Lucas 24
24
Spitzcꞌubꞌail Jesús
(Mateo 28:1-10; Marcos 16:1-8; Juan 20:1-10)
1Jaꞌ yet lalanto sajbꞌi yet Domingo, jun bꞌabꞌel cꞌu yul semana, jix too ebꞌ ix bꞌey jix muji can octoj smimanil Jesús tuꞌ. Jix yiꞌtoj wan ambꞌal sukꞌukꞌi sabꞌ ebꞌ jix swaꞌne ebꞌ ix tuꞌ. Ey pax wanxa ebꞌ ix jix too yetoj ebꞌ. 2Jaꞌ yet jix apni ebꞌ, jix yilon ebꞌ tol elnaj xa jun chꞌen eyoc smajiloj bꞌey jix muji Jesús tuꞌ. 3Jix octoj ebꞌ yul chꞌen, catuꞌ jix yilon ebꞌ, cꞌamxa smimanil Naj Kaawil Jesús tuꞌ eyecꞌ tituꞌ. 4Caw jix qꞌueya scꞌul ebꞌ yiloni. Jix yilon ebꞌ tol eyecꞌ cawan ángel jaxca yili winaj, linan oc ebꞌ scꞌatan ebꞌ. Chi tzejeji yili spichil ebꞌ ángel tuꞌ. 5Yuxan, caw chi xiw ebꞌ ix, catuꞌ jix ey tꞌanan ebꞌ sat txꞌotxꞌ. Jix yalon ebꞌ ángel tuꞌ tet ebꞌ ix jaxca tiꞌ:
—¿Tzet yuxan jaꞌ bꞌey chi muji ebꞌ camnaj tiꞌ che sey Naj tol iquis xa? 6Cꞌamxa Naj eyecꞌ titiꞌ. Jix pitzcꞌu a Naj. Naꞌwejtej tzet jix yal can ey jex, yet eyecꞌ bꞌey Galilea. 7Jix yalcanoj tol jaꞌ Akꞌbꞌil Yopiso yu Dios xol ebꞌ je yet animail, sowalil oj akꞌle yul skꞌabꞌ ebꞌ penawom, catuꞌ oj ale oc yin culus, jix yaloni. Jaꞌ yet yoxial, catuꞌ oj pitzcꞌu aoj, ẍi jix yalon can ey jex, ẍi ebꞌ tet ebꞌ ix.
8Catuꞌ jix snaꞌontej ebꞌ ix tzet albꞌilcan tet ebꞌ yu Jesús. 9Catuꞌ jix paxtoj ebꞌ. Jix too yalon ebꞌ jun skꞌaneal tiꞌ tet ebꞌ juslucꞌwan ẍejabꞌ Jesús, cꞌal tet masanil ebꞌ scuywom. 10Jaꞌ ix María Magdalena, Juana, yetoj María xutx Jacobo, jaꞌ ebꞌ jix bꞌet alon wan kꞌane tuꞌ. Ey pax wanxa ebꞌ ix ix eyecꞌ yetoj ebꞌ. 11Jaꞌ ebꞌ ẍejabꞌ tuꞌ, tucꞌal chi yal ebꞌ ix snaꞌon ebꞌ. Ma ẍaꞌ ebꞌ yabꞌe.
12Jal pax naj Pedro, jix a linan naj. Jix yakꞌon ani stoo bꞌey chꞌen chꞌen tuꞌ. Jix apni cꞌal, catuꞌ jix yilon octoj yul chꞌen chꞌen tuꞌ. Asanxane an pichile ey can xꞌojli. Catuꞌ jix paxtej. Caw jix qꞌueya scꞌul naj yin wan jix yil tuꞌ.
