उत्पत्ती 7
7
नोआह ठेयब डोंगाम ओव़शो
1मिनु परमप्रभु यावेमी नोआह कली “गे नु इ खिं ङा मुर नेल्ल शी के ठेयब डोंगामी ओव़ङीन। मारदे हना एको पाला ङा मुर आन दातेमी गे का ला ठीक पाइब बाक्नेवे। उत्पत्ती ६:८ 2गे चढ़ेचा दुम्ब बी ब्यफ, क्यारश बोका, भेडा सांड रे ७ जोड लतो। उत्पत्ती ८:२०; लेवी ११:- 3मिनु चढ़ेचा दुम्ब सरीङम बेरब चिक्ब यो ७ जोड लतो। भाले नु पोथी लतो। मारदे हना मेकोपुकी रागीमी ब्रोंइचा माल्नीम। 4गो ७ नाक्त नोले ४० नाक्त नु ४० नाक्दो सम्म रेउ यिपाइक्नुङ। मिनु आं सेल्शो रागीम मार मार ब्रोंइशा बाक्मा, मेको नेल्ल आन कली साइक्नुङमी” देंमाक्त। 5मिनु परमप्रभु यावेमी मार मार अरेवा, नोआहमी नेल्ल टिशा पवा बाक्त।
6रागीमी रेउ यिचा गोवानु, नोआह ६ सहे बर्स दुम्शो बाक्माक्त। 7मिनु नोआहम मार पवा बाक्त देंशा हना, ङोंइती आ तौपुकी, आ मीश, आ चाइमीपुकी ब्वाक्कु रे प्रोंइचा कली ठेयब डोंगामी ओव़पाइक्मी बाक्त। १ पत्रुस ३:२० 8मिनु चढ़ेचा दुम्ब बस्तु, चढ़ेचा मदुम्ब बस्तु नु चिक्ब नु मारेइ मारेइ खपीम ग्रेशा गाक्ब आइक्च जन्तु, 9निक्निक्शी बी ब्यफ, जोड जोड भाले पोथी नोआह नु ठेयब डोंगामी ओव़मा बाक्त। परमप्रभुमी दोपा नोआह कली अरेवा, मोपा पवा बाक्त। उत्पत्ती ६:१९-२० 10मिनु ७ नाक्त नोले रागीम ब्वाक्कु ब्रीचा गोवा बाक्त।
11मिनु रेउ यिमेनु, उइ रे यो ब्वाक्कु बारशा कुचा गोवा बाक्त। मेना नोआह ६ सहे बर्स, महिना निक्शी १७ नाक्त दुम नाक्त मोदेंशो दुम्माक्त। प्रकाश ९:१ 12मिनु ४० नाक्त नु ४० नाक्दो शुश रेउ यिमाक्त।
13मेको रेउ यिचा आ ङोंइती नाक्ती नोआह नु आ तौ शेम, हाम, नु यफेथ सांफा, नोआह आ मीश नु आ चाइमी सांफा मेको डोंगामी ओव़मा बाक्त। 14मिनु मारेइ मारेइ जन्तु, मारेइ मारेइ बी ब्यफ, क्यारश भेडा, मारेइ मारेइ खपीम ग्रेशा गाक्ब आइक्च जन्तु नु मारेइ मारेइ फ्रां पाइश्शो, ब्रोंइशा बाक्ब जन्तु 15जोड जोड पा नोआह नु ठेयब डोंगामी ओव़मा बाक्त। 16मिनु ब्रोंइशा बाक्ब नेल्ल जोड जोड पा, भाले पोथी नेल्ल ओव़मा बाक्त। परमप्रभुमी नोआह कली दोपा अरेवा, मोपा नेल्ल टिशा पवा बाक्त। मेको नेल्ल ओव़मा नोले परमप्रभु यावेमी लाप्चो चोक्गा बाक्त। उत्पत्ती ६:१९
17मिनु ब्वाक्कु ४० नाक्त सम्म रागीम ब्रीना ब्रीन बाक्माक्त। ब्वाक्कु शुश बारशा, ब्वाक्कुमी ठेयब डोंगा कली कुरा बाक्त। ब्वाक्कु रागीम शुश बारमाक्त। 18मिनु रेउ यिना यिन, ब्वाक्कु बारना बारन लमेनु, मेको डोंगा ब्वाक्कु तारी गाक्चा गोवा बाक्त। 19रागी नेल्लेम ब्वाक्कु शुश दुम्शा, ठेयब डांडा यो सुमा बाक्त। 20डांडा क्येङा यो १५ कुबीत सम्म ग्येत्थ सुमा बाक्त। कुबीत का ०.५ मिटर खोदेंशो बाक्ब।
21मिनु रागीम मार मार ब्रोंइशो बाक्मा, बी ब्यफ, क्यारश भेडा, ब्वाकी ङा जन्तु, रागीम फोंइब, खपीम ग्रेशा गाक्ब आइक्च जन्तु नु मुर नेल्ल बेक्मा बाक्त। २पत्रुस ३:५-६ 22रागीम ब्रोंइशा बाक्ब नेल्ल बेक्मा बाक्त। 23मोपा मेकोमी रागीम ब्रोंइशा बाक्ब मार मार बाक्मा, मुर, जन्तु खपीम ग्रेशा गाक्ब आइक्च जन्तु नु सरीङम बेरब चिक्ब नेल्ल क्याम्दा बाक्त। नोआह नु आ खिं ङा मुर ला प्रोंइमी बाक्त। 24मिनु मेको ब्वाक्कु सहे का ५० नाक्त सम्म रागीम बारना बारन बाक्माक्त।
S'ha seleccionat:
उत्पत्ती 7: susz
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.