San Juan 1
1
Benꞌ naca xtiꞌidzaꞌ Diuzi guquëꞌ beꞌmbyu
1Caora binecueꞌ lao yedyi layu, bazucazi tu benꞌ naca xtiꞌidzaꞌ Diuzi. Lëbenꞌ naꞌ zulënëꞌ Diuzi tuz̃e, lëscanꞌ naquëꞌ Diuzi. 2Desde aodixu Diuzi yedyi layu, bazulanëꞌ nacalënëꞌ Diuzi tzaz̃e. 3Conlë lëbëꞌ bë Diuzi yugulu ta de lao yedyi layu. Ni tu ta bë Diuzi bibënnëꞌn sin lëbëꞌ. 4Por lëbëꞌ de yelaꞌ neban quiero. Naquëꞌ ca quie tu guiꞌ ta useniꞌn uluꞌen xnezaro ga rdaro. 5Lëguiꞌ naꞌ rseniꞌn quie yaca benꞌ rda lao lato lao chula. Nitu nitu nunu saqueꞌ usula len.
6Uzu tu benꞌ lao Juan, benꞌ useꞌelaꞌ Diuzi. 7Bidëꞌ udixogueꞌnëꞌ benëꞌ unëꞌ huida tu benꞌ naca ca quie guiꞌ rseniꞌn ga naca chula. Lëcanaꞌ guca Juan testigo de que huida benꞌ naca ca quie guiꞌ rseniꞌn ga naca chula. 8Juan binaquëꞌ benꞌ zazaꞌ, benꞌ naca ca guiꞌ rseniꞌn ga naca chula. Nacazëꞌ tu testigo ta useꞌelaꞌ Diuzi ta quixogueꞌnëꞌ quie benꞌ zazaꞌ, benꞌ naca ca quie guiꞌ rseniꞌn ga naca chula. 9Naꞌra babidacazi benꞌ naca ca quie guiꞌ rseniꞌn ga naca chula, benꞌ ruꞌe diꞌidzaꞌ li, benꞌ ruzioñeꞌe yaca benꞌ nitaꞌ lao yedyi layu.
10Bidanëꞌ lao yedyi layu. Udixogueꞌnëꞌ benëꞌ diꞌidzaꞌ laꞌiya quie Diuzi. Baꞌalaꞌcazi conlë lëbëꞌ bë Diuzi yugulu ta de lao yedyi layu, bibezaque yaca benëꞌ chi lëbëꞌ. 11Lëbëꞌ uzunëꞌ lao yedyi quienëꞌ, naꞌ biz̃i yaca benꞌ lao yedyi quienëꞌ, biuyezilaꞌadyiꞌyaquëꞌ lëbëꞌ. 12Pero con bala benꞌ uyezilaꞌadyiꞌ lëbëꞌ, lëbenꞌ naꞌ bëꞌnëꞌ derecho gacayaquëꞌ z̃iꞌi Diuzi. 13Pero netzaꞌ quie yaca benꞌ gaca z̃iꞌi Diuzi, porque cala mandado quie benëꞌ gacajëꞌ z̃iꞌi Diuzi, cala danꞌ golojëꞌ nitaꞌjëꞌ lao yedyi layu gacajëꞌ z̃iꞌi Diuzi, dechanꞌ Diuzicazi bë canaꞌ gacajëꞌ z̃iꞌi Diuzi.
14Benꞌ naca xtiꞌidzaꞌ Diuzi guquëꞌ tu beꞌmbyu. Uzunëꞌ lado raꞌo tu chiꞌ. Blëꞌëndoꞌ yelaꞌ huaca quienëꞌ, blëꞌëndoꞌ tuzi lëbëꞌ naquëꞌ z̃iꞌi Diuzi, benꞌ nedyëꞌë raꞌo, benꞌ ruꞌe diꞌidzaꞌ li. 15Unë Juan udixogueꞌnëꞌ quie benꞌ naꞌ unëꞌ:
―Quie benꞌ naꞌ uniaꞌ caora niaꞌ benꞌ zazaꞌra zenao nëꞌëdiꞌ, nacarëꞌ benꞌ z̃e ca nëꞌëdiꞌ como bazulanëꞌ caora uzuaꞌ nëꞌëdiꞌ. ―Canaꞌ una Juan.