Jix Xꞌoxa Sbꞌa Jesús Yul Bꞌe
(Marcos 16:12-13)
13Jaꞌ yet jun cꞌual tuꞌ, ey cawan ebꞌ scuywom lalan stoo yul bꞌe chi apni Emaús. Jaꞌ jun conobꞌ tuꞌ, ey mi oxebꞌoj legua snan xol yetoj Jerusalén. 14Jaꞌ yet lalan sbꞌey ebꞌ tuꞌ, lalan yalon ebꞌ yu tzet jix yun tuꞌ. 15Jaꞌ yet lalan cꞌal yaloꞌtanen wan tuꞌ ebꞌ, jix apni Jesús scꞌatan ebꞌ. Catuꞌ junne xacꞌal chi ecꞌ ebꞌ yetoj Naj. 16Chi moyi a sat ebꞌ yu, yet watxꞌ cꞌam chi yotajne el ebꞌ ta tol jaꞌ Naj. 17Jix skꞌanlen Jesús tet ebꞌ jaxca tiꞌ:
—¿Tzetyetal che yalaꞌ, yet chex bꞌey tiꞌ? ¿Tzet yuxan caw chex cusi? ẍi tet ebꞌ.
18Jix takꞌwi jun chi yij Cleofás tet Naj:
—Yotaj masanil ánima tzet jix yun bꞌey Jerusalén yet caabꞌi-oxi tiꞌ. Jal jaach, ¿tumi cꞌam cha wabꞌ niꞌoj? Ilaꞌ, jix jaach ecꞌ pax tituꞌ, ẍi ebꞌ tet Jesús.
19¿Tzet jix yun tituꞌ xin? ẍi Jesús tuꞌ tet ebꞌ.
—Ey jun Naj a Nazaret, chi yij Jesús, caw ẍejabꞌ Dios yeoc Naj. Jaꞌ tzet jix el swaꞌneni cꞌal tzet jix el yaloni caw miman yeloc apnoj yul sat Dios yetoj yul sat ebꞌ ánima masanil. 20Jaꞌ ebꞌ yaaw yakꞌomal xaambꞌal tet Dios, yetoj ebꞌ yaaw yeoc cu xol jix aon oc yul skꞌabꞌ camich. Yuxan jix yaon oc ebꞌ yin culus. 21Jaꞌton jun tuꞌ chi kaoc yipoj cu cꞌul, tzet utbꞌil tol oj cu colcha el jaon Israel jon tiꞌ yu. Jal tinaniꞌ, oxi tax jix yun wan tuꞌ. 22Ey wan ebꞌ ix ketbꞌi jon jix qꞌueya cu cꞌul yu, yet jix kabꞌen jon, jaꞌ yet jix sajbꞌi, jix bꞌet yilon chꞌen chꞌen ebꞌ bꞌey jix bꞌet muji can octoj smimanil Jesús tuꞌ. 23Jaꞌ yet jix yilon ebꞌ tol manxa eyoj ecꞌ smimanil tuꞌ, jix too ebꞌ yalon ey jon, tzet utbꞌil tol jaxca weyiche jix yute yilon wan ángel ebꞌ. Jix yalon ebꞌ ángel tuꞌ tet ebꞌ, tol iquis Naj. 24Jix cꞌal lawi tuꞌ xin, ey wan ebꞌ ketbꞌi jix bꞌet ilon ecꞌoj. Jaxca cꞌal yalon ebꞌ ix ix tuꞌ, queytuꞌ jix yute yilon ebꞌ. Tol cꞌamxa smimanil Jesús eyoctoj jix yil ebꞌ, ẍi ebꞌ tet Jesús.
25Yuxan jix yal Jesús tet ebꞌ jaxca tiꞌ:
—Jaex tiꞌ, jaxca tol cꞌam niꞌoj je naꞌbꞌal. Caw cꞌam che yaoc yin je cꞌul jantaj tzet albꞌilcan yu ebꞌ ẍejabꞌ Dios yet peyxa. 26Jaꞌ Cristo* sowalil ton tꞌinan yabꞌen syaꞌil wan tuꞌ yet cꞌamto chi oc Yaawilal, ẍi Jesús tet ebꞌ.
27Catuꞌ jix ẍaꞌon el yich yalon tet ebꞌ, bꞌeytaj cꞌal eyoc skꞌaneal yul An Juun Tzꞌibꞌebꞌilcanoj. Jix ẍaꞌontej yich yalon tzettaj tzꞌibꞌebꞌilcan yu naj Moisés. Jix yalon pax tej tzet tzꞌibꞌebꞌilcan yu ebꞌ ẍejabꞌ Dios yet peyxa.
