Mr 1
1
Juan Bautista ch'usaj lugarpi willan
1Diospaj Churin Jesucristomanta sumaj evangelio cay jinata kallarin.
2Diospaj profetan Isaías escriberkan Dios Churinta cachamunanmanta:
“Kanmanta ñaupajta willajniyta cachamuni,
runacunapaj sonkonta waquichinanpaj
ñanta jina.
3Ch'usaj lugarpi uj runa alto vozwan
willaconka: ‘Señor jamuchcan.
Sonkoyquichista waquichiychis
recto ñanta jina.’ ”
4Ajinata Juanka ch'usaj lugarpi bautizachcaspa willararkan: “Diosman cutiricuspa bautizachicuychis, juchayquichiscunata Dios perdonananpaj” nispa. 5Judeapi caj tucuy provinciamanta Jerusalén llajtamantapas achqha runacuna uyarej jamuchcarkancu. Juan juchancu willacojcunata bautizarkan Jordán mayupi.
6Juanpaj p'achantaj camello millmamanta carkan, karamanta cinturonwan chumpiycuska, miqhunantaj langosta niska athun t'inticuna t'aja misq'ipiwan. 7Pay willarkan: “Khepayta jamuchcan nokamanta astawan atiyniyoj. Paypaj ñaupakenpi ni imapaschu cani, abarcanta pascaranallaypajpas. 8Nokaka unullawan bautizachcayquichis. Paycajtaj Santo Espirituwan bautizasunquichis” nispa.
Juan Jesusta bautizan
9Chay p'unchaycunapi Jesús Galileapi caj Nazaret llajtamanta llojserkan. Juantaj payta bautizarkan Jordán mayupi. 10Unumanta llojsiytawan, Jesús ricorkan janaj pacha quicharacuchcajta, Santo Espiritutataj paloma jina uraycamuchcajta. 11Diospaj voznin janaj pachamanta nimorkan: “Kan munaska Chureyka canqui, nokapaj ajllaskay.”
Jesús pruebata pasan
12Chay pasayta Santo Espíritu Jesusta ch'usaj lugarman pusarkan. 13Chaypi cachcarkan sajra animalcunawan tawa chunca p'unchayta. Supay Satanás tucuy imata ruwachcarkan Jesusta juchallichinanpaj, nitaj aterkanchu. Diospaj angelnincunataj Jesusta sirverkancu.
Jesús Galilea provinciapi willaran
14Juan Bautistata carcelaycojtincu, Jesús Galilea provinciaman purerkan Diospaj evangelionta willananpaj. 15Nerkantaj: “Diospaj gobiernon kayllallapiña. Cunan Diospaj ajllaskan tiempo chayamunña. Chayraycu juchayquichiscunata sakespa Diosman cutiricuychis, paypaj evangelionta creeychis” nispa.
Jesús tawa discipuloncunata wajan
16Jesús Galilea kocha cantonta purichcaspa, Simonta paypaj wauken Andrestawan ricorkan. Paycunaka challwa jap'inancupaj llicata kochaman cachaycuchcarkancu, imaraycuchus challwiru carkancu. 17Jesustaj paycunata nerkan:
—Nokawan puriychis, nokataj runacunata Diosman pusamojta ruwaskayquichis, imaynatachus challwata jap'ej cachcanquichis jinata.
18Chhicapacha llicancuta sakerpayaspa, Jesuswan puriporkancu.
19Uj chhicallantaraj ñauparispa, Jesús Zebedeopaj churincunata, Santiagota wauken Juantawan ricorkan. Botepi llicancuta jallch'aspa cachcarkancu. 20Jesustaj wajarkan discipuloncuna canancupaj. Ajinapi paycunaka tatancu Zebedeota llanc'ajcunatawan botepi sakepuspa, Jesuswan puriporkancu.