16Yelaꞌ benꞌ huen quienëꞌ taz̃e naꞌ bënëꞌ quiero bëlaꞌiyanëꞌ raꞌo yuguluro. 17Lao naꞌa Moisés pcaꞌn Diuzi ley quienëꞌ. Pero lao naꞌa Cristo neziro nedyëꞌë Diuzi raꞌo, neziro ca naca tabala quie Diuzi. 18Nitu nitu nunu nuebëꞌ Diuzi. Tuzi z̃iꞌinëꞌ, benꞌ dugalo nacalë Diuzi tuz̃e, lënëꞌ ruzioñeꞌenëꞌ raꞌo ta huebëꞌro Diuzi.
Uzë Juan cule quie Jesucristo
(Mt. 3.11‑12; Mr. 1.7‑8; Lc. 3.15‑17)
19Yaca benꞌ Israel, yaca benꞌ nitaꞌ ciudad Jerusalén, useꞌelaꞌyaquëꞌ yaca pxuzi len yaca benꞌ naca familia quie Leví ta yenabayaquëꞌ Juan chi naquëꞌ benꞌ Cristo.
20Biz̃i dyëꞌëdi unëꞌ:
―Cala nëꞌëdiꞌ benꞌ Cristo.
21Naꞌra tatula unayaquëꞌ rëbiyaquëꞌ lëbëꞌ:
―¿Nuz̃i nacoꞌ luëꞌ chiꞌ? ¿Nacoꞌ benꞌ profeta, o chi nacoꞌ benꞌ lao Elías?
Naꞌ biz̃i una Juan rëbinëꞌ leyaquëꞌ:
―Cala Elías nëꞌëdiꞌ.
Pero tatula unayaquëꞌ rëbiyaquëꞌ Juan:
―¿Nacoꞌ benꞌ profeta, benꞌ zazaꞌra?
Naꞌra bequëbinëꞌ unanëꞌ:
―Cala nëꞌëdiꞌ.
22Biz̃i tatula rëbiyaquëꞌ lëbëꞌ:
―¿Nuz̃i nacoꞌ luëꞌ chiꞌ? Deyeyuꞌandoꞌ tu diꞌidzaꞌ quioꞌ ta inezi yaca benꞌ useꞌelaꞌ nëtoꞌ. ¿Cabiz̃i inaoꞌ? ¿Nuz̃i nacoꞌ luëꞌ?
23Naꞌra una Juan rëbinëꞌ leyaquëꞌ:
―Nacaꞌ tu benꞌ rnë zidzo lao lato ga bidyia yuꞌu. Niaꞌ canꞌ con ca baona profeta Isaías, benꞌ uzu dza naꞌte, niaꞌ: “Usalole tu neza li, danꞌ bazaꞌ xaꞌnro, benꞌ useꞌelaꞌ Diuzi.”
24Naꞌ biz̃i yaca benꞌ uyo yegueꞌlë Juan diꞌidzaꞌ, nacayaquëꞌ benꞌ useꞌelaꞌ yaca benꞌ partido fariseo. 25Naꞌra unayaquëꞌ rëbiyaquëꞌ lëbëꞌ:
―Chi binacoꞌ benꞌ Cristo, ni Elías, ni benꞌ profeta, ¿naꞌa bixquienꞌ ruꞌeloꞌ lao yaca benëꞌ?
26Naꞌra una Juan rëbinëꞌ leyaquëꞌ:
―Tali ruꞌa lao yaca benëꞌ con nisa, pero entre ladole huida tu benꞌ binubëꞌle. 27Zazaꞌrëꞌ zenaohuëꞌ nëꞌëdiꞌ. Tanto naquëꞌ benꞌ z̃era ca nëꞌëdiꞌ, ni lëꞌëtiꞌ bibi zacaꞌ ni siquiera biyeyaz̃ogaꞌ cuiogaꞌ guidi yuꞌu niꞌanëꞌ. ―Canaꞌ una Juan.