28Jaꞌ yet jix apni ebꞌ bꞌey jun conobꞌ bꞌey lalan stoo ebꞌ tuꞌ, ian palan cꞌal yecꞌ el Jesús tuꞌ. 29Jix cꞌal yakꞌon yip ebꞌ smitxꞌon oc tucanoj. Jix yalon ebꞌ tet jaxca tiꞌ:
—Canan ketoj, ilaꞌla, lalan yeycꞌu, lalanxa skꞌejbꞌi, ẍi ebꞌ tet Jesús. Jaꞌ yet jix octoj yul na tuꞌ, jix can tituꞌ yetoj ebꞌ. 30Jaꞌ yet jix ey chotan yin meẍa yetoj ebꞌ, jix yiꞌon a jun ixim pan, catuꞌ jix yalon yu diosalil tet Dios yu. Catuꞌ jix xion ecꞌ xol ebꞌ tuꞌ. 31Jaꞌ yet jix yun jun tuꞌ, jaxca tol jix jajcha sat ebꞌ. Catuꞌ jix yilon oc ebꞌ, tol jaꞌ Jesús. Jix yesnen pax qꞌueya sbꞌa. Jix yilontej ebꞌ, cꞌamxa mactxequel. 32Catuꞌ jix yalon ebꞌ jaxca tiꞌ:
—Yel toni, caw jix jul cu naꞌbꞌal yet jix yalon ey jon yul bꞌe, yet jix yakꞌon naꞌcha el ku, tzettaj chi yal yul An Juun Tzꞌibꞌebꞌilcanoj, ẍi ebꞌ.
33Jix too xacꞌal ebꞌ bꞌey Jerusalén yet jun txolan tuꞌ, jix il-le yin ebꞌ juslucꞌwan ẍejabꞌ Jesús tituꞌ yu ebꞌ, yetoj wanxa ebꞌ yetbꞌi ebꞌ. Yaman ecꞌ ebꞌ tituꞌ. 34Jix yalon ebꞌ tuꞌ tet ebꞌ cawan tuꞌ jaxca tiꞌ:
—Caw yel jix pitzcꞌu a Naj Kaawil. Jix xꞌoxa sbꞌa tet naj Simón tiꞌ, ẍi ebꞌ.
35Catuꞌ jix yalontej ebꞌ cawan tuꞌ tzet jix yun ebꞌ yul-laj bꞌe. Jix yalon pax tej ebꞌ tzet jix yun snaꞌcha el Jesús yu ebꞌ, yet jix xꞌion ecꞌ ixim pan.
Jix Xꞌoxa Sbꞌa Jesús Tet Ebꞌ Scuywom
(Mateo 28:16-20; Marcos 16:14-18; Juan 20:19-23)
36Lalanto yalon ebꞌ wan tuꞌ, jix yilontej ebꞌ, eyxa ecꞌ Jesús snan xol ebꞌ. Catuꞌ jix yalon jaxca tiꞌ:
—Ey ojabꞌ watxꞌcꞌulal snan je xol, ẍi Jesús tet ebꞌ.
37Jal ebꞌ, tucꞌal chi xiw ebꞌ catuꞌ caw chi qꞌueya scꞌul ebꞌ. Jaꞌ snaꞌon ebꞌ tol labꞌ jun chi yil ebꞌ tuꞌ. 38Yuxan jix yal tet ebꞌ jaxca tiꞌ:
—¿Tzet yuxan tucꞌal chi somcha el je cꞌul yet chin je yiloni? ¿Tzet yuxan ey je caabꞌcꞌulal win an? 39Ilaꞌla, ilwej jin kꞌabꞌ cꞌal wajan tiꞌ an. Jain toni, mitxꞌ jinwej an. Chi cam je yoc tꞌanan win an. Jaꞌ junoj labꞌ, toj ey ẍiꞌbꞌeal, toj ey sbꞌajil bꞌey chex oc mitxꞌan yin jaxca wet tiꞌ an, ẍi Jesús tet ebꞌ.