Jesús sajra espirituyoj runata alliyachin
21Jesús discipuloncunawan Capernaum llajtaman chayarkan. Samana p'unchaypi Jesús sinagoga wasiman yaycuspa runacunata yachachiyta kallarerkan. 22Uyarejcunataj chay jina autoridadwan yachachiskanmanta muspharkancu, imaraycuchus leymanta yachachejcuna mana jinatachu yachacherkancu. 23Chay sinagoga wasipi uj runa carkan, paytaj sajra espirituyoj wajach'acorkan:
24—¡Nazaret llajtayoj Jesús! ¿Imapaj meticuwanquichis? ¿Tucuchanawayquichispajchu jamunqui? Allinta rejsiyqui pichus caskayquita. Kanka Diospaj Santon canqui.
25Jesús sajra espirituta c'amerkan:
—¡Jup'allay! ¡Llojsiy paymanta! —nispa.
26Sajra espiritutaj runata t'ucuta jap'icherkan. Sinchi callpawan wajach'acuspataj, paymanta llojsiporkan. 27Tucuy ricojcunataj musphararkancu, tapunacorkancutaj:
—¿Imataj cayri? ¡Sinchi autoridadwan yachachin! ¡Sajra espiritucunawanpas casuchicun! —nispa.
28Chaypacha tucuy Galilea provinciapi Jesusmanta yachacorkan.
Jesús Pedropaj suegranta alliyachin
29Jesús sinagoga wasimanta llojsispa, Santiagowan Juanpiwan Simonpaj Andrespajwan wasinman purerkan. 30Simonpaj suegran sinchi calenturawan puñunapi cachcarkan. Chayta Jesusman willarkancu. 31Jesustaj onkoskaman chimpaycuspa, maquinmanta jap'ispataj, jataricherkan. Chhicapacha calenturamanta alliyaporkan, paycunatataj atendiyta kallarerkan.
Jesús achqha onkoskacunata alliyachin
32Ch'isiyaycuytataj tucuy onkoskacunata sajra espirituyoj cajcunatawan Jesusman pusamorkancu. 33Llajtapacha wasi puncuman tantacamorkancu. 34Jesustaj achqhayojta tucuy ima onkoyniyojcunata alliyacherkan. Achqhayojmantataj sajra espiritucunata katerkorkan. Sajra espiritucunataj Jesusta rejserkancu. Chayraycu Jesús paycunata mana parlacherkanchu.
Jesús sinagogacunapi evangeliota willaran
35Tutapiraj Jesús jatarispa, ch'usaj lugarman oracionta ruwananpaj llojserkan. 36Simontaj uj discipuloncunapiwan Jesusta masc'aj llojserkancu. 37Taripaspataj nerkancu:
—Tucuy masc'achcasunquichis —nispa.
38Jesustaj contestarkan:
—Cay kaylla llajtacunaman purisunchis evangeliota willaraj. Chaypaj cay pachaman jamuni.
39Ajinamanta Jesús tucuy Galileanejpi purichcaspa, sinagoga wasicunapi evangeliota willaraj, sajra espiritucunatapas katerkoj.
Jesús lepra onkoyniyojta alliyachin
40Uj lepra onkoyniyoj runa Jesusman chimpaycuspa, konkoriycuspataj nerkan:
—Munanqui chayka, onkoyniymanta alliyachiwayta atinqui —nispa.
41Jesús qhuyapayaspa llanqhaycorkan. Nerkantaj:
—Munani. ¡Alliyaska cay! —nispa.
42Jesús chayta nejtin jina, alliyaporkan. 43Jesustaj cachapuspa, sinchita mandarkan:
44—¡Uyariy! Ama pimanpas cayta willanquichu. Jerusalenman puriy, sacerdotemantaj ricuchicamuy alliyaskaña caskayquita, limpiochacuna costumbreta ruwanayquipaj. Moisespaj mandacuskanman jina ofrendata apamuy, ajinapi tucuy yachanancupaj alliyaskaña caskayquita.
45Paytaj llojsiytawan, tucuynincuman willaracaporkan chay pasaskanta. Chayraycu Jesuska pacallamantaña llajtacunaman yaycoj, astawanpas ch'usaj lugarcunapi puriycachaj; chaywanpas runacunaka tucuynejmanta payman jamoj cancu.
S'ha seleccionat:
Mr 1: qul
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1985, Wycliffe Bible Translators, Inc. All rights reserved.