28Lëcanaꞌ uz̃acayaquëꞌ lao lato laona Betábara, ga regaꞌnnan gaꞌalaꞌ ga de yao Jordán, con ganꞌ bëꞌ Juan lao yaca benëꞌ.
Jesucristo, benꞌ naca ca becoꞌ z̃iꞌilaꞌ, bia naca gun quie Diuzi
29Biz̃i beteyu blëꞌë Juan bazaꞌ Jesús gaꞌalaꞌ. Naꞌ unëꞌ rëbinëꞌ yaca benꞌ nitaꞌ naꞌ:
―Ulenaꞌ, lëbenꞌ ni naquëꞌ ca becoꞌ z̃iꞌilaꞌ, bia naca gun quie Diuzi. Lëlëbëꞌ cubëꞌ dulaꞌ xquia quie yaca benëꞌ nitaꞌ lao yedyi layu. 30Quie benꞌ niga uniaꞌ caora niaꞌ: “Benꞌ zazaꞌra zenao nëꞌëdiꞌ, nacarëꞌ benꞌ z̃e ca nëꞌëdiꞌ, como danꞌ bazulanëꞌ caora uzuaꞌ nëꞌëdiꞌ.” 31Biz̃i nëꞌëdiꞌ biunezdaꞌ nu naquëꞌ, pero zaꞌ ruꞌa lao yaca benꞌ Israel con nisa tacuenda ineziyaquëꞌ nu naquëꞌ.
32Lëzi unarë Juan:
―Blëꞌëdaꞌ uyezi Bichi Be quie Diuzi, zaꞌnëꞌ guibá ca uyezi biu, yasënëꞌ ga zë Jesús. 33Biz̃i nëꞌëdiꞌ biunezdaꞌ nu naquëꞌ. Pero benꞌ useꞌelaꞌ nëꞌëdiꞌ ta zaꞌ ruꞌa lao yaca benëꞌ unëꞌ rëbinëꞌ nëꞌëdiꞌ: “Cati ilëꞌëloꞌ Bichi Be quiaꞌ chezinëꞌ tzasënëꞌ ga zë tu beꞌmbyu, lëbenꞌ naꞌ udzeꞌnëꞌ Bichi Be quie Diuzi luꞌu laxtaꞌo yaca benëꞌ.” 34Blëꞌëdaꞌ guca quie benꞌ ni con ca una Diuzi. Quie lenaꞌ nacaꞌ testigo lëlëbëꞌ naquëꞌ z̃iꞌi Diuzi.
Udilo Jesús yaca benꞌ inao lëbëꞌ
35Biz̃i beteyu tula, zë Juan len chopa yaca benꞌ nao lëbëꞌ. 36Cati blëꞌënëꞌ ude Jesús ganꞌ zënëꞌ unëꞌ:
―Ulenaꞌ, lëbenꞌ ni naquëꞌ ca becoꞌ z̃iꞌilaꞌ, bia naca gun quie Diuzi.
37Lao rupate yaca benꞌ zio nao Juan, beyaquëꞌ ca una Juan. Naꞌra zioyaquëꞌ unaoyaquëꞌ Jesús. 38Naꞌra beyëcho Jesús unaꞌnëꞌ xcuꞌudzunëꞌ blëꞌënëꞌ zio yaca benëꞌ zenao lëbëꞌ. Naꞌ unëꞌ rëbinëꞌ leyaquëꞌ:
―¿Cabiz̃i rguilole?
Naꞌra unëyaquëꞌ rëbiyaquëꞌ lëbëꞌ:
―Maestro, ¿gaz̃i idyinloꞌ?
39Naꞌra una Jesús:
―Uleda, hualëꞌële ganꞌ idyinaꞌ. Naꞌra uz̃iꞌyaquëꞌ ziolëyaquëꞌ lëbëꞌ blëꞌëyaquëꞌ ganꞌ bdyinnëꞌ. Lëganꞌ naꞌ begaꞌnlëyaquëꞌ lëbëꞌ danꞌ uyëꞌënëꞌ dza, baruen cadu reda tapa quie zadzeꞌ.
40Biz̃i lado chopa benꞌ be ca una Juan unaoyaquëꞌ Jesús, zu tunëꞌ laohuëꞌ Andrés, biꞌ bichi Simón Pedro. 41Canaꞌ laoyote Andrés yedilonëꞌ ga zu bichinëꞌ Simón, naꞌ gudyinëꞌ lënëꞌ:
―Abedilandoꞌ benꞌ useꞌelaꞌ Diuzi, benꞌ naca Cristo.
42Naꞌra uquiëꞌ Andrés biꞌ bichinëꞌ Simón ganꞌ zë Jesús. Biz̃i caora blëꞌë Jesús Andrés len Simón, unëꞌ rëbinëꞌ Simón:
―Luëꞌ Simón, z̃iꞌi Jonás, ixubaꞌ laoloꞌ Cefas, ta inaro: Pedro.
Ulio Jesús Felipe len Natanael, gucajëꞌ benꞌ nao lëbëꞌ
43Lëzirë beteyu tula, Jesús uz̃iꞌnëꞌ zionëꞌ Galilea. Lëganꞌ naꞌ bedilanëꞌ Felipe, naꞌ gudyinëꞌ lëbëꞌ:
―Unao nëꞌëdiꞌ gacoꞌ benꞌ quiaꞌ ―unëꞌ rëbinëꞌ lëbëꞌ.
44Naꞌra benꞌ yedyi Betsaida naca Felipe. Lëlao yedyi naꞌ zurë Andrés len Pedro. 45Biz̃i Felipe bedilanëꞌ Natanael nëꞌ rëbinëꞌ lëbëꞌ:
―Bedilandoꞌ tu benꞌ rnën quie lëꞌë guichi bë Moisés, len yaca guichi bë yaca benꞌ profeta. Lëbenꞌ naꞌ laohuëꞌ Jesús, z̃iꞌi José, benꞌ yedyi Nazaret.
46Naꞌra una Natanael rëbinëꞌ Felipe:
―¿Cabiz̃i tu tahuen ero lao yedyi Nazaret?
Naꞌra bequëbi Felipe:
―Uda, ilëꞌëloꞌ.
47Caora blëꞌë Jesús bazaꞌ Natanael, naꞌra unë Jesús cani:
―Bazaꞌ tu benꞌ naca dugalo benꞌ Israel, benꞌ birziꞌ yëꞌ.
48Biz̃i Natanael unëꞌ rëbinëꞌ Jesús:
―¿Cómo nubëꞌloꞌ nëꞌëdiꞌ?
Naꞌra una Jesús rëbinëꞌ lëbëꞌ:
―Bala blëꞌëdaꞌ luëꞌ ga reꞌloꞌ z̃an yaga higo tu binequixogueꞌ Felipe luëꞌ.
49Naꞌra una Natanael rëbinëꞌ Jesús:
―Maestro, luëꞌ nacoꞌ z̃iꞌi Diuzi, benꞌ zaꞌ inabëꞌ yaca benꞌ Israel.
50Biz̃i una Jesús rëbinëꞌ Natanael:
―¿Baguleloꞌ danꞌ niaꞌ blëꞌëdaꞌ luëꞌ ga reꞌloꞌ?
51Lëzi unarë Jesús rëbinëꞌ leyaquëꞌ:
―Tali rniaꞌ leꞌe, nacaꞌ bichi yugulu benëꞌ, naꞌ hualëꞌële tzalo guibá chezi yeyëpi yaca ángel idyinjëꞌ gan zuaꞌ lao yedyi layu.
S'ha seleccionat:
San Juan 1: zpc
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1986, Wycliffe Bible Translators, Inc. All rights reserved.