞌulal jix yun ẍaꞌle apnoj yu ánima, yutol jaꞌ yet jix bꞌet ebꞌ ilo kꞌin Pascua* bꞌey Jerusalén, jaꞌ tituꞌ jix yil ebꞌ, tol caw ey tzet jix bꞌet yun Jesús tituꞌ. 46Jix apni Jesús bꞌey jun conobꞌ chi yij Caná, bꞌey yul yet Galilea tuꞌ, bꞌey jix oc jaꞌ jaꞌ yin vinoal yu Naj, cꞌal bꞌey junxa conobꞌ chi yij Capernaúm. Jaꞌ tituꞌ ey jun naj yaaw caw yaꞌey jun scꞌaal naj. 47Jaꞌ yet jix yabꞌen naj tuꞌ tol jaꞌ Jesús speto bꞌey Judea, jix apni bꞌey Galilea tuꞌ, jix bꞌet oc tean tet Jesús, tol chi too Naj yetoj bꞌey sna, yu stoo yakꞌle waꞌxoj scꞌul scꞌaal naj yaaw tuꞌ, yutol ian chi camel jun scꞌaal naj tuꞌ. 48Jix yalon pax Jesús tet naj tuꞌ jaxca tiꞌ:
—Ta cꞌam che yil milagro, wan tzet chi txꞌoxon el wopiso, ¿tumi che yaoc je cꞌul win an? ẍi Jesús tet naj. 49Catuꞌ jix yalon naj yaaw tuꞌ tet Jesús jaxca tiꞌ:
—Mamin, toon wetoj an, yajbꞌan iquisto jun jin cꞌaal tuꞌ, Ta cꞌam chach toi, oj cam naj, ẍi naj tet Jesús.
50—Paxantoj, jaꞌ naj ja cꞌaal tuꞌ, man oj cam naj tinaniꞌ, ẍi Jesús tet naj. Jix yaoc yin scꞌul naj tzet jix yal Jesús tuꞌ tet. Catuꞌ jix meltzo naj bꞌey sna. 51Yul xa bꞌe jix ẍaꞌle sbꞌa yetoj ebꞌ smooso. Jix yalon ebꞌ tet naj jaxca tiꞌ:
—Man oj cam naj ja cꞌaal tuꞌ, iquis naj, watxꞌ xa scꞌul naj, ẍi ebꞌ tet naj. 52Catuꞌ jix skꞌanlen naj tet ebꞌ jaxca tiꞌ:
—¿Jantaj hora jix oc tucan syaꞌil tuꞌ? ẍi naj tet ebꞌ.
—Ewi taxa. Yet jix tzꞌeymo cꞌu jix sicbꞌi jun kꞌakꞌ tuꞌ yin naj, ẍi ebꞌ tet naj. 53Catuꞌ jix snaꞌontej naj tuꞌ, tol stzꞌeymo xa pax cꞌu yet jix yalon Jesús tet naj jaxca tiꞌ: “Jaꞌ naj ja cꞌaal tuꞌ, man oj cam naj tinaniꞌ.” Yuxan jix yaoc scꞌul naj yin Jesús cꞌal yetoj ebꞌ ey bꞌey yul sna. 54Jaꞌton jun yet scaabꞌ milagro xꞌoxbꞌanil el yopiso tiꞌ. Jaꞌ yet jix bꞌet bꞌey Judea, catuꞌ jix apni junelxa bꞌey Galilea, catuꞌ jix yuneni.
S'ha seleccionat:
Juan 4: knj
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.