Uan 3
3
Esusën Nicodemo chiaid
1Adnubien Edusaden yacnobidi Nicodemo cuëmëdquid icpondash. Aidi padiseobo yec abëtan chuiquid utsibobëd isadaidbon chuiquid tapa nepondash. 2Aidi inchëshën Esusbëd onquenuec chopanëdash. Adec choshon: Nuquin Papan namiaid icquimbien bëdambuen chuibanquin naic, quequin mibi tantiombi. Mimbi nadatiambocquin nabansho issun: Nuquin Papan namiaidënuidtsëquien aden nabantsiash, mibi caombi, quepanëdash Nicodemo.
3Adsho tantiashumbien Esusën naden chuipanëdash: Tantia. Mibi chuinu. Chuca uabi icquid yec Nuquin Papan namiacno mibi tabadtiapimbo iquendac. 4Adsho tantiashien: ¿Mitsipadec tsësiobi chuca uadpatsiash? Chidon padpiden usundoshon tishtiapimbuen iquec, quepanëdash Nicodemo. 5Adsho tantiashumbien Esusën: Mibi abimbo chuinu. Tantia. Nuquin Papan Mayanën tantiamiac chuca uadec acten mentoadabicquid yec Nuquin Papan namiacno puduedtiapimbo iquendac. 6Chidon tishaiduidtsëqui yec matsesën dadauidtsëqui nendac. Nuquin Papan Mayanën chuca uaquin tantiamiaidien Nuquin Papabëd tabadtequid nendac. 7Chuca uaquin padpiden tishacbimbuecquid Nuquin Papabëd tabadendac, ubi quesho tantiash: ¿Mitsipaden chuipec? ¿quequinda tantie? 8Tantia. Mibi chuinu. Cunquequid isadenquio icquid nec. Isadenquio icquimbi cute ishcunsho isash: Cunquequidën nac nec, mibi quepec. Adquiobidi isadenquio Nuquin Papan Mayan iquec. Isadenquio icquimbi aidën chuca uaid yec bëdambuec tabadsho issun: Nuquin Papan Mayanën chuca uaid nec, quequin mimbi tantiendac, quepanëdash Esus.
9Adsho tantiash: ¿Mitsipaden capec? queuapanëdash Nicodemo. 10Adoaquien Esusën: Isadaidbo Nuquin Papan Chiaid tantiamequin ¿chuibanquid icquimbida tantienquio ique? 11Tantia. Mibi abimbo chuinu. Umbi isondaidbëta umbi tantiondaidquio chuibanaqui ma mibitedishun tantienquio icpaboc. 12Umbi nidaidënshun naid chuibued tantienquio icquin ¿Mitsipaden Nuquin Papan abucshun nate umbi chuisho mimbi tantiape? 13Nuquin Papa yacno abuc nidec matses nidtanambo iquec. Nadquio iccosh, quequin matsesën chuitiapimbo iquec. Umbien Matsesën Tishaid icquimbi abucuësh chondaid icquin tantiendac. 14Nuquin Papan chiacpaden shubu nibëdacnoshon: Ma nëid isec nisin piaid bëdannu, queshun nisibimbuecnuc shocosh nacnenaid Moisesën cuesten dectampampic. Adecbidi Matsesën Tishaid yec matses cuidmenquio icnuec ubided cuidadec abuc cueste napotiaidën dectamëdendabi. 15Ma ubi tantiaquido uënësacsho cuidenquio icquin Nuquin Papan ënëdenquiocnoc abi yacno tabadmenu, quiash adendabi, quepanëdash Esus Nicodemo chiec.
Nuquin Papan matses abitedi tantiaquin naid
16Adashic Esus: Matses abitedimbo tantiaquidquio icquin Nuquin Papan aton Mado abentsëqui abided cuidmequin uënës uasho ubi tantiaquid cuidenquiocquin abi yacno ubëd ënëdenquiocnoc tabadmendac.#3.16 Ëndenquio Nuquin Papan Abadauan aton mado cuessunnemetsempampic. Nuquin Papambien aton madombo Esus cuessunnemepanëdash. Abadauanën naid iste bunquin Ene. 22.1-19. 17¿Matses cuidnuenda Nuquin Papan aton Mado chomepanëdash? Padenquio. Aton Mado tantiasho matses cuidenquio icquin abëdi tabadmenuen chomepanëdash.
18Nuquin Papan Aton Mado tantiaquido cuidenquio icquimbi Aton Mado abentsëcquid tantiesa icsho cuidendac. 19Nuquin Papan matsesmiaid icquin ambi icsambuen naid umbi chuibansho tantiashumbi matses icsambo icquidon ambi icsambuen naid ëntiapimbo icquin ubi tantiatiapimbo iquec. 20Adquidon: Uëshën chëncaquin tantiamiacbimbuen umbi icsambuen naid utsibo tantiamenushe, queshun ubi chieshëmpec. 21Nuquin Papan chiacpadec tabadquidombien ubi chieshënenquio iquendac. Adquidon Nuquin Papan namiacpadec bëdambuec tabadquin ismiac: Ma utsibon umbi bëdambuen naid tantiapanu, quiash ubi tantiate bunendac, quepanëdash Esus.
Uan acten mentoanquidën padpiden Esus chuiuaid
22Aden chiashic Esus abëd icquidobëd Edusaden yacnouësh nidec aid nidaid cuëshë Udea caidëmbidi nidpondash. Ambo iuec tabadquin Nuquin Papa tantiabenquido icsho acten mentobampondambi. 23Adembidi Uanën acten mentobampanëdash. Aden mentobanquin shubu daëdpactsëcquid Enon caid yacnoshon shubu daëdpactsëcquid utsi Sadin caid anoentsëqui acte nua yacnoshon matses dadpen acten mentobampanëdash. 24Chieshënquin quënën tsadunmiabi yac Uanën adopanëdash.
25Adnubien Uambëd icquido cun matses isadaidbo utsibëd: Mimbi icsambuen chiec, quec chushcananec: Uanëmbien Nuquin Papa tantiabenquido bëdambuen acten mentobanosh, quesho tantienquio yec Moisesën acten mëpamëdte chiampiduidi tantiec chushcanampanëdash. 26Adshumbien Uambëd icquidon: Nuquin chuiquid chiec nidnunid, quianec nidshun Uan chuituidpanëdash: Acte Odan caid ëquëmatsiucshun ¿mitsicquid: Nuquin Papan Chomiaid nec, mimbi cadio? Aidën matses dadpenquio acten mentobanac caosh. Adoac matses dadpenshun tsibanampac caosh, 27caquien Uanën: Nuquin Papan namiabicquidën aden natiapimbo iquec. 28Nuquin Papan Chomiaid Quidistu Mesias caidpenquio nebi, quequin mibitedi cuembo chiondambi. Nuquin Papan aidën bëyuc chomiaid icquin aid chote chuibanquidquio nebi, quequin umbi chuibansho mibitedishun tantiondac. 29Aden umbi chuibuedquio nec, quiash Esus chosho istanec cuishonquepobi. Cun matses aton chido bedmiombi, quiash cuishonquiacbimbuec cuishonquepobi. ¿Aden chido bedmequidën: Min bënëbëd nidenda, caquinda ictiosh? Padenquio. Bënëbëd nidmiash bëdambo yacbimbuec Esusbëd matses dadpen nidanniosh, quesho tantiash bëdambo iquebi. 30Umbi Nuquin Papan chiacpadombuen tantiamequin ënquin chuiquin tantiamiac umbi acten mentoaido daëdpactsëc yanendac. Padnuen umbi chuibuedën tantiamiac abi tantiaquido dadpenquio yanendac, quepanëdash Uan abëd icquido chiec.
Nuquin Papa yacnouësh choquid chiaid
31Adshumbic Uanën naden chuiuapanëdash: Esusquio bëdamboshëcquid nec. Aidi Nuquin Papa yacnouësh choquid yec abitedishun Icbombo nec. Padnueni nidaidën tabadquid matses yec: Nuquin Papa isondambi. Nadquio iccondash, quequin chuitiapimbo iquec. 32Esusëmbien ambi Nuquin Papa yacnoshon isnëdaidbëta ambi tantianëdaid chuibampec. Aden chiaqui matses dadpenshun: Abimbo caic, quequin tantiate bunenquio iquec. 33Aden aidën chiac tantiaquidombien: Nuquin Papa muesambo nec, quequin tantiendac. 34Nuquin Papan Chomiaidquio icquin Aidën Chiaidquio chuibanec. Nuquin Papan aton Mayan abëd tabadmiaid icquin nadatiambocquin nabanquin abimbo chuibanec. 35Ambi tantiaidquio icsho Nuquin Papan Aton Mado abentsëcquiobi abitedishun Icbombo icmiac. 36Adoaid Aton Mado tantiaquido icsho Nuquin Papan abi yacno tabadmendac. Padnuen aton mado tantiesabo icsho Nuquin Papan abi yacno tabadmenquio icquin mëyadtequid yacno nidmequin cuidquiendac, quequin Uanën chuipanëdash.
S'ha seleccionat:
Uan 3: mcfNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.