40Jix lawi yalon jun tuꞌ, jix xꞌoxon skꞌabꞌ tet ebꞌ tuꞌ, cꞌal yajan. 41Caxcꞌal chi tzala a ebꞌ, jacꞌalaꞌ ian cꞌal ma yaoc ebꞌ yin scꞌul, yutol tucꞌal chi qꞌueya scꞌul ebꞌ. Yuxan jix yal pax tet ebꞌ jaxca tiꞌ:
—¿Cꞌam mi niꞌoj tzet watxꞌ chin loꞌ titiꞌ? ẍi Naj tet ebꞌ.
42Yuxan jix yakꞌ niꞌoj bꞌolbꞌil pescado ebꞌ tet, /cꞌal niꞌan yaal awcabꞌ./ 43Jix ẍaꞌon ecꞌoj, catuꞌ jix sloꞌon sattaj ebꞌ. 44Yet jix lawi sloꞌoni, jix yalon pax tet ebꞌ jaxca tiꞌ:
—Jaꞌ tinaniꞌ, jix yun jaxca jix yun walon ey jex yet jix jin ecꞌ je yetoj. Ilaꞌla, jix wal ey jex tol sowalil oj yun jantaj tzetyetal tzꞌibꞌebꞌilcan wu an yul sley Moisés, yetoj tzet tzꞌibꞌebꞌilcan yu ebꞌ ẍejabꞌ Dios, yetoj wan chi alon win an yul libro Salmos, ẍi Jesús tet ebꞌ.
45Catuꞌ jix yakꞌon jajcha snaꞌbꞌal ebꞌ, yet watxꞌ chi naꞌcha el yu ebꞌ, tzet tzꞌibꞌebꞌilcan yul An Juun Tzꞌibꞌebꞌilcan tuꞌ. 46Yuxan jix yal tet ebꞌ jaxca tiꞌ junelxa:
—Jaꞌ yul An Juun Tzꞌibꞌebꞌilcan jin kꞌaneal, jain Cristo* jin tiꞌ an, tol sowalil oj jin camoj, yoxial tuꞌ, catuꞌ chin pitzcꞌu pax a xol ebꞌ camnaj. 47Yetoj pax oj, sowalil oj al-le el jin kꞌaneal xol ánima bꞌey junjun nación. Oj al-le el xol ebꞌ tol sowalil chi snaꞌ sbꞌa scꞌul ebꞌ yin spenail, yet watxꞌ chi joꞌole qꞌuey spenail ebꞌ tuꞌ yibꞌan. Jaꞌ bꞌey Jerusalén tiꞌ oj bꞌabꞌoj al-le el jin kꞌaneal, catuꞌ oj sajlemtoj bꞌey junjun conobꞌ. 48Jaex tiꞌ, oj je yakꞌ je bꞌa testigoal yin wan tiꞌ. 49Yakꞌnaj can Dios stiꞌ, tol ey jun oj eyol ey jex. Jaꞌton jun tuꞌ, oj jin chejtej. Yuxan echbꞌanewej bꞌey Jerusalén tiꞌ, masantaꞌcꞌal che chaꞌ je yip oj ale eytej satcan, ẍi Jesús tet ebꞌ.
Jix Paxa Jesús Satcan
(Marcos 16:19-20)
50Catuꞌ jix yiꞌontoj ebꞌ scuywom bꞌey scawilal conobꞌ Betania. Jix sqꞌuetxbꞌa a skꞌabꞌ tituꞌ, catuꞌ jix skꞌanon swatxꞌcꞌulal Dios yibꞌan ebꞌ. 51Lalanto skꞌanon swatxꞌcꞌulal Dios tuꞌ, catuꞌ jix iꞌle atoj satcan, catuꞌ jix cancan ebꞌ yu. 52Jix lawi yiꞌon ey sbꞌa ebꞌ tet, catuꞌ jix meltzo ebꞌ yin tzalacꞌulalil bꞌey Jerusalén. 53Junjun cꞌal cꞌu chi bꞌet ebꞌ bꞌey stemplo Dios. Jix bꞌet yalon watxꞌ kꞌane ebꞌ tet Dios.
S'ha seleccionat:
Lucas 24: knj
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.