Ducas 14
14
Padiseobon shubun puduedshun Esusën bëdanmiaid
1Adashic chonoadtemaid uëshë utsin padiseobon chuiquidën shubun pec Esus puduedacsho issun: Nëid uëshë chonoadtemaid icnubi Esusën bëdanmenushe. Isnu, queshun padiseobo utsibo puduedash tabadquin caimbededpanëdash. 2Aden caimbedednubien dada podobëd nidte bidisquiaid ambobi tsadsho issun Esusën: 3Moisesën chiampid tantiamequidobëta padiseobo chuiquin: Chonoadtemaid uëshën daicsaidbëta nënquido bëdanmenquiocte uëshë nec, ¿quequinda mimbi tantiape? caquien 4aido otacquio tabadcuededpanëdash. Adsho issun podobëd nidte bidisquiaid dada Esusën mëdinquin bëdanmeshun: Nidec nid, cac nidpanëdash.
5Aden aid nidmeshun: Bëdanmenushe. Isnu, quequin abi caimbededquido chiec: Chonoadtemaid uëshëmbi shëcuë ëquëducquio icnuc uëdëshcaidën min mado ampaëdacsho issun badedquio bedtanquin ¿indoenquioda mimbi icpatsia? Adembidi baca bënë ampaëdacsho issun ¿badedquio bedenquioda mimbi icpatsia? quepanëdash Esus. 6Aden chuisho tantiashun ëcbedenquio yec otacquio tabadcuededpanëdash.
Pec nidta, caido chiaid
7Ambobi tsadquin: Pec nidta, caido chochoash: Chuiquidën tsadten tsadnu, quequinuidtsëqui tantiec tabadsho issun Esusën naden chuipanëdash: 8-9Chido bednu, quequidën: Pec nidta, cac choash Chuiquid tapa tsadte caidën tsadenda. Icbon chiabi tsadsho shubu icbon ambi: Pec nidta, caid utsi chuiquid chosho issun: Chuiquid tapa choeque. Ma ambo tsadnu. Uanno tsadtan, icbon canushe. Adoac mibi natiatsiaque. Icbon chiabi chuiquidon tsadten tsadenda. 10Adquid icnuc: Pec nidta, cac choash tsadte uannocquidën tsadta. Adsho issun: Uanno mibi tsadeque. Nëmbo chuiquidbëd tsadec cho, mibi shubu icbon catsiash. Adoac mibëd tabadquidon mibi bëdambuen isendac. 11Utsien abibi tantiadec: Ubiuidtsëqui bëdambo iquebi, quequin utsibo ismenuenuidi naquido Nuquin Papan: Icsambo iquec, caindac. Padnuen utsi Nuquin Papan chiacpadombuen naquin utsibo nashunquid yec utsibo ismeteuidi bunenquio icsho Nuquin Papan: Bëdambo iquec, caindac, quepanëdash Esus abëta iuedaido chiec.
12Aden aido chiashic abi iuedquid caic Esus nadpanëdash: Pemenu, quequin mimbi tantiaido yec mibëd icquid yec min utsibo yec atona dadpen icquido yec quequidouidi pec nidta, cainda. Aido pemiac adembidi mibi: Pec nidta, cauaindac. 13Pemenu, quequin atona nibëdquido yec caputiapimbocquido yec tidinquequido yec bëshuaido yec quenuc: Pec nidta, cata. 14Adquidon mibi cuidquin pemetiapimbo iquec. Adquido pemiash: Bëdambo iquebi, mibi quendac. Adquid abi tantiaquido uënësaido uincuenmete uëshëmbi Nuquin Papan abi yacno puduedmequin mibi bëdambo icmendac, quepanëdash Esus.
Utsi chiacbimbuen pec tabadte chiaid
(Mat. 22.1-10)
15Aden Esusën chuisho tantiash abëtan pec tsadquid abentsëc: Nuquin Papan namiacno nidshun aidbëtan pec bëdambo icmiaid iquendac, quepanëdash.
16Adoaquien aid tantiamenuen utsi chiacbimbuen chiec Esus nadpanëdash: Pemenu, quequin dada abentsëcshun: Aid uëshënquio pec chota, quequin matses dadpenquio chuiposh. 17Ambi chuibuedquio uëshë chonoc: Umbi chuibuedtedi: Pete codoquiaccoshe. Pec nidta, quequin chuitan, cac aton iua nidposh. 18Adec nidshun chuituidaquien: Nidtiapimbo iquebi, queposh abitedi. Abia chuituidaid abentsëc nadposh: Cun tied umbi nëbi bedbued istannu. Nidenquio iquebi, quiosh, cata, queposh.
19Utsibic: Baca bënë 10ted umbi bedbuedën: ¿Ada bëdambuen nimbanquin buaneque? Tantannu. Nidenquio iquebi, quiosh, cata, queposh.
20Utsibic: Nëbimbobi cun chido bedombique. Nidenquio iquebi, quiosh, cata, queposh.
21Aden chuisho tantianec choshon aidon chiacpaden iuan aton icbo chuituidposh. Adsho tantiash nëishshun icbon: Umbi isacmaido yacno nidshun: Pec nidta, catan. Atona nibëdquid yec capuenquiocquid yec bëshuaid yec quenuc chuitan, cac aton iua nidposh.
22Adshun chuitanec aidobëdi chochoshon: Mimbi chuibuedtedi bëombi. Aido icnubi abi tsadte iquec, caposh iuan.
23Adoaquien icbon: Shubu ënëdacno nidshun utsibobi istuidshun bëuata. Ma adoac chochoash cun shubun tsucus tsucustsëcquio yec puduedash ma tabadpanu. 24Abia umbi: Pec cho, cauidbuedon ubëtambi petiapimbo iquendac, queposh icbo, quepanëdash Esus.#14.21-24 Nuquin Papan Chiaid tantiaquidënquio naden chuipec. Aden isadaidbon abi tantiatiapimbo icsho issun Nuquin Papan isadaidpembotsen chuimequin abi tantiaquido dadpen icmepanëdash. Adquid iquendac, quequin pete pemete chuipanëdash, quequin chuipec.
Esus tantiaquidquio icnu, quequin nate chiaid
(Mat. 10.37-38)
25Adanec nidsho matses dadpenshun tsibanac abi choacmi bidiadshun isec Esus nadpanëdash: 26Ubi caic: Mibi tantiaquidquio icnu, quequidëmbi nëidted tantiaquid iquec. Aton papauidi tantiaquinc aton titauidi tantiaquinc aton chidouidi tantiaquinc aton bacuëbouidi tantiaquinc aton utsibouidi tantiaquinc abiuidtsëqui datantiadquinc caquid yec ubi tantiaquid ictiapimbo iquendac. 27Utsibon chieshënac ubi tantiaquid icbuedëmbi chieshtoquin tantienquio yanshun umbi chiacpadombuen natiapimbo iquendac. Adquidotsen ubi tantiaquid ictiapimbo iquendac, quepanëdash Esus.
28Aden chiashic Esus: Shubu uanu, queshun: Nëidtenquio nanu, quequin tantiashun aidtedquiobidi bëshun toccashun ¿shubu uainquioda mimbi icpe? 29Aden tantienquiocquidën shubu uate buintad teshun abentse abentsen bëbëquin baded nainenquiocsho issun utsibon naden mamënshumbededquin: 30Bëdambuen tantienquio icquin shubu uaquin bedambuedi baded nainenquio icquid yec tantiesambo nec, quequin isbededendac.#14.30 Esus tantiaquid icnu, queshun Umbi Chiaid bëdambuen tantiabenash adquidbidi icpec. Ubi tantiauidtsëcquid ubi tantiaquid ictiapimbo iquec, quequin Esusën chuipec.
31Adembidi chuinu. Tantiata: Mibëd icquidobëta mibi cuesnannuec chuiquid utsi nëmbo chochoec, quesho tantiashun ambocquid chuiquidën naden tantiapec: Ubëd icquido daëdpactsëcquio 10midted iquec. ¿Ada aidtedtsëqui iquec cuesambo icquin chuiquid utsi abëd icquido 20midtedbëta cuesquin dëniacpec? Ai, dëniactsiambi, queshun: Ma chobono, quequin caimpec. 32Adshumbic abëd icquido dacuëdquido icsho issun chuiquidën: Chuiquid utsi choabicshobi 10midted chuiquidën abëd icquid nidmec. Chuiquid choquid naden chui: Padi. Mibëdi bëdambuec tabadtsiabi. Ubëd icquidon chuiquid icta, quiosh cun chuiquid, quequin chuitan, quequin chuiposh. 33Adquid icnuc ubi tantiaquidquio icnuen bëdambuen tantiata. Cun chuiquid nec, quequin tantiaquin mitsanatedi nianta. Adoesa ubi tantiaquid ictiapimbo iquendac, quepanëdash Esus abi tsibananquido chiec.
Sa batapentsëcquioquid chiaid
(Mat. 5.13; Madc. 9.50)
34Aden chiashic Esus nadpanëdash: Sa bëdambocquid pete casecac aidbëd daëdash bëdambo iquec. Sa bëdambo icbuedi icsacsho ¿Mitsipaden bëdambo icmeuapec? 35Adquid icsho nidaidbëta daëd uashun utsitedi nabannun dayun uanu, quenquio icquin secatequid nendac.#14.35 Adecbidi: Esus tantiaquidquio icnu, quiash chieshtoquiash abi tantiaquidpenquio yanendac, quequin tantiamenuen Esusën aden chuipanëdash.
Pabiate shëcuë choquidën umbi chuibued bëdambuen tantiata, quepanëdash Esus.
S'ha seleccionat:
Ducas 14: mcfNